དེ་རིང་བྱང་ཀོ་རེ་ཡའི་གཞུང་འབྲེལ་བརྙན་འཕྲིན་གྱིས། བྱང་ཀོ་རེ་ཡའི་དམག་དོན་སྤྱི་ཁྱབ་པ་རཱེ་ཡོང་ཧོ་གློ་བུར་དུ་ནད་ཚའི་དབང་གིས་དགོངས་ཞུ་བྱས་ཡོད་ཚུལ་བསྒྲགས་འདུག
ད་ནངས་བྱང་ཀོ་རེ་ཡའི་དབུས་བརྙན་འཕྲིན་ཁང་(KCNA) གིས་གནས་ཚུལ་སྤེལ་པའི་ནང་། ཁ་སང་གཟའ་ཉི་མའི་ཉིན་བྱང་ཀོ་རེ་ཡའི་གཞུང་འཛིན་ཚོགས་པའི་དབུས་དམག་དོན་ལྷན་ཁང་གི་ཚོགས་ཆེན་སྟེང་། དམག་དོན་སྤྱི་ཁྱབ་པ་རཱེ་ཡོང་ཧོ་ (Ri Yong Ho) ནད་ཚའི་དབང་གིས་དགོངས་ཞུ་བྱ་རྒྱུའི་ཐག་གཅོད་བྱུང་ཡོད་སྐོར་བརྗོད་ཡོད་ཀྱང་། ནད་ཚ་ག་རེ་ཡིན་མིན་སྐོར་ལ་ཞིབ་ཕྲའི་གནས་ཚུལ་གང་ཡང་བརྗོད་མི་འདུག རཱེ་ཡོང་ཧོ་ནི་བྱང་ཀོ་རེ་ཡའི་དམག་དོན་སྤྱི་ཁྱབ་པ་དང་། ད་ལྟའི་ལོ་ན་གཞོན་པའི་སྲིད་འཛིན་ཀེམ་ཇོང་ཨེན་(Kim Jong Un) གྱི་རྒྱབ་རྟེན་གལ་ཆེ་ཤོས་ཤིག་ཡིན་འདུག
རཱེ་ཡོང་ཧོ་དགོངས་ཞུ་བྱས་པའི་གནད་དོན་ཐད་བྱང་ཀོ་རེ་ཡའི་དཔྱད་བརྗོད་པ་ཞིག་གིས། དེ་ནི་བྱང་ཀོ་རེ་ཡའི་དམག་དོན་དཔོན་རིགས་དང་མཐོ་རིམ་མི་དྲག་བར་གྱི་འཐབ་རྩོད་རྣམ་པ་ཞིག་མཚོན་ཡོད་པར་བརྗོད་ཡོད་ལ། གནད་དོན་དེའི་ཐད་ལྷོ་ཀོ་རེ་ཡའི་ཀོ་ཀི་མེན་གཙུག་ལག་སློབ་ཆེན་(Kookmin University) གྱི་དགེ་རྒན་ཆེན་མོ་ལཱན་ཀོཝ་(Andrei Lankov) ཡིས་ཀྱང་། ད་ལྟའི་བྱང་ཀོ་རེ་ཡའི་ལོ་ན་གཞོན་པའི་སྲིད་འཛིན་ཀེམ་ཇོང་ཨེན་གྱི་ཨ་ཞང་ཇང་སོང་ཊའེ་ཀི་(Jang Song Taek) དང་། ཁོའི་ཤོག་གཏོགས་པས་དབང་ཤུགས་ཆེན་པོ་བཟུང་ཡོད་པ་མ་ཟད། འདི་ལོའི་ཕྱི་ཟླ་གསུམ་པ་ནས་བཟུང་ཁོ་རང་ཉིད་དང་ཁོང་གི་ཤོག་གཏོགས་ལ་ཉེན་ཁ་ཡོད་པའི་མཐོ་རིམ་མི་སྣ་རྣམས་ཕྱིར་འབུད་གཏོང་པའི་ནང་ཁུལ་དབང་ཆའི་འཐབ་རྩོད་མངོན་གསལ་ཅན་དུ་འགྱུར་བཞིན་ཡོད་པ་དང་། ཐེངས་འདིར་དམག་དོན་སྤྱི་ཁྱབ་པ་རཱེ་ཡོང་ཧོ་ཕྱིར་བུད་པ་དེ་ཕྱི་ཚུལ་ནས་ང་ཤི་ཁྱོ་གསོན་གྱི་འཁྲུག་རྩོད་མངོན་མེད་ཀྱང་། ནང་ཁུལ་དུ་རྣོ་ངར་ཆེ་བའི་འཐབ་རྩོད་ཅིག་ཡོང་གི་ཡོད་པ་ཟུར་བལྟས་ལེབ་མཐོང་ཡིན་པ་བརྗོད་འདུག
བྱང་ཀོ་རེ་ཡ་ནི་ཀེམ་ཁྱིམ་བརྒྱུད་ཀྱིས་སྲིད་དབང་སྒེར་འཛིན་བྱེད་པའི་དམར་ཤོག་སྲིད་གཞུང་ཞིག་ཡིན་པ་དང་། ལོ་སྔོན་མའི་ནང་ཀེམ་ཇོང་(Kim Jong II) གློ་བུར་དུ་འདས་གྲོངས་སུ་གྱུར་རྗེས། ལོ་ན་གཞོན་པའི་ཁོང་གི་བུ་ཀེམ་ཇོང་ཨེན་ཕ་ཤུལ་བུ་འཛིན་དུ་བྱང་ཀོ་རེ་ཡའི་སྲིད་འཛིན་ལ་བསྐོ་བཞག་བྱས་ཡོད།
