གྲོས་ཚོཊ་བཀའ་ཤག་ཚོཊ་ཁང་དུ་འཚོཊ་རྒྱུ་རེད།

སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་ཕྱི་ཟླ་ ༩ བའི་ཚེས་ ༡༤ ནས་ ༢༢ བར་བཀའ་ཤག་ཡང་སྟེང་གི་ཚོགས་ཁང་ཆེ་བའི་ནང་འཚོགས་རྒྱུ་རེད།

འདི་ལོའི་ཕྱི་ཟླ་ ༤ བའི་ཚེས་ ༡༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ལས་ཁུངས་དང་གྲོས་ཚོགས་ཚོགས་ཁང་བསྐྱར་བཟོའི་ལས་གཞི་མགོ་འཛུགས་གནང་སྟེ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཚོགས་དྲུང་ལས་ཁུངས་དང་སྤྱི་འཐུས་རྒྱུན་ལས་བཅས་ལས་ཁུངས་ཁག ཆེས་མཐོའི་ཁྲིམས་ཞིབ་ཁང་གི་ལས་ཤག་གི་གཤམ་འོག་ཏུ་ཡོད་པའི་དེ་སྔའི་འཕྲོད་བསྟེན་དང་འོས་བསྡུ། འཆར་འགོད་བཅས་ཀྱི་ལས་ཁུངས་ཀྱི་ཤུལ་དུ་གནས་སྤོར་བྱས་ཏེ། སྤྱི་འཐུས་ལྷན་ཚོགས་ཀྱིས་ལས་ཁུངས་ཁག་བསྐྱར་བཟོ་རྒྱ་སྐྱེད་ཀྱི་ལས་གཞི་འགྲོ་མུས་ཡིན་པ་ལྟར། ཉེ་སྔོན་བཀའ་ཤག་དང་སྤྱི་འཐུས་ཚོགས་གཙོ་མཉམ་འཛོམས་ཀྱིས་གྲོས་བསྡུར་གནང་སྟེ། སྐབས་བཅོ་ལྔ་བའི་བོད་མི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་ཕྱི་ཟླ་ ༩ པའི་ཚེས་ ༡༤ ནས་ ༢༢ བར་འཛིན་སྐྱོང་བཀའ་ཤག་ཡང་སྟེང་གི་ཚོགས་ཁང་ཆེ་བའི་ནང་འཚོགས་གཏན་ཁེལ་ཡོད་འདུག

གསར་འགོད་པས་ཚོགས་དྲུང་སྟོབས་རྒྱལ་ལགས་སུ་བཅར་འདྲི་བྱས་ཏེ་ཤེས་རྟོགས་བྱུང་བ་ལྟར་ན། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དེ་ནི། ༡༩༨༢ ལོར་ཐོག་མར་གསར་རྒྱག་བྱས་པ་ཞིག་ཡིན་འདུག་ལ། ད་ལྟའི་བར་གྲོས་ཚོགས་ཚོགས་ཁང་ནང་གི་ས་གདན་དང་འཛིན་ཆས་བརྗེ་བོ་བརྒྱབ་པ་ཙམ་ལས། ཞིག་གསོ་བྱེད་དགོས་བྱུང་མེད་ཀྱང་། ལོ་འགའི་སྔོན་ནས་བཟུང་ཁང་བརྩེགས་གཉིས་པར་གསར་རྒྱག་སྐབས་ཡག་པོ་བརྒྱབས་མེད་སྟབས། གྲོས་ཚོགས་ཚོགས་ཁང་དང་ལས་ཁུངས་ཁག་གི་ནང་ཐིགས་པ་བརྒྱབ་པ་དང་། ཕྱོགས་ཡོངས་ལ་སེར་ཀ་གས་པ་དང་བརླན་ཡོང་སྟེ་དཀའ་ངལ་རིམ་པ་འཕྲད་ཡོད་འདུག  འདི་ལོ་འཛིན་སྐྱོང་བཀའ་ཤག་གིས་ཐོག་བརྩེགས་གཉིས་པ་བསྐྱར་གསོའི་ཆེད་ཧིན་སྒོར་འབུམ་ ༡༠༠ བཀའ་འཁྲོལ་གནང་ཡོད་ཅིང་། སྐབས་དེར་ཐོག་བརྩེགས་གཉིས་པ་ཁོ་ན་བསྐྱར་བཟོ་བྱས་ཏེ་ཕྱི་ཟླ་  ༩ པའི་གྲོས་ཚོགས་ཚོགས་ཁང་རང་དུ་ཚོགས་ཐུབ་པར་བྱ་རྒྱུའི་འཆར་གཞི་སྒྲིག་ཡོད་ཀྱང་། ཉེ་ལམ་སྟེང་འོག་གཉིས་ཀ་བསྐྱར་བཟོ་བྱ་རྒྱུའི་ལས་གཞི་མགོ་འཛུགས་གནང་སྟབས། ཐེངས་འདིའི་གྲོས་ཚོགས་བཀའ་ཤག་ཡང་སྟེང་གི་ཚོགས་ཁང་ཆེ་བའི་ནང་འཚོགས་དགོས་བྱུང་ཡོད་འདུག  

ཚོགས་དྲུང་ལགས་ཀྱིས་བརྗོད་དོན་ལྟར་ན། ཐེངས་འདིའི་བསྐྱར་བཟོའི་ལས་གཞིའི་ཁྲོད་ཐོག་བརྩེགས་གཉིས་པར་སྤྱི་འཐུས་རྒྱུན་ལས་ཀྱི་ལས་ཁུངས་དང་རྒྱུན་ལས་ཚོགས་ཁང་། མཇལ་འཕྲད་ཁང་། ཐབ་ཚང་དང་འཁྲུས་ཁང་གསང་སྤྱོད་བཅས་རྒྱག་འཆར་ཡོད་འདུག་ལ། འོག་ཏུ་གྲོས་ཚོགས་ཀྱི་ཚོགས་ཁང་རྒྱ་སྐྱེད་དང་། དཔེ་མཛོད་ཁང་། ཚོགས་དྲུང་ལས་ཁུངས་བཅས་རྒྱག་འཆར་ཡོད་འདུག