རང་གི་འདོད་མོས་ལྟར་ལས་ཀ་གོ་སྒྲིག་ཞུ་བའི་རེ་བ་ཡོད།

བཀའ་ཤག་གི་དགོངས་དོན་ལྟར་ལས་བྱེད་འདེམས་བསྐོ་ལྷན་ཁང་གི་གཙོ་འགན་འོག འཛིན་རིམ་ ༡༢ ནས་མཐོ་རིམ་གཙུག་ལག་རམས་འབྱམས་པའི་བར་གྱི་སློབ་ཐོན་པ་ ༤༠ ཙམ་ལ། འདི་ལོའི་ལས་བྱེད་གསར་བསྡུའི་སྤུས་ཚད་ཇེ་ལེགས་སུ་གཏོང་ཕྱིར་ཟླ་ ༥ རིང་ས་རཱ་མཐོ་སློབ་ཏུ་ཟབ་སྦྱོང་ཞིག་སྤྲོད་བཞིན་འདུག

དབུས་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག ཕྱི་ཟླ་ ༧ ཚེས་ ༡ ནས་འབྱུང་འགྱུར་ཕྱི་ཟླ་ ༡༡ བར་ས་རཱ་མཐོ་སློབ་ཏུ་བཀའ་ཤག་གསར་པའི་དགོངས་དོན་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་ལས་བྱེད་སྤྱིའི་སྤུས་ཚད་ཡར་རྒྱས་གཏོང་ཕྱིར། བོད་རིགས་སློབ་ཐོན་པ་ ༤༠ ཙམ་ལ་འདི་ལོའི་གཞུང་ཞབས་གསར་བསྡུའི་ཆེད་ཟབ་སྦྱོང་སྤྲོད་བཞིན་ཡོད་པའི་སྐབས་དང་བསྟུན་འདི་གའི་གསར་འགོད་པས་ཟབ་ཞུགས་སློབ་མ་ཁག་ཅིག་དང་། ས་རཱ་མཐོ་སློབ་ཀྱི་སློབ་སྤྱི། འདེམས་བསྐོ་ལྷན་ཁང་གི་འགན་འཛིན་སོ་སོར་ཟབ་སྦྱོང་དང་འབྲེལ་བའི་སྐོར་ལ་བཅར་འདྲི་ཞུས་ཡོད། 

ཕྱི་ཚེས་ ༢༥ ཉིན་གསར་འགོད་པ་ཆེད་དུ་འདེམས་བསྐོ་ལྷན་ཁང་དུ་བཅར་སྐབས། འདེམས་བསྐོ་ལྷན་ཁང་གི་འགན་འཛིན་འཇམ་དཔལ་ཆོས་བཟང་ལགས་ཀྱིས་ཟབ་སྦྱོང་པ་འདེམས་སྒྲུག་བྱེད་སྟངས་ངོ་སྤྲོད་གནང་དོན། འདི་ལོའི་བཙན་བྱོལ་བོད་མིའི་སྒྲིག་འཛུགས་ཀྱི་ལས་བྱེད་གསར་བསྡུའི་ཚུད་རྒྱུགས་ཆེད་ཟླ་ ༥ རིང་གི་ཟབ་སྦྱོང་ལ་མཉམ་ཞུགས་སྟེང་ཚུད་རྒྱུགས་གཏོང་པའམ། ཟབ་སྦྱོང་ནང་མ་ཞུགས་ཀྱང་ཐད་ཀར་ཚུད་རྒྱུགས་གཏོང་ཆོག་པ་བཅས་དང་། ཚུད་རྒྱུགས་ནང་ཞུགས་འདུན་ཡོད་རིགས་ཚོས་ཕྱི་ཟླ་ ༥ པའི་ཚེས་ ༣༡ གོང་འདེམས་བསྐོ་ལྷན་ཁང་ལ་སྙན་ཞུ་འབུལ་དགོས་ཞེས་ཕྱི་ཟླ་ ༣ ཚེས་ ༢༡ ཉིན་གསལ་བསྒྲགས་སྤེལ་ཡོད་པ་ལྟར། སྙན་ཞུ་འབུལ་མཁན་ ༢༤༠ བྱུང་ཡོད་པ་ལས་མི་ ༩ ལ་ཆ་རྐྱེན་ཚང་མེད་པ་དང་། ཟབ་སྦྱོང་འདེམས་སྒྲུག་གི་ངག་རྒྱུགས་ནང་ཞུགས་རྒྱུར་ཆ་རྐྱེན་ཚང་མཁན་ ༢༣༡ བྱུང་ཡོད་ཀྱང་། དངོས་གཞིའི་ངག་རྒྱུགས་སྐབས་སློབ་མ་ ༡༦༤ ལས་བྱུང་མེད་པ་དང་། དེ་དག་ཁྲོད་ཀྱི་སློབ་མ་ ༧༣ གྱིས་ངག་རྒྱུགས་འཕྲོད་ཡོད་སྟབས། ངག་རྒྱུགས་འཕྲོད་མཁན་ལས་བརྒྱ་ཆ་རྩེ་བཏོག་ ༤༠ ལ་ཟབ་སྦྱོང་སྤྲོད་ཀྱི་ཡོད་ཅིང་། གཞན་ལྷག་མ་ ༣༦ ཙམ་སྒུག་ཐོའི་མིང་གཞུང་ནང་བཞག་ཡོད་འདུག གོང་གི་དུས་ཆད་ནང་སྙན་ཞུ་འབུལ་མཁན་ཁྲོད་ཟབ་སྦྱོང་ལ་མ་ཞུགས་པར་ཐད་ཀར་ཚུད་རྒྱུགས་གཏོང་གི་ཡིན་ཟེར་མཁན་གཉིས་གསུམ་ཞིག་ལས་བྱུང་མེད་པ་དང་། མཐའ་མའི་གཞུང་ཞབས་ཚུད་རྒྱུགས་སྐབས་ད་སྔ་སྙན་ཞུ་ཕུལ་ཟིན་པའི་རིགས་མ་གཏོགས་འཛུལ་ཞུགས་བྱ་མི་ཆོག་པ་བཟོས་འདུག

ད་སྔ་སྐབས་སོ་སོའི་གཞུང་ཞབས་ཀྱི་ས་མིག་དང་གནས་རིམ་གཏན་འཁེལ་ཐོག་གཞུང་ཞབས་གསར་བསྡུའི་ཚུད་རྒྱུགས་གཏོང་རྒྱུའི་གསལ་བསྒྲགས་སྤེལ་རྗེས། སྙན་ཞུ་འབུལ་མཁན་ཁྲོད་ཀྱི་ཆ་རྐྱེན་ཚང་མཁན་ཚོས་སོ་སོའི་འདོད་མོས་ལྟར་གནས་རིམ་སོ་སོའི་ས་མིག་ལ་ཚུད་རྒྱུགས་གཏོང་ཆོད་པ་མ་ཟད། འཛིན་རིམ་ ༡༢ ཐོན་མཁན་ཚོས་འགན་འཛིན་སྡེ་ཚན་དང་ལས་བྱེད་སྡེ་ཚན་གཉིས་ལས་ལས་བྱེད་སྡེ་ཚན་ནང་ཚུད་རྒྱུགས་གཏོང་ཆོག་གི་ཡོད་ཀྱང་། ཐེངས་འདིའི་ཐོག་མའི་གསལ་བསྒྲགས་ནང་མཐོ་སློབ་ཐོན་མཁན་ཚོས་སྙན་ཞུ་འབུལ་ཆོག་ཅེས་བསྒྲགས་ཡོད་པའི་ཐད་གསར་འགོད་པས་བཀའ་འདྲི་ཞུས་པར། འཇམ་དཔལ་ཆོས་བཟང་ལགས་ཀྱིས་ “བཀའ་ཤག་གིས་ཐེངས་འདིའི་ཚུད་རྒྱུགས་ནང་མཐོ་སློབ་ཐོན་མཁན་རྐྱང་དགོས་པའི་བཀའ་གནང་ཡོད་ཀྱང་། སྒྲིག་གཞིའི་ནང་འཛིན་རིམ་ ༡༢ ཐོན་མཁན་ཚོ་ཚུད་རྒྱུགས་ནང་ཞུགས་ཆོག་པ་གསལ་ཡོད་ཚུལ་ཞུས་པ་ཡིན། གསལ་བསྒྲགས་ནང་མཐོ་སློབ་ཐོན་མཁན་ཞེས་བཀོད་ཡོད་ཀྱང་། འཛིན་རིམ་ ༡༢ ཐོན་མཁན་ཚོར་གོ་སྐབས་ཡོད་རེད། ཐེངས་འདིའི་ཟབ་སྦྱོང་ནང་འཛིན་རིམ་ ༡༢ ཐོན་པའི་སློབ་མ་གཅིག་ཡོད་”ཅེས་བརྗོད་བྱུང་། ཡང་ཁོང་ལ་ད་ལྟའི་ཆར་དབུས་བོད་མིའི་སྒྲིག་འཛུགས་ནང་ལས་བྱེད་ས་མིག་ག་ཚད་ཅིག་ཡོད་མེད་དྲིས་པར་ཁོང་གིས་ “ ད་ལྟའི་ཆར་ལས་བྱེད་གསར་བསྡུའི་ས་མིག་ ༦༠ ཡས་མས་ཤིག་ཡོད་པ་རེད། ཡིན་ནའང་ཡིག་རྒྱུགས་དངོས་གཞིའི་བར་ཕྲན་བུ་ཡར་མར་འགྱུར་བ་འགྲོ་སྲིད་པ་རེད” ཅེས་བརྗོད་བྱུང་།

མཐའ་མའི་ཚུད་རྒྱུགས་དང་ལས་གནས་བསྐོ་བཞག་ཇི་ལྟར་བྱ་རྒྱུའི་སྐོར་དྲིས་པར་ཁོང་གིས། མཐའ་མའི་ལས་བྱེད་གསར་བསྡུའི་ཚུད་རྒྱུགས་ཚང་མར་གཅིག་གྱུར་བཏང་ཐོག རྒྱུགས་འབྲས་བརྒྱ་ཆའི་མཐོ་དམན་ལྟར་ལས་བགོས་བསྐོ་བཞག་བྱ་རྒྱུ་ཡིན་པ་དང་། མཐའ་མའི་ཚུད་རྒྱུགས་ཁྲོད་འཛིན་རིམ་ ༡༢ ཐོན་མཁན་སློབ་མ་ཞིག་མཐོ་རིམ་གཙུག་ལག་རབ་འབྱམས་པ་(M.Ph) ཐོན་མཁན་ཞིག་ལས་བརྒྱ་ཆ་མཐོ་བ་རག་ཡོད་ཚེ། རྒྱུགས་འབྲས་བརྒྱ་ཆ་མཐོ་བ་ལེན་མཁན་འཛིན་རིམ་ ༡༢ ཐོན་པའི་སློབ་མ་གང་དེའི་ལས་བྱེད་ཀྱི་གནས་རིམ་མཐོ་རིམ་གཙུག་ལག་རབ་འབྱམས་པ་ཐོན་མཁན་ལས་མཐོ་བར་བསྐོ་སྲིད་སྐོར་བརྗོད་བྱུང་།

ཡང་ཁོང་གིས་བརྗོད་པ་ལྟར་ན། ད་སྔའི་སྲི་ཞུ་ལས་བྱེད་གསར་བསྡུའི་ནང་གནས་རིམ་དམའ་བ་ལས་བྱེད་སྡེ་ཚན་དང་གནས་རིམ་མཐོ་བ་འགན་འཛིན་སྡེ་ཚན་གཉིས་ཡོད་པ་ལས། ལས་བྱེད་སྡེ་ཚན་ནང་ཚུད་ཟིན་རྗེས་ལོ་ག་ཚོད་ཕྱིན་ཡང་གླ་ཕོགས་ལས་གནས་རིམ་འཕར་རྒྱུ་མེད་ཀྱང་། ད་ལོ་ནས་ལས་བྱེད་སྡེ་ཚན་ནང་ཚུད་ཀྱང་གནས་རིམ་འཕར་རྒྱུ་ཡོད་པ་དང་། ད་སྔ་བོད་མིའི་སྒྲིག་འཛུགས་ལས་བྱེད་གསར་བསྡུའི་ནང་ཚུད་རྗེས་ལས་བགོས་གང་ལ་བྱས་པའི་ལས་ཁུངས་དེར་ཟླ་ ༦ རིང་ཚོད་ལྟའི་ཐོག་འདུག་དགོས་ཀྱང་། ད་ལོ་ནས་ལས་བྱེད་དུ་ཚུད་པ་རྣམས་ཀྱི་ཚོད་ལྟའི་ཟླ་ ༦ དེ་དབུས་བོད་མིའི་སྒྲིག་འཛུགས་ནང་ཟླ་ ༣ དང་། ས་གནས་གཞིས་ཆགས་གང་རུང་ནང་ཟླ་ ༣ བཅས་ཚོད་ལྟའི་ཟླ་ ༦ ཚང་རྗེས་གཏན་འཇགས་ལས་བྱེད་དུ་བསྒྱུར་དགོས་པ་སོགས་ཀྱི་འགྱུར་པ་བཏང་ཡོད་འདུག

    ཕྱི་ཚེས་ ༢༤ ཉིན་གསར་འགོད་པ་ས་རཱ་མཐོ་སློབ་ཏུ་ཕྱིན་ཏེ་ཟབ་སྦྱོང་བ་ཁག་ཅིག་དང་གླེང་མོལ་བྱེད་སྐབས། བྷང་ལོར་(Bangalore) ནས་གློག་ཀླད་སྟེང་གཙུག་ལག་རམས་འབྱམས་པ་(MCA)ཐོན་མཁན་བསྟན་འཛིན་མཆོག་ལྡན་གྱིས་ “ང་ཚོ་སོ་སོའི་ཆེད་སྦྱོང་དང་འབྲེལ་བ་ཡོད་པའི་ལས་གནས་ཤིག་ཏུ་བསྐོ་བཞག་མ་བྱས་ཚེ། གཅིག་ནས་སོ་སོའི་ནུས་པ་འདོན་མི་ཐུབ་པ་དང་། གཉིས་ནས་རང་ཉིད་ཀྱི་འདོད་མོས་དང་མི་འཐུན་པས། ལོ་གཅིག་གཉིས་སོང་རྗེས་ལས་ཀ་གཡུགས་ནས་འགྲོ་བཞག་གི་རེད”ཟེར། 

གཞན་མཱ་ནེ་པལ་གཙུག་ལག་སློབ་ཆེན་(Manipal University) ནས་སྨན་ཞབས་ཐོན་མཁན་བུ་མོ་ངག་དབང་བསྟན་འཛིན་གྱིས་ “ནང་མིའི་འདོད་བློ་དང་སློབ་ཡོན་གྱི་གོ་སྐབས་འོག འཛིན་རིམ་ ༡༢ ཐོན་རྗེས་སྨན་ཞབས་སློབ་སྦྱོང་བྱས་དགོས་བྱུང་། མཐོ་སློབ་ལོ་རིམ་གཉིས་པར་བསླེབས་སྐབས་ངས་སོ་སོའི་སློབ་སྦྱོང་གི་གདམ་ཀ་དེ་ནོར་ཡོད་པ་ཤེས་བྱུང་། གཞུང་ཞབས་ནང་ཚུད་ཚེ་འཕྲོད་བསྟེན་ལས་ཁུངས་ནང་བཏང་པ་ཡིན་ན་སོ་སོའི་ནུས་པ་འདོན་ཐུབ་རྒྱུ་རེད། འོན་ཀྱང་། ལས་གནས་གཞན་ཞིག་ཏུ་བཏང་ཡང་གཞུང་ཞབས་ནང་ལས་ཀ་བྱ་འདོད་ཆེན་པོ་ཡོད་”ཟེར།

མཱ་ངྷི་རཱ་སི་གཙུག་ལག་སློབ་ཆེན་(Madras University) ནས་དཔལ་འབྱོར་རིག་པའི་སྟེང་མཐོ་རིམ་གཙུག་ལག་རམས་འབྱམས་པ་(M.Ph)ཐོན་མཁན་བསྟན་འཛིན་རྣམ་རྒྱལ་གྱིས་ “ངས་གདམ་ཀ་དང་པོ་དཔལ་འབྱོར་ལས་ཁུངས་བྲིས་ཡོད། ཡིན་ནའང་སོ་སོར་བོད་པའི་སྤྱི་ཚོགས་ནང་ཞབས་ཞུ་བསྒྲུབ་འདོད་ཆེན་པོ་ཡོད་སྟབས། ལས་ཁུངས་གཞན་པ་ཞིག་ཏུ་བཏང་ནའང་རིམ་གཞིན་འགྲིག་འགྲོ་ངེས་རེད་”ཅེས་བརྗོད་བྱུང་།

དེ་སྔོན་འདེམས་བསྐོ་ལྷན་ཁང་གིས་སྲི་ཞུ་ལས་བྱེད་གསར་བསྡུའི་ཟབ་སྦྱོང་སྐོར་གྱི་གསར་འགོད་གསལ་བསྒྲགས་སྤེལ་སྐབས། ཐེངས་འདིའི་ཟབ་སྦྱོང་གི་འགྲོ་གྲོན་ཆ་ཚང་དབུས་བོད་མིའི་སྒྲིག་འཛུགས་ཀྱིས་གཏོང་རྒྱུ་ཡིན་པ་དང་། སྔོན་རྩིས་ལྟར་ན་ཟབ་སྦྱོང་ཐད་ཧིན་སྒོར་འབུམ་ ༢༥ ནས་ ༣༠ བར་འགྲོ་རྒྱུར་ཚོད་དཔག་བྱེད་ཀྱི་ཡོད་སྐོར་བརྗོད་ཡོད་པ་རེད།

གསར་འགོད་པ། བནྡེ་སྐྱབས།

བོད་ཀྱིད་དུས་བབ་ཚགས་པར་ལས་འདིར་བདམས་བཀོད་བྱས་པ་ཡིན།