གཟའ་ཟླ་བའི་ཉིན་ཧྥ་རན་སིའི་གཞུང་ཚབ་མི་སྣས་ཌེ་བའེ་ལིར་སི་བཀག་བསྐྱིལ་ཁང་མ་ཡིན་པའི་མཐུན་རྐྱེན་ལེགས་པའི་ས་ཆ་ཞིག་ཏུ་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༢༣ ཉིན་རྒྱ་ནག་ཏུ་གནས་སྡོད་ཧྥ་རན་སི་གཞུང་ཚབ་མི་སྣས་གསར་ལམ་ཁག་ཏུ་བརྗོད་དོན། བདུན་ཕྲག་སྔོན་མའི་མཇུག་ཙམ་ལ་ཧྥ་རན་སིའི་འབྲེལ་ཡོད་གཞུང་ཚབ་མི་སྣ་ཆེད་དུ། ཉེ་ཆར་ཁམ་བྷོ་ཌི་ཡཱ་ནས་རྒྱ་ནག་ནང་ཁྲིད་ཡོད་པའི་ཧྥ་རན་སིའི་བཟོ་སྐྲུན་པ་ཌེ་བའེ་ལིར་སི་(Patrick Henri Devillers)ལ་ཐུག་འཕྲད་དུ་བསྐྱོད་ཡོད་ལ། ད་ལྟའི་ཆར་ཁོ་རང་བཀག་བསྐྱིལ་ཁང་མ་ཡིན་པའི་མཐུན་རྐྱེན་ལེགས་པའི་ས་ཆ་ཞིག་ཏུ་ཡོད་སྐོར་བརྗོད་འདུག
ཧྥ་རན་སིའི་བཟོ་བསྐྲུན་པ་ཌེ་བའེ་ལིར་སི་ནི་པའོ་ཞིས་ལའེ་དང་པའོ་ཡི་ཆུང་མ་ཀུའུ་ཁའེ་ལའེ་གཉིས་ལ་འབྲེལ་བ་དམ་ཟབ་ཡོད་པ་མ་ཟད། དེ་སྔོན་ཀུའུ་ཁའེ་ལའེ་དང་མཛའ་གྲོགས་ཀྱི་འབྲེལ་བ་ཡོད་འདུག ༢༠༠༥ ལོར་ཁོ་རང་རྒྱ་ནག་དང་ཁ་བྲལ་ཏེ་འདས་པའི་ལོ་ ༦ རིང་ཁམ་བྷོ་ཌི་ཡཱའི་ནང་གདན་སྡོད་བྱས་ཡོད་པ་རེད།
ཟླ་སྔོན་མའི་ནང་རྒྱ་གཞུང་གིས་སྐུལ་འདེད་ལྟར་ཁམ་བྷོ་ཌི་ཡཱ་གཞུང་གིས་ཧྥ་རན་སིའི་བཟོ་སྐྲུན་པ་ཌེ་བའེ་ལིར་སི་འཇུ་བཟུང་གིས་ཟླ་གཅིག་ལྷག་རིང་བཀག་བསྐྱིལ་བྱས་མཐར། ཟླ་འདིའི་ཕྱི་ཚེས་ ༡༧ ཉིན་རྒྱ་ནག་ལ་རྩིས་སྤྲོད་ཀྱིས་ཧྲང་ཧེ་གྲོང་ཁྱེར་དུ་ཁྲིད་ཡོད་པ་མ་ཟད། པའོ་ཚང་གི་རུལ་སུངས་ཉེས་དོན་དང་འབྲེལ་བའི་གནད་དོན་ཁ་ཤས་ཐད་བདེན་དཔང་ཆེད་ཕྱིན་པ་བརྗོད་ཡོད། ཡིན་ནའང་། རྒྱ་ནག་ཏུ་སླེབས་རྗེས་ཌེ་བའེ་ལིར་སི་ལ་ལྟ་རྟོག་བཀག་སྡོམ་བྱས་ཡོད་པ་མ་ཟད། རྒྱ་གཞུང་གིས་ཁོ་གྱོད་དོན་དེའི་ཁྲོད་ཚུད་ཡོད་མེད་ཐད་ཞིབ་བཤེར་བྱ་རྒྱུ་ཡིན་སྐོར་བརྗོད་འདུག
ཟླ་འདིའི་ཕྱི་ཚེས་ ༡༩ ཉིན་ཁམ་བྷོ་ཌི་ཡཱ་ཉེན་རྟོག་སྡེ་ཁག་གིས་གཞུང་འབྲེལ་དྲ་རྒྱའི་སྟེང་། ཧྥ་རན་སིའི་བཟོ་སྐྲུན་པ་ཌེ་བའེ་ལིར་སི་ལ་བཅར་འདྲི་བྱས་པའི་བརྙན་ཐུང་ཞིག་སྤེལ་བའི་ནང་། ཐོབ་ཐང་མི་གསལ་བའི་བཅར་འདྲི་གནང་མཁན་ཞིག་ལ། ཌེ་བའེ་ལིར་སི་ཡིས་ཁོ་རང་མོས་ཐོག་རྒྱ་ནག་ཏུ་བསྐྱོད་འདོད་ཡོད་པ་དང་། ཁམ་བྷོ་ཌི་ཡཱ་གཞུང་གིས་ཁོ་རང་གློད་པར་ཐུགས་རྗེ་ཆེ་ཞུས་འདུག ད་དུང་བརྙན་ཐུང་དེའི་ནང་ཧྥོན་
ཁམ་བྷོ་ཌི་ཡཱ་ཉེན་རྟོག་པས་གསར་ལམ་ཁག་ཏུ་བརྙན་ཐུང་དེ་ཡིས། ཌེ་བའེ་ལིར་སི་ལ་གནོན་ཤུགས་གང་ཡང་སྤྲད་མེད་པར་རང་མོས་ཐོག་རྒྱ་ནག་ཏུ་ཕྱིན་བ་བདེན་དཔང་བྱས་ཡོད་པ་བརྗོད་ཡོད། དེ་བཞིན། ཁམ་བྷོ་ཌི་ཡཱའི་གཞུང་འབྲེལ་དཔོན་རིགས་དང་། ཁམ་བྷོ་ཌི་ཡཱར་གནས་སྡོད་ཧྥ་རན་སིའི་གཞུང་ཚབ་མི་སྣས་ཀྱང་དེ་ནི་ཌེ་བའེ་ལིར་སི་རང་ཉིད་ཀྱི་འདོད་མོས་ལྟར་སྒྲུབ་པ་ཞིག་ཡིན་པ་བརྗོད་ཡོད་པ་རེད།
ཌེ་བའེ་ལིར་སི་ཡིས་པའོ་ཞིས་ལའེ་ཡི་ཆུང་མ་ཀུའུ་ཁའེ་ལའེ་ལ་མ་དངུལ་ཕྱིར་གཏོང་བསྡུ་ཉར་ཐད་རོགས་འདེགས་བྱས་ཡོད་ལ། ཀུའུ་ཁའེ་ལའེ་ཡིས་ཕྱིའི་རྒྱལ་ཁབ་ཁག་ནང་བསྡུ་ཉར་བྱས་ཡོད་པའི་ཁྲིམས་མཐུན་མིན་པའི་ལྐོག་དངུལ་ཨ་སྒོར་དུང་ཕྱུར་ ༦༠ ལ་སླེབས་ཡོད་པ་རེད། པའོ་ཚང་གི་གནད་དོན་དེ་དཔལ་འབྱོར་ཁོ་ན་ཞིག་མ་ཡིན་པར། རྒྱ་གཞུང་དཔོན་རིགས་ནང་ཁུལ་དབང་ཤུགས་འཐབ་རྩོད་ཀྱི་གཞི་རྩ་གལ་ཆེན་ཞིག་ཆགས་ཡོད་སྟབས། རྒྱ་ནག་ཧུའུ་ཝིན་སྲིད་གཞུང་གིས་ཌེ་བའེ་ལིར་སི་ཡིས་པའོ་ཞིས་ལའེ་དང་ཀུའུ་ཁའེ་ལའེ་ཡི་ཕྱིར་གཏོང་ལྐོག་དངུལ་གསལ་འདོན་ཐད་རོགས་འདེགས་ཡོང་བའི་རེ་བ་བྱེད་ཀྱིན་ཡོད་འདུག
གསར་འགོད་པ། ཚེ་རིང་རྒྱལ།
ཨ་སྒོར་དུང་ཕྱུར ༦༠ཟེར་བ་དེ་བཤད་སྟངས་ཤིག་རེད་མ་གཏོགས་ད་ལྟའི་ཆར་ཁུངས་སྐྱེལ་བྱེད་ཐུབ་ཡོད་པ་མ་རེད། དེ་བས། རང་དབང་གི་གསར་ཁང་ཞིག་ལ་མཚོན་ན། དོགས་གཞི་ཡོད་པའི་ལམ་ནས་གསར་འགྱུར་སྤེལ་རྒྱུ་ཧ་ཅང་གི་གལ་ཆེན་རེད་ལ། ང་རང་ཚོས་ཀྱང་དོན་དག་གསལ་བོ་ཤེས་ཐུབ་ཀྱི་རེད།
རྒྱ་ནག་གཞུང་ལ་མཚན་ན། ཏིན་གྱི་ནང་ཚང་། ལིས་ཕིང་གི་ནང་ཚང་། ཧོའུ་ཅིན་ཐའོ་ཡི་ནང་ཚང་། ཝུན་ཅཱ་པོ་ཡི་ནང་ཚང་བཅས་ལ་ཨ་སྒོར་དུང་ཕྱུར་བརྒྱ་ཕྲག་མང་བོ་ཡོད་པའང་དངོས་ཡོད་གནས་ཚུལ་རེད།
སྐབས་ཐོག་འདིར་བོད་ཅིག་གི་ཐད་ནས་བཤད་ན། པོ་ཞི་ལེ་ནག་པོ་ཡིན་མིན་དེ་གཙོ་བོ་མིན་པར་གཞན་དག་ཀྱང་ནག་པོ་ཡིན་པ་གཙོར་འདོན་གནང་བ་ཡིན་ན། བོད་མིས་ཡུན་རིང་སེམས་ལ་་བརྣག་པའི་དོན་ཆེན་དེ་ཁོ་རང་ཚོའི་ནང་འཁྲུག་གིས་འགྲུབ་སྲིད་ཀྱང་ངེས་པས། ཀླད་ཞོ་ཅུང་ཙམ་ཅུང་ཙམ་དཀྲུགས་དཀྲུགས་རེ་གནང་བའི་དུས་ལའང་སླེབས་ཟིན་པ་མ་ཡིན་ནམ།
སྐད་ཆ་འདི་ཚང་མ་ལོར་བཤད་ཀྱི་ཡོད་མ་གཏོགས་གསར་འགོད་པར་ཆེད་དུ་སྨྲས་པ་ཞིག་མིན་ཞེས་ཞུ་རྒྱུ་ཡིན།