རྒྱ་གཞུང་གིས་ལྷ་སར་སྔར་བཞིན་དམ་དྲག་ཆེན་པོ་བྱེད་ཀྱི་ཡོད་པ་དང་། རྒྱ་ནག་ནས་དམག་མིའི་དྲག་ཆས་མཚོན་ཆ་ལྕགས་ཁྲབ་འཐབ་འཁོར་མང་པོ་ཞིག་འབྱོར་བཞིན་ཡོད་འདུག
དེ་རིང་འདི་གར་གནས་ཚུལ་འབྱོར་བ་ལྟར་ན། ཉེ་སྔོན་རྒྱལ་གཅེས་དཔའ་བོ་ཚེ་དབང་རིག་འཛིན་གྱིས་འདམ་གཞུང་རྫོང་ཐོག་ཏུ་རང་ལུས་མེ་བསྲེགས་བཏང་བའི་རྗེས་སུ་འདམ་གཞུང་རྫོང་དུ་མི་མང་འདུ་འཛོམས་རིགས་བྱེད་མི་ཆོག་པའི་བཙན་བཀའ་བཏང་ཡོད་པ་མ་ཟད། ལོ་ལྟར་ཕྱི་ཟླ་བརྒྱད་པའི་ནང་ཚོགས་བཞིན་པའི་འདམ་གཞུང་རྟ་རྒྱུག་དུས་ཆེན་དེའང་ད་ལོ་མེད་པ་བཟོས་ཡོད་འདུག དུས་ཆེན་དེ་ནི་རྫོང་དེའི་དུས་ཆེན་ཆེ་ཤོས་ཤིག་ཡིན་པ་མ་ཟད། ལོ་ལྟར་ལྷ་སའི་དམར་ཤོག་མགོ་འཁྲིད་དག་ཀྱང་ལྟད་མོ་ལྟ་བར་སླེབ་ཀྱི་ཡོད་འདུག
དེ་བཞིན། སྔོན་ཆད་རེ་གཟའ་ལྷག་པ་ནམ་ཡིན་ལ་འདམ་གཞུང་རྫོང་གི་བོད་མི་ཚོ་རི་མགོར་བསང་གསོལ་བྱེད་དུ་འགྲོ་བའི་གོམས་སྲོལ་ཡོད་ཀྱང་། དེང་སྐབས་བསང་གསོལ་དེ་བཀག་ཡོད་པ་མ་ཟད། དེ་རིགས་ཀྱི་ཆོས་ཕྱོགས་བྱེད་སྒོ་གཅིག་ཀྱང་སྤེལ་མི་ཆོག་པ་བཟོས་འདུག
དེ་སྔོན་རྒྱལ་གཅེས་དཔའ་བོ་ཚེ་དབང་རིག་འཛིན་གྱིས་སྐུ་ལུས་མེར་བསྲེགས་བཏང་བའི་རྗེས་སུ་རྒྱ་ནག་གི་དཔོན་ལི་ཁྲང་ཁྲོན་ཆེད་དུ་འདམ་གཞུང་རྫོང་དུ་བསླེབས་ཡོད་པ་མ་ཟད། རྒྱལ་གཅེས་དཔའ་བོ་ཚེ་དབང་རིག་འཛིན་གྱི་ནང་ཡོད་སའི་གྲོང་ཚོ་མཆོད་རྟེན་ཁུག་ཟེར་བ་དེར་བསླེབས་ཡོད། དེ་བཞིན་དེང་སང་རྒྱ་ནག་ནས་(ལྕགས་ཁྲབ་འཐབ་འཁོར)ལ་སོགས་པའི་དམག་མིའི་དྲག་ཆས་མཚོན་ཆ་མང་པོ་ལྷ་སར་བོར་འདྲེན་བྱེད་བཞིན་ཡོད་འདུག
བཙན་བྱོལ་ནང་གི་བོད་ཀྱི་དབུ་ཁྲིད་དང་ཆབ་སྲིད་པ་རྣམ་པས་དགོངས་པ་ཞིག་བཞེས་དང་།
ཀྲུང་གོ་སྤྱི་མཐུན་རྒྱལ་ཁབ་ཀྱི་འོག་ཏུ་ཇི་ལྟར་སྡོད་ཐུབ་ཟ་རེད་དམ།
དྲང་བདེན་མིན་པའི་གྲོས་མོས་ཞིག་ག་དུས་ཡོང་གི་རེད་དམ།
ང་ཚོ་བོད་མི་ཚང་མ་རྒྱལ་སྲས་བྱང་ཆུབ་སེམས་པ་ཤ་གཅིག་མིན་པས་རང་གི་རང་ལ་མགོ་བསྐོར་བཏང་ནས་ག་དུས་བར་སྡོད་ཐུབ་བམ།
བྱས་ན་བོད་མི་ཚང་མ་སྡར་མ་ཝ་མོ་ཤ་གཅིག་རེད་དམ།
ངའི་དྲན་ཚོད་ལ། སྤྱི་ལོ་བརྒྱད་ཅུ་གྱ་གྲངས་ནང་དུ་ལྷ་སའི་གཙུག་ལག་ཁང་གི་མདུན་དུ་ལྕགས་ཁྲབ་འཁོར་ལོ་འདི་རིགས་གཉིས་གསུམ་བསྒྲིགས་པ་དེ་ཡང་དྲན་གསོས་ཡོང་གི་འདུག ད་དུང་ལྷ་ས་གྲོང་ཁྱེར་ནང་དུ་ལྕགས་ཁྲབ་འཁོར་ལོ་འདི་རིགས་ཀྱིས་སྐོར་སྐྱོད་ཡང་ཡང་བྱས་པ་དེ་ཡང་དྲན་གསོས་ཡོང་གི་འདུག
སྐབས་དེ་དུས་ལྷ་ས་གྲོང་ཁྱེར་ནང་དུ་ལྕགས་ཁྲབ་འཁོར་ལོ་དེས་བོད་རིགས་མིང་ལ་འཇིགས་སྣང་ཇི་ཙམ་ཞིག་བསྐུལ་ཡོད་དམ།
ང་ཚོ་མི་རབས་གཅིག མི་རབས་གཉིས། རྒྱ་གཞུང་གི་ལྕགས་ཁྲབ་འཁོར་ལོ་འདི་དང་འདི་འདྲ་བའི་དྲག་པོའི་མཚོན་ཆའི་འོག་ཏུ་ལོ་ངོ་ཇི་ཙམ་གནས་དགོས་སམ།
ཞི་མཐུན་གྱི་བོད་ལྗོངས། འཆམ་མཐུན་གྱི་བོད་ལྗོངས། བརྟན་བརླིང་གི་བོད་ལྗོངས་སོགས་ཀྱི་ཁ་གཡང་གི་ཁ་དོག་མཛེས་པོ་དེའི་འོག་ཏུ། སྡུག་བསྔལ་གྱི་མིག་ཆུ་བཞུར་གྱིན། ཚེ་སྲོག་གི་རྒྱུ་བ་ཆད་ཀྱིན། མི་རབས་ཅི་ཞིག་ཙམ་ཞིག་ད་དུང་འདུག་དགོས་སམ།