ལོ་ ༧ གྱི་ཁྲིམས་ཐག་བཅད་འདུག

བོད་མདོ་སྨད་རྔ་པ་རྫོང་ཁ་ཤིས་དགོན་གྱི་ལྷོ་ཡོན་ཏན་རྒྱ་མཚོ་ལགས་སུ་རྒྱ་གཞུང་གིས་ལོ་ ༧ གྱི་བཙོན་འཇུག་ཁྲིམས་ཐག་བཅད་ཡོད་འདུག  

དེ་རིང་གསར་དུ་གནས་ཚུལ་ཤེས་རྟོགས་བྱུང་བར། ཟླ་བ་བརྒྱད་ཙམ་རིང་གར་སོང་ཆ་མེད་དུ་གྱུར་པའི་རྔ་པ་རྫོང་བློན་ཙང་ཞང་ཁཱ་ཤིས་སྡེ་བའི་ལྷོ་ཚང་གི་ཁཱ་ཤིས་དགོན་གྱི་རང་ལོ་ ༣༧ ཡིན་པའི་གྲྭ་ལྷོ་ཡོན་ཏན་རྒྱ་མཚོ་ལགས། ལོ་སྔོན་མའི་ཕྱི་ཟླ་ ༡༠ ཚེས་ ༡༨ ཉིན་རྔ་པ་རྫོང་མཁར་ནས་གློ་བུར་གར་སོང་ཆ་མེད་ཀྱིས་ཟླ་ ༦ ལྷག་རིང་ཤི་གསོན་གནས་སྟངས་ཤེས་རྟོགས་ཐུབ་མེད་ཀྱང་། ཉེ་ལམ་གསར་དུ་ཤེས་རྟོགས་བྱུང་བར། དེ་སྔོན་སི་ཁྲོན་ཁྲིན་ཏུའུ་གསང་བའི་ལས་ཁུངས་ཀྱིས་རྔ་པ་རྫོང་ས་གནས་དམག་སྒར་བརྒྱུད་ལྐོག་ནས་འཛིན་བཟུང་བཙན་ཁྲིད་བྱས་ཏེ། བུན་གྱང་ཞེས་པའི་ས་གནས་བཙོན་ཁང་དུ་བཀག་སྐྱིལ་གྱིས་གཅར་རྡུང་མནར་གཅོད་ཚད་མེད་བཏང་ཡོད་པ་དང་། སྐབས་དེར་ཁོང་ལ་གསོན་པ་ལས་རང་ཤི་བརྒྱབ་ན་དགའ་བའི་སེམས་ཚོར་བྱུང་བ་སོགས་ཀྱི་དཀའ་སྡུག་ཚད་མེད་མྱངས་མཐར། རྔ་པ་རང་སྐྱོང་ཁུལ་གྱི་འབྲེལ་ཡོད་ལས་ཁུངས་ལ་རྩིས་སྤྲོད་བྱས་ཏེ་རྔ་པ་ཁུལ་མི་དམངས་ཁྲིམས་ཁང་གིས་ཕྱི་ལོ་ ༢༠༡༢ ཟླ་ ༦ ཚེས་ ༡༨ ཉིན་རྒྱལ་གཅེས་དཔའ་མོ་བཙུན་མ་བསྟན་འཛིན་དབང་མོས་རང་ལུས་མེ་བསྲེགས་བཏང་བའི་འདྲ་པར་དང་གནས་ཚུལ་ཕྱི་ཕྱོགས་སུ་མཁོ་སྤྲོད་བྱས་པ་དང་། ཕྱི་ལོ་ ༢༠༠༨ ནས་བཟུང་བོད་ནང་གི་གནས་ཚུལ་མང་པོ་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་སོགས་ལ་ཁ་པར་བརྒྱུད་ཞུ་གཏུག་བྱེད་མཁན་གཏེ་བོའི་གྲས་ཡིན་པ་སོགས་ཀྱི་ནག་ཉེས་བཙན་འགེལ་བྱས་ཏེ། ལོ་ ༧ གྱི་བཙོན་འཇུག་ཁྲིམས་ཐག་བཅད་དེ། ད་ཆ་རྒྱ་ནག་སི་ཁྲོན་གྱི་མེན་ཡང་བཙོན་ཁང་དུ་བཅུག་ཡོད་འདུག 

ཁོང་གི་ཕ་མིང་ལ་ཆོས་བསམ་དང་། མ་མིང་ལ་གངྒ་ཡིན་པ་དང་། རང་ལས་ཆུང་བའི་སྤུན་སྲིང་གཉིས་བཅས་ནང་མི་བཞི་ཡོད་འདུག ཁོང་ནི་ཁཱ་ཤིས་དགོན་དགེ་འཕེལ་བསམ་གཏན་གླིང་གི་དགེ་བསྐོས་དང་། དབུ་མཛད་། ཆོས་ལུགས་དོ་དམ་ཁང་གི་འགན་འཛིན་དང་ཚོགས་མི་ཟུར་བ་བཅས་ཡིན་འདུག  

ཁོང་གིས་དེ་སྔ་ ༡༩༩༢ ལོར་རྔ་ཡུལ་ཁཱ་ཤིས་ཚོང་པ་རྣམས་ཀྱིས་མ་དངུལ་རྩ་འཛུགས་ཀྱིས་སློབ་གྲྭ་གསར་རྒྱག་བྱས་པ། རྔ་པ་རྫོང་ཁ་ཤུལ་གྲོང་སྡེའི་རེ་སྨོན་སློབ་ཆུང་གི་སློབ་མ་གཙོས་དགོན་གྲོང་གཉིས་ཀྱི་སློབ་ཕྲུག་ན་གཞོན་རྣམས་ཀྱི་གསབ་སྦྱོང་འཛིན་གྲའི་བོད་ཡིག་དགེ་རྒན་དང་། ཡང་སྒོས་ཁཱ་ཤིས་སྤྱི་ཚོགས་སློབ་གསོ་ཚོགས་པའི་ཚོགས་གཙོའི་ལས་འགན་ཁུར་མུས་ཀྱི་ངོས་ནས་རྔ་པ་སྟོད་སྨད་བར་གསུམ་གྱི་མང་ཚོགས་ཁྲོད་སྤྱི་ཚོགས་སློབ་གསོའི་ལས་འགུལ་སྤེལ་བའི་བརྒྱུད་རིམ་ནང་བོད་རང་གི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ལེགས་བྱང་། ཡུལ་གོམས་གཤིས་ལུགས་སོགས་ཡ་རབས་བཟང་སྤྱོད་ལྡན་པའི་བོད་མི་རིགས་ཀྱི་ངོ་བོ་གསོན་པོར་ཡུན་གནས་ཡོངས་ཐབས་སུ་ཕྱོགས་ཡོངས་ནས་ནུས་པ་ཡོད་དགུས་མཁས་དབང་གདན་འདྲེན་ཞུས་ཀྱིས་སྤྱི་ཚོགས་ཡར་སྐུར་གྱི་ལམ་སྟོན་སློབ་གསོ་གནང་བཅུག་པ་དང་། ཁོང་རང་ངོས་ནས་ཀྱང་སྙིང་སྟོབས་དང་སེམས་ཤུགས་ཞུམ་པ་མེད་པའི་སྒོ་ནས། བོད་ཀྱི་ཆབ་དཔལ་རིག་གསུམ་དང་། ལྷག་པར་ཏུ་བོད་རིགས་ནང་ཁུལ་མཐུན་སྒྲིལ་ཟོང་ཁ་གཅིག་གྱུར་དགོས་པ་སོགས་ཀྱི་ཐད། བོད་མིའི་དབུ་ཁྲིད་༸གོང་ས་མཆོག་གིས་བོད་མི་སྤྱི་བོ་གནམ་བསྟན་ཡོངས་ལ་བཀའ་སློབ་ལམ་སྟོན་སྤྱི་ཕེབས་བྱུང་བ་རྣམས་ཇི་ལྟ་བ་བཞིན་ས་གནས་མི་དམངས་དཀྱིལ་དུ་རྒྱལ་བའི་མཚན་དང་བཅས་ཏེ་བཀའ་སློབ་དགོངས་དོན་ཁག་དངོས་སུ་ལུང་འདྲེན་དང་འགྲེལ་བཤད་ཡང་ཡང་བྱས་ཡོད་འདུག

དེ་ཡང་ཁཱ་ཤིས་དགོན་དགེ་འཕེལ་བསམ་གཏན་གླིང་ནི་༸ རྗེའི་དངོས་སློབ་ཚ་ཁོ་དཔོན་པོ་ངག་དབང་གྲགས་པས་ཕྱག་བཏབས་མཛད་པ་ཞིག་དང་། དེང་གི་རྔ་པའི་རྫོང་མཁར་ནས་ནུབ་ཕྱོགས་སུ་སྤྱི་ལེ་ ༢ ཙམ་གྱི་སར་ཡོད།

གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།