འབར་མ་དང་ཨ་སམ་དོན་རྐྱེན་གྱིས་བོད་པ་ཚོ་དཀའ་ཉེན་ལ་གཏད།

ཉེ་ལམ་འབར་མའི་ནང་ཁ་ཆེ་དང་ནང་པའི་བར་རྙོག་དྲ་ཞིག་བྱུང་ཡོད་པ་དང་། དེ་བཞིན་ཟླ་སྔོན་མའི་ནང་རྒྱ་གར་བྱང་ཤར་ཨ་སམ་ནང་བྷོ་ཌི་མི་རིགས་དང་ཁ་ཆེ་མི་རིགས་བར་འཁྲུག་རྩོད་བྱུང་བ་བཅས་ལ་བརྟེན་ཏེ། ད་ཆར་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཁག་གི་ཁ་ཆེ་དང་བྱང་ཤར་ཁུལ་གྱི་མིའི་བར་དུའང་རྙོག་ཟིང་འབྱུང་བཞིན་ཡོད་པ་མ་ཟད། བྷིང་ལོར་དང་མེ་སོར་སོགས་གྲོང་ཁྱེར་ཆེ་ཁག་ནང་གི་ཨ་སམ་གྱི་མི་རིགས་རྣམས་རྒྱ་གར་གཞུང་གི་ཆེད་གཏོང་མེ་འཁོར་བརྒྱུད་ཕྱིར་སོ་སོའི་ལུང་པར་ལོག་གི་ཡོད་འདུག་པ་མ་ཟད། ཧི་མ་ལ་ཡའི་རི་རྒྱུད་ཀྱི་མི་རིགས་ཁག་དང་། བོད་པ་དག་ཀྱང་ས་གཞན་ལ་འགྲོ་བཞིན་ཡོད་འདུག་པ་དང་། བོད་ནས་ཡོང་བའི་སློབ་ཕྲུག་རྣམས་སེ་ར་སོགས་གྲྭ་ས་ཁག་ཏུ་ཕྱིན་ཡོད་འདུག

ཕྱི་ཚེས་ ༡༣ ཉིན་མེ་སོར་(Mysore) གྲོང་ཁྱེར་ནང་རང་ལོ་ ༢༣ ཡིན་པའི་བོད་རིགས་བསྟན་འཛིན་དར་རྒྱས་ལགས་ཁྲོམ་དུ་འགྲོ་བའི་ལམ་བར་ནས་མི་ཞིག་གིས་རྒྱབ་ལོགས་ནས་གྲི་བཙུགས་ཏེ་སྨན་ཁང་དུ་བསྐྱལ་ཡོད་པ་དང་། སྐབས་དེར་གྲི་འཛུགས་མཁན་ངོ་ཐག་ཆོད་མེད་ཀྱང་། གྲོང་ཁྱེར་ཉེན་རྟོག་པས་གསར་ལམ་དུ་བརྗོད་པ་ལྟར་ན་དེ་ནི་བསྟན་འཛིན་དར་རྒྱས་ལགས་རྒྱ་གར་བྱང་ཤར་ཨ་སམ་ཕྱོགས་ནས་ཡིན་པར་ནོར་ཏེ་ཁ་ཆེ་ཚོས་གྲིས་བརྒྱབ་ཡོད་པའི་དོགས་གཞི་ཡོད་ཚུལ་བརྗོད་འདུག

དེ་རིང་གསར་འགོད་པས་ད་ཆར་སྨན་ཁང་དུ་ཡོད་པའི་བསྟན་འཛིན་དར་རྒྱས་ལགས་ལ་ནད་གཡོག་བྱེད་བཞིན་པའི་ས་གནས་གཞོན་ནུའི་ཚོགས་གཙོ་བློ་བཟང་འཇམ་དབྱངས་ལགས་སུ་ཁ་པར་བརྒྱུད་བཅར་འདྲི་ཞུས་པར། ཕྱི་དྲོ་དེར་བློ་བཟང་དར་རྒྱས་གཅིག་པུ་གྲོང་ཁྱེར་གཞུང་ལམ་བརྒྱུད་དགོང་ཟས་བཟའ་རུ་འགྲོ་སྐབས། སྦག་སྦག་ཞོན་པའི་མི་གཉིས་རྒྱབ་ཕྱོགས་ནས་ཡོང་སྟེ་གྲི་བཙུགས་ཡོད་འདུག་ལ། གྲི་བཙུགས་རྗེས་བྲོས་ཡོད་སྟབས་གྲི་འཛུགས་མཁན་དེ་གཉིས་ངོ་ཐག་ཆོད་མེད་པ་དང་། གྲི་རྒྱབ་ལོགས་ནས་བཙུགས་ཏེ་མདུན་དུ་ཐོན་ཡོད་ཀྱང་། དེ་མ་ཐག་སྨན་ཁང་(Krishna Rajendra hospital)ལ་བསྐྱལ་ཡོད་ཐུབ་ཡོད་པ་དང་སྲོག་ཐོག་ལ་ཁེལ་མེད་པ་བཅས་ལ་བརྟེན་ད་ཆར་སྲོག་ཉེན་ལས་འཐར་ཡོད་འདུག

གནས་ཚུལ་དེ་བྱུང་མ་ཐག་བྷིང་ལོར་དང་བྷིང་བྷེ། མེ་སོར་བཅས་སུ་ཡོད་པའི་བོད་པའི་སློབ་ཕྲུག་དང་སིལ་ཚོང་བ་བཅས་ཀྱིས་ཕན་ཚུན་ཉེན་བརྡ་བཏང་སྟེ་བོད་མི་མང་པོ་ཞིག་ས་གནས་གཞན་དུ་ལོག་མགོ་བརྩམས་ཡོད་འདུག་ལ། ཧི་མ་ལ་ཡའི་རི་རྒྱལ་ཁུལ་གྱི་མི་རིགས་ཚོ་ཡང་རང་རང་གུ་ལུང་པར་ལོག་བཞིན་ཡོད་འདུག མེ་སོར་གྲོང་ཁྱེར་ནང་བོད་པ་སིལ་འཚོང་པ་དང་རིགས་སློབ་ཕྲུག་ཁྱོན་ ༢༠༠ ཡས་མས་ཡོད་པ་ཕལ་ཆེ་བ་ས་གནས་གཞན་ལ་ཕྱིན་ཡོད་འདུག་ལ། སློབ་ཕྲུག་ཚོས་ཀྱང་སློབ་གྲྭར་དགོངས་པ་ཞུས་ཏེ་ནང་དུ་ལོག་པ་དང་། བོད་ནས་ཡོང་མཁན་དག་སེ་ར་སོགས་གྲྭ་ས་ཁག་ཏུ་ཕྱིན་ཡོད་འདུག ཁ་སང་ཕྱི་ཚེས་ ༡༦ ཉིན་སློབ་ཕྲུག་ ༢༠ ཙམ་སེ་ར་དགོན་པར་འབྱོར་ཡོད་འདུག

གསར་འགོད་པས་ཅེན་ནའེ་(Chennai) གྲོང་ཁྱེར་ནང་གི་བོད་རིགས་མཐོ་རིམ་སློབ་མ་ཚོའི་གནས་སྟངས་སྐོར་ལ་ས་གནས་བོད་རིགས་སློབ་ཕྲུག་ཚོགས་པའི་ཚོགས་གཙོ་བསྟན་འཛིན་ཕུན་ཚོགས་ལ་ཁ་པར་བརྒྱུད་རྒྱུས་ལོན་བྱས་པར། ཁོང་གིས་ཅེན་ནའེ་ནང་གི་བོད་རིགས་སློབ་མ་ཚོར་དམིགས་བསལ་དཀའ་ངལ་འཕྲད་ཀྱི་མེད་པར་རྒྱུན་ལྡན་ལྟར་མཐོ་སློབ་ཁང་དུ་འགྲོ་བཞིན་ཡོད་ཀྱང་། གྲོང་ཁྱེར་སྤྱི་བདེ་ལས་ཁུངས་དང་གསང་བའི་ལས་ཁུངས་སོགས་ཀྱིས་ལྟ་རྟོག་ནན་མོ་བྱེད་ཀྱི་ཡོད་སྐོར་བརྗོད་འབྱུང་།

འབར་མའི་ནང་གི་དོན་རྐྱེན་དང་ཨ་སམ་ནང་གི་དོན་རྐྱེན་གཉིས་ངོ་བོ་ཐ་དད་ཡིན་པ་མ་ཟད། བོད་པ་ཚོར་དོན་རྐྱེན་དེ་གཉིས་ཀར་འབྲེལ་བ་གང་ཡང་མེད་ཀྱང་། ཉེ་ཆར་འབར་མའི་ནང་དུ་རྙོག་ཟིང་དེ་བྱུང་རྗེས་ ༢༠༡༠ ལོའི་ཡུལ་ཤུལ་ས་ཡོམ་སྐབས་ཀྱི་པར་མང་པོ་ཞིག་གི་ཐོག་ཏུ་ “ནང་པ་ཚོས་ཁ་ཆེ་བ་དམར་གསོད་གཏོང་གི་འདུག” སོགས་བཀོད་དེ་དཀྲོག་རྐྱེན་བཟོས་ཡོད་སྟབས། ཁ་ཆེ་མང་པོ་ཞིག་གིས་བོད་པའི་དགེ་འདུན་པ་ཚོར་གོ་ནོར་ཐེབས་ཀྱི་ཡོད་པ་དང་། ཟླ་སྔོན་མའི་ནང་ཨ་སམ་ནང་ཧིན་རྡུའི་ཆོས་བྱེད་མཁན་བྷོ་ཌོ་གྲངས་ཉུང་མི་རིགས་དང་ས་གནས་ཁ་ཆེ་བར་འཁྲུག་འཛིང་བྱུང་སྟེ་མི་མང་པོ་བསད་རྨས་བྱས་ཡོད་སྟབས། རྒྱ་གར་ལྷོ་ཕྱོགས་གཙོ་བོར་གྱུར་པའི་གྲོང་ཁྱེར་དང་ས་གནས་ཁག་གི་ཁ་ཆེ་ཚོས་བོད་མི་ཚོ་རྒྱ་གར་བྱང་ཤར་ཨ་སམ་ཕྱོགས་ཀྱི་མི་ཡིན་པར་གོ་ནོར་ཐེབས་བཞིན་ཡོད་འདུག

ཕྱི་ཚེས་ ༡༤ ཉིན་དབུས་བོད་མིའི་སྒྲིག་འཛུགས་ཀྱིས་གསར་འགོད་གསལ་བསྒྲགས་སྤེལ་ཏེ། ཉེ་ཆར་འབར་མའི་ནང་ཁ་ཆེ་དང་ནང་པའི་བར་འཁྲུག་རྩོད་བྱུང་སྐབས། ༢༠༡༠ ལོའི་སྐྱེ་རྒུ་མདོའི་ས་ཡོམ་སྐབས་བོད་པའི་དགེ་འདུན་པ་ཚོས་གོད་ཆག་ཁྲོད་རྐྱེན་འདས་སུ་ཕྱིན་པའི་བོད་མི་དག་གི་ཕུང་པོ་མེར་བསྲེགས་གཏོང་བཞིན་པའི་པར་རིས་ཁག་ཅིག་ལ་ལོག་འགྲེལ་བརྒྱབ་སྟེ། ནང་པ་ཚོས་ཁ་ཆེ་དམར་གསོད་བཏང་པའི་པར་ཡིན་ཚུལ་གྱིས་དྲ་ལམ་ཁག་དུ་བཀོད་པ་དེར་བློ་འཚབ་ཡོད་སྐོར་དང་། པར་རིས་དེ་དག་པཱ་ཀི་སི་ཐན་ནང་གི་གསར་ལམ་ཁག་ཅིག་ནང་འཐོན་རྗེས། དབུས་བོད་མིའི་སྒྲིག་འཛུགས་ཀྱིས་འཕྲལ་དུ་པཱ་ཀི་སི་ཐན་གྱི་འབྲེལ་ཡོད་གསར་ཁང་ལ་གནས་ཚུལ་གསལ་བཤད་བྱས་པའི་ཕྱི་ཉིན་པར་དེ་དག་ཕྱིར་འཐེན་བྱས་ཡོད་ཀྱང་། ཉེ་ལམ་ཨ་སམ་ནང་གི་དོན་རྐྱེན་སྐབས་སླར་ཡང་པར་དེ་དག་བེད་སྤྱོད་ལོག་པར་གཏོང་གི་ཡོད་པ་དེ་མཚམས་འཇོག་དགོས་པའི་འབོད་སྐུལ་གནང་འདུག

ཕྱི་ཚེས་ ༡༥ ཉིན་ངྷ་ས་གཙུག་ལག་ཁང་གི་མཆོད་འབུལ་ཐོག་བཀའ་ཁྲི་མཆོག་གིས། རྒྱ་གར་གཞུང་དང་སྤུན་ཟླ་ཁ་ཆེ་ཚོས་བོད་པ་དང་ཁ་ཆེ་བར་གོ་ནོར་ཐེབས་པའི་གནད་དོན་དེ་གཙང་སེལ་གནང་དགོས་པའི་འབོད་སྐུལ་དང་། ས་གནས་གང་སར་ཡོད་པའི་བོད་མི་ཚོས་གནས་སྐབས་རིང་ཕྱོགས་སྐྱོད་སྐབས་གཟབ་ནན་བྱ་དགོས་པའི་འབོད་སྐུལ་གནང་འདུག ཕྱི་ཚེས་ ༡༦ ཉིན་བཀའ་ཤག་གིས་སླར་ཡང་གསལ་བསྒྲགས་སྤེལ་ཏེ། རྒྱ་གར་གཞུང་དང་སྤུན་ཟླ་ཁ་ཆེ་བ་ཚོས་གནས་ཚུལ་དེ་གཙང་མ་བཟོས་ཏེ་གནད་དོན་ཞི་འཇམ་བྱ་རྒྱུར་རོགས་འདེགས་བྱ་དགོས་པའི་འབོད་སྐུལ་ཡང་གནང་འདུག

ཉེ་ཆར་རྒྱ་གར་གྱི་གྲོང་ཁྱེར་མོམ་བྷའེ་སོགས་ཀྱི་ནང་ངོ་རྒོལ་འཁྲུག་རྩོད་བྱུང་སྐབས། རྒྱ་གར་ཁ་ཆེ་ཚོགས་པའི་(Muslims Political Council of India)ཚོགས་གཙོ་སྐུ་ཞབས་རཱ་མཱ་ནེ་(Dr T.A Rahmani) ཡིས་ལྡི་ལིར་ཡོད་པའི་འབར་མའི་གཞུང་ཚབ་ལ་གནད་དོན་དེའི་སྐོར་དྲིས་པར། འབར་མའི་གཞུང་ཚབ་ཡེན་ཡཝ་(Yin Yaw) ཡིས་འཁྲུག་རྩོད་ཀྱི་ཐོག་མའི་རྒྱུ་རྐྱེན་དང་ད་ལྟའི་གནས་སྟངས་སོགས་གསལ་བཤད་བྱས་པའི་ནང་། ཕྱི་ཟླ་ ༥ ཚེས་ ༢༨ ཉིན་ཁ་ཆེ་བ་གསུམ་གྱིས་ནང་པའི་བུ་མོ་ཞིག་ལ་བཙན་གཡེམ་བྱས་པ་ནས་འཁྲུག་རྩོད་ཀྱི་མགོ་བརྩམས་ཡོད་པ་དང་། འཁྲུག་རྩོད་ཁྲོད་ཕྱོགས་གཉིས་ཀྱི་མི་༧༩ ཙམ་དམར་གསོད་བཏང་ཡོད་པ་ལས། ནང་པ་བ་ཚོས་ཁ་ཆེ་བ་དམར་གསོད་བཏང་ཡོད་ཚུལ་བསྒྲགས་པ་དེ་དངོས་ཡོད་མིན་པ། དོན་རྐྱེན་བྱུང་རྗེས་འབར་མའི་གཞུང་དང་། རང་དབང་སྡེ་ཚན་ཁག་ཚང་མ་མཉམ་འབྲེལ་ཐོག་འཁྲུག་རྩོད་ཞི་འཇགས། ཁང་ཁྱིམ་དང་རྒྱུ་དངོས་གཏོར་སྐྱོན་ཐེབས་རིགས་ད་ཆར་བསྐྱར་གསོ་བྱེད་ཀྱི་ཡོད་སྐོར་ལན་འདེབས་བྱས་ཡོད་འདུག

གསར་འགོད་པ། བནྟེ་སྐྱབས།