བོད་
སྔོན་ཆད་བོད་ནང་གི་ཕ་མ་སྤུན་མཆེད་དང་དགའ་ཉེ་གྲོགས་པོ་ཚོར་འབྲེལ་བ་མཐུད་རྒྱུ་ལོ་བརྒྱའི་ནང་དུ་ལན་གཅིག་ཙམ་ཡིན། སྐབས་དེར་ཕན་ཚུན་སྒེར་གྱི་གནས་ཚུལ་དང་སེམས་གཏམ་བཤད་རེས་ཉན་རེས་ཀྱི་དུས་ཚོད་ཡག་ཤོས་དེ་ཡང་ཆགས་ཡོད། རིམ་གྱིས་བརྡ་འཕྲིན་བརྒྱུད་ལམ་ཇེ་བདེར་སོང་བ་དང་བསྟུན་ཏེ་བོད་ནང་ལ་འབྲེལ་གཏུག་ཀྱང་ཇེ་མང་དུ་ཕྱིན། བོད་ནང་འབྲེལ་གཏུག་ཇེ་མང་དང་མཉམ་དུ་སྒེར་དོན་ཁ་བརྡ་ཇེ་ཉུང་དང་སྤྱི་དོན་གླེང་མོལ་ཇེ་མང་ནས་ཇེ་ཟབ་ཏུ་ཕྱིན་སོང་། ཕར་ཕྱོགས་ལ་བཤད་རྒྱུ་དང་སྟོན་རྒྱུ་གཉིས་ཀ་འདུག་ལ། ཤོད་བཞིན་པའི་བོད་སྐད་ཀྱང་གཙང་མ་དག་མ་རེད། དེས་ང་ཚོ་ཕྱི་ལོགས་སུ་སྡོད་མཁན་ཚོ་ངོ་ཚ་ཁ་སྐྱེངས་བཟོས་པ་ཐེངས་གཅིག་མིན་ལ། མནར་གཅོད་འགྲམ་ལྕག་བཞུས་པའང་ཉུང་ཉུང་མིན།
ལྷག་པར་དུ་ན་ནིང་དང་ད་ལོར་ཁ་པར་དང་གློག་ཀླད་སོགས་ལས་བོད་ནང་གི་བོད་མི་ཚོར་ཁ་བརྡ་བྱེད་སྐབས། ང་ཚོར་དོགས་མ་བདེ་བ་དང་གསལ་བཤད་ལན་འདེབས་མ་རྙེད་པ། ཡང་ན་ཚིག་གཅིག་གཉིས་ཤིག་གིས་ར་སྤྲོད་གསལ་པོ་མི་ཆགས་པ་སོགས་ཀྱི་གདོང་ཐུག་ཡང་ཡང་རྒྱག་གི་འདུག ཁོང་ཅག་དང་ཁ་བརྡ་མགོ་བཙུགས་མ་ཐག ད་ལྟ་བོད་རྒྱའི་གནད་དོན་ག་འདྲ་ཆགས་ཡོད་པ་རེད། ཕྱི་སྡོད་བོད་མི་ཚོས་ཅི་ཞིག་བྱེད་ཀྱི་ཡོད། བཀའ་བློན་ཁྲི་པ་མཆོག་དང་བཙན་བྱོལ་བོད་གཞུང་གིས་ག་རེ་གནང་གི་འདུག་ཅེས་དྲིས་ཡོང་གི་འདུག འདི་བོད་ཕྱི་ལོགས་སུ་སྡོད་མཁན་ཚོར་མཚོན་ན་བོང་བུ་དར་ཐོག་ཏུ་འདེད་པ་དང་ཀུན་ནས་མཚུངས། མི་མང་ཚོགས་སར་རང་སྐྱོན་ངོས་ལེན་བྱེད་བཅུག་པ་དང་གཉིས་སུ་མེད།
དྲི་བ་འདི་དག་མགོ་མ་འཚོས་པའི་སྐད་ཆ་མ་རེད་ལ། ཧམ་པ་ཆེ་དྲགས་པ་དེ་བས་ཀྱང་མ་རེད། དྲི་བ་འདི་དག་གི་རྒྱབ་ཏུ་ཁོང་ཅག་གིས་བོད་ཕྱི་ལོགས་སུ་འཆང་བའི་རེ་བ་ཞིག་དང་ཡིད་ཆེས་ཤིག་སྦེད་ཡོད། སེམས་ཤུགས་ཤིག་མཛའ་བརྩེ་ཞིག་སྐུང་ཡོད། གཞིས་སྲུང་སྤུན་ཟླའི་ཡིད་ཆེས་དང་སེམས་ཤུགས་འདི་ང་ཚོས་མུ་མཐུད་དུ་ཉར་ཐུབ་དགོས། འདི་ང་ཚོའི་རང་དབང་འཐབ་རྩོད་ཀྱི་སྟོབས་ཤུགས་ཡིན། འོན་ཀྱང་བོད་ཕྱི་ལོགས་ནས་མང་ཚོགས་ཀྱིས་མར་མེ་ཁྲོམ་སྐོར་རེ་དང་མཆོད་འབུལ་སྨོན་ལམ་རེ་བྱེད་པ་དང་། གཞུང་ཕྱོགས་ནས་གསར་འགོད་གསལ་བསྒྲགས་རེ་དང་ཕྱི་མིར་ཐུག་འཕྲད་རེ་བྱས་ཏེ། ཉི་མ་འཕུད་ཐབས་དང་མི་ཚེ་སྐྱེལ་ཐབས་བྱས་བསྡད་ན། རྩ་དོན་འཐབ་རྩོད་མདུན་སྐྱོད་མི་ཐུབ་ལ། གཞིས་སྲུང་སྤུན་ཟླའི་རེ་བ་ཡང་མི་འགྲུབ།
ཕྱི་ཕྱོགས་ན་ང་ཚོས་ནམ་རྒྱུན་འདི་འདྲ་ཞིག་ཤོད་ཀྱི་ཡོད། ང་ཚོ་ཆབ་སྲིད་ཀྱི་སྐྱབས་བཅོལ་བ་ཡིན། རང་དབང་སླར་གསོའི་ཆེད་མིིའི་ལུང་པར་ཡོང་བ་ཡིན། ང་ཚོས་བོད་པའི་སྐད་ཡིག་རིག་གཞུང་ཉམས་གསོ་དང་གོང་སྤེལ་གཏོང་གི་ཡོད་ཟེར། མི་ལོ་ལྔ་བཅུ་འཁོར་པའི་བཙན་བྱོལ་ལོ་རྒྱུས་ལ་ཕྱི་མིག་ཅིག་ལྟོས་དང་། ང་ཚོར་རང་དབང་སླར་གསོའི་ཐོག་གྲུབ་འབྲས་ཅི་ཞིག་སྟོན་རྒྱུ་ཡོད། སྐད་ཡིག་རིག་གཞུང་གོང་སྤེལ་གྱི་མཚོན་དོན་གང་ཞིག་འཇོག་རྒྱུ་ཡོད། ཐ་ན་ཁ་སང་དེ་རིང་གི་རང་ལུས་མེར་བསྲེགས་ལས་འགུལ་ཐད་དུའང་ང་ཚོས་ཅི་ཞིག་སྒྲུབ་བཞིན་ཡོད། བརྡ་འཕྲིན་བརྒྱུད་ལམ་ད་དུང་ཉིན་རེ་བཞིན་སྟབས་ཇེ་བདེར་འགྲོ་ངེས་ཡིན། བོད་ཕྱི་ནང་གི་བར་ཐག་ཇེ་ཉེ་དང་བློ་ཐག་ཇེ་རིང་དུ་འགྲོ་ཉེན་འདུག སྒུག་ནས་སྡོད་དང་། བོད་ནས་མུ་མཐུད་དུ་གཅིག་ལས་གཅིག་ལྷག་གི་ཛ་དྲག་གི་གནས་ཚུལ་འུ་ཅག་གི་ཨམ་ཅོག་ནང་བརྫང་ནས་ཡོང་གི་རེད།
