ལྷོ་ཕྱོཊ་ཀྱི་མེ་ལྕེ་སྐོར་སྐྱོད།

བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་རུ་ཁག་ཅིག་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཁག་ནང་སྐྱོད་བཞིན་ཡོད་འདུག

བོད་མི་མང་སྤྱི་འཐུས་ཀརྨ་ཡེ་ཤེས་ལགས་ཀྱིས་སྣེ་འཁྲིད་པའི་བདེན་པའི་མེ་ལྕེ་སྐོར་སྐྱོད་ལས་འགུལ་དེ་ཕྱི་ཚེས་ ༦ ཉིན་རྒྱ་གར་ལྷོ་ཕྱོགས་ཀོ་ཅི་ (Kochi)ནས་ཐོན་ཏེ། ཕྱི་ཚེས་ ༧ ཉིན་གྱི་ཞོགས་པར་ཏ་མེན་ན་ཌའུ་(Tamil Nadu)མངའ་སྡེའི་གྲོང་ཁྱེར་ཁཱེམ་བྷ་ཊོརེ་(Coimbatore)ཞེས་པར་འབྱོར་ཡོད་པ་དང་། ཁུལ་དེའི་གསར་བརྒྱུད་ལམ་ཁག་ལ་སྤྱི་འཐུས་ཀརྨ་ཡེ་ཤེས་ལགས་ཀྱིས་དབྱིན་སྐད་དང་། ས་ཁུལ་དེར་ཚོང་ལས་གཉེར་མཁན་བུད་མེད་ཞིག་ནས་ཡུལ་སྐད་ཐོག་ལས་འགུལ་སྐོར་ངོ་སྤྲོད་གནང་ཡོད་པ་དང་། གྲོང་ཁྱེར་རྫོང་དཔོན་ལས་ཁུངས་མདུན་དུ་བདེན་ཚིག་སྨོན་ལམ་དང་རྒྱལ་བའི་ཞབས་བརྟན། བོད་རྒྱལ་ཁབ་ཆེན་པོའི་རྒྱལ་གླུ་བཅས་བཏང་ཡོད་འདུག་ལ། ས་གནས་དེ་གི་བོད་མི་དང་བོད་དོན་རྒྱབ་སྐྱོར་བ་ཚོས་ས་རྟགས་བསྡུ་རུབ་གནང་ཡོད་འདུག

ཕྱི་ཚེས་ ༩ ཉིན་སྤོན་ཌི་ཅི་རི་(Pondicherry)མངའ་སྡེའི་རྒྱལ་སར་འབྱོར་བ་དང་། ཕྱི་ཚེས་ ༡༠ ཉིན་གྱི་སྔ་དྲོའི་ཆུ་ཚོད་ ༡༡།༣༠ ཐོག་གྲོང་ཁྱེར་དེའི་གསར་འགོད་མཐུན་ཚོགས་ཀྱི་ཚོགས་ཁང་ནང་གསར་འགོད་ལྷན་ཚོགས་ཤིག་བསྐྱངས་ཏེ། བདེན་པའི་མེ་ལྕེ་སྐོར་སྐྱོད་སྐོར་ངོ་སྤྲོད་དང་ཡིག་ཆ་ཁག་འགྲེམས་སྤེལ་བྱས་ཡོད་འདུག་ལ། དེའི་རྗེས་ས་ཁུལ་དེའི་བོད་མི་ཚོར་སྤྱི་འཐུས་ཀརྨ་ཡེ་ཤེས་ལགས་ནས་བོད་ཀྱི་ད་ལྟའི་གནས་སྟངས་ངོ་སྤྲོད་དང་། དེའི་རྗེས་ས་རྟགས་བསྡུ་རུབ་སོགས་གནང་ཡོད་འདུག

དེ་རིང་ཞོགས་པའི་ཆུ་ཚོད་ ༧།༣༠ ཐོག་འདི་ག་ཅེ་ནའེ་ཁུལ་གྱི་(Lady Andal School)ཞེས་པའི་སློབ་གྲྭའི་ཞོགས་ཚོགས་ཐོག་བོད་དོན་འགྲེལ་བཤད་ཀྱི་གོ་སྐབས་བྱུང་ཡོད་པ་མ་ཟད། སློབ་ཕྲུག་ཚོའི་དྲི་བར་ལན་འདེབས་དང་འབྲེལ་ས་རྟགས་བསྡུ་རུབ་གནང་ཡོད་འདུག དེའི་རྗེས་ཁུལ་དེའི་ཡེ་ཤུ་མཐོ་སློབ་(All India Catholic University Federation (AICUF) ཞེས་པའི་དབུ་འཛིན་སྐུ་ཞབས་(Rev. Fr. M. G. Selvin Raj S.J)མཆོག་མཇལ་འཕྲད་ཞུས་ཏེ། བདེན་པའི་མེ་ལྕེའི་ལས་འགུལ་ངོ་སྤྲོད་མཚན་རྟགས་ཞུས་ཡོད་འདུག