ཉེ་ཆར་བོད་ནས་གསར་དུ་འབྱོར་བའི་བོད་མི་ཞིག་གིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས་མདོ་སྨད་ཀན་ལྷོ་བསང་ཆུ་རྫོང་རྒན་གྱ་ཞང་བྲག་དཀར་དགོན་པའི་གྲྭ་དགེ་འདུན་རྒྱ་མཚོ་ལགས། ༡༩༩༢ ལོར་རྒྱ་གར་ནས་ཕྱིར་བོད་ནང་ལོག་སྐབས་འཛིན་བཟུང་གིས་ཉིན་ཤས་རིང་བཀག་ཉར་འདྲི་བརྩད་བྱས་རྗེས་ཀློད་གྲོལ་བཏང་ཡོད་ཀྱང་། ༢༠༡༡ ལོའི་ཕྱི་ཟླ་ ༡ པོའི་ནང་ཁོང་ཨ་རི་ནས་ཡོང་བའི་གྲོགས་པོ་ཞིག་ལམ་འཇུག་ཆེད་ཀན་སུའུ་ཞིང་ཆེན་ལན་ཀྲུའུ་གྲོང་ཁྱེར་དུ་ཕྱིན་སྟེ། ཕྱིར་བླ་བྲང་བསང་ཆུ་རྫོང་དུ་འབྱོར་སྐབས་ཉེན་རྟོག་པ་ཁ་ཤས་ཀྱིས་ཁོང་ལ་གནས་ཚུལ་ཞིག་འདྲི་རྒྱུ་ཡོད་ཚུལ་བཤད་དེ་ས་གནས་མགྲོན་ཁང་ཞིག་ཏུ་ཁྲིད་རྗེས། རྐང་ལག་གཉིས་ལ་ལྕགས་སྒྲོག་བརྒྱབས་པ་དང་། མགོར་ཁུག་མ་ནག་པོ་ཞིག་བསྐོན་རྗེས་གང་ཡིན་མི་ཤེས་པའི་ས་ཆ་ཞིག་ཏུ་འཁྲིད་དེ། ཁོང་རྒྱ་གར་ནས་ཕྱིར་ལོག་རྗེས་གང་དུ་སོང་མིན་དང་ཅི་ཞིག་ལས་མིན། སུ་དང་ཐུག་འཕྲད་བྱས་ཡོད་མེད་སོགས་ཀྱི་ཡིག་ཚགས་ཤིག་ཁོང་གི་སྔུན་དུ་གཡུགས་པ་དང་། དེ་འབྲེལ་གྱི་གནས་ཚུལ་ཁག་འདྲི་བརྩད་བྱས་པ་དང་མནར་གཅོད་ཚད་ལས་བརྒལ་བ་བཏང་རྗེས་ཀློད་གྲོལ་བཏང་ཡོད་འདུག
སྔར་ལོའི་ཕྱི་ཟླ་ ༧ པའི་ནང་གྲྭ་དགེ་འདུན་རྒྱ་མཚོ་ལགས་གློ་བུར་དགོན་པ་ནས་གར་སོང་ཆ་མེད་དུ་གྱུར་ཡོད་འདུག་ལ། སྐབས་དེར་ཁོང་གི་ནང་མི་ཉེ་འབྲེལ་ཁག་ཅིག་བསང་ཆུ་རྫོང་བདེ་འཇགས་ལས་ཁུངས་སུ་སོང་སྟེ། ས་གནས་ཉེན་རྟོག་པས་འཛིན་བཟུང་བྱས་ཡོད་མེད་ཀྱི་སྐད་ཆ་དྲིས་པར། ས་གནས་བདེ་འཇགས་ཚན་པས་ཁོང་ཀན་སུའུ་ཞིང་ཆེན་གྱི་མངའ་ཁོངས་སུ་མེད་པའི་བརྡ་ལན་སྤྲད་ཡོད་ཀྱང་། ཁོང་གི་ནང་མིས་ཐེངས་འདིར་ཡང་ཁོང་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་ཡོད་པའི་ཚོད་དཔག་བྱེད་ཀྱི་ཡོད་འདུག
རང་ལོ་ ༤༣ ཡས་མས་ཡིན་པའི་གྲྭ་དགེ་འདུན་རྒྱ་མཚོ་ལགས་ནི། ཀན་ལྷོ་ཁུལ་བླ་བྲང་བསང་ཆུ་རྫོང་རྒན་གྱ་སུ་རུག་འཚོ་བའི་ནང་འཚར་ལོངས་བྱུང་བ་དང་། ཕྱིས་སུ་བྲག་དཀར་དགོན་པའི་ནང་གྲྭ་པ་བྱས་ཏེ་སློབ་གཉེར་གནང་ཡོད་ལ། ༡༩༨༩ ལོར་རྒྱ་གར་ནང་སྐྱབས་བཅོལ་དུ་འབྱོར་ཏེ་ལོ་ཤས་རིང་གདན་སར་སློབ་གཉེར་གནང་ཡོད་འདུག ༡༩༩༢ ལོར་ཕྱིར་བོད་དུ་ལོག་རྗེས་དགོན་པའི་དོ་དམ་པའི་ལས་འགན་བཞེས་ཏེ། དགོན་པའི་སློབ་གསོ་དང་འཛུགས་བསྐྲུན་སོགས་ཕྱོཊ་ཡོངས་ལ་འགན་འཁུར་མཁན་ཞིག་ཡིན་འདུག
