ཁ་སང་ཕྱི་དྲོ་ངྷ་ས་མེག་གྷན་འཇིཊ་མེད་ཟ་ཁང་དུ། རྩོམ་པ་པོ་བུ་ཆུང་བསོད་ནམས་ལཊ་ཀྱིས་དབྱིན་ཡིག་ཐོག་གསར་དུ་བརྩམས་པའི་༼གཡག་རྭ་༽དེབ་ཕྲེང་ ༤ པ་དབུ་འབྱེད་གནང་སོང་།
ཁ་སང་ཕྱི་ཚེས་ ༡༥ ཉིན་གྱི་ཕྱི་དྲོའི་ཆུ་ཚོད་ ༤།༣༠ སྟེང་ངྷ་ས་མེག་གྷན་འཇིགས་མེད་ཟ་ཁང་དུ། བོད་རིགས་གཞོན་སྐྱེས་རྩོམ་པ་པོ་བུ་ཆུང་བསོད་ནམས་ལགས་ཀྱིས། ཉེ་ལམ་གསར་དུ་བརྩམས་པའི་དབྱིན་ཡིག་དེབ་ཕྲེང་བཞི་པ་གཡག་རྭ་ (yak horns) ཞེས་པ་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོར་ཨ་རིར་གནས་སྡོད་རྩོམ་པ་པོ་ལྡོམ་པ་ཚེ་རིང་དབང་མོ་དང་། རྩོམ་པ་པོ་བསྟན་འཛིན་བདེ་སྐྱིད། རྩོམ་པ་པོ་བསྟན་འཛིན་བརྩོན་འགྲུས། རྩོམ་པ་པོ་བདེ་ཆེན་སྤེན་པ་གཙོས་བཞུགས་སྒར་ཁུལ་གྱི་ཤེས་ཡོན་ཅན་དང་། ཕྱི་རྒྱལ་དང་རྒྱ་གར་བ་སོགས་ཁྱོན་མི་ ༥༠ ཙམ་འདུ་འཛོམས་བྱུང་འདུག
བུ་ཆུང་བསོད་ནམས་ལགས་ཀྱི་དེབ་དེའི་བརྗོད་བྱ་གཙོ་བོ་བོད་ནང་གི་རྩོམ་པ་པོ་ཚོས་བྲིས་པའི་རྩོམ་ཡིག་ཁག་ཅིག་ལ་ཕྲན་དཔྱད་དང་། དེང་རབས་བོད་ཀྱི་གཞས་དང་རོལ་དབྱངས།༸གོང་ས་མཆོག་བགྲེས་ཡོལ། བོད་ཀྱི་ཆབ་སྲིད་འཕོ་འགྱུར་བཅས་ཀྱི་སྐོར་ཡིན་ཞིང་། དེབ་འདི་ནི་རྩོམ་པ་པོ་བུ་ཆུང་བསོད་ནམས་ལགས་ཀྱིས་དབྱིན་ཡིག་ནང་བརྩམས་པའི་དེབ་ཕྲེང་བཞི་པ་དེ་ཆགས་ཡོད་འདུག
བུ་ཆུང་བསོད་ནམས་ལཊ་ཀྱིས་གཡག་རྭ་དཔེ་དེབ་གསར་རྩོམ་གནང་དགོས་དོན་ནི། དེང་སྐབས་ཕར་ཕྱོགས་སུ་རྒྱ་གཞུང་གིས་མངོན་ལྐོག་གཉིས་ཐོག་བོད་ཀྱི་དངོས་ཡོད་གནས་སྟངས་ལ་འཁྱོག་བཤད་དང་རྫུན་བཟོ་བྱེད་པ་དང་། ཚུར་ཕྱོགས་སུ་ཕྱི་རྒྱལ་བ་ཚོས་སོ་སོའི་ལྟ་ཚུལ་རེ་བཟུང་སྟེ་བོད་ཀྱི་གནས་སྟངས་ལ་ཞིབ་འཇུག་བྱེད་ཀྱི་ཡོད་སྟབས། གནས་སྟངས་དེ་གཉིས་བར་ནས་བོད་ཀྱི་དངོས་ཡོད་ལོ་རྒྱུས་དང་གནས་སྟངས་ངོ་མ་བརླག་ཉེན་ཡོད་པ་མཐོང་སྟེ། བོིད་ཀྱི་གནས་ཚུལ་ངོ་མ་དེ་དབྱིན་ཡིག་ནང་འབྲི་རྒྱུར་གལ་ཆེན་དུ་བརྩི་བཞིན་ཡོད་སྐོར་དང་། དེ་བཞིན། ༢༠༠༨ ལོའི་ཞི་རྒོལ་རྗེས་བོད་ནང་གི་རྩོམ་པ་པོ་ཚོས་བྲིས་པའི་རྩོམ་ཡིག་རྣམས་ཕྱི་རྒྱལ་གནས་སྡོད་བོད་རིགས་གཞོན་སྐྱེས་ཚོས་ཤེས་རྟོགས་ཐུབ་རྒྱུར་དམིགས་ཏེ་དབྱིན་ཡིག་ནང་བྲིས་པ་ཡིན་ཚུལ་ངོ་སྤྲོད་གནང་སོང་།
མཇུག་ཏུ་དབྱིན་ཡིག་ཐོག་རྩོམ་འབྲི་གནང་བཞིན་པའི་བོད་རིགས་རྩོམ་པ་པོ་རྣམ་པས་ཚོགས་ཐོག་ཏུ་སོ་སོས་བྲིས་པའི་སྙན་ངག་གྱེར་འདོན་གནང་པ་མ་ཟད། དབྱིན་ཡིག་ནང་བོད་ཀྱི་གནས་སྟངས་མཚོན་པའི་སྙན་ངག་ཇི་ལྟར་འབྲི་དགོས་མིན་སྐོར་གྱི་བསམ་ཚུལ་བརྗེ་རེས་གནང་སོང་།
གསར་འགོད་པ། དཔལ་ལྡན།
༄༅། །རྩོམ་པ་པོ་བུ་ཆུང་བསོད་ནམས་ལགས་ཀྱིས་དབུས་རྩོམ་པ་པོ་བསྟན་འཛིན་བདེ་སྐྱིད། ལྡོམ་པ་ཚེ་རིང་དབང་མོ། བསྟན་འཛིན་བརྩོན་གྲུས་ལགས་དང་རྩོམ་པ་པོ་བདེ་ཆེན་སྤེན་པ་བཅས་རྣམ་པ་ལྷན་རྒྱས་ཚང་མ་ལ་གུས་པ་ངག་དབང་ནོར་བུས་བྱང་ཨ་རི་ས་གནས་བྷོས་ཊོན་བོད་རིགས་མི་མང་ཡོངས་ཀྱི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ། །
དཔེ་དེབ་འདི་ལྟ་བུ་པར་བསྐྲུན་བྱེད་པ་ལ་སེམས་གཏིང་ནས་དགའ་བསུ་ཞུ། མུ་མཐུད་ནས་སྤེལ་རོགས། མ་གཏོགས་དེང་སང་བཙན་བྱོལ་ནང་གི་བོད་ཡིག་རྩོམ་དེབ་མང་ཆེ་བའི་བརྗོད་བྱ་ནི་ཕྱོགས་དང་ཆགས་་སྲེད་རྐྱང་པ་རེད་འདུག །
བོད་མི་རིགས་ཀྱི་མགྲིན་ཚབ་པ་ངོ་མ་ཞིག་ཏུ་འགྱུར་བའི་རེ་སྨོན་དང་།
བོད་མི་རིགས་ཀྱི་བདེ་སྡུག་རྣམས་བོད་མི་རང་ཉིད་ཀྱིས་དབྱིན་ཡིག་ནང་ལྷད་མེད་འགོད་དགོས་པ་ནི། རྩོམ་པ་པོ་ཁྱེད་ལྟ་བུ་རྣམས་ཀྱི་ལྡོག་མེད་ཀྱི་འོས་འགན་ཞིག་རེད། དེ་དོན་ཡིད་འཇགས་ཡོད་པ་ཞུ།།
ཕོ་ཁྱོ་ག། བྲིས་ན་དེ་འདྲ་འབྲི་དགོས།
དགའ་བསུ་ཞུ།