རྒྱ་གཞུང་གིས་ཟླ་འདིའི་ཕྱི་ཚེས་ ༢༥ ནས་ཕྱི་ཟླ་ ༨ པའི་ཟླ་དཀྱིལ་བར་པའེ་ཏའེ་ཧི་ཚོགས་འདུ་ཚོགས་གཏན་ཁེལ་ཡོད་པ་དང་། ཚོགས་འདུའི་སྟེང་མ་འོངས་པའི་རྒྱ་གཞུང་དཔོན་རིགས་འདེམས་སྒྲིག་དང་། དམར་ཤོག་སྒྲིག་ཡིག་བཅོས་སྒྲིག་སྐོར་གཏན་འབེབས་བྱ་འཆར་ཡོད་འདུག
པེ་ཅིན་གྱི་འབྲེལ་ཡོད་མི་སྣས་མཱེན་ཅིན་ཟླ་དེབ་ཀྱི་གསར་འགོད་པར་བརྗོད་པ་ལྟར་ན། ཉེ་སྔོན་རྒྱ་གཞུང་གི་སྲིད་འཛིན་ཟུར་པ་ཅང་ཙེ་མཱེན་པེ་ཅིན་ཆོན་ཧྲན་དུ་ཧུའུ་ཅིན་ཐའོ་ཕུད་པའི་རྒྱ་གཞུང་གི་ད་ལྟའི་ཆབ་སྲིད་ལྷན་ཁང་གི་རྒྱུན་ལས་དཔོན་རིགས་ཚང་མར་ཐུག་འཕྲད་བྱས་ཡོད་པ་མ་ཟད། ཅཱང་གིས་གླེང་མོལ་སྐབས་དྲུག་བཞིའི་གནད་དོན་མུ་མཐུད་མནར་འགྱངས་བྱ་ཐབས་མེད་པར་ཐག་གཅོད་དགོས་པ་དང་། དྲུག་བཞིའི་གནད་དོན་དཀར་འདོན་གྱི་ཇུས་གཞི་ཞིག་བཏོན་ཏེ། འཆར་གཞི་ལྡན་པ་དང་རིམ་པ་ཡོད་པའི་ཐོག་ལག་བསྟར་བྱ་དགོས་སྐོར་བརྗོད་ཡོད་འདུག མ་གཞི་ཅཱང་ནི་དྲུག་བཞི་དམར་གསོད་ཀྱི་ལག་དམར་གཙོ་བོ་དེ་ཆགས་ཡོད་སྟབས། ཅཱང་གིས་བཏོན་པའི་བསམ་ཚུལ་དེས་པའེ་ཏའེ་ཧི་ཚོགས་འདུ་དང་ཏང་གི་ཚོགས་ཆེན་བཅོ་བརྒྱད་པའི་ཚོགས་ཆེན་སྐོར་ལ་ཤུགས་རྐྱེན་གང་འདྲ་ཞིག་འབྱུང་མིན་ཐད། ཆབ་སྲིད་དབྱེ་ཞིབ་པ་མང་པོ་ཞིག་ལ་དོགས་སློང་གསར་བ་ཞིག་བསྐྲུན་ཡོད་པ་རེད།
མཱེན་ཅིན་ཟླ་དེབ་སྟེང་སྤེལ་བའི་གནས་ཚུལ་ནང་། མི་ཚང་མས་དོ་སྣང་ཤུགས་ཆེན་བྱེད་བཞིན་པའི་རྒྱ་གཞུང་མཐོ་རིམ་མི་སྣ་འདེམས་སྒྲིག་ཐད། ད་ལྟའི་ཆར་གནད་དོན་ཆེ་ཤོས་ནི་རྒྱ་གཞུང་ཆབ་སྲིད་ལྷན་ཁང་གི་རྒྱུན་ལས་མི་ ༩ དེ། མ་འོངས་པར་མི་ ༧ ལ་ཉུང་འཕྲི་བྱ་ཐུབ་མིན་དང་། སྐབས་བཅོ་བརྒྱད་པའི་ཚོགས་ཆེན་དེ་ཕྱི་ཟླ་ ༡༠ ཟླ་དཀྱིལ་ནས་ཕྱི་ཟླ་ ༡༡ ཟླ་མགོ་བར་ཚོགས་གཏན་ཁེལ་ཐུབ་མིན་བཅས་ཡིན་སྟབས། ད་ལྟ་འཚོགས་འཆར་གྱི་པའེ་ཏའེ་ཧི་ཚོགས་འདུའི་སྟེང་ཆབ་སྲིད་ལྷན་ཁང་གི་རྒྱུན་ལས་མི་སྣ་འདེམས་སྒྲིག་ཐད་གཞི་རྩའི་གོ་སྒྲིག་ཡོང་ངེས་པའི་སྐོར་བརྗོད་འདུག
ཉེ་སྔོན་ཧོང་ཀོང་ནན་ཧྭ་ཞོགས་པའི་གསར་ཤོག་གིས་རྒྱ་གཞུང་མཐོ་རིམ་དཔོན་རིགས་ནང་ཁུལ་དུ། མ་འོངས་པའི་རྒྱ་གཞུང་གི་མཐོ་རིམ་དཔོན་རིགས་མིང་འདོན་གྱི་འོས་འདེམས་བྱས་ཡོད་པའི་གནས་ཚུལ་ཞིག་སྤེལ་པའི་ནང་། སྐབས་བཅོ་བརྒྱད་པའི་ཆབ་སྲིད་ལྷན་ཁང་གི་རྒྱུན་ལས་མི་གྲངས་ ༧ ལ་ཉུང་འཕྲི་བྱ་རྒྱུ་ཡིན་པ་དང་། ཞི་ཅིན་ཕེན་དང་ལི་ཁི་ཆང་གཉིས་ཕུད་པའི། རྒྱུན་ལས་ཁྲོད་རེ་བ་ཡོད་མཁན་རྣམས་ནི་ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་ཡུས་ཀྲིན་ཧྲིན་དང་། སྲིད་བློན་གཞོན་པ་དང་ཁྲུང་ཆིན་གྲོང་ཁྱེར་དམར་ཤོག་དྲུང་ཆེ་ཀྲང་ཏིག་ཅང་། སྲིད་བློན་གཞོན་པ་ཝང་ཀྲི་ཧྲན། རྩ་འཛུགས་སྡེ་ཁག་གི་མགོ་གཙོ་ལིས་ཡོན་ཁྲའོ། རྒྱ་གཞུང་དབུས་དྲིལ་བསྒྲགས་སྡེ་ཁག་གི་མགོ་གཙོ་ལིག་ཡོན་ཧྲན་བཅས་ཡིན་པའི་ཚོད་བགམ་བྱས་ཡོད།
ཡིན་ནའང་། ཉེ་ཆར་པའོ་ཞོན་རྒྱ་ཡིག་དྲ་བས་རྒྱ་གཞུང་ཆབ་སྲིད་ལྷན་ཁང་གི་རྒྱུན་ལས་མི་ ༩ གྲངས་འབོར་དེ་སྐབས་བཅོ་བརྒྱད་པར་མུ་མཐུད་རྒྱུན་གནས་བྱ་རྒྱུ་ཡིན་སྐོར་བརྗོད་འདུག་ལ། དེ་བཞིན། མཱེན་ཅིན་ཟླ་དེབ་ཀྱིས་རྒྱ་གཞུང་འབྲེལ་ཡོད་མི་སྣས་བརྗོད་པའི་གནས་ཚུལ་བཀོད་པའི་ནང་། རྒྱ་གཞུང་དཔོན་རིགས་ནང་ཁུལ་གྱི་གསང་བའི་འོས་འདེམས་དེ་ཕྱི་ཟླ་ ༦ ཚེས་ ༢༥ ཉིན་བྱ་གཏན་ཁེལ་ཡོད་ཀྱང་། རྒྱ་གཞུང་དབུས་ཡིག་ཚང་གི་དྲུང་ཆེ་ཅིན་ཅིས་ཧྭ་དང་ཁྲིམས་སྲིད་ལྷན་ཁང་གི་དྲུང་ཆེ་ཀྲུག་ཡུང་ཁཱང་གི་ལྐོག་ཇུས་ལ་བརྟེན་ནས། ཕྱི་ཟླ་ ༥ ཚེས་ ༧ ལ་སྔ་སྣུར་གྱིས་ཚོགས་དགོས་བྱུང་བ་དང་། དེ་ནི་ཅིན་ཅིས་ཧྭ་རྒྱུན་ལས་ཁྲོད་འཛུལ་ཐུབ་ཆེད་དང་། ཕྱི་ཟླ་ ༣ ཚེས་ ༡༨ ཉིན་པེ་ཅིན་དུ་ཅིན་ཅིས་ཧྭ་ཡི་བུ་རླངས་འཁོར་དོན་རྐྱེན་འོག་རྐྱེན་འདས་སུ་བཏང་བ་སོགས་ཀྱི་འཇིགས་སྣང་གནོན་ཤུགས་ཀྱི་རྐྱེན་གྱིས་ཡིན་སྐོར་བརྗོད་འདུག
རྒྱ་གཞུང་དཔོན་རིགས་རིམ་པས་དབང་འཛིན་སྐབས། རང་ཉིད་ཀྱི་ལངས་ཕྱོགས་རྣམས་རྒྱ་གཞུང་དམར་ཤོག་ཚོགས་པའི་སྒྲིག་ཡིག་ནང་བཅུག་སྟེ། སྐབས་སོ་སོའི་རྒྱ་གཞུང་དམར་ཤོག་པའི་ཆབ་སྲིད་ཁ་ཕྱོགས་བཅོས་སྒྲིག་བྱས་ཡོད་ལ། དེའང་ ༡༩༩༧ ལོར་རྒྱ་གཞུང་སྐབས་བཅོ་ལྔ་པའི་དམར་ཤོག་རྩ་འཛིན་ནང་ཏིན་ཞའོ་ཕིན་གྱི་རིག་པའི་གཞུང་ལུགས་ནི་བསམ་བློའི་མཛུབ་སྟོན་དུ་བཟུང་ཞིང་། ༢༠༠༢ ལོར་སྐབས་བཅུ་དྲུག་པའི་དམར་ཤོག་རྩ་འཛིན་ནང་མཚོན་བྱེད་གསུམ་དང་། ༢༠༠༧ ལོར་སྐབས་བཅུ་བདུན་པའི་དམར་ཤོག་རྩ་འཛིན་ནང་ཚན་རིག་གི་འཕེལ་རྒྱས་ལྟ་བ་གཙོར་འདོན་བཅས་བྱས་ཡོད་པ་ལྟར། མ་འོངས་པའི་སྐབས་བཅོ་བརྒྱད་པའི་རྗེས་ཞིས་ཅིན་ཕེན་གྱིས་དམར་ཤོག་རྩ་འཛིན་ནང་ལངས་ཕྱོགས་གང་འདྲ་ཞིག་གཙོར་འདོན་བྱ་མིན་ནི་ཆབ་སྲིད་དབྱེ་ཞིབ་དག་གིས་དོ་སྣང་བྱ་ཡུལ་ཞིག་ཆགས་ཡོད་འདུག
རྒྱ་གཞུང་གི་ཚོགས་ཆེན་བཅུ་དྲུག་པའི་གཏན་འབེབས་ལྟར། རང་ལོ་ ༦༨ ལོན་མཁན་ཆ་ཚང་ཆབ་སྲིད་ལྷན་ཁང་གི་རྒྱུན་ལས་ནས་རང་བཞིན་གྱིས་རྒན་ཡོལ་བྱེད་དགོས་སྟབས། རྒྱ་གཞུང་དབུས་ཆབ་སྲིད་ལྷན་ཁང་གི་ད་ཡོད་རྒྱུན་ལས་མི་ ༩ ཁྲོད་ནས་མི་ ༧ རྒན་ཡོལ་དུ་འགྲོ་དགོས་པ་མ་ཟད། རྒྱ་གཞུང་དབུས་ཆབ་སྲིད་ལྷན་ཁང་གི་འཐུས་མི་ ༢༥ ཁྲོད་ནས་ཀྱང་མང་ཤོས་རྒན་ཡོལ་དུ་འགྲོ་དགོས་པར་བརྟེན། སྐབས་བཅོ་བརྒྱད་པའི་ཚོགས་ཆེན་དེ་ནི་རྒྱ་གཞུང་གི་དཔོན་རིགས་གསར་རྙིང་བརྗེ་སྤོར་རིམ་པའི་ཁྲོད་མི་འབོར་ཆེས་མང་ཤོས་དང་། རྒྱ་གཞུང་དཔོན་རིགས་ནང་ཁུལ་ཤོག་ཁག་བར་མི་སྣ་འདེམས་སྒྲིག་ཐད་ཕན་ཚུན་འཐབ་རྩོད་ཀྱི་རྣོ་ངར་ཧ་ཅང་ཆེ་བའི་སྐབས་ཤིག་ཆགས་ཡོད་པར་མ་ཟད། རྒྱ་ནག་ནང་དབུལ་ཕྱུག་གི་ཧེ་བག་དང་། དཔོན་རིགས་རུལ་སུངས། དམངས་དང་དམར་གཞུང་བར་འགལ་ཟླ་ཆེས་ཆེ་བའི་དུས་མཚམས་ཤིག་ལའང་སླེབས་ཡོད་པ་རེད།
གསར་འགོད་པ། ཚེ་རིང་རྒྱལ།
རིམ་པས་འགྱུར་བ་ཞིག་འགྲོ་རྒྱུ་ཡིན་ཚོད་འདྲ་ཡང་། ང་ཚོར་ཕན་པའི་འགྱུར་བ་ཞིག་འགྲོ་མི་འགྲོ་ཚོད་དཔག་བྱ་སའི་གཞི་ཡང་མི་འདུག་གཱ
འདབ་པ་ལགས། ངས་འདིར་རྒྱ་ནག་ནང་གནས་ཚུལ་ག་རེ་བྱུང་བཞིན་ཡོད་མེད་འགོད་ཀྱིན་པ་ལས། ཁྱེད་ཅག་མཁས་དབང་རྣམ་པ་ནང་བཞིན་མིག་བཙུམ་ནས་སྣང་ལ་གང་ཤར་གྱི་དཔྱད་བརྗོད་སྤེལ་གྱིན་མེད། མ་གཞི་རྒྱ་ནག་གི་གནས་སྟངས་ཙམ་ཡང་མ་ཤེས་པར་ཁ་གཏད་དུ་ཇི་ལྟར་ལངས་ཨང་། ལྷག་པ་མཐོང་མཁན་ཀུན་ཀྱིས་རྒྱ་ནག་སྐོར་གྱི་དཔྱད་རྩོམ་དང་གནས་ཚུལ་ཀུན་ལས་ལྷག་པ་གང་མང་སྤེལ་རྒྱུར་སྙིང་ནས་རེ་བཞིན་ཡོད་དོ།
རྒྱ་ནག་གི་དཔོན་རིགས་འཕོ་འགྱུར་འགྲོ་ན་ཕན་ཐོགས་ཅི་ཡོད། དེ་སྔོན་མའོ་ཙེ་ཏུང་གྲོངས་པ་ནས་བཟུང་ད་ལྟ་བར་འཕོ་འགྱུར་སོང་བ་རེད། བོད་ལ་ཕན་ཐོགས་ཅི་བྱུང་སོང་།
དེ་ལས་རེ་བ་མེད་ས་རེ་བ་བརྒྱབ་སྟེ་མ་བསྡད། རང་ཉིད་རང་ཉིད་ལ་མགོ་སྐོར་བཏང་ན་གཞན་གྱིས་གསལ་བཤད་བྱེད་མཁན་འོང་གིན་མ་རེད། དེ་ལས་རྣམ་དཔྱོད་དང་ལྡན་པའི་སྒོ་ནས་སྐད་ཆ་ཤོད་དང་། གྲུབ་འབྲས་ཡོད་པའི་སྐད་ཆ་ཡོད་ན་ཤོད། བསམ་བློ་དང་འཆར་གཞི་ལྡན་པའི་སྐད་ཆ་འདྲ་ཡོད་ན་ཤོད། དེ་ལས་ཡར་འགྱུར་ལྡོག་འགྲོ་གིན་འདུག མར་འགྱུར་ལྡོག་འགྲོ་གིན་འདུག་ཅེས་བཤད་དེ་ཅི་ཕན། དེ་ནི་ཀུན་གྱིས་ཁྱེད་ལྷག་པ་མཐོང་བཞིན་པ་རེད།
རྒྱ་ནག་དམར་གཞུང་གི་ཆབ་སྲིད་ཀྱི་མི་སྣ་གཙོ་བོ་རྣམས་རིམ་བཞིན་རྒན་ཡོལ་དུ་འགྲོ་དགོས་པ་འདི་ཡག་རྟགས་ཞིག་རེད་ཟེར་ན་ཆོག་གང་ལྟར་དམར་ཕྱོགས་གཞུང་མགོ་གཙོ་སུ་ཞིག་ཡིན་རུང་རྩ་བའི་དམར་གཞུང་གི་འགྲིག་གཞུ་ལྟར་འགྲོ་དགོས་ན་ཡང་རྒན་གཞོན་གཉིས་ཀྱི་བསམ་བློའི་ཁྱར་པར་གྱི་རང་བཞིན་ལ་ལྟས་ན་ལེགས་པའི་ཕྱོགས་སུ་འགྲོ་པར་དགེ་མཚན་ཡོད་མཉམ།