གུ་དོག་པོའི་བསམ་བློ་ནི་བོད་ཡིག་འཆི་ལམ་དུ་གཏོང་བྱེད་ཅིག་ཡིན།

འབྲོང་ངུར་ཆོས་རྗེ།

མི་རིགས་ཤིག་ལ་མཚོན་ན་རང་ཉིད་ཀྱི་སྐད་དང་ཡི་གེ་གཉིས་པོ་ནི་མི་རིགས་དེ་ཡི་ངོ་བོ་མཚོན་བྱེད་དམ་མི་རིགས་དེ་སྲ་བརྟན་རྒྱུན་གནས་ཡོང་བའི་སྲོག་རྩ་ལྟ་བུ་ཆགས་ཡོད་པ་ནི་དུས་རབས་འདིར་མི་ཕལ་མོ་ཆེས་ཤེས་གསལ་ཡིན་ལ། རང་སོའི་སྐད་ཡིག་དར་སྤེལ་དང་སྲུང་སྐྱོབ་ཀྱི་ཆེད་བྱ་གཞག་སྣ་ཚོགས་སྤེལ་བཞིན་ཡོད་པའང་མཐོང་ཆོས་སུ་གྱུར་ཡོད། འཛམ་བུའི་གླིང་འདིའི་ནང་གི་མི་རིགས་དང་སྐད་རིགས་སྟོང་ཕྲག་མང་པོའི་ཁྲོད་ནས་སྐད་ཡིག་གཞན་ལས་ཁྱད་དུ་འཕགས་པ་ནི། ཡོངས་གྲགས་སུ་དབྱིན་ཇིའི་སྐད་དང་ཡི་གེ་གཉིས་པོ་ཆགས་ཡོད་པ་མ་ཟད། དེ་གཉིས་པོར་འཛམ་གླིང་སྤྱིའི་སྐད་ཡིག་ཀྱང་བརྗོད་ཆོག་པའི་གནས་སུ་སླེབས་ཡོད། མི་རིགས་སུ་འདྲ་ཞིག་ཡིན་ནའང་རང་གི་སྐད་དང་ཡི་གེ་གཉིས་པོའི་དར་ཁྱབ་མི་འདོད་མཁན་ཞིག་མེད་པ་དང་། དེའི་ཆེད་འབད་རྩོལ་ཡོད་རྒུ་རྩལ་སྤྲུགས་གཉེར་གྱིན་ཡོད་ནའང༌། དབྱིན་ཇིའི་སྐད་ཡིག་གཉིས་པོ་དམིགས་བསལ་གྱིས་འབུར་དུ་འཐོན་པའི་རྒྱུ་མཚན་ཅི་ཡིན་ནམ་ཞེས་ང་ཚོས་བསམ་གཞིག་རེ་བྱས་ན། དེ་ནི་གློ་བུར་ཐོག་རྒྱག་ཏུ་བྱུང་བའམ་དང་པོ་ནས་འཛམ་གླིང་སྤྱིའི་སྐད་ཡིག་གི་ངོ་བོར་གྲུབ་པ་མིན་པར་རང་གི་སྐད་ཡིག་ཉམས་པ་སོར་ཆུད་དང༌། མི་ཉམས་གོང་སྤེལ་གྱི་ཐབས་ལམ་བསྟེན་ཕྱོགས་ལ་མགོ་སེར་ཚོ་གཞན་དག་ལས་རྣམ་དཔྱོད་ཆེ་བ་ཡོད་པས་རེད། དངོས་པོ་ཀུན་གྱི་གཤིས་ལུགས་ལྟར་རྒྱུ་རྐྱེན་ཕུན་སུམ་ཚོགས་པ་ཞིག་ལ་བརྟེན་ནས་དེ་ལྟར་འབྱུང་བ་ཡིན་གྱི་རྒྱུ་མེད་ལས་སྐྱེ་བོ་ཀུན་གྱིས་ཚད་མཐོན་པོའི་གདེང་འཇོག་དེ་ཐོབ་པ་ཞིག་ག་ལ་ཡིན། དེས་ན་ང་ཚོའི་བོད་ཀྱི་སྐད་ཡིག་འཕེལ་རྒྱས་འདོད་མཁན་ཞིག་ཡིན་ན། ངེས་པར་དུ་སྐད་ཡིག་གཞན་གྱི་དར་རྒྱས་ཀྱི་ཕྱོགས་ལ་བསམ་གཞིག་བྱ་དགོས་སྙམ།

ང་ཚོའི་སྐད་ཡིག་གཉིས་ཀྱང་ངོ་བོའི་ཆ་ནས་བཤད་ན། འཇིག་རྟེན་ཁམས་འདིར་དེས་བརྗོད་བྱ་མི་ཐུབ་པ་ཞིག་གཏན་ནས་གཞི་མ་གྲུབ་ལ་འགྲུབ་པར་མི་འགྱུར་ཞིང༌། ཁྱད་པར་དུ་དབྱངས་གསལ་སོ་བཞིའི་རང་བཞིན་ཅན་གྱི་གདོང་དམར་བའི་ཡི་གེ་འདི་ཤིན་ཏུ་ནས་སྟོབས་ལྡན་ཞིག་ཡིན་ནའང༌། འདི་ཉིད་འཛིན་སྐྱོང་དང་འཕེལ་རྒྱས་སུ་གཏོང་མིའི་བསམ་སྤྱོད་ཀྱི་ཆ་ནས་བཤད་ན། ངེས་པར་རྗེས་ལུས་ཤུགས་ཆེན་ཐེབས་ཡོད་པ་ནི་བསྙོན་མེད་དུ་གྲུབ། རྒྱུ་མཚན་དེ་དག་ལ་བརྟེན་ནས་བོད་ཀྱི་སྐད་ཡིག་སྲུང་སྐྱོབ་དང་འཕེལ་རྒྱས་ཀྱི་ཆེད། ལས་འགུལ་སྤེལ་བ་དང་། རེ་སྐུལ་ཞུ་བ། ཁྱབ་བསྒྲགས་བྱེད་པ་སོགས་ཇེ་མང་ནས་ཇེ་མང་ཆགས་ཡོད། དེ་དག་གིས་བརྗོད་བྱའི་གཙོ་བོ་ནི། བོད་ཀྱི་སྐད་ཡིག་གལ་ཆེན་ཡིན་པ་དང་རྩ་ཆེན་ཡིན་པ་སོགས་གཙོ་ཆེར་འཛིན་མོད། དེ་ཙམ་གྱིས་གྲུབ་འབྲས་ངེས་ཅན་ཞིག་འཐོན་དཀའ་བར་སེམས། གང་ཡིན་ཞེ་ན། གལ་གནད་ཀྱི་དོན་པོ་གདོང་དམར་བོད་པའི་སྐད་ཡིག་གཉིས་པོ་མི་ཉམས་རྒྱུན་འཛིན་བྱེད་པར་འགལ་རྐྱེན་གཙོ་བོ་གང་ཡིན་པ་དེ་ངོས་འཛིན་གསལ་པོ་ཞིག་ཡོད་དགོས་ཀྱང༌། ད་བར་འགལ་རྐྱེན་གྱི་གཏེ་པོ་དེ་ངོས་འཛིན་མ་ཐུབ་པའམ་ཐུབ་ཀྱང་མི་སྨྲ་བའི་བརྟུལ་ཞུགས་སུ་ལུས་ཡོད། ཇི་སྲིད་འགལ་རྐྱེན་གྱི་གཙོ་བོ་དེ་ངོས་འཛིན་དང་འབྲེལ་དེ་ཉིད་བསལ་མ་ཐུབ་པ་དེ་སྲིད་དུ་ཡར་རྒྱས་ཡང་དག་པ་ཞིག་མི་ཡོང་བ་ནི་དངོས་པོའི་གཤིས་ལུགས་ཤིག་ཡིན་པ་སྨོས་ཅི་དགོས། དེར་བརྟེན། འདས་པའི་གནས་ཚུལ་དང་ཉམས་མྱོང་ལ་དཔགས་ནས་ད་མ་འོངས་གཉིས་ལ་འགལ་རྐྱེན་སེལ་བ་དང་མཐུན་རྐྱེན་སྒྲུབ་པ་ཟུང་འབྲེལ་གྱི་སྒོ་ནས་བསྐྱོད་དགོས་པ་ཡིན། མདོར་ན་གལ་ཆེན་ཡིན། རྩ་ཆེན་ཡིན། ཞེས་ཡང་ཟློས་བསྐྱར་ཟློས་མི་བྱེད་པར་སྐད་ཡིག་འཕེལ་རྒྱས་ལ་གནོད་པའི་འགལ་རྐྱེན་ངོས་གཟུང་རྒྱུ་དང་དེ་ཉིད་སེལ་བའི་ཐབས་ལམ་བསྟེན་རྒྱུ་ནི་དུས་སྐབས་འདིར་གནད་འགག་ཅིག་ཆགས་ཡོད། དེ་དག་ནི་ངས་སྐད་ཡིག་གཉིས་པོའི་འཕེལ་རྒྱས་ཐད་གླེང་སློང་ཙམ་ཡིན།

ད་ནི་གང་ཞིག་གླེང་བྱའི་གཙོ་བོ་བོད་ཀྱི་ཡི་གེ་འདི་ཉིད། ཉམས་པ་སོར་ཆུད། སོར་ཆུད་རྒྱུན་སྐྱོང༌། རྒྱུན་སྐྱོང་དར་སྤེལ་བཅས་ཀྱི་ཆེད་འགག་རྩ་ལྡན་པའི་ཚིག་དུམ་འགའ་ཞིག་སྤེལ་བར་འདོད། སྐབས་འདིར་ཡང་ངས་བོད་ཡིག་འདིས་བཀའ་འགྱུར་དང་བསྟན་འགྱུར་ཆ་ཚང་བརྗོད་བྱར་བྱས་པས་ཤིན་ཏུ་རྩ་ཆེན་ཡིན་པ་དང་བོད་མི་རིགས་ཀྱི་ཚབ་མཚོན་ཡིན་པས་ཤིན་ཏུ་གལ་ཆེན་ཡིན་པ་མ་ཟད། འཇིག་རྟེན་ཁམས་འདིའི་དངོས་པོ་ཡོད་ཚད་དབྱངས་གསལ་སོ་བཞི་པོ་གཅིག་པུ་འདིས་བརྗོད་ནུས་པས་ཤིན་ཏུ་སྟོབས་ལྡན་ཡིན་ཞེས་པ་སོགས་ལས་འཕྲོས་ནས་བསྐྱར་ཟློས་ཡང་ཟློས་ཀྱིས་ཁ་གཡང་བསྒྲག་རྒྱུ་མིན་པར། གལ་ཆེན་རྩ་ཆེན་སྟོབས་ཆེན་རང་བཞིན་ལྡན་པའི་བོད་ཡིག་འདི་ཉིད་ཀྱི་མདུན་སྐྱོད་ཀྱི་བཀག་རྡོ་ཆེ་ཤོས་ཤིག་ངོ་སྤྲོད་དང་སྦྲགས་ནས་བཀག་རྡོ་དེ་ངེས་པར་རྩ་གཏོར་གཏོང་དགོས་པའི་སྐོར་ལས་འཕྲོས་ནས་གཙོ་བོར་གླེང་འདོད་པ་ཡིན།

དེ་ཡང་རྒྱལ་ཁབ་ཅིག་ལ་མཚོན་ན་རྒྱལ་ཁབ་དེའི་ཡི་གེ་ནི། རྒྱལ་ཁབ་ཕན་ཚུན་བར་འཕྲལ་ཕུགས་ཀྱི་དོན་ཆེན་སྒྲུབ་པར་མེད་དུ་མི་རུང་བའི་ལག་ཆ་ཞིག་གམ། རྒྱལ་ཁབ་དེའི་མི་སེར་རྣམས་ཆོས་དང་འཇིག་རྟེན་གང་ཐད་ནས་རྨོངས་གཉིད་ལས་དཀྲོག་བྱེད་ཀྱི་ལག་ཆ་ཆེ་གྲས་ཤིག་ཡིན། མདོར་ན་ཡི་གེ་ནི། ཆོས་དང་འཇིག་རྟེན་གྱི་བྱ་གཞག་ཐམས་ཅད་རི་མོའི་ལམ་ནས་མཚོན་བྱེད་ཅིག་ཡིན་པས། ནམ་ཡང་ཆོས་དང་འཇིག་རྟེན་གཉིས་ཀས་ཐུན་མོང་དུ་ལོངས་སུ་སྤྱད་བྱ་ཞིག་ཡིན་ཞིང་དེ་གཉིས་ཀྱི་ཕྱོགས་སུ་མ་ལྷུང་པར་གནས་དགོས་པ་ལྟ་ཅི་སྨོས། གལ་སྲིད་རྒྱལ་ཁབ་དེའི་ཡི་གེ་གང་ཞིག་ཆོས་ཕྱོགས་ཀྱི་བསམ་བློའི་སྟངས་འཛིན་ཚད་ལས་བརྒལ་བ་ཐེབས་སོང་ན་ཡི་གེ་དེས་གོང་བརྗོད་ཀྱི་བྱེད་ལས་རྣམས་ཇི་བཞིན་སྒྲུབ་པར་བྱེད་པ་ལ་འགལ་རྐྱེན་དུ་གྱུར་ཅིང་། གནོད་པས་བྱེ་བྲག་མི་སེར་དཀྱུས་མའི་འཚོ་བ་ནས་མགོ་རྒྱལ་ཁབ་སྤྱིའི་དོན་ཆེན་ལ་ཤིན་ཏུ་གནོད། མདོར་ན་ཡི་གེའི་ཚེ་སྲོག་ལ་གནོད་པ་ཡིན། ཡི་གེའི་ཚེ་སྲོག་ལ་གནོད་པ་ནི། རྒྱལ་ཁབ་དེའི་མི་རིགས་ཀྱི་ཚེ་སྲོག་ལ་གནོད་པ་ལྟ་སྨོས་ཀྱང་ཅི་དགོས།

དེས་ན་ང་ཚོས་ནམ་ཡང་ཡི་གེའི་སྟེང་འཛིན་དགོས་པའི་འདུ་ཤེས་གསུམ་ཡོད་པ་ནི། ངོ་བོ་ལ་བསམས་ན། སྨྱུག་རྩེ་ལས་རི་མོའི་གཟུགས་སུ་འཕོས་པའི་བེམ་གཟུགས་ཤིག་དང༌། བྱེད་ལས་ལ་བསམས་ན། གང་བརྗོད་པར་འདོད་པའི་དོན་གསལ་བྱེད་ཅིག ཁྱད་པར་ལ་བསམས་ན། མི་རིགས་དེའི་ཐུན་མིན་གྱི་ངོ་བོ་མཚོན་བྱེད་ཅིག་དང་མི་རིགས་དེ་གནས་མིན་གྱི་འགག་རྩ་ཞིག་ཡིན་པ་བཅས་ཡིན། ང་ཚོར་ཡི་གེའི་སྟེང་འཛིན་པའི་བསམ་བློ་དེ་ཙམ་ཡོད་ན་དེ་གས་མ་འཐུས་པ་མེད་ལ། དེ་ལས་ལྷག་འགྲེལ་བཤད་དང་བརྩི་མཐོང་གང་ཡང་དགོས་པ་མེད། ཡི་གེ་རྩ་ཆེན་པོ་ཡིན་པ་ཡང་བྱེད་ལས་དང་ཁྱད་པར་གཉིས་པོ་དེའི་སྟེང་ནས་འཇོག་དགོས་པ་ཁོ་ན་ཡིན་པར་ངོས་འཛིན་གསལ་པོ་ཞིག་ཚང་མས་ཡིད་འཇགས་ཐུབ་དགོས་སྙམ། དེ་མིན་ང་ཚོས་ཆོས་ཕྱོགས་དང་འབྲེལ་ནས་རྟོག་བློས་འགྲེལ་བཤད་སྣ་ཚོགས་པ་ཞིག་རང་བཟོ་བྱས་ནས་གུ་དོག་པོའི་བསམ་བློ་དང་ལག་ལེན་རྒྱ་འབྱམས་སུ་ཕྱིན་ཏེ། ཡི་གེ་ལ་བསམ་བློའི་གུ་ཡངས་དང་ལག་ལེན་གྱི་གུ་ཡངས་མི་སྟེར་བ་ནི་ང་ཚོ་གདོང་དམར་བའི་བོད་ཡིག་འདི་ཉིད་ཀྱི་འཕེལ་རྒྱས་ལ་གནོད་པའི་འགལ་རྐྱེན་ཆེ་ཤོས་ཤིག་ཡིན་པར་ཁོ་བོས་ངོས་འཛིན་བྱེད་ལ། ཐམས་ཅད་ཀྱིས་དེ་ལྟར་ངོས་འཛིན་གསལ་པོར་ཐུབ་སོང་ན་ད་གཟོད་བོད་ཡིག་འཕེལ་རྒྱས་ཀྱི་སྒོ་མོ་ཧ་ཅང་ཡངས་པོར་འགྱུར་བ་ཡིན།

ཁ་གསལ་དུ་བཏང་ནས་བརྗོད་ན་ང་ཚོའི་ཡི་གེ་འདིར་བོད་མི་རྣམས་ཀྱིས་ཐུབ་གསུང་གི་དགོངས་པ་ཇི་བཞིན་མ་ལོན་པར་ཆོས་ཕྱོགས་ཀྱི་བསམ་བློའི་སྟངས་འཛིན་ཚད་ལས་བརྒལ་བ་ཐེབས་སོང་བ་འདི་ནི། ང་ཚོའི་བོད་ཡིག་གི་འགལ་རྐྱེན་གཙོ་བོ་ཞིག་ཏུ་འཁུམས། ང་ཚོའི་བོད་ཡིག་འདི་དབྱིན་ཡིག་སོགས་ཀྱི་རྗེས་ཟིན་ནས་ཡོངས་ཁྱབ་ཏུ་དར་རྒྱས་འབྱུང་དགོས་པའམ་རྒྱུན་གནས་ཐུབ་དགོས་ན། ང་ཚོའི་བོད་ཡིག་འདིར་ཡང་ངེས་པར་དུ་དབྱིན་ཡིག་གི་གུ་ཡངས་རང་བཞིན་དང༌། བེད་སྤྱོད་རང་བཞིན། ཁྱབ་ཚད་རང་བཞིན་བཅས་རྣམ་པ་གསུམ་པོ་ལྡན་དགོས། དེ་མིན་ང་ཚོས་སྐད་ཡིག་སྲུང་སྐྱོབ་དང་མི་ཉམས་རྒྱུན་འཛིན་ཞེས་གནམ་ས་གང་བའི་སྐད་འབོད་བྱས་ཀྱང་ཕན་པ་མི་སྲིད་སྙམ། ང་ཚོས་སྐད་དང་ཡི་གེ་མི་ཉམས་རྒྱུན་འཛིན་འདོད་ན་ཡར་འཛིན་བསྡད་རྒྱུ་མ་ཡིན་པར་ངེས་པར་དུ་དེ་གཉིས་གུ་ཡངས་ངང་མར་གློད་གང་ཐུབ་བྱ་དགོས། རྒྱལ་ཁབ་བམ་མི་རིགས་ཤིག་ལ་མཚོན་ན། དེའི་ཡི་གེར་བཀོལ་སྤྱོད་ཀྱི་གུ་ཡངས་དང་རང་དབང་ཇི་ཙམ་ཡོད་པའམ་ཇི་ཙམ་ཁོ་རང་རང་དབང་གིས་གློད་ཐུབ་ན་དེ་ཙམ་གྱིས་འཕེལ་རྒྱས་སུ་འགྲོ་བ་དང་ཤུགས་ལ་མི་ཉམས་རྒྱུན་འཛིན་རང་བཞིན་གྱིས་འབྱུང་བ་ཡིན། ཡི་གེ་མི་ཉམས་རྒྱུན་འཛིན་ཞེས་པ་ང་ཚོའི་མེས་པོ་གླེན་ལྐུགས་འགའ་ཞིག་གི་བྱ་སྤྱོད་ལྟར་སྒམ་ནང་དུ་བཟུང་ནས་སྡོད་པ་དང་མཆོད་གཤོམ་དུ་བསྒྲིགས་ནས་བཞག་པ་དེ་འདྲ་གཏན་ནས་མིན་པ་འདྲ། ང་ཚོའི་ཟེར་སྒྲོས་ཀྱི་སྐྱབས་འགྲོའི་བསླབ་བྱ་དང་འབྲེལ་བའི་ཡི་གེ་བཀོལ་སྤྱོད་ལ་གུ་ཡངས་མི་སྤྲོད་པ་ནི་བསམ་བློའི་ངོས་ནས་རང་གི་ཡི་གེར་མཐོང་ཆེན་བྱེད་ཀྱིན་ཡོད་སྲིད་ཀྱང་དོན་དངོས་ཐོག་རང་གི་ཕུན་སུམ་ཚོགས་པའི་ཡི་གེ་འདིའི་རིང་གནས་ཀྱི་ཚེ་སྲོག་གཏུབས་དང་གཏུབ་བཞིན་ཡོད་པ་ནི་དངོས་བྱུང་ལོ་རྒྱུས་ཀྱིས་བདེན་དཔང་བྱས་དང་བྱེད་བཞིན་པ་ཡིན།

ཡི་གེ་ཞིག་ལ་མཚོན་ན་ཇི་ཙམ་གང་སར་མིག་མདུན་དུ་མཐོང་རྒྱུ་མང་བ་ཡོད་པ་དེ་ཙམ་གྱིས་ཡི་གེ་དེས་མི་ཚོར་རང་བཞིན་གྱིས་བག་ཆགས་ཤིག་འཇོག་འགྲོ་བའང་ཆོས་ཉིད་ཅིག་རེད།་དཔེར་ན། དབྱིན་ཇིའི་ཡི་གེ་ལ་མཚོན་ན། ཡུལ་དུས་གནས་སྐབས་གང་དུའང་མཐོང་རྒྱུ་ཡོད། མཐོ་རྒྱལ་ཁབ་ཀྱི་རྩ་ཁྲིམས་དང་དཔེ་མཛོད་ཆེན་མོ་ནས། དམའ་གད་སྙིགས་དང༌། སྲང་ལམ་ཛོར་པོའི་ཐོག་ཏུའང་མངོན་གསལ་ངང་ང་ཚོས་མཐོང་ཐུབ། ངང་ཚུལ་འདིས་མི་རྣམས་ལ་དབྱིན་ཡིག་ཅེས་ཟེར་དུས་བག་ཆགས་གཏིང་ཟབ་ཅིག་སྐྲུན་གྱིན་ཡོད། མ་ཟད་དུས་རབས་འདིར་ཅ་དངོས་ཤིག་ལ་མཚོན་ན་དབྱིན་ཡིག་གིས་མ་ཁྱབ་པ་ཕལ་ཆེར་མེད་ཟེར་ན་ཆོག་ལ། ཐ་ན་གསང་སྤྱོད་ཤོག་བུ་ལའང་དབྱིན་ཡིག་བྲིས་ཡོད་ལ་མི་རྣམས་ཀྱིས་ཀྱང་སྣང་བ་རྣམ་རྟོག་ཅི་ཡང་མེད་པའི་སྒོ་ནས་ཕྱི་ཤོག་ཏུ་བེད་སྤྱོད་བྱེད། མི་ཞིག་གིས་དབྱིན་ཇིའི་ཡི་གེས་འཕོངས་ཕྱིས་སོང༌། ཁ་ལུད་སྣབས་ལུད་ཕྱིས་སོང་ཟེར་ནས་འཕྱ་སྨོད་དང་འཁང་ར་བྱེད་མཁན་ཞིག་གཏན་ནས་མེད། འདི་ནི་དབྱིན་ཇིའི་མེས་པོ་ཚོས་རང་གི་སྐད་ཡིག་དར་ཁྱབ་འགྲོ་བའི་ཆེད་གུ་ཡངས་ཀྱི་བསམ་བློ་ལ་བརྟེན་ནས་བྱུང་བ་ཞིག་རེད། མི་ཚང་མ་གུ་ཡངས་དང་སྟབས་བདེ་ལ་ཤིན་ཏུ་དགའ་བའི་དུས་རབས་འདིར་གུ་ཡངས་རང་བཞིན་ལྡན་པའི་དབྱིན་ཇིའི་ཡི་གེ་ཤིན་ཏུ་དར་རྒྱས་འགྲོ་ཡིན་ཡོད། དོན་དངོས་ཐོག་བསམས་ན། དབྱིན་ཡིག་གིས་འཕོངས་ཕྱིས་པས་དབྱིན་ཡིག་ལ་གནོད་པ་མེད་པ་མ་ཟད། དེ་ཉིད་འཕེལ་རྒྱས་ལ་སྨན་པའི་མཐུན་རྐྱེན་གྱི་ཆ་ཤས་ཤིག་ཆགས་པ་ཡིན།

མདོ་དོན་ཡང་སྙིང་དཔེ་མཚོན་དེ་དག་གིས་གང་ཞིག་སྒྲུབ་འདོད་པ་ནི། ང་ཚོའི་བོད་ཀྱི་ཡི་གེ་འདིར་ཡང་དབྱིན་ཡིག་ལྟར་གུ་ཡངས་རང་བཞིན་ལྡན་དགོས་ཟེར་བ་ཡིན། གུ་ཡངས་རང་བཞིན་ལྡན་ཞེས་པའང་གཉིས་ཏེ། བསམ་བློ་གུ་ཡངས་དང༌། བཀོལ་སྤྱོད་གུ་ཡངས་བཅས་རྣམ་པ་གཉིས་སོ། །དེ་གཉིས་པོ་རྒྱུ་འབྲས་སུ་གནས་པ་ཡིན་གཤིས་དབྱིན་ཡིག་ལྟར་བཀོལ་སྤྱོད་གུ་ཡངས་ཡོང་བ་ལ་དང་ཐོག་ང་ཚོ་བོད་མིས་བོད་ཡིག་ཐོག་བཟུང་བའི་བསམ་བློ་དེ་གུ་ཡངས་བཟོ་དགོས་པ་གལ་གནད་དུ་མཐོང༌། ང་ཚོས་བོད་ཡིག་ཟེར་བ་དེ་བོད་མི་རིགས་ཀྱི་ངོ་བོ་ཡུན་དུ་གནས་མིན་གྱི་ཚེ་སྲོག་ཅིག་ཡིན་པར་ངོས་འཛིན་གྱི་བསམ་བློ་ངེས་ཤེས་འདྲོངས་པ་ཞིག་ཡོད་ན་བོད་ཡིག་ཐོག་བཟུང་བའི་བསམ་བློ་དེ་གས་ཆོག དེ་མིན་ཡི་གེའི་ཐོག་བཟུང་བའི་སྲོལ་རྒྱུན་ངན་པའི་བསམ་བློའི་འཆིང་རྒྱ་ལས་གྲོལ་མ་ཐུབ་པ་དེ་སྲིད་དུ་བོད་མི་རིགས་ཀྱི་ཡི་གེ་འདིའི་ཚེ་སྲོག་རྒྱས་མི་ཐུབ། ད་བར་ཕུན་སུམ་ཚོགས་པའི་བོད་ཡིག་འདིའི་ཚེ་སྲོག་ཤིན་ཏུ་ཉམ་ཆུང་དུ་གནས་པའང་བསམ་བློ་འདིས་བཟོས་པའི་བྱས་རྗེས་ནག་པོ་ཞིག་ཡིན་ལ་བོད་ཡིག་འཕེལ་རྒྱས་ཀྱི་བཀག་རྡོ་ཆེ་ཤོས་ཤིག་ཆགས་ཡོད།

ཁ་གསལ་དུ་བཏང་ནས་བརྗོད་ན། ང་ཚོའི་བསམ་བློའི་ནང་ཡི་གེ་ནི་སངས་རྒྱས་ཀྱི་སྤྲུལ་པ་ཡིན་པ་དང༌། ཆོས་དཀོན་མཆོག་ལ་སྐྱབས་སུ་སོང་ཕྱིན་ཆད་ཡི་གེ་ན་གཅིག་ཚུན་ཆད་ལ་ཆོས་དཀོན་མཆོག་གི་འདུ་ཤེས་བཞག་ནས་གོང་དུ་བཀུར་དགོས་པར་སེམས་བཞིན་ཡོད། གོང་དུ་བཀུར་ཞེས་པའི་དོན་ནི། བོད་ཡིག་ན་གཅིག་པུ་ཞིག་ཡིན་ཡང་རྐང་པས་འགོམ་པའམ་རྫི་མི་རུང་བ་དང༌། བཙོག་སར་འཇོག་པའམ་གཡུག་མི་རུང་བར་ནམ་ཡང་མཐོ་སར་འཇོག་ཅིང་གཙང་སར་འཇོག་དགོས་པ་སོགས་ཀྱི་དག་སྣང་ཆེ་བའི་བསམ་སྤྱོད་ཅིག་གམ་གུ་དོག་པོའི་བྱ་སྤྱོད་ཅིག་རེད། ང་ཚོའི་བོད་ཡིག་ནི་མིག་གིས་ལོངས་སྤྱོད་ཁོ་ན་མ་གཏོགས་ཡན་ལག་གཞན་གྱིས་ལོངས་སུ་སྤྱོད་མི་ཆོག་པའི་བཀའ་ཁྲིམས་ཤིག་བོད་ཡིག་གསར་གཏོད་གནང་བ་པོ་སློབ་དཔོན་ཐོན་མིས་གནང་མེད་ལ་ཆོས་རྒྱལ་བཀའ་དྲིན་ཅན་རིམ་བྱོན་གྱིས་ཀྱང་གཏན་ནས་མཛད་མེད་ནའང་གུ་དོག་པོའི་གནས་ཚུལ་དེ་ལྷག་པ་ནི། ཡབ་མེས་གོང་མ་རེ་ཟུང་གི་དག་སྣང་ཆེ་བའི་སྐད་ཆ་སྒྲ་ཇི་བཞིན་དུ་བཟུང་བ་དང༌། ཡང་འགའ་ཞིག་གིས་ལུང་དོན་མ་གོ་ནའང་རང་ཉིད་མཁས་མདོག་གིས་འགྲེལ་བཤད་ཅིག་བརྩམས་པར་བོད་མི་ཚོས་རི་བོང་ཅལ་འདྲོགས་ཀྱི་ངང་ཚུལ་བཟུང་བ་ལས་བྱུང་བ་གོར་མ་ཆག ཤིན་ཏུ་གུ་དོག་པོའི་བསམ་བློ་དེ་དག་ནི་བོད་ཡིག་འཕེལ་རྒྱས་ལ་གནོད་པའི་བསམ་བློའི་དུག་ཅིག་རེད་ཟེར་ན་མི་ཆོག་པ་མེད།

དེ་ཡང་སྟོན་པ་བཀའ་དྲིན་ཅན་གྱིས། ལྔ་བརྒྱ་མཐའ་མར་གྱུར་པ་ན། །ང་ཉིད་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་སྐྱེད། །ཅེས་བྱ་བའི་ཚིགས་སུ་བཅད་པ་དེས་ང་ཉིད་ཡི་གེའི་གཟུགས་སུ་གནས་ཞེས་སྤྱི་བམ་པ་ཞིག་ལས་ང་ཉིད་བོད་ཡིག་གཟུགས་སུ་གནས་ཞེས་གསུངས་མེད། ང་ཚོས་ལུང་དེ་རྒྱུ་མཚན་དུ་བྱས་ནས་དགོས་མེད་དུ་བོད་ཡིག་ཉིད་ཀྱི་མདུན་ལམ་འགོག་དགོས་དོན་ཅི། ཁ་ཐུག་བཤད་ན། ལུང་དེའི་དོན་དང་སྐྱབས་འགྲོའི་བསླབ་བྱ་ལས་ཡི་གེར་གོང་བཀུར་བྱ་དགོས་པར་གསུངས་པ་རྣམས་ཡི་གེ་སྤྱི་འབྱམས་ལ་གོ་རྒྱུ་མིན་པར། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་ཆོས་དཀོན་མཆོག་བརྗོད་བྱར་བྱས་པའི་ཡི་གེ་རྣམས་ལ་གོ་དགོས། དེ་ལྟའི་རང་བཞིན་ལྡན་ཕྱིན། བོད་ཡིག་གཅིག་པུ་མ་ཡིན་པར་དབྱིན་ཧིན་རྒྱ་བལ་སོགས་ཀྱི་ཡི་གེའི་རིགས་ཐམས་ཅད་ལ་ཆ་སྙོམས་ཐོག་ཆོས་དཀོན་མཆོག་གི་འདུ་ཤེས་ཀྱིས་བསམ་སྤྱོད་གཉིས་ཐད་ནས་ཕྱག་མཆོད་གོང་བཀུར་སོགས་སྐྱབས་འགྲོའི་བསླབ་བྱ་ལྟར་བྱ་དགོས་ངེས་རེད། བོད་ཡིག་གཅིག་པུར་འགྲེལ་བཤད་བྱེད་པ་སོགས་ནི་རང་ཉིད་གོ་རྒྱ་ཆུང་བའི་རང་མཚང་བསྟན་པ་ཙམ་དུ་ཟད། གཞན་ཡང༌། ཚིགས་སུ་བཅད་པ་དེས་སྟོན་པ་བཀའ་དྲིན་ཅན་རང་ཉིད་ཀྱིས་ཤེས་རིག་གི་རྨང་གཞི་ཡི་གེའི་སྦྱོར་བ་ལ་གདེང་འཇོག་ཧ་ཅང་ཚད་མཐོན་པོ་གནང་བ་མཚོན་ཕྱིར་དང་། རྗེས་འཇུག་རྣམས་ཀྱིས་ཀྱང་ཡི་གེའི་སྦྱོར་བ་ལ་ངེས་པར་དུ་བསླབ་དགོས་པར་གདམ་པའི་ཆེད་དུ་ཡི་གེ་ནི་རང་ཉིད་དང་དབྱེར་མེད་དོ། །ཞེས་དྲང་དོན་དགོངས་པ་ཅན་གྱི་གསུང་ཞིག་ཡིན་པ་ནི་མངོན་གསལ་ཡིན། དཔེར་ན། མདོ་ལས་ང་དེའི་ཚེ་དེའི་དུས་ན་སངས་རྒྱས་རྣམ་གཟིགས་སུ་གྱུར་ཏོ། །ཞེས་གསུངས་པ་བཞིན་ནོ།།

དེ་མིན་ཆོས་ཕྱོགས་ཀྱི་བརྗོད་བྱ་མིན་པར་དེ་ལས་གཞན་སྒྲུང་གཏམ་དང༌། སྙན་ངག དཔྱད་བརྗོད། བསྒྱུར་རྩོམ། འབོལ་རྩོམ་སོགས་བརྗོད་བྱར་བྱེད་པའི་བོད་ཡིག་གི་དེབ་དང་ཚགས་ཤོག་སོགས་ནི་ཇི་ལྟར་དབྱིན་ཡིག་བེད་སྤྱོད་བྱེད་པ་དེ་བཞིན་རང་ལུས་ཀྱི་ཡན་ལག་ཚང་མས་གང་འདོད་དུ་བེད་སྤྱོད་བྱས་ན་མི་ཆོག་པ་ཅི་ཡང་མེད་པ་མ་ཟད། མིག་གིས་ལོངས་སྤྱོད་གྲུབ་རྗེས་གང་འདོད་ལྟར་བེད་སྤྱོད་གཞན་དུ་བཏང་ན་ད་དུང་དགེ་མཚན་ཤིན་ཏུ་ཆེ། ང་ཚོས་ཉིན་རེའི་དབྱིན་ཇིའི་ཚགས་པར་ལ་བསམས་ན། དང་པོ་ང་ཚོས་ཐེངས་གཅིག་བཀླགས་ནས་ཉིན་རེའི་གནས་ཚུལ་རྒྱུས་ལོན་གྱིས་མཐོང་རྒྱ་ཐོས་རྒྱ་སྐྱེད་པ་སོགས་དགོས་སྙིང་གྲུབ་ཟིན་པའི་རྗེས་སུ་ཡང༌། རང་ཉིད་ཀྱི་དགོས་མཁོ་དང་བསྟུན་ཤོག་བུ་ཞིག་གི་འདུ་ཤེས་ཀྱི་སྒོ་ནས་བེད་སྤྱོད་གཞན་འདྲ་མིན་གཏོང་ཐུབ་ཀྱི་ཡོད་པས་མི་རྣམས་རང་བཞིན་གྱིས་དབྱིན་ཡིག་གི་ཚགས་དཔར་ཀློག་ཉོ་བྱེད་པར་དགའ་སྣང་དང་སྟབས་བདེ་པོ་ཚོར་གྱིན་ཡོད། ང་ཚོས་བོད་ཡིག་ཚགས་དཔར་ཞིག་ཉོས་ཤིང་། བཀླགས་ཚར་ན་མེར་བསྲེགས་གཏང་རྒྱུ་ལས་གཞན་བེད་སྤྱོད་གང་ཡང་ཡོང་གི་མེད། འདི་ནི་གོང་དུ་རྒྱས་པར་བརྗོད་པའི་གུ་དོག་པོའི་བསམ་བློ་དེས་བསྐྱེད་པའི་མཇུག་འབྲས་ཤིག་རེད། མདོར་ན་ང་ཚོ་རང་ཉིད་ཀྱིས་རང་ཉིད་ལ་དོན་མེད་དུ་གྱོང་ཁུར་བའམ་གྱོང་སྤྲོད་ཀྱིན་པ་ཁོ་ན་རེད།

དེ་བཞིན་དབྱིན་ཇི་བ་ཚོས་དབྱིན་དེབ་ཅིག་བཀླགས་ནའང་དེབ་ཅིག་ཡིན་པའི་འདུ་ཤེས་ཀྱི་ཐོག་ནས་ཀློག་གི་ཡོད་ལ་བེད་སྤྱོད་ཀྱང་བྱེད་ཀྱི་ཡོད། ཁོང་ཚོས་ཡི་གེ་ལ་ཡི་གེའི་འདུ་ཤེས་མ་གཏོགས་དེ་ལས་ལྷག་དག་སྣང་གང་ཡང་མི་བྱེད། ལྟ་ཚུལ་དེས་ཁོང་ཚོར་ཁེ་བཟང་ཞེ་དྲག་ཐོབ་ཡོད་པ་ནི་དངོས་ཡོད་གནས་ཚུལ་རྟོགས་སླ་བ་ཞིག་ཡིན། ང་ཚོས་དུས་དེབ་དང་བརྩམས་དེབ་དང་ཚགས་པར་སོགས་གང་ཞིག་ཡིན་ཡང་བག་ཆགས་ངན་པའི་དབང་གིས་དཔེ་དེབ་ཅིག་ཁོ་ན་ཡིན་པའི་འདུ་ཤེས་དེ་སླེབ་མི་ཐུབ་དུས་ཡར་མར་འཁྱེར་འཇོག་ལ་སྟབས་མི་བདེ་བའི་སུན་སྣང་སྐྱེ་ཡི་ཡོད། དེས་མི་མང་པོར་བོད་ཡིག་གི་དེབ་དང་ཚགས་པར་སོགས་མཐོང་དུས་གུ་དོག་པོའི་ཚོར་སྣང་དང་ཉོབ་སྣང་ཞིག་རང་བཞིན་གྱིས་སྐྱེ་ཡོང༌། དེ་ལས་ཀྱང་དབྱིན་དེབ་ཅིག་ལ་མཚོན་ན། ཀློག་སྙིང་འདོད་ན་ཀློག དེ་མིན་བཀླགས་མཚམས་སུ། ས་ལ་གཞག་སྙིང་འདོད་ན་འདྲ། རྐང་པའི་ལྷམ་ཕྱི་སྙིང་འདོད་ན་འདྲ། རྐུབ་ལ་གདན་ཚབ་ཏུ་གདིང་སྙིང་འདོད་ན་འདྲ། དེ་བཞིན་ལག་པ་ཕྱི་སྙིང་འདོད་ན་འདྲ། ཐ་ན་གསང་ཤོག་གི་ཚབ་ཏུ་བེད་སྤྱོད་བྱ་སྙིང་འདོད་ན་འདྲ། རང་གིས་གང་འདོད་ལྟར་བཀོལ་སྤྱོད་བྱེད་བཞིན་པ་ནི་ཡོངས་ཁྱབ་མངོན་སུམ་འཛེམས་མེད་ཀྱི་གནས་ཚུལ་ཞིག་ཆགས་ཡོད། བཞག་ན་འཇོག་བདེ་བ། གཡུགས་ན་གཡུག་བདེ་བ། ཁྱེར་ན་འཁྱེར་བདེ་བ། ཉར་ན་ཉར་བདེ་བ་སོགས་མདོར་ན་དབྱིན་དེབ་དང་དབྱིན་ཚགས་རྣམས་ནི། བེད་སྤྱོད་མང་བ། སྟབས་བདེ་ཆེ་བ། གུ་ཡངས་ཀྱི་རང་བཞིན་ཆ་ཚང་ལྡན་པའི་ཁྱད་ཆོས་ཡོད་པ་འདིས། འདི་ལྟར་མི་རྣམས་རང་བཞིན་གྱིས་དབྱིན་ཡིག་ལྟ་ཀློག་ལ་དགའ་སྤྲོ་གཞན་ལས་ཆེ་བ་བསྐྲུན་པ་རེད་ལ། འདི་ཉིད་དབྱིན་ཡིག་དར་ཁྱབ་ཀྱི་རྒྱུ་མཚན་གཙོ་བོའམ་གཞི་རྩ་དང་པོའི་དང་པོ་དེ་ཡིན་པར་སེམས། དེས་ན་ང་ཚོས་དབྱིན་ཡིག་དར་ཁྱབ་ཀྱི་རྒྱབ་ལྗོངས་དང་ཕུག་གམ་ཐོག་མའི་རྒྱུ་མཚན་འདི་དག་ལ་བསམ་གཞིག་ཡང་ཡང་བཏང་ནས་དེ་དོན་ཧ་གོ་བའི་ཐོག་ང་ཚོའི་བོད་ཡིག་འདི་བེད་སྤྱོད་བྱས་པ་ཡིན་ན་གདོང་དམར་བོད་པའི་ཡི་གེ་འདིའི་སྐྱེད་ཚལ་སྔར་ལས་རྒྱས་ཤིང་མཛེས་སྡུག་རྣམ་པར་བཀྲ་བ་གདོན་མི་ཟ་སྙམ།

ཐོག་མར་ཆོས་རྒྱལ་སྲོང་བཙན་སྒམ་པོས་བོད་ཕྲུག་ཤེས་རབ་ཅན་འགའ་ཞིག་རྒྱ་གར་དུ་ཡི་གེ་བསླབ་ཏུ་གཏང་རྒྱུའི་ཐུགས་བསམ་དེ་ཡང་རྒྱལ་ཁབ་ཀྱི་འཛིན་སྐྱོང་བརྟན་བརླིང་ཡོང་བ་དང༌། གཞན་གྱི་ཡི་གེ་གཡར་བའམ་གཞན་གྱི་ཡི་གེ་ལ་སྐྱབས་འཇུག་ཞུ་མི་དགོས་པར་རང་གི་ཡི་གེ་ཞིག་གཞུང་དམངས་ཀུན་གྱིས་བེད་སྤྱོད་བྱ་རྒྱུ་བྱུང་ན་འཕྲལ་ཕུགས་གང་ལའང་དགེ་མཚན་ཤིན་ཏུ་ཆེ་བར་དགོངས་ནས་ཐོག་མར་བོད་ཡིག་གསར་བཟོའི་ཐུགས་སྐྱེད་དེ་བྱུང་བ་ཡིན་པར་ལོ་རྒྱུས་རྣམས་སུ་གསལ་བ་ལྟར་རེད། ང་ཚོས་ད་དུང་ཐ་ན་རང་གི་སྟབས་བདེའི་འབོལ་གདན་སོགས་ལ་སོ་སོའི་མིང་ཙམ་ཞིག་བྲིས་ན་ཡང་དབྱིན་ཡིག་སོགས་གཞན་གྱི་ཡི་གེ་གཡར་ནས་འབྲི་བའམ། བཤད་སྟངས་གཞན་ཞིག་ལྟར་ན་རང་ལ་ཕུན་སུམ་ཚོགས་པའི་ཡི་གེ་ཞིག་ཡོད་བཞིན་དུ་གཞན་གྱི་ཡི་གེ་ལ་སྐྱབས་འཇུག་ཞུ་བ་ནི། ངོ་མ་ཡིད་སྐྱོ་དགོས་པ་ཞིག་རེད། 

བཙན་པོ་སྲོང་བཙན་དང་སློབ་དཔོན་ཐོན་མིས་བོད་ཡིག་འདི་བེད་སྤྱོད་གཏོང་བའི་ཕྱིར་བཟོས་པ་ཞིག་ཡིན་པ་ལས་མཆོད་གནས་ཤིག་ཏུ་བཟོས་པ་ག་ལ་ཡིན། སློབ་དཔོན་ཐོན་མིས་དཀའ་ངལ་མང་པོ་ཁྱད་དུ་བསད། ངལ་བ་མང་པོ་དང་དུ་བླངས་ནས་བསྐྲུན་པའི་བོད་ཡིག་འདི་མདོར་བསྡུས་ནས་བཤད་ན་ང་ཚོ་བོད་རིགས་ཚོས་ཚད་བཀག་གང་ཡང་མེད་པའི་ཐོག་ནས་བེད་སྤྱོད་གཏོང་བའི་ཕྱིར་དུ་བཟོས་པ་ཞིག་ཡིན་པ་ཐམས་ཅད་ཀྱིས་མཁྱེན་དགོས། བེད་སྤྱོད་གཏོང་བའི་ཕྱིར་བཟོས་པ་དེ་བེད་སྤྱོད་མ་བཏང་ན་ནམ་ཞིག་རྩ་མེད་དུ་འགྲོ་བའི་ཉེན་ཁ་ཡོད་པ་ནི་ཆོས་ཉིད་ཡིན། གནའ་ནས་ད་བར་འཛམ་གླིང་འདིའི་སྟེང་ཡིག་རིགས་མི་འདྲ་བ་སྟོང་ཕྲག་མང་པོ་བྱུང་ཡོད་པའི་ལོ་རྒྱུས་མཆིས་ནའང༌། དེ་དག་ལས་མང་པོ་ཞིག་མིང་ཙམ་ལས་མཐོང་རྒྱུ་མེད་པར་གྱུར་པ་ནི། ཡི་གེ་དེ་དག་བེད་སྤྱོད་མ་བྱས་པ་དང༌། བེད་སྤྱོད་བྱེད་མ་བཅུག་པ། བེད་སྤྱོད་བྱེད་མཁན་མེད་པ་སོགས་ལ་བརྟེན་ནས་རིམ་བཞིན་ཉམས་སོང་བ་ཞིག་ཡིན་པར་རྗེས་སུ་དཔོག་ཐུབ། དེར་བརྟེན་ང་ཚོས་བོད་ཡིག་འདིའི་ཚེ་སྲོག་ཡུན་གནས་སུ་འདོད་ན་ངེས་པར་དུ་ཚད་བཀག་གང་ཡང་མེད་པའི་ཐོག་ཧ་ཅང་གུ་ཡངས་ཀྱི་ངང་ནས་བེད་སྤྱོད་བྱེད་དགོས།

སྐབས་འདིར་ངས་དཔེ་མཚོན་ཞིག་བཀོད་ན། སྔོན་མི་དབུལ་པོ་ཞིག་ལ་རང་གི་བླ་མས་འབྲས་ཀྱི་ས་བོན་ཁྱོར་བ་གང་སྤྲད་ནས་ཁྱོད་ཀྱིས་ས་བོན་འདི་ཞིང་ལ་ཐོབ་དང་ལོ་ཏོག་ཕུན་སུམ་ཚོགས་པ་བྱུང་ནས་མ་འོངས་པར་ཁྱོད་རང་གི་འཚོ་བ་ལ་དཀའ་ངལ་མེད་པར་འགྱུར་རོ་ཞེས་བཀའ་བསྩལ། སྤྲང་པོ་དེ་ནང་དུ་སླེབ་སྐབས་འདི་ནི་ངའི་རྩ་བའི་བླ་མས་བསྩལ་བ་ཡིན་པས་ས་ལ་འདེབས་ག་ལ་རུང་ཞེས་འབྲས་ཀྱི་ས་བོན་ཞིང་ལ་གདབ་རྒྱུའི་ཚབ་ལ་མཆོད་གཤོམ་དུ་བསྒྲིགས་ནས་ཉིན་ལྟར་མཆོད་པ་འབུལ་བ་དང་ཕྱག་འཚལ་བའི་རྟེན་རྩ་ཆེན་ཞིག་ཏུ་བྱས། འོན་ཀྱང་ཡུན་རིང་མ་འགོར་བར་འབྲས་ཚང་མར་འབུ་བརྒྱབ་པ་དང་སྤུ་ནག་ཟིང་ཟིང་ཐོན་ནས་རུལ་བ་ན་འགྱོད་ཀྱང་ཕྱིས་དྲགས་སོང་ཞེས་ངུ་དགོས་བྱུང་བ་རེད། དཔེ་དེ་བཞིན་དུ་ང་ཚོས་ཀྱང་བཀའ་དྲིན་ཅན་གྱི་ཐོན་མིས་བེད་སྤྱོད་གཏོང་བའི་ཕྱིར་བཟོས་པའི་བོད་ཡིག་འདི་བེད་སྤྱོད་གཏོང་དགོས་པ་མ་གཏོགས་རྨོངས་དད་བྱས་ནས་འགྲེལ་བཤད་སྣ་ཚོགས་པ་ཞིག་བརྒྱབ་ནས་བསྡད་པ་ཡིན་ན། གོང་གི་སྒྲུང་ཐུང་དེ་བཞིན་མ་འོངས་པར་འགྱོད་པ་སྐྱེ་དགོས་པ་ཞིག་ཡོང་རྒྱུ་གཏན་འཁེལ་བ་མ་རེད་དམ། ཁྱེད་ཀྱིས་ཐུགས་བསམ་ཞིག་བཞེས་དང་གྲོགས་པོ་ལགས། 

གཞན་ཡང༌། གལ་སྲིད་ང་ཚོར་རང་སྐྱོང་གི་དུས་ཤིག་མགྱོགས་མྱུར་ཤར་སོང་ན་དེའི་ཚེ་སོ་སོའི་སྐད་དང་སོ་སོའི་ཡི་གེ་གཙོ་བོར་བེད་སྤྱོད་བྱ་རྒྱུའི་ང་ཚོའི་རེ་སྨོན་མངོན་དུ་གྱུར་པ་ཡིན་པས། དེའི་ཚེ་སོ་སོའི་རྒྱལ་ཁབ་ལ་དབང་སྒྱུར་མཁན་གྱི་སྐད་ཡིག་གཙོ་བོ་ནི་བོད་མི་རིགས་རང་གི་སྐད་ཡིག་གཉིས་ཡིན་པ་སྨོས་ཅི་དགོས། དེར་བརྟེན་དེའི་ཚེ་ང་ཚོས་བོད་ཡིག་བེད་སྤྱོད་དེ་གོང་བཤད་ཀྱི་བསམ་བློ་གུ་དོག་དང་ལག་ལེན་གུ་དོག་ལས་ལྡོག་ནས་བསམ་བློ་གུ་ཡངས་དང་བཀོལ་སྤྱོད་གུ་ཡངས་བཅས་གཞི་རྩ་གཉིས་ཀྱི་ཐོག་ནས་འགྲོ་ཐུབ་པ་ཡོང་ཆེད་ད་ལྟ་ནས་ཚང་མས་ཧུར་བརྩོན་སྐྱེད་དགོས། ང་ཚོས་དེའི་ཚེ་རང་གི་རྒྱལ་ཁབ་ཀྱི་བཟོ་གྲྭ་ནས་བཏོན་པའི་ཐ་ན་ལྷམ་གོག་དང་བསིལ་ལྷམ། གསང་དོར་དང་གསང་ཤོག་ཚུན་ཆད་ལ་ཁོངས་སོ་སོའི་བཟོ་གྲྭའི་མིང་དང༌། ཚད་གཞི། རིན་གོང་སོགས་བོད་ཡིག་ཐོག་འབྲི་དགོས་ངེས་ཡིན། འོན་ཀྱང་དེའི་ཚེ་ད་དུང་གླེན་རྨོངས་པ་ཁ་ཅིག་གིས་ང་ཚོའི་བོད་ཡིག་རྩ་ཆེན་པོ་ཡིན་པས་ལྷམ་གོག་དང་གསང་དོར་སོགས་ལ་བྲིས་ན་གཏན་ནས་མི་འགྲིག་ཅེས་གུ་དོག་པོའི་བསམ་བློ་འཁོར་སོང་ན། ང་ཚོའི་མི་རིགས་འདིའི་ཚེ་སྲོག་རྒྱ་སྐྱེད་ལ་བཀག་རྡོ་དེ་ལས་ཆེ་བ་མེད་པས་ད་ལྟ་ནས་རིམ་བཞིན་ལག་ལེན་དོན་ཐོག་ཏུ་བཀལ་ནས་བསམ་བློ་གུ་ཡངས་དང་བཀོལ་སྤྱོད་གུ་ཡངས་གཉིས་པོར་གོམས་འདྲིས་ཤུགས་ཆེར་བྱེད་ཐུབ་དགོས། དེ་ལྟ་ན་མ་འོངས་པར་རང་ཡུལ་རང་ལ་བདག་པའི་སྐལ་བཟང་གི་དུས་སྐབས་དེའི་ཚེ་ན་དཀའ་ངལ་གང་ཡང་མེད་པར་རང་སྲིད་རང་གིས་འཛིན་སྐྱོང་ལྷུག་པོར་བྱེད་ཐུབ། རྒྱལ་ཁབ་དང་སྤྱི་ཚོགས་གཞན་དང་མཉམ་དུ་དཔུང་པ་མཉམ་གཤིབས་ཀྱིས་བསྐྱོད་ཐུབ།

ད་དུང་དོན་གནད་འདི་གོ་སླ་བའི་ཕྱིར་དཔེ་མཚོན་ཁ་ཤས་བཀོད་ན། ང་ཚོས་རྒྱུན་ལྡན་དུ་མཐོང་བཞིན་པ་འགའ་དཔེ་མཚོན་དུ་འགོད་ཆོག དེ་ཡང་ཚོང་ཁང་དང་མགྲོན་ཁང་དང་དེ་བཞིན་མཐུན་རྐྱེན་ཅུང་ལེགས་པའི་སྒེར་ཁང་སོགས་ཀྱི་མདུན་དུ་ལྷམ་བརྡར་འགྱིག་ལྷེབ་བམ། རས་ལྷེབ་གྲུ་བཞི་དེ་ཡི་སྟེང་དབྱིན་ཡིག་ཐོག  (Welcome)ཝེལ་ཁམ་ཞེས་བྲིས་ཡོད་པ་ནི་བོད་ཡིག་ཐོག་བསྒྱུར་ན་བྱོན་པ་ལེགས་སོའི་འཚམས་འདྲི་མཚོན་བྱེད་ཅིག་རེད། དེ་བཞིན་ང་ཚོས་ཀྱང་རང་ཁྱིམ་གྱི་སྒོ་ཐེམ་མདུན་དུ་དེ་ལྟའི་ལྷམ་གོག་ཕྱི་བརྡར་བྱེད་སའི་འགྱིག་ལྷེབ་འཇོག་དགོས་ན། དེ་ཡི་སྟེང་དབྱིན་ཡིག་གི་ཚབ་ཏུ་ངེས་པར་རང་གི་བོད་ཡིག་ཐོག་བྱོན་པ་ལེགས་ཞེས་བྲིས་ན་དགེ་མཚན་ཤིན་ཏུ་ནས་ཆེ་སྙམ། ཡང་ན་བཀྲ་ཤིས་བདེ་ལེགས་ཞེས་བྲིས་ནའང་ཤིན་ཏུ་རིགས་ཤིང་འཐད། དེ་བཞིན་བླ་ཆེན་མི་ཆེན་སོགས་གདན་འདྲེན་ཞུ་སྐབས་ས་ལ་བཀྲ་ཤིས་རྟགས་བརྒྱད་སོགས་ཀྱི་རི་མོ་བྲིས་ནས་སྣེ་ལེན་ཟབ་རྒྱས་ཞུ་ཡིན་ཡོད་པ་དང་ཆབས་ཅིག་བོད་ཡིག་ཐོག་ཡིད་འཕྲོག་པའི་ཤིས་ཚིག་ཚིགས་སུ་བཅད་པའམ་ལྷུག་མ་འགའ་རི་མོ་དང་འབྲེལ་ནས་བྲིས་པ་ཡིན་ན། དེ་ནི་ཐད་ཀར་བལྟས་ན་ཤིན་ཏུ་བྱ་དཀའ་བ་དང་ཆེས་རླབས་ཆེན་གྱི་བྱ་གཞག་ཅིག་མིན་ནའང་ང་ཚོའི་བོད་ཡིག་འདིར་དགེ་ཕན་ལྡན་པའི་ལས་ཤིག་ཡིན།

དང་ཐོག་ངས་སྐད་ཆ་འདི་འདྲ་ཞིག་བཤད་པ་དང་ཁྱེད་ཀྱིས་རྩོམ་འདི་འདྲ་ཞིག་ཀློག་སྐབས། ང་ཚོའི་མཐོང་རྒྱ་ཐོས་རྒྱ་ཆུང་བའི་མི་རབས་གོང་མ་འགའ་ཞིག་གི་བསམ་བློ་ཞན་པའི་དབང་བསྒྱུར་འོག་ཆུད་པའི་གོམས་གཤིས་རྒྱུན་འབྱམས་སུ་སོང་ཡོད་པ་ལ་བརྟེན་ནས་སེམས་ལ་ཚོར་སྣང་དོག་མི་བདེ་བ་ཞིག་འབྱུང་བ་ནི་ཆོས་ཉིད་ཅིག་ཏུ་འཁུམས། མ་ཟད་དོན་དངོས་ལག་ལེན་དུའང་བོད་ཡིག་གི་བེད་སྤྱོད་དེ་དབྱིན་ཡིག་ལྟར་གུ་ཡངས་རང་བཞིན་ཅན་ཞིག་ཏུ་བསྐྲུན་པ་ལ་ཐོག་མར་སྟབས་བདེ་མིན་གྱི་གནས་ཚུལ་སོགས་ཀྱི་དཀའ་སྣང་ཅུང་ཟད་ཡོང་སྲིད་པའང་ཤེས་ཀྱི་ཡོད། འོན་ཀྱང༌། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་པ་ལྟར་དཀའ་ངལ་ལ་གདོང་ལེན་རྒྱུན་མཐུད་བྱེད་ཐུབ་ན་རིམ་བཞིན་ཡར་རྒྱས་འགྲོ་ངེས་སྙམ། བྱེད་ནུས་ཁྱད་པར་ཅན་ལྡན་པའི་བོད་ཡིག་འདི་རང་གི་མི་རིགས་འདིས་དགའ་བཞིན་སྤྲོ་བཞིན་གང་འདོད་དུ་ལོངས་སུ་སྤྱོད་པའི་སྐལ་བཟང་ཞིག་འཆར་བ་ལ། དུས་ད་ལྟ་ནས་ང་ཚོས་ཉི་མ་རེ་རེའི་འཚོ་བའི་ནང་བོད་ཡིག་འདི་དབྱིན་ཡིག་ལྟར་བེད་སྤྱོད་བྱེད་དགོས་པའི་དགོས་པ་དང་རྒྱུ་མཚན་རྣམས་ཤེས་པའི་ཐོག་ནས་བོད་ཡིག་བཀོལ་སྤྱོད་བྱ་རྒྱུ་འགོ་འཛུགས་བྱེད་དགོས།

དེ་ལྟར་ང་ཚོས་དགོས་མེད་བཀག་རྡོར་གྱུར་པའི་བག་ཆགས་རྙིང་པ་དང་འགྲེལ་བརྗོད་ཡ་མ་བརླ་དེ་དག་གཞི་མེད་རྩ་བྲལ་དུ་བཏང་ནས་སོ་སོའི་མི་རིགས་འདིའི་དགེ་མཚན་ལ་སྨན་པའི་བསམ་བློ་དང་ལག་ལེན་ཟུང་འབྲེལ་གྱིས་ད་ལྟ་ནས་མདུན་སྐྱོད་བྱེད་དགོས་པ་ཡིན། ཡང་ན་དེང་དུས་ཀྱི་བསམ་བློ་བ་འགའ་ཞིག་གི་བཤད་སྟངས་ལྟར་ན། དང་པོ་རང་ཉིད་ནས་འགོ་རྩོམ་དགོས་པ་ཡིན། ངས་ཀྱང་སྟོང་བཤད་ཙམ་མ་ཡིན་པར་དཔེ་ཁྲིད་དང་ཆོས་རའི་སྐབས་གདིང་རྒྱུའི་སྟབས་བདེའི་འབོལ་གདན་གྲུ་བཞི་མ་དེའི་སྟེང་དུ་རང་མིང་རང་གི་ཡི་གེའི་ཐོག་ནས་བྲིས་ཡོད། གསལ་པོར་བཤད་ན། བོད་ཡིག་ཐོག་རང་ཉིད་ཀྱི་མིང་དང་མིང་གཞུང་ཨང་གྲངས་བཅས་བྲིས་ཡོད། རང་ལ་སློབ་དཔོན་ཐོན་མིའི་བཀའ་དྲིན་ལ་བརྟེན་ནས་བེད་སྤྱོད་གཏང་རྒྱུའི་ཕུན་སུམ་ཚོགས་པའི་བོད་ཡིག་ཅིག་ཡོད་བཞིན་དུ་ངས་དབྱིན་ཡིག་གཡར་དགོས་དོན་མི་འདུག འགའ་ཞིག་གིས་བྱ་སྤྱོད་འདིར་ཧང་སང་སང་གིས་མིག་འབུར་ཚུགས་སུ་ལྟ་བ་དང༌། འགའ་ཞིག་གིས་སྐྱབས་འགྲོའི་བསླབ་བྱ་དང་འགལ་ལོ་ཞེས་ཅ་ཅོ་སྒྲོག འགའ་ཞིག་གིས་ཅི་ཡང་མི་སྨྲ་བར་སྒམ་ཚུགས་འཛིན། འགའ་ཞིག་གིས་ལེགས་སོ་ཞེས་ཁ་གཡང་སྒྲོག གང་ལྟར་ངས་ནམ་ཡང་བོད་ཡིག་སློབ་སྦྱོང་དང༌། བོད་ཡིག་བེད་སྤྱོད། བོད་ཡིག་འཕེལ་རྒྱས་གསུམ་ནི་མེད་ན་མི་འབྱུང་གི་འབྲེལ་བ་གྲུབ་ཡོད་པར་འདོད་ཀྱི་ཡོད། 

ང་ཚོས་བོད་ཡིག་གི་སུམ་རྟགས་དག་གསུམ་སྦྱོང་བ་དང་རྩོམ་ཡིག་སྤེལ་བ་སོགས་ནི་བོད་ཡིག་སྦྱོང་བ་ཙམ་ཡིན་པ་ལས་དོན་ངོ་མའི་བོད་ཡིག་བེད་སྤྱོད་བྱེད་པ་ཞིག་གི་གོ་ཆོད་ཀྱི་མེད། བོད་ཡིག་བེད་སྤྱོད་བྱེད་ཅེས་པ་ནི་ཡི་གེ་འབྲི་དགོས་པའི་ཅ་དངོས་གང་འདྲ་ཞིག་ཡིན་ནའང་དེའི་སྟེང་དུ་གང་སྦྱངས་པའི་བོད་ཡིག་དེ་འབྲི་བའམ་བྲི་རུ་བཅུག་པ་དེ་ཡིན། དཔེར་ན་གོང་དུ་བཤད་པའི་དཔེ་མཚོན་དེ་དག་བཞིན་ནོ།། དེ་ལྟར་བོད་ཡིག་སློབ་སྦྱོང་དང་བོད་ཡིག་བེད་སྤྱོད་གཉིས་པོ་ཡོད་ཚར་ནས་བཟུང་བོད་ཡིག་འཕེལ་རྒྱས་ཀྱང་རང་བཞིན་གྱིས་བྱུང་བ་ཡིན་པས། རང་ཉིད་ཀྱིས་བོད་ཡིག་སྦྱངས་ཤིང་ཤེས་པའི་རྗེས་སུ་བེད་སྤྱོད་མ་བྱས་པ་ཡིན་ན་བོད་ཡིག་འཕེལ་རྒྱས་དགོས་ཞེས་གནམ་ས་རལ་བའི་འུར་སྒྲ་བསྒྲགས་ཀྱང་ཕན་ཐོགས་གང་ཡང་མེད། དེར་བརྟེན་མདོར་ན། དང་པོ་རང་ཉིད་ནས་འགོ་མ་བརྩམས་པའི་སྐད་ཆ་ཐམས་ཅད་ནི་མགོ་བསྐོར་དང་སྙིང་པོ་མེད་པ་ཞིག་ཡིན་སྟབས། ངས་ཀྱང་བོད་ཡིག་ཐོག་བཟུང་བའི་བསམ་འཆར་འདི་སྤེལ་བ་དང་ཆབས་ཅིག་རྩོམ་ཡིག་འདིའི་ནང་དོན་དང་མཐུན་པར་དང་པོ་རང་ཉིད་ནས་འགོ་བརྩམས་ཟིན་པ་ཞིག་ཡིན།

མདོར་ན་ང་ཚོའི་བོད་ཡིག་འདི་མཐོ་ཁང་པའི་སྒོ་བྱང་ལ་འབྲི་ཆོག་ལ། དམའ་ཐེམ་སྐས་མདུན་གྱི་ལྷམ་བརྡར་སྟེང་བྱོན་པ་ལེགས་སོའི་འཚམས་འདྲིར་ཡང་འབྲི་རུང༌། ང་ཚོའི་བོད་ཡིག་འདི་སྦུག་མཆོད་གཤོམ་དང་དཔེ་ཁྲིའི་སྟེང་མཆོད་འབུལ་གྱི་གནས་བྱེད་ཆོག་ལ། ཕྱི་གད་སྙིགས་དང་རྫབ་དོང་གི་ནང་དུ་གཡུག་པའམ་སྲང་ལམ་དུ་ཡན་གར་བོར་ཆོག་པའང་ཡིན། ང་ཚོའི་བོད་ཡིག་འདིར་གུས་བཀུར་གྱིས་ཐོད་པ་གཏུག་ཆོག་ལ། སྣང་མེད་དུ་རྐང་པས་བརྫིས་ནའང་ཆོག དེ་ལྟ་ན་ང་ཚོའི་བོད་ཡིག་འདི་འབྲི་མི་རུང་ས་ཞིག་གཏན་ནས་མེད། བོད་ཡིག་དང་ལྡན་པའི་ཚགས་ཤོག་དང་དཔེ་དེབ་སོགས་ཅ་དངོས་ཤིག་ཡིན་ན་ཡང་རང་གིས་གང་འདོད་ལྟར་བེད་སྤྱོད་གཉིས་པ་དང་གསུམ་པ་སོགས་བྱེད་པར་བཀའ་རྒྱ་གང་ཡང་མེད་པས་ཅི་དགར་ལོངས་སུ་སྤྱོད་ཆོག

ཡང་སྙིང་བོད་ཡིག་ཅེས་པ་འདི་རང་གི་ཁོར་ཡུག་ཆུང་ཆུང་ཞིག་ལས་མེད་ནའང་གང་སར་མཐོང་ཐུབ་པ་ཞིག་དང་བཀླག་རྒྱུ་ཡོད་པ་ཞིག་བཟོ་དགོས། དེས་ང་ཚོ་དང་ང་ཚོའི་མ་འོངས་ཚ་རྒྱུད་ཚོར་བག་ཆགས་གཏིང་ཟབ་ཅིག་རང་བཞིན་གྱིས་བསྐྲུན་ངེས། ང་ཚོའི་སྤྱི་སྒེར་གྱི་ཚོགས་པ་མང་པོས་འགེངས་ཤོག་དང་གསལ་བསྒྲགས་དེ་བཞིན་སྙན་ཞུ་སོགས་བོད་ཡིག་ཐོག་འབྲི་དགོས་པའི་སྐུལ་འདེད་དང་སྒྲིག་གཞི་སོགས་བྱུང་དང་འབྱུང་བཞིན་པ་ནི་ཆེས་ཤིན་ཏུ་དགའ་འོས་པ་ལོས་ཡིན་མོད། ད་དུང་དེ་ཙམ་གྱིས་རྩ་བ་ཉིད་ནས་འགྲིགས་མེད། གོང་བརྗོད་གཞི་རྩའི་གནད་འགག་འདི་དག་ལ་དོ་སྣང་ངེས་པར་དུ་བྱེད་དགོས་པ་ཡིན། གསལ་པོར་བརྗོད་ན། ང་ཚོའི་མི་རབས་འདིས་བོད་ཡིག་ཐོག་བཟུང་བའི་བསམ་བློ་ལ་དག་ཐེར་དང་ལག་ལེན་ལ་དག་ཐེར་ཡར་རྒྱས་ངེས་ཅན་ཞིག་གཏོང་མ་ཐུབ་ན། ལས་འགུལ་གཞན་ག་ཚོད་སྤེལ་ཀྱང་རྩ་བ་རུལ་བའི་ཤིང་སྡོང་བཞིན་གནས་སྐབས་ཙམ་ལས་རྐང་ཚུགས་པའི་ཕན་འབྲས་འབྱུང་མི་སྲིད་པ་ཚང་མས་ཡིད་འཇགས་མཛད་དགོས་པ་འདུག་གོ། 

འབྲོང་ངུར་ཆོས་རྗེ་མཚོ་བྱུང་དགྱེས་པའི་དབང་པོ་རུ་འབོད་པས།

སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་དུ་བྲིས།