ཕྱི་ལོ་ ༢༠༡༢ ཟླ་ ༤ ཚེས་ ༢༠ ཉིན་གྱི་བོད་ཀྱི་དུས་བབ་སྤྱིའི་འདོན་ཐེངས་ ༥༥༢ སྟེང་གི་ཤོག་གྲངས་ ༦ པའི་ནང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་ལ། ལམ་དབུ་མའི་མདུན་ལམ་སྐོར་ལ། བཀའ་ལན། “བོད་དེ་དང་པོ་སྲིད་པ་ཆགས་སྐབས་ནས་སྟོབས་ཆེན་རྒྱལ་ཁབ་རྒྱ་གར་དང་རྒྱ་ནག ཨུ་རུ་སུ་སོག་པོ་བཅས་ཀྱི་བར་དུ་གནས་ཡོད་ཀྱང་། ༡༩༥༡ བར་བོད་ལ་སྟོབས་ཆེན་རྒྱལ་ཁབ་སུས་ཀྱང་ཆ་ཚང་དབང་བསྒྱུར་བྱས་པའི་ལོ་རྒྱུས་མེད་པར།” ཞེས་པ་ནས། “དབུ་མའི་ལམ་གྱི་སྲིད་བྱུས་ཀྱིས་རྒྱ་ནག་མང་གཙོའི་ལམ་ཕྱོགས་ཐོག་བསྐུལ་འདེད་གཏོང་ཐུབ་ཡོད།”
གསར་འགོད་པས། ཚེ་བརྟན་རྡོ་རྗེ་མ་བུ་གསུམ་གྱིས་བོད་རྒྱའི་རྒྱལ་དར་འཁྱེར་ཏེ་ལས་འགུལ་སྤེལ་བཞིན་པ་གཟིགས་ཚུལ་དྲི་བཞུས་པར། བཀའ་ལན། “ང་ཚོས་ཁ་གཏད་བྱེད་སྐབས་མི་རིགས་ཤིག་གི་བརྩི་མཐོང་དང་མཚོན་རྟགས་ཡིན་པ་ཞིག་ལ་དམའ་འབེབས་བཏང་ན།” ནས་ “ རྒྱ་ནག་གི་རྒྱལ་དར་ལ་མེར་བསྲེགས་གཏོང་བ་དང་རྡོག་བརྫིས་བཏང་ན། དེ་བཟང་སྤྱོད་དང་མཐུན་པ་ཞིག་ལ་ངོས་འཛིན་ཞུ་གི་མེད།” ཅེས་གསུངས་འདུག་པ་ནི་སྐྱེས་བུ་དམ་པའི་བཀའ་ལོས་ཡིན། རང་རེའི་རྒྱལ་དར་ཆོས་སྲིད་གཉིས་ཀའི་མཚོན་དོན་ཡོད་པ་དེ་དང་། རྒྱ་དམར་གྱི་རྒྱལ་གླུའི་ཚིག་ལ་མི་མང་པོ་སྲོག་བཅད་པའི་ཁྲག་མདངས་ཡིན་ཟེར་བའི་རྒྱ་དམར་གྱི་དར་ཆ་མཉམ་འཁྱེར་བྱེད་རྒྱུ་དེ། བོད་པ་མི་མང་གི་བསམ་པའི་ཆེ་མཐོང་ལ་ཆ་འཇོག་ཏིལ་ཙམ་མེད་པའི་རང་རྟགས་སམ། ཡང་ན་སྐྱབས་བཅོལ་གཞུང་ལ་དགོངས་སྐོར་ཞུ་དགོས་པ་ཅིག་མིན་ནམ།
“ང་རང་སྒེར་ངོས་ནས་དེ་ལ་ངོ་རྒོལ་བྱ་འདོད་གང་ཡང་མེད། ངས་བལྟས་ན་ཁོ་རང་ལ་རྒྱབ་ལྗོངས་ཀྱི་དགོངས་པ་བཞེས་སྟངས་ཤིག་ཏན་ཏན་ཡོད་ཀྱི་རེད།” ཅེས་ཞེ་ས་དང་བཅས་གསུངས་པ་ལོས་བདེན། ཡིན་ན་ཡང་། རྒྱབ་ལྗོངས་ཀྱི་ཚིག་ལ་རེ་མ་དགོས་པའི་བོད་པའི་ངེས་ཚིག་མི་འདྲ་བ་ལྔ་དྲུག་ངེས་པར་ཡོད་ངེས། རྒྱ་གར་ནས་བཀའ་བསྟན་བཅོས་མང་པོ་དེ་ཙམ་བསྒྱུར་དུས་ཚིག་གི་ཕོངས་པ་བྱུང་ཚུལ་མཐོང་ཐོས་མེད་ངེས་ཡིན། ཡང་དབུ་མའི་ལམ་གྱི་སྲིད་བྱུས་ཀྱིས་རྒྱ་ནག་མང་གཙོ་ཅན་དུ་འགྱུར་བར་ཤུགས་རྐྱེན་ཐེབས་ཀྱི་ཡོད་མེད་དྲིས་པར། “རྒྱ་ནག་གི་མི་སུ་ལ་སྐད་ཆ་དྲིས་ན་ཡང་། བརྒྱ་ཆ་ ༩༠ ཙམ་གྱིས་བོད་ཁ་བྲལ་དུ་སོང་ན་འགྲིག་གི་མ་རེད་ཟེར་གི་རེད། རྒྱ་རིགས་མང་ཆེ་ཤོས་ཀྱིས་རྒྱ་བོད་གཉིས་མཉམ་འབྲེལ་ཐོག་སྡོད་དགོས་པ་རེད་ཟེར་གྱི་ཡོད།” གསུངས་འདུག་ཀྱང་། གོང་དུ་ནི་ “བོད་དེ་དང་པོ་སྲིད་པ་ཆགས་སྐབས་ནས་” ཞེས་པ་ནས་ “༡༩༥༡ བར་བོད་ལ་སྟོབས་ཆེན་རྒྱལ་ཁབ་སུས་ཀྱང་ཆ་ཚང་དབང་བསྒྱུར་བྱས་པའི་ལོ་རྒྱུས་མེད་པར་” ཞེས་པ་ནས། “བོད་ནི་དབུས་ཨེ་ཤ་ཡའི་གླིང་ཆེན་ནང་མི་ཚང་མས་ཞེད་སྣང་བྱ་སའི་སྟོབས་ཆེན་རྒྱལ་ཁབ་ཅིག་གི་ངོ་བོར་གནས་ཡོད་ཚུལ་དང་།” ཞེས་དང་། “འགྲོ་འགོན་ཆོས་རྒྱལ་འཕགས་པས་” ཞེས་པ་ནས་ “ཁྱིམ་མཚེས་རྒྱལ་ཁབ་ཚོས་དབང་བསྒྱུར་བྱས་པའི་གནས་སྟངས་བྱུང་མྱོང་མེད་པ་དང་། ” ཞེས་སོགས་བཀའ་གནང་བཞིན་དུ། “ད་བར་ང་རང་བོད་རྒྱ་ནག་དང་ཁ་བྲལ་ཏེ་རང་བཙན་བྱས་ན་འགྲིག་གི་རེད་ཟེར་མཁན་གཅིག་མ་གཏོགས་ཐུག་མ་སོང” ཞེས་སོགས་བཀའ་གནང་ན། ད་ཆ་མདོ་སྟོད་སྨད་ཀྱི་བོད་པ་ཕོ་མོ་ཁྱད་མེད་དང་། གཞོན་པ་ལོ་བཅུ་བདུན་བཅོ་བརྒྱད་ཙམ་ཡིན་པ་འགའ་ཤས་ནས་ཀྱང་རང་ཡུལ་རང་བཙན་གྱི་དོན་དུ། ལུས་སྲོག་ཕངས་མེད་དུ་བཏང་དང་གཏོང་བཞིན་པ་ལ། རྗེ་བཙུན་བྱམས་པ་མགོན་པོས། ༼ཆོས་ཀྱི་དོན་དུ་སྲོག་གཏོང་བ། ནས་ཕྱིར་མི་ལྡོག་པའི་རྟགས་དག་ཡིན།༽ ཞེས་པ་ལྟ་བུའི་གསུང་གིས་སེམས་གསོ་གཏོང་རྒྱུ་ཐུགས་ལ་མ་བབས་ན་ཡང་། བོད་པ་ལྷག་བསམ་ཅན་ཚོ་ཡི་ཐང་ཆད་འཇུག་པ་གནང་ན་སྐུ་སྡིག་མི་ཡོང་ངམ།
གུས་པས་དྲང་གཏམ་ཞིག་ཞུ་དགོས་བྱུང་དོན་ནི། ༸གོང་ས་སྐྱབས་མགོན་བཅུ་གསུམ་པས། བཀྲས་མཐོང་བུ་རིག་འཛིན་རྣམ་རྒྱལ་དཔའ་ཤོད་རཀ་རའི་སྐྱེ་སྲིད་དུ་ངོས་འཛིན་ན་འཐུས། ཞེས་ཕྱག་རྟགས་གནང་བ་བཞིན་ད་ལྟའང་མདོ་སྟོད་ཀྱི་ཁོངས་སུ་ཡོད་པས་མགྲིན་ཚབ་བྱས་ཏེ། མཐའ་དོན་ཞུ་རྒྱུ་ནི། མཛད་སྒོའི་གསུང་བཤད་དབུ་བཙུགས་སྐབས་ལ་ནི། སྲིད་པ་ཆགས་སྐབས་ནས་སྟོབས་ཆེན་རྒྱལ་ཁབ་རང་དབང་རང་བཙན་ཡིན་པ་དང་། ཡང་མཐའ་སྡོམ་དུ་ནི་རྒྱ་བོད་མཉམ་འབྲེལ་དུ་གནས་པ་མ་གཏོགས། ཁྱིམ་པ་ཕོ་མོ་ལྟར་ཁ་བྲལ་མི་ཆོག་ཅེས་བཀའ་ནན་གནང་ན། མང་གཙོའི་ཁས་ལེན་དམ་བཅའ་ལ་མི་གནོད་དམ། རབ་ཏུ་གུས་པའི་ཕྱག་བཅས།
བོད་རྒན་རཀ་ར་བཀྲས་མཐོང་པས། ༢༠༡༢ ཟླ་ ༦ ཚེས་ ༢༣ ལ། ཕུལ།
རྩོམ་སྒྲིག་པའི་མཆན། གོང་གི་རྩོམ་ཐུང་དེའི་མ་ཡིག་ནང་འཕྲིན་ཡིག་གི་ཚུལ་དུ་ཁ་བྱང་སོགས་མེད་པར་སྤེལ་འདུག་མོད། འདིར་དྲ་བའི་ཁ་བྱང་གི་ས་མིག་བསྐང་ཕྱིར་ཁ་བྱང་བཀོད་པ་ཡིན།
རཀ་ར་རྒད་པོ་དེ་ད་ལྟ་གཞི་ནས་གཉིད་ལས་སད་པ་འདྲ། ཟམ་གདོང་རིན་པོ་ཆེ་བཀའ་ཁྲི་ནས་དགོངས་པ་ཞུས་ནས་ལོ་ངོ་གཅིག་ཙམ་འགྲོ་གྲབས་འདུག བོད་ནང་དཔའ་བོ་ཚོས་རང་སྲེག་གི་ལས་འགུལ་སྤེལ་ནས་ཀྱང་དུས་ཚོད་གང་ཙམ་ཕྱིན་སོང་། འོན་ཀྱང་རཀ་ར་རྒད་པོ་ད་ལྟ་གཞི་ནས་གཉིད་ལས་སད་པ་འདྲ།
འཁྲུལ་ཅིག་འཁྲུལ་ན་མཁས་པ་འཁྲུལ། ཞེས་པ་ལྟར་མཁས་པས་མཁས་ཉམས་བཏོན་ན་འདི་འདྲ་རེད། ནམ་མཁའ་མ་གཏོགས་ས་གཞི་མ་མཐོང་ཙང་བྱས་པ་རེད། རཀ་ར་རྒན་པོས་གསུངས་པ་དེ་དེ་བཞིན་ནོ།