རྫོང་སྲིད་གཞུང་ལ་ངོ་རྒོལ།

ངྷ་ས་གནས་སྡོད་བསང་ཆུ་འབྲུག་བྷེ་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཉེ་བའི་ལོ་མང་པོའི་རིང་མདོ་སྨད་ཀན་ལྷོ་བསང་ཆུ་རྫོང་ཨ་མཆོག་ལུང་ནག་སྡེ་བ་དང་། འབོ་ར་འཚོ་བའི་ཨ་ལི་ནང་སྡེ་བ་གཉིས་ཀྱིས་བར་རྩྭ་ས་རྩོད་གླེང་བྱས་ཏེ་མི་ཤི་རྟ་འགྱེལ་གྱི་དོན་རྐྱེན་རིམ་པར་བྱུང་བ་དང་། ཉེ་ཆར་སྡེ་བ་གཉིས་ཀྱི་བར་བསྐྱར་དུ་རྩྭ་ས་རྩོད་གླེང་གི་རྐྱེན་པས་ཕན་ཚུན་འཁྲུག་རྩོད་ཀྱི་དོན་རྐྱེན་བྱུང་སྟེ། སྡེ་བའི་གཉིས་ཀྱི་མཐུན་སྒྲིལ་ལ་གཏོར་བརླགས་ཚབས་ཆེན་བཟོས་ཡོད་འདུག

གནད་དོན་དེའི་ཐད་ སྡེ་བ་གཉིས་ཀྱི་རྒན་རབས་པ་དང་སྡེ་བའི་སྐུ་ཚབ་གྲོས་བསྡུར་བྱས་རྗེས། འབོ་ར་ཞང་དང་བསང་ཆུ་རྫོང་མི་དམངས་སྲིད་གཞུང་བཅས་སུ་སྡེ་བ་གཉིས་ཀྱི་རྩྭ་ས་རྩོད་གླེང་གི་གནད་དོན་འདུམ་འགྲིག་ཡོང་ཐབས་ལ་རོགས་རམ་བྱ་དགོས་པའི་རེ་སྐུལ་དང་སྙན་ཞུ་རིམ་པ་ཕུལ་ཡོད་ཀྱང་། གཞུང་ཕྱོགས་ནས་ད་ལྟའི་བར་སྡེ་བ་གཉིས་འདུམ་སྒྲིག་ཡོང་ཐབས་ལ་འབད་བརྩོན་དང་འདོད་བློ་ཁེངས་པའི་བརྡ་ལན་ཅི་ཡང་སྤྲད་མེད་སྟབས། ཟླ་འདིའི་ཚེ་མགོ་ནས་བཟུང་སྡེ་བའི་གཉིས་ཀྱི་རྒན་རབས་པ་དང་སྐུ་ཚབ་ཁག་ཅིག་བསང་ཆུ་རྫོང་མི་དམངས་སྲིད་གཞུང་གི་སྒོ་འགྲམ་དུ་སོང་སྟེ། ངོ་རྒོལ་གྱི་རྣམ་པ་བསྟན་ཏེ་བསྡད་ཡོད་འདུག

གནས་ཚུལ་འབྱོར་གསལ་ལྟར་ན། སྡེ་བ་གཉིས་ཀྱི་བོད་མི་ཚོས་ཉིན་གྲངས་ ༤ ལྷག་གི་རིང་བསང་ཆུ་རྫོང་མི་དམངས་སྲིད་གཞུང་གི་སྒོ་འགྲམ་དུ་ངོ་རྒོལ་གྱི་རྣམ་འགྱུར་བསྟན་ཏེ་བསྡད་ཡོད་ཀྱང་། གཞུང་ངོས་ནས་ཁོང་རྣམ་པར་རོགས་རམ་བྱ་རྒྱུའི་བརྡ་ལན་ཅི་ཡང་སྤྲད་མེད་པ་མ་ཟད། ཁ་སང་ཁོང་ཚོའི་ཁྲོད་ཀྱི་མི་ ༢ འཛིན་བཟུང་བཀག་ཉར་བྱས་ཡོད་པའི་གནས་ཚུལ་ཐོན་འདུག

ཨ་ལུ་ནང་སྡེ་བ་དང་ལུང་ནག་སྡེ་བ་གཉིས་ནི། ཀན་ལྷོ་བསང་ཆུ་རྫོང་འབོ་ར་ཨ་མཆོག་ཞང་གི་ཁྱབ་ཁོངས་སུ་ཡོད་པ་དང་། ད་ལྟའི་ཆར་ལུང་ནག་སྡེ་བར་ཁྱིམ་ཚང་ ༤༠ ལྷག་དང་། ཨ་ལུ་ནང་སྡེ་བར་ཁྱིམ་ཚང་ ༢༠ ལྷག་ཡོད་འདུག