ཁ་སང་སླར་ཡང་རྔ་པ་རྫོང་ཐོག་ཏུ་གྲྭ་པ་ཞིག་དང་མི་སྐྱ་ཞིག་གིས་དུས་གཅིག་ཏུ་རང་ལུས་མེར་བསྲེགས་བཏང་སྟེ་སྐུ་གྲོངས་ཡོད་འདུག
ཁ་སང་ཕྱི་ཚེས་ ༢༧ ཉིན་གྱི་བོད་ནང་གི་ཞོགས་པའི་ཆུ་ཚོད་ ༨།༣༠ ཙམ་ལ་བོད་མདོ་སྨད་རྔ་པ་རྫོང་མཁར་དུ་ཡོད་པའི་ཀིརྟི་དགོན་པའི་ཤར་ཕྱོགས་ཀྱི་སྒོ་ཆེན་འགྲམ་ནས་རྔ་པ་ཀིརྟི་དགོན་པའི་རང་ལོ་ ༡༨ ཡིན་པའི་གྲྭ་བློ་བཟང་སྐལ་བཟང་། རྔ་པ་རྫོང་གཅའ་ཞང་རྭ་རུ་བའི་ཚེ་པོ་ཚང་གི་རང་ལོ་ ༡༧ ཡིན་པའི་བུ་(མི་སྐྱ་)དམ་ཆོས་གཉིས་ཀྱིས་རང་ལུས་མེར་བསྲེགས་བཏང་སྟེ། རྒྱ་གཞུང་གིས་བོད་ཐོག་འཛིན་པའི་མི་རིགས་རྩ་མེད་དུ་གཏོང་རྒྱུའི་སྲིད་བྱུས་ལ་ངོ་རྒོལ་སྐད་འབོད་གནང་ཡོད་འདུག
སྐབས་དེར་ཐག་རིང་ཙམ་ནས་མཐོང་འདུག་པར་ཁོང་གཉིས་གོམ་པ་ ༢༠ ཙམ་ལ་མེ་འབར་བཞིན་དུ་རྒྱུག་ཡོད་པ་དང་། མཐར་ཐང་ལ་འགྱེལ་ཡོད་འདུག མེ་ལྕེའི་དབུས་ནས་ཀི་སྒྲ་ཙམ་ནས་འབོད་ཚིག་ག་རེ་བསྒྲགས་ཡོད་མེད་གསལ་པོ་ཤེས་རྟོགས་མ་ཐུབ། དེ་རྗེས་ཉེན་རྟོག་པ་སོགས་སླེབས་ཏེ་ཁོང་གཉིས་ལུས་ཀྱི་མེ་བསད་ནས་རྔ་པའི་སྨན་ཁང་དུ་ཅུང་ཙམ་རིང་བཞག་རྗེས་འབར་ཁམས་ལ་ཁྲིད་ཡོད་འདུག
དགོང་མོ་ཤེས་རྟོགས་བྱུང་བར་ཁོང་གཉིས་ཀ་འདས་གྲོངས་སུ་གྱུར་ཡོད་པ་དང་། ཁོང་གཉིས་ཀྱི་སྐུ་ཕུང་འབར་ཁམས་ལ་ཁྱེར་ཡོད་ཅིང་ནང་མིར་སྤྲད་ཡོད་མེད་ཤེས་རྟོགས་མ་ཐུབ།
གནས་ཚུལ་དེ་བྱུང་རྗེས་གྲྭ་བློ་བཟང་སྐལ་བཟང་ལགས་ཀྱི་ཤག་གཅིག་པ་གྲྭ་བློ་བཟང་དཔལ་ལྡན་ཉེན་རྟོག་པས་འཛིན་བཟུང་བྱས་ཡོད་འདུག བློ་བཟང་སྐལ་བཟང་གི་ཕ་མིང་ལ་ཚེ་ཁོ་རྡོ་རྗེ་དང་། མ་མིང་སངས་རྒྱས་སྒྲོན། སྤུན་ཆེ་བ་ཚེ་ཁོ་བཀྲ་ཤིས་བཅས་ནང་མི་གསུམ་ཡོད་འདུག
གཅའ་ཞང་རྭ་རུ་བའི་ཚེ་པོ་ཚང་གི་དམ་ཆོས་ཀྱི་ཕ་མིང་ལ་མདོ་ཤིས་བློ་བྷེ་དང་། མ་མིང་ལ་ཚེ་པོ་ཡིན་ཞིང་ཕ་མ་གཉིས་ཁ་ཁ་བྱས་ཏེ་ཁོང་ཨ་མ་དང་མཉམ་དུ་ཡོད་ཅིང་། ཤུལ་དུ་ཨ་མ་གཅིག་པུ་ལས་ནང་མི་གཞན་མེད། ཁོང་ནི་གྲྭ་བློ་བཟང་སྐལ་བཟང་གི་ཚ་བོ་དང་། འདི་ལོའི་ཕྱི་ཟླ་ ༢ ཚེས་ ༡༡ ཉིན་རྔ་པའི་མ་མའི་བཙུན་དགོན་ནས་རང་ལུས་མེར་སྲེག་གིས་འདས་གྲོངས་སུ་གྱུར་པའི་རྒྱལ་གཅེས་དཔའ་མོ་བཙུན་མ་བསྟན་འཛིན་ཆོས་སྒྲོན་གྱི་ཕ་མ་གཅིག་པའི་སྤུན་ཆུང་བ་ཡིན་ཞིང་། བསྟན་འཛིན་ཆོས་སྒྲོན་ཨ་ཕའི་ཁྱིམ་དུ་ཡོད་སྟབས་མིང་སྲིང་གཉིས་ཁྱིམ་ཁ་ཁ་བྱས་ནས་ཡོད། ཁོང་དེ་སྔོན་རྔ་པ་ཀིརྟི་དགོན་པར་གྲྭ་པ་བྱས་ཤིང་རྗེས་སུ་སྐྱ་སར་བབ་ནས་ཨ་མ་དང་མཉམ་དུ་འབྲོག་ལས་བྱས་ནས་བསྡད་ཡོད་འདུག
འབྲོག་སྡེ་རྭ་རུ་བ་ནི་རྔ་པ་རྫོང་མཁར་གྱི་ཤར་ཕྱོགས་སུ་སྤྱི་ལེ་ ༧༠ ཙམ་གྱི་སར་ཡོད་ལ། ཕྱི་ལོ་ ༡༩༥༩ ལོའི་ཡར་སྔོན་དུ་རྨེའུ་རུ་གཤོག་ཀ་བདུན་གྱི་ནང་ཚན་གྱི་གཤོག་ཀ་གཅིག་ཡིན་མོད། རྗེ་སུ་རྒྱ་གཞུང་གིས་བཅད་བཟུང་བྱས་རྗེས་གཅའ་ཞང་ཟེར་བའི་ཁོངས་སུ་བསྡུས་ཡོད་པའི་འབྲོག་སྡེ་ཞིག་ཡིན་འདུག
གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
བོད་བསྟན་པ་ཆབ་སྲིད་དང་མི་རིགས་ཀྱི་ཆེད་དུ་རང་སྲོག་བློས་གཏོང་གནང་མཁན་གྱི་ཆོལ་ཁ་གསུམ་གྱི་རྒྱལ་གཅེས་དཔའ་པོ་དཔའ་མོ་རྣམས་ལ་སྙིང་ཐག་པ་ནས་གུས་འདུད་ཞུ་རྒྱུ་དང། ཁྱེད་རྣམས་ཀྱི་ཆེད་དུ་སྨོན་ལམ་གང་ཤེས་བྱེད། དེ་ནས་མཚམས་འདི་ནས་ཞུ་རྒྱུ་ཞིག་ལ་བཙན་བྱོལ་སྒྲིག་འཛུགས་ཀྱིས་གྲངས་ཀ་ཙམ་བརྒྱབ་ནས་བསྡད་མ་འདུག་པར་རབ་ན་༧གོང་ས་སྐྱབས་མགོན་ཆེན་པོ་མཆོག་གིས་དབུས་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་ཁག་མཉམ་འཛོམ་ཐོག་མཆོད་འབུལ་རྒྱས་པ་ཞིག་འཚོགས་རྒྱུ་གལ་ཆེ་སྙམ། དེ་མ་བྱུང་ན་ཆོལ་ཁ་གང་ནས་རང་སྲོག་བློས་གཏོང་གནང་མཁན་བྱུང་ན་དེ་དང་འབྲེལ་ཡོད་ཀྱི་བླ་ཆེན་ཁག་གདན་ཞུས་ཀྱིས་སྨོན་ལམ་འཚོགས་རྒྱུ་ལས་ལམ་ལུགས་སྲོལ་ཞིག་ལ་བརྩིས་ནས་འཚོགས་བསྡད་ན་དེ་ཙམ་གྱིས་འདས་གྲོངས་སོང་མཁན་གྱི་ནང་མི་ཚོས་སེམས་ཁ་གང་གི་མེད་ཚོད་རེད།
རྒྱལ་གཅེས་དཔའ་བོ་རྣམ་གཉིས་ལ་མྱ་ངན་དང་གུས་འདུད་གྲངས་མེད་ཞུ། བོད་ཕྱི་ནང་གང་སར་གནས་པའི་བོད་རིགས་གཞོན་སྐྱེས་རྣམས་ཀྱིས་རྒྱལ་གཅེས་པ་ཁོང་ཚོའི་བླ་ན་མེད་པའི་སྙིང་སྟོབས་དང་། རང་གི་མི་རིགས་ལ་བཅངས་པའི་བརྩེ་སེམས་སོགས་ཡིད་ནས་མ་བརྗེད་པར་མ་འོངས་གངས་ལྗོངས་གསར་བསྐྲུན་གྱི་དམིགས་འདུན་ཡིད་ལ་བཅངས་ནས་རང་ཡུལ་དགྲ་ལག་ནས་ཚུར་ལེན་པའི་ཐབས་ལ་སྒོ་ཀུན་ནས་འབད་པར་འཚལ།
མི་རིགས་རྩ་ཆེན
སྐད་ཡིག་རྩ་ཆེན།
རང་དབང་རྩ་ཆེན།
ཡིན་ཡང།་
ཚེ་སྲོག་ནི་རྩ་ཆེན་རྣམས་ཀྱི་སྲོག་སྐྱོབས་དེ་ཡིན་པའི་
སྤུན་ཟླ་ཚོས།
རང་ལུས་སྲེག་པ་མ་གནང།་
ཨོ་མ་ནི་པདྨ་ཧུྃ།
བོད་མི་རིགས་ཀྱི་དཔའ་བོ་དཔའ་མོ་ཀུན་ལ་སེམས་གཏིང་ནས་གུས་འདུན་ཡོད་ལ། ལྷག་པར་ཏུ་ཀིརྟི་དཔའ་བོའི་ལུང་བའི་མི་རྣམས་ལ་གུས་འདུན་ཡོད། ཁྱེད་རྣམས་བོད་མི་རིགས་ཀྱི་ཆེད་དུ་ཡོད་ཚད་ལུས་བཏང་གནང་བ་དེ་དག ང་ཚོ་བོད་གངས་ཅན་གྱི་མི་རབ་རྗེས་མ་རྣམས་རྟག་ཏུ་ཁྱེད་ཚོ་རྗེས་དྲན་བྱེད་ངེས་ཡིན།
མ་ཎི་ཚིག་གཉིས་ཀྱིས་ཕན་མིན་བདག་གིས་མི་ཤེས།།
སྨྲེ་ངག་སྐྱོ་པོ་ཞིག་འདོན་ཡང་དགོས་པ་མི་འདུག།
སྙིང་ཁྲག་དམར་པོ་འདི་ས་དང་མ་འདྲེས་བར་དུ།།
དཔའ་རྒོད་ཁྱེད་ཚོ་ཡི་ཞབས་རྗེས་ནམ་ཡང་འཚོལ་ངེས།།
རྔ་པ་རྫོང་གཅའ་ཞང་རྭ་རུ་བའི་༼ཚེ་ཁོ་རྡོ་རྗེ་ཚང་༽གི་རང་ལོ་ ༡༧ ཡིན་པའི་བུ་(མི་སྐྱ་)དམ་ཆོས་གཉིས་ཀྱིས་རང་ལུས་མེར་བསྲེགས་བཏང་།
གཅའ་ཞང་རྭ་རུ་བའི་༼ཚེ་པོ་ཚང་༽གི་དམ་ཆོས་ཀྱི་ཕ་མིང་ལ་མདོ་ཤིས་བློ་བྷེ་དང་། མ་མིང་ལ་ཚེ་པོ།
འདི་ལ་འགྲེལ་བཤད་གསལ་པོ་ཞིག་བྱེད་རོགས།
སྣུམ་ཟད་མར་མེར་གྱུར་བའི་བོད་མིའི་ལས།
མྱུར་སྐྱོབ་དཔུང་ལ་ཞུགས་པའི་དཔའ་བོའི་སྡེ།
གཅིག་རྗེས་གཉིས་མཐུད་བོད་སྐྱོང་སྲུང་མ་སྟེ།
སླར་ཡང་གངས་རིའི་ལྗོངས་སུ་བྱོན་པར་ཤོག
མཁྱེན་ནོ་གངས་ཅན་ལྷ་གཅིག་པད་དཀར་འཆང་། །སྐྱོངས་ཤིག་ང་ཡི་བླ་མ་ཡིད་བཞིན་ནོར། །འཁྲིད་ཅིག་དཔའ་བོ་འདི་གཉིས་བར་དོ་ནས། །གྲུ་འཛིན་རི་བོར་རྫུས་ཏེ་སྐྱེ་བར་མཛོད། །
དངོས་གནས་རང་རེ་བོད་ལ་དཔའ་རྒོད་ནི་ཧ་ཅང་མང་པོ་འདུག བོད་ཀྱི་དཔའ་རྒོད་ཚོ་ནི་དོན་དམ་གྱི་དཔའ་རྒོད་ཞེ་ཅིག་རེད། འདི་འདྲའི་དཔའ་རྒོད་ནི་བོད་ཁོ་ན་ལ་མ་གཏོགས་འཛམ་གླིང་གི་ཡུལ་གྲུ་གཞན་གང་དུ་ཡང་མི་འདུག ཡིན་ན་ཡང་། ཧ་ཅང་གི་སེམས་སྐྱོ་དགོས་པ་ཞིག་ནི་བོད་ཀྱི་དཔའ་རྒོད་ཚོར་བདག་པོ་རྒྱག་མཁན་མི་འདུག་པ་དེ་རེད། མེ་ལྕེའི་ཀློང་གི་བོད་ཀྱི་དཔའ་རྒོད་ཚོའི་རེ་འབོད་དང་ཞལ་ཚེམས་དག་ལ་ཉན་འཇོག་བྱེད་མཁན་མེད་པ་དེ་རེད། བརྡ་ལན་མ་ཎི་བཞིན་བགྲང་བགྲང་བྱེད་མཁན་གྱི་འཛིན་སྐྱོང་བཀའ་ཤག་ལྟ་བུར་ཡང་གྲངས་ཀ་རྒྱག་རྒྱུ་དང་སྨོན་ལམ་འདོན་རྒྱུ་ཙམ་ལས་མེར་སྲེག་ཐད་ལ་ཚོར་ཤུགས་དྲག་པོའམ་དངོས་མ་དེ་གུད་ན་ཡང་མི་འདུག
བསྟན་དང་དེ་འཛིན་ཆབ་སྲིད་རང་རིགས་སླད།། གཅེས་པའི་ལུས་སྲོག་ལོངས་སྤྱོད་ཡོངས་བཏང་བའི།། དཀའ་བ་བརྒྱ་ཕྲག་བསྒྲུབས་པའི་སྐྱེ་བོ་རྣམས།། གྲུ་འཛིན་མགོན་དེའི་ཐུགས་རྗེས་སྐྱོངས་བར་མཛོད།།
ཚེ་ཡི་འདུ་བྱེད་གཏོང་ཚེ་གནད་གཅོད་དང་།།
བར་དོ་གཤིན་རྗེའི་འཇིགས་སྐྲག་ཀུན་ཞི་ནས།།
དགའ་ལྡན་མཁའ་སྤྱོད་ཆོས་ཀྱི་ཕོ་བྲང་དུ།།
སྐྱེ་ནས་འཇམ་མགོན་ཡབ་སྲས་ཞལ་མཐོང་ཤོག།