ཁ་སང་གཟའ་ལྷག་པའི་ཉིན་ལེ་བྷེ་ཡའི་བར་བརྒལ་སྲིད་གཞུང་གིས། མི་མང་གིས་འོས་འདེམས་བྱས་པའི་གྲོས་ཚོཊ་གསར་པར་དབང་ཆ་རྩིས་སྤྲོད་དང་དམངས་གཙོའི་སྲིད་གཞུང་སྲ་བརྟན་བཟོ་རྒྱུའི་སྐུལ་འདེད་བྱས་འདུག
ཁ་སང་ཕྱི་ཚེས་ ༨ ཉིན་ལེ་བྷེ་ཡའི་རྒྱལ་ས་ཊི་རེ་པོ་ལེ་ (Tripoli) རུ་བར་བརྒལ་སྲིད་གཞུང་གིས་ཉེ་ཆར་གསར་དུ་འདེམས་ཐོན་བྱུང་པའི་གྲོས་ཚོགས་ལ་དབང་ཆ་རྩིས་སྤྲོད་ཀྱི་མཛད་སྒོ་ཚོགས་ཏེ། བར་བརྒལ་སྲིད་གཞུང་གི་མགོ་གཙོ་མུ་སི་ཊ་ཧྥ་ (Mustafa Abdel Jalil) ཡིས། གྷ་ཌ་ཧྥེ་མགོ་རྟིང་སློག་པ་ནས་རྒྱལ་ཡོངས་སྲིད་འགྱུར་ལྷན་ཚོགས་ཀྱིས་བར་རྒལ་གཞུང་གི་འགན་ཁུར་ཡོད་ཀྱང་། ད་ཆར་རྒྱལ་ཡོངས་ཀྱི་གྲོས་ཚོགས་འཐུས་མི་འདེམས་ཐོན་ཟིན་སྟབས། བར་བརྒལ་གཞུང་གིས། སྲིད་གཞུང་གི་དབང་ཚད་གྲོས་ཚོགས་གསར་པར་རྩིས་སྤྲོད་བྱ་རྒྱུ་ཡིན་ཞེས་ཁྱབ་བསྒྲགས་བྱས་འདུག
ཡང་ཁོང་གིས་མུ་མཐུད། གྲོས་ཚོགས་གསར་པ་འདི་ནི་ལེ་བྷེ་ཡའི་ཁྲིམས་མཐུན་གཞུང་གི་འཐུས་མི་ཡིན་པ་དང་། ཁོ་ཚོས་མི་འགྱངས་བར་སྲིད་བློན་གྱི་འོས་བསྡུ་གཏན་འབེབ་དང་། རྩ་ཁྲིམས་ཟིན་བྲིས་གཏན་འབེབ། གྲོས་ཚོགས་ཚགས་ཚུད་ཡོང་ཐབས་སོགས་དམངས་གཙོའི་སྲིད་གཞུང་སྲ་བརྟན་གཏོང་དགོས་པའི་སྐུལ་འདེད་བྱས་ཡོད་འདུག
བར་བརྒལ་གཞུང་གིས་སྲིད་དབང་རྩིས་སྤྲོད་བྱས་པར། ལེ་བྷེ་ཡའི་མི་མང་བརྒྱ་ཕྲག་མང་པོ་འདུ་འཛོམས་ཀྱིས། བར་བརྒལ་གཞུང་གིས་ཞི་འཇགས་ངང་སྲིད་དབང་མི་མང་གིས་འོས་འདེམས་བྱས་པའི་གྲོས་ཚོགས་གསར་པར་རྩིས་སྤྲོད་བྱས་པ་དེ་ནི། ལོ་རྒྱུས་རང་བཞིན་གྱི་རླབས་ཆེན་བྱ་བཞག་ཅིག་ཡིན་པའི་དགའ་བསུའི་རྣམ་འགྱུར་ཤུགས་ཆེར་བསྟན་ཡོད་འདུག
ལེ་བྷེ་ཡའི་བར་བརྒལ་གཞུང་ནི། དེ་སྔའི་གྷ་ཌ་ཧྥེ་སྲིད་གཞུང་ལ་མང་ཚོགས་ཀྱིས་ངོ་རྒོལ་གྱེན་ལངས་བྱས་སྐབས། གྱེན་ལངས་ཤོག་ཁག་ཁྲོད་ཀྱི་རྒྱལ་ཡོངས་སྲིད་འགྱུར་ལྷན་ཚོགས་ (National Transitional Council) ཞེས་པ་དེ་ཡིན་ཞིང་། གྷ་ཌ་ཧྥེ་དམར་གསོད་བཏང་རྗེས་ལྷན་ཚོགས་དེས་བར་བརྒལ་གཞུང་གི་འགན་འཁུར་ཡོད་པ་རེད།
གསར་འགོད་པ། བནྡེ་སྐྱབས།
