འབྲོང་གི་གཏམ་གླེང་དྲི་ལན་དྲུག་མ།

འབྲོང་དཀར་པོ།

བདག་ལ་འདོད་པ་གཅིག་རང་ཡོད་པ་ནི་ཁུ་སིམ་གྱི་རི་གྲོང་ཞིག་ཏུ་དཔེ་དེབ་འདྲ་བལྟས་སྙན་རྩོམ་ཐུང་ཐུང་འདྲ་བྲིས་ནས་སྡོད་འདོད་ཀྱང་བདག་གི་སྡོད་གནས་ནོར་བ་ཡིན་ནམ་གང་ལྟར་སྐད་ཆ་མང་པོ་ཞིག་བཤད་དགོས་འདུག་ལ་འབྲི་དགོས་འདུག འདི་ལྟར་བྱེད་དོན་ནི་འུད་སྒྲོག་ལ་དགའ་ཞིང་དོན་དངོས་ལ་སུན་པའི་ཁོར་ཡུག་འདིའི་སྐྱོ་གར་མཐོང་མང་བས་སོ།། དེ་ནི་བདག་གི་ལས་སྐལ་ཡིན་པ་འདྲ། དེས་ན་བདག་གིས་དེང་སྐབས་རང་གིས་རང་ལ་དྲིས་པའི་དྲི་བ་དྲུག་གི་ཐོག་ལ་ལན་འདེབས་ཀྱི་ཚུལ་དུ་བྱས་ནས་རྒྱ་ཆེའི་ཀློག་པ་པོ་རྣམས་དང་བགྲོ་གླེང་བྱ་རྒྱུ་ཡིན།

དང་པོ། ༸གོང་ས་མཆོག་ནས་ཉེ་ཆར་ཨི་ཊ་ལི་དང་། ལ་དྭགས་ལ་བོད་གཞུང་ཕྱིར་བསྡུ་བྱས་ཡོད་མེད་དང། མཚན་བྱང་བརྗེ་སྒྱུར་སྐོར་སླར་ཡང་གསུངས་དགོས་དོན་གང་ཡིན་ནམ།

གནད་དོན་དེ་ཚོའི་ཐོག་༸གོང་ས་མཆོག་གིས་སླར་ཡང་བཀའ་སློབ་ཕེབས་དགོས་བྱུང་བ་ནི་ལོ་ངོ་དེ་དག་གི་རིང་ཁོང་ལ་བློ་ཕམ་དང་ཡིད་ཆད་ཆེན་པོ་བྱུང་ཡོད་པ་གསལ་པོ་རེད། ༸གོང་ས་མཆོག་ནས་ཆབ་སྲིད་ཀྱི་སྐུ་དབང་ཐམས་ཅད་མི་མང་ནས་འོས་འདེམ་བྱས་པའི་དབུ་ཁྲིད་ཅིག་ལ་རྩིས་འབུལ་ཞུ་རྒྱུའི་དགོངས་པ་ནི་བཙན་བྱོལ་ནང་མང་གཙོའི་སྒྲིག་འཛུགས་བཙུགས་པའི་ཉིན་དེ་ནས་ཡོད། དུས་དེ་ནས་བཟུང་བཙན་བྱོལ་མང་གཙོའི་སྒྲིག་འཛུགས་ལ་ཡར་རྒྱས་ཀྱི་འགྱུར་བ་རིམ་ཕྱིན་གྱིས་ཕྱི་ལོ་ ༢༠༠༡ ལོར་བཀའ་ཁྲི་མི་མང་གིས་ཐད་ཀར་འོས་འདེམ་བྱས་པ་ནས་བཟུང་༸གོང་ས་ཆེན་པོའི་ཆབ་སྲིད་སྐུ་དབང་གི་ནུས་པ་ཆུང་དུ་ཕྱིན་ཡོད། དུས་སྐབས་དེའི་རིང་༸གོང་ས་མཆོག་ནི་དོན་དམ་པར་ཕྱེད་བགྲེས་ཡོལ་རང་རེད། མི་མང་ནས་འོས་འདེམ་བྱས་པའི་བཀའ་ཁྲི་སྐབས་གསུམ་པ་དེ་དེང་རབས་ཀྱི་ཤེས་ཡོན་ཐོག་ནས་འབུམ་རམས་པའི་མཚན་སྙན་ཡོད་པའི་ན་གཞོན་ཞིག་ཕེབས་པར་བརྟེན་༸གོང་ས་མཆོག་ནས་སྐབས་དང་དུས་ལ་བབས་པར་གཟིགས་ཏེ་གསུམ་དུས་ཐེངས་ང་གཉིས་པའི་གསུང་འཕྲིན་ནང་ཆབ་སྲིད་ཀྱི་སྐུ་དབང་ཡོང་རྫོགས་མི་མང་ནས་ཐད་ཀར་འོས་འདེམ་བྱས་པའི་དབུ་ཁྲིད་ལ་རྩིས་འབུལ་ཞུ་རྒྱུ་ཡོངས་ཁྱབ་གནང་བར་མ་ཟད། སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་བཅའ་ཁྲིམས་ནང་གསལ་བའི་༸གོང་གི་སྐུ་དབང་ཐམས་ཅད་ཕྱིར་བསྡུ་དགོས་པ་དང་། དགའ་ལྡན་ཕོ་བྲང་གི་མཚན་གནས་རྗེས་འབྲེལ་གྱི་གཞུང་གི་མཚན་བྱང་ལའང་འགྱུར་བ་དགོས་སྐོར་གྱི་ཟབ་གསལ་གསུང་འཕྲིན་བསྩལ་ཡོད། དེ་རྗེས་སྨོན་ལམ་ཚེས་བཅོ་ལྔ་ཉིན་༸གོང་ནས་སྐྱེས་རབས་གསུང་ཆོས་སྐབས་མི་མང་ལ་ཆབ་སྲིད་ཀྱི་སྐུ་དབང་རྩིས་འབུལ་ཞུ་ཕྱོགས་དང་། གཞུང་གི་མཚན་བྱང་ལ་འགྱུར་བ་འགྲོ་ཕྱོགས་སོགས་ཀྱི་སྐོར་ལ་བཀའ་སློབ་ཧ་ཅང་གསལ་པོ་ཕེབས་ཡོད། མཐར་ཕྱི་ལོ་ ༢༠༡༡ ཟླ་༨ ཚེས་༨ ཉིན་༸གོང་ས་མཆོག་ནས་ཆབ་སྲིད་ཀྱི་སྐུ་དབང་མི་མང་ནས་བདམས་པའི་དབུ་ཁྲིད་ལ་རྩིས་འབུལ་ཞུས་ཡོད། སྐབས་དེར་༸གོང་ནས་ལོ་དྲུག་བཅུའི་སྔོན་སྲིད་སྐྱོང་སྟག་བྲག་གི་སྐུ་མདུན་ནས་བཞེས་པའི་ཆབ་སྲིད་ཀྱི་སྐུ་དབང་དེ་དེ་རིང་འོས་འདེམ་བྱས་པའི་སྲིད་སྐྱོང་བློ་བཟང་སེངྒེ་ལ་རྩིས་འབུལ་ཞུ་བཞིན་ཡོད་སྐོར་བཀའ་གནང་བར་མ་ཟད། ལོ་རྒྱུས་ཡུན་རིང་ལྡན་པའི་བཀའ་ཐམ་བདེ་སྐྱིད་མ་མི་མང་ཚང་མའི་མིག་གིས་མཐོང་སར་རྩིས་འབུལ་ཞུས་པ་སོགས་གཞུང་འཛིན་ལམ་ལུགས་བརྒྱུད་སྤྲོད་ཀྱི་རྣམ་འགྱུར་གསལ་པོ་བསྟན་ཡོད། འོན་ཀྱང་ཡ་མཚན་དགོས་པ་ཞིག་ལ་སྐབས་དེར་མི་འགའ་ཤས་ཤིག་གིས་དོན་དངོས་ཀྱི་གནས་ཚུལ་དེ་ཚོ་མིག་མཐོང་ལག་ཟིན་བྱུང་ཡང་ད་དུང་མ་གོ་མ་ཐོས་པའི་ཚུལ་གྱིས་བོད་གཞུང་བསྡུ་གསོག་བརྒྱབ་ཚུལ་དང་། བཙན་བྱོལ་གཞུང་གི་མིང་མེད་པ་བཟོས་ཚུལ་སོགས་འུད་སྒྲོག་ཆེན་པོས་གླེང་ཡོད། ཁོ་ཚོ་ལ་དམིགས་ཡུལ་ཞིག་ཡོད་ཀྱི་རེད། ང་ཁོ་ཚོའི་དམིགས་ཡུལ་དེར་དོགས་པ་ཧ་ཅང་ཆེ་ཡང་ངས་དེའི་ཐོག་ཚོད་དཔག་ཀྱི་སྐད་ཆ་ཤོད་འདོད་མེད།

བོད་གཞུང་བསྡུ་གསོག་བརྒྱབ་སྟེ་མེད་པ་བཟོས་པར་འུད་སྒྲོག་བྱས་པ་དེ་༸གོང་ས་མཆོག་བློ་ཕམ་ཡིད་ཆད་བྱུང་བ་དང་། ཉེ་ཆར་གནད་དོན་འདིའི་ཐོག་སླར་ཡང་བཀའ་སློབ་ཞིབ་གསལ་ཕེབས་དགོས་པའི་རྒྱུ་རྐྱེན་ཡང་དེ་ཡིན། གསལ་བཤད་ཇི་ཙམ་བྱས་ཀྱང་གསལ་པོ་ཆགས་རྒྱུ་མེད་པ་ནི་ཐང་ཆད་དགོས་པ་རང་རེད།

གཉིས་པ། བོད་ཡིག་ནང་བཙན་བྱོལ་བོད་གཞུང་ཞེས་པ་བཙན་བྱོལ་བོད་མིའི་སྒྲིག་འཛུགས་ལ་འགྱུར་བ་བཏང་དགོས་པའི་རྒྱུ་མཚན་གང་ཡིན་ནམ།

འདི་ལ་དགག་དགོས་པའི་རྒྱུ་མཚན་དུ་མ་ཞིག་ཡོད་རེད་སྙམ། དཔེ་ན། ཉེ་ཆར་གནང་བའི་ཨི་ཊ་ལི་དང་། ལ་དྭགས་ཀྱི་བཀའ་སློབ་ནང་གསལ་པོ་ཡོད། ཕྱི་ལོ་ ༡༦༤༢ ལོར་༸གོང་ས་ལྔ་པ་ཆེན་པོས་བཙུགས་པའི་དགའ་ལྡན་ཕོ་བྲང་གི་སྲིད་གཞུང་དེ་ཕྱི་ལོ་ ༡༩༥༩ བར་དུས་འགྱུར་རིམ་པའི་ཁྲོད་རང་ཡུལ་དུ་ཕྲ་ཚུགས་ཐུབ་པ་བྱུང་ཡོད། ང་དགུ་ལོར་བོད་ས་ཡོངས་རྫོགས་རྒྱ་ལག་ཏུ་ཤོར་ཏེ་ཟླ་གསུམ་པའི་ཚེས་བཅུ་བདུན་གྱི་དགོངས་དྲོ་༸གོང་ས་མཆོག་དང་བཀའ་ཤག་ལྷན་རྒྱས་ནོར་གླིང་ནས་ཕེབས་ཐོན་གནང་ཞིང་ཚེས་བཅོ་བརྒྱད་ཙམ་ནས་བོད་གཞུང་གི་ལས་ཁུངས་མ་ལག་དང་བཅས་པར་རྒྱ་མིས་ཚོད་འཛིན་དོ་དམ་ཡོངས་སུ་བྱས་པར་བརྟེན་༸གོང་ས་མཆོག་དང་བཀའ་བློན་ལྷན་རྒྱས་ནས་ལྷོ་ཁུལ་ལྷུན་རྩེར་བོད་གཞུང་གནས་སྤོས་བྱས་པའི་ཁྱབ་བསྒྲགས་གནང་ཡོད། ང་དགུ་ལོའི་ཟླ་བཞི་པའི་ནང་རྒྱ་གར་གྱི་སྲིད་བློན་ནེ་རུ་མ་སུ་རིར་༸གོང་ས་མཆོག་གི་བཞུགས་སྒར་དུ་བཅར་ནས་ཕན་ཚུན་འཚམས་འདྲི་དང་ནང་མོལ་གནང་སྐབས། ༸གོང་ནས་བཙན་བྱོལ་བོད་གཞུང་ངོས་བཞེས་ཡོང་ཐབས་ཀྱི་རེ་བ་གནང་ཡང་སྲིད་བློན་མཆོག་ནས་ངོས་བཞེས་ཐོབ་མེད། <ཕྱི་ལོ་ ༡༩༥༤ དང་། ༡༩༥༦ ལོ་སོ་སོར་རྒྱ་དཀར་ནག་གཉིས་ཀྱི་རྒྱལ་ཁབ་སོ་སོར་གནས་ཡོད་མི་སྣ་ཕན་ཚུན་འཚམས་ཞུར་བཅར་སྐབས་གནད་དོན་མང་པོའི་ཐོག་བཀའ་མོལ་དང་མཁས་ལེན་བྱུང་ཡོད་ཚོད་འདུག>  དེ་རྗེས་༸གོང་ནས་གསར་འགོད་པས་བོད་གཞུང་གང་དུ་ཡོད་དམ་ཞེས་པའི་དྲི་བར་ལན་འདེབས་གནང་སྐབས་ཏཱ་ལའི་བླ་མ་དང་ཏཱ་ལའི་བླ་མའི་བཀའ་ཤག་དང་བཀའ་བློན་ཚོ་གང་དུ་ཡོད་པ་དེར་བོད་མི་ཚོས་བོད་གཞུང་ཡོད་པར་ངོས་འཛིན་བྱེད་ཀྱི་རེད། ཅེས་གསུངས་པར་ཉིན་གཉིས་ཀྱི་རྗེས་སུ་ལྡི་ལི་ནས་རྒྱ་གར་གཞུང་ཀྱིས་བོད་གཞུང་ཟེར་བ་མེད་སྐོར་གྱི་གསར་བཀོད་གསལ་བསྒྲགས་སྤེལ་ཏེ་ལང་ཕྱོགས་གསལ་སྟོན་བྱས་ཡོད། འདི་ཚོ་དཔེ་མཚོན་ཙམ་རེད། ཉེ་ཆར་༸གོང་ས་མཆོག་ནས་བྱ་ཕྲུག་མའི་སྦོ་འོག་ནས་དྲོད་པའི་དཔེ་གསུངས་པ་ལྟར་སྲིད་དོན་གྱི་དཀའ་ངལ་འདི་འདྲའི་ཁྲོད་དུ་རྒྱ་གར་གཞུང་ནས་༸གོང་ས་མཆོག་གི་ཐུགས་རེ་བཞིན་ཏཱ་ལའི་བླ་མའི་མཚན་གནས་རྗེས་འབྲེལ་གྱི་མཚན་བྱང་འོག་གཟུགས་ཆེ་ཡང་དབྱིབས་མི་མངོན་པའི་ཐོག་ནས་གནས་ཐུབ་པའི་མཐུན་འགྱུར་བསྐྲུན་པར་བརྟེན་མི་ལོ་ལྔ་བཅུ་ཙམ་གནས་ཐུབ་པར་མ་ཟད། གཞི་རྒྱ་ཆེ་བའི་གཞུང་འབྲེལ་ལས་དོན་སྣ་མང་ཕུན་ཚོགས་བསྒྲུབས་ཐུབ་པ་བྱུང་ཡོད། ལོ་ངོ་འདི་དག་གི་རིང་རྒྱ་གཞུང་ནས་རྒྱ་གར་གཞུང་ལ་བརྙས་འདོགས་ཀྱི་ལག་པ་འཇུ་ས་བྱུང་མེད་ལ་རྒྱ་གར་གཞུང་ཡང་གནང་སྟབས་བདེ་པོ་བྱུང་ཡོད། ཕྱི་ལོ་ ༢༠༡༡ ལོར་༸གོང་ས་མཆོག་དང་ཁོང་གི་བླ་བྲང་ནས་བོད་གཞུང་གི་ཆབ་སྲིད་སྐྱོང་རྒྱུའི་སྐུ་དབང་ཕྱིར་བསྡུ་གནང་བར་བརྟེན་༸གོང་གི་བླ་བྲང་གི་མཚན་བྱང་དང་། གཞུང་གི་མཚན་བྱང་སོ་སོར་ཕྱེས་པར་བརྟེན་གཞུང་ཞེས་པའི་ཚིག་ཅིག་ལྷག་ཡོད་པ་འདི་འབྱུང་འགྱུར་ནང་ཕྱི་དགྲ་ནང་དགྲ་ཚང་མས་འགྲེལ་བརྗོད་འདྲ་མིན་གྱིས་ལོག་བཤད་སྤེལ་ས་མེད་པར་གཙང་མ་ཞིག་ཡོང་ཕྱིར་བོད་མིའི་སྒྲིག་འཛུགས་ཞེས་སྒྱུར་བཅོས་གནང་ཡོད། མིང་བྱང་འདིའི་འོག་དོན་དམ་པའི་བོད་གཞུང་དེ་སླར་ཡང་གཟུགས་ཆེ་ཡང་དབྱིབས་མི་མངོན་པའི་ཐོག་ནས་ལས་དོན་ཐམས་ཅད་སྔར་བཞིན་གནང་དང་གནང་མུས་སུ་ཡོད། ང་རང་གི་བསམ་ཚུལ་བྱས་ན་བོད་མིའི་སྒྲིག་འཛུགས་ཞེས་པའི་མིང་བྱང་འདི་༸གོང་ས་མཆོག་གི་ཐུགས་ལ་ཡོད་པའི་མིང་དེ་མ་རེད་སྙམ། གང་ཡིན་ཞེ་ན། སྐབས་དེར་ཚོགས་ཆེན་མཇུག་བསྒྲིལ་རྗེས་ཚོགས་ཞུགས་པ་ཚང་མར་༸གོང་ས་མཆོག་ནས་མཇལ་ཁ་དང་བཀའ་སློབ་གནང་ཡོད། སྐབས་དེར་ཚོགས་ཞུགས་པའི་རེ་ཞུ་བཞིན་༸གོང་ས་མཆོག་ནས་གངས་ལྗོངས་རང་དབང་མང་གཙོའི་སྒྲིག་འཛུགས་སམ། ཡང་ན། གངས་ལྗོངས་རང་དབང་མང་གཙོའི་ལྷན་ཚོགས་ཞེས་བཏགས་ན་ལེགས་པའི་ལམ་སྟོན་ཕེབས་ཡོད། དེ་རྗེས་གྲོས་ཚོགས་ནང་བཀའ་སྤྱི་ལྷན་སྦྲེལ་གྱི་ཚོགས་ཆུང་དེས་༸གོང་ས་མཆོག་ལ་མིང་བྱང་འགའ་ཤས་ཤིག་སྤྱན་འབུལ་ཞུས་ཏེ་དེ་ཁྲོད་ནས་གཅིག་བདམས་གནང་ཡོང་བའི་སྙན་སྒྲོན་ཞུས་པར་༸གོང་ས་མཆོག་ནས་བོད་མིའི་སྒྲིག་འཛུགས་ཞེས་པ་འདི་བདམས་གནང་ཡོད་པ་རེད། འདིའི་ཐོག་བསམ་ཞིབ་བྱས་ན་ཚོགས་ཆུང་ནས་ཕུལ་བའི་མིང་བྱང་ཁྲོད་དུ་༸གོང་ས་མཆོག་ནས་བཏགས་གནང་བའི་མིང་དེ་གཉིས་མེད་པ་གསལ་པོ་རེད། ༸གོང་ས་མཆོག་གི་དགོངས་པར་གཞུང་གི་མིང་དུ་གངས་ལྗོངས་རང་དབང་མང་གཙོའི་ལྷན་ཚོགས་སམ་གངས་ལྗོངས་རང་དབང་མང་གཙོའི་སྒྲིག་འཛུགས་ཞེས་པ་གང་རུང་འདོགས་འདོད་ཡོད་ཅིང་བཀའ་ཁྲིར་སྲིད་སྐྱོང་ཞེས་འབོད་འདོད་ཡོད་ཀྱང་། སྐབས་དེའི་གྲོས་ལ་དབང་བའི་སྐྱེ་བོ་དབང་ཤུགས་ཅན་མང་པོས་ཐུགས་འདུན་བཞིན་གནང་མེད་པ་གསལ་པོ་རེད།

གསུམ་པ། བོད་གཞུང་གི་མཚན་བྱང་བརྗེ་སྒྱུར་ཐད་སླར་ཡང་འབྱུང་འགྱུར་གྱི་ཚོགས་ཆེན་ཐོག་བཀའ་བསྡུར་དགོས་པ་མཐོང་གི་འདུག་གམ།

ངའི་བསམ་ཚུལ་བྱས་ན་ད་ལྟ་ང་ཚོས་སླར་ཡང་གཞུང་གི་མཚན་བྱང་ཐོག་བཀའ་བསྡུར་གནང་བ་དགོས་པ་དམིགས་བསལ་བ་གང་ཡང་ཡོད་པ་མ་རེད་སྙམ། དེ་ལས་ལྡོག་སྟེ་ང་ཚོས་ཚོར་བ་རྣོ་མདོག་དང་། གོ་བ་ཟབ་མདོག སེམས་ཤུགས་ཡོད་མདོག་བྱས་ཏེ་བོད་གཞུང་གི་མཚན་དོན་གཉིས་ཀྱི་ཐོག་གླེང་ཕྱོགས་མང་པོ་བཟོས་ན་རྒྱ་གར་གཞུང་དང་བོད་གཞུང་བར་གྱི་ནང་མོལ་མང་པོ་ཞིག་ཁྲོམ་བསྒྲགས་བྱ་དགོས་པར་ཐུག་སྲིད། དེ་འདྲའི་ཐོག་ནས་རྒྱ་ནག་ལ་ལག་པ་འཇུ་སའི་ཁོར་ཡུག་བསྐྲུན་པ་ལྟ་བུ་ཆགས་མི་སྲིད་པ་མིན། རྒྱ་ནག་གཞུང་གི་རེ་བ་ནི་གཟུགས་ཆེ་ཡང་དབྱིབས་མི་མངོན་པའི་སྲིད་བྱུས་འོག་གནས་པའི་བཙན་བྱོལ་བོད་གཞུང་དེའི་གཟུགས་བརྙན་གསལ་སྟོན་བྱ་རྒྱུ་དང་། དེ་ནས་དེ་ཉིད་ཐོག་གླེང་ཕྱོགས་བཟོས་ཏེ་མཐའ་མ་མེད་པ་བཟོ་རྒྱུ་དེ་ཡིན། ད་ལྟའི་ཆར་ང་ཚོར་ཉེན་ཁ་ཆེ་བའི་གླེང་ཕྱོགས་ཉེན་ཁ་ཅན་གཉིས་ཡོད། གཅིག་ནི་རྒྱལ་ཁབ་སུས་ཀྱང་ངོས་བཞེས་མེད་པའི་བཙན་བྱོལ་བོད་གཞུང་ཞེས་པ་འཛམ་གླིང་ཡོངས་ཁྱབ་བྱ་དགོས་པ་དེ་དང་། གཉིས་པ་ནི་བཙན་བྱོལ་བོད་གཞུང་ཞེས་པ་བསྡུ་གསོག་བརྒྱབ་ནས་ད་ཆ་རྩ་བ་ནས་མེད་པ་ཡོངས་ཁྱབ་བྱ་རྒྱུ་དེ་རེད། འདི་གཉིས་ཀ་རྒྱ་ནག་གཞུང་ལ་དགོས་པའི་རིན་བྲལ་གྱི་དངོས་པོ་རྩ་ཆེན་ཞིག་རེད། གནད་དོན་འདི་ཚོའི་ཐོག་རྒྱ་མིས་ཀྱང་གླེང་ཕྱོགས་སྤེལ་སྲིད་པས་ང་ཚོས་དེ་ལ་ཞབས་འདེགས་ཞུ་དགོས་པ་གང་ཡོད་དམ། ཆབ་སྲིད་ཀྱི་རྙོག་འཛིང་མང་པོའི་ནང་སེམས་ཤུགས་དང་། ཚོར་བས་རང་ཉིད་དགྲ་བོའི་ལག་ཆར་འགྱུར་སྲིད་པ་རེད། དེས་ན་གནས་སྐབས་འགའ་ཤས་ལ་ཡིད་ཆེས་བྱེད་པ་དེའང་ཐབས་བྱུས་ལེགས་ཤོས་ཤིག་ཡིན་སྲིད།

བཞི་པ།༸གོང་ས་བཅུ་གསུམ་པས་བསྐྱར་བསྒྲགས་བྱས་པའི་རང་བཙན་བསྐྱར་གླེང་བྱས་ན་དགོས་པ་མེད་དོན་གང་ཡིན་ནམ།

 ༸གོང་ས་བཅུ་གསུམ་པའི་སྐབས་འབྲི་ཆུའི་ཤར་རྒྱུད་ཀྱི་བོད་སྡེ་མང་པོ་ཞིག་བོད་གཞུང་གི་དབང་སྒྱུར་འོག་མ་ཚུད་ཅིང་རྒྱ་གཞུང་གི་དབང་སྒྱུར་ཁྱབ་ཁོངས་སུའང་མེད་པར་བར་གནས་འདྲ་བོ་ཞིག་བསྡད་ཡོད། ས་ཆ་དེ་ཚོ་ལོ་རྒྱུས་དང་ས་ཁྲའི་ཐོག་ནས་བོད་གཞུང་གི་ཁྱབ་ཁོངས་ཡིན་པ་གསལ་པོ་རེད། ཉེ་ཆར་སྦིར་གཞིས་སུ་ཚོགས་པའི་གཞོན་ལྷན་གྱི་ཚོགས་འདུའི་ཐོག་ཆོལ་གསུམ་གཅིག་ཏུ་སྒྲིལ་བའི་རང་བཙན་གཙང་མ་རྩོད་ལེན་བྱ་རྒྱུའི་སྐད་ཆ་བཤད་འདུག ད་ལྟའི་ཆར་རང་བཙན་དང་རང་སྐྱོང་ཐོབ་མིན་ཇི་ལྟར་ཡང་ཆོལ་གསུམ་བོད་མིའི་ནུས་ཤུགས་ཆིག་སྒྲིལ་གོང་ཐོར་གཏོང་རྒྱུའི་སྐད་ཆ་ཤོད་པ་ལས་དེ་མིན་མི་སེམས་དུམ་བུ་གཏོང་བའི་སྐད་ཆ་ཤོད་པའི་དུས་ཤིག་མིན། ཆོལ་གསུམ་བོད་མི་ཁ་གཏོར་གཏོང་རྒྱུའི་ལས་ཀ་དེ་རྒྱ་མིའི་ལས་ཀ་རེད། དེ་ང་ཚོས་དཀའ་ལས་བརྒྱབ་ནས་བྱེད་དགོས་པའི་ལས་ཀ་ཞིག་མ་རེད། དེར་བརྟེན་ངས་༸གོང་ས་བཅུ་གསུམ་པ་འུད་སྒྲོག་བྱེད་པའི་རྒྱབ་ལྗོངས་ལ་ཞིབ་འཇུག་བྱེད་དགོས་པ་རེད་སྙམ།

ལྔ་པ། བོད་ཀྱི་སྲིད་དོན་རྒྱལ་རབས་ཀྱི་རྩོམ་པ་པོ་ཞྭ་སྒབ་པར་བཙན་བྱོལ་ནང་གི་ལོ་རྒྱུས་སྨྲ་བའི་དབང་ཕྱུག་གཅིག་པུ་དེ་ཡིན་ན་བཙན་བྱོལ་ནང་ལོ་རྒྱུས་སྨྲ་བར་ངོས་འཛིན་བྱས་ཆོག་པ་ཁོང་ལས་མེད་དམ།

བཙན་བྱོལ་ནང་ནམ་རྒྱུན་ང་ཚོས་བོད་ཀྱི་རྒྱལ་རབས་མཁས་དབང་གྲངས་འདྲེན་བྱེད་སྐབས་འདི་དང་དེ་ཞེས་མང་པོ་རྩི་རྒྱུ་ཡོད་པ་འདྲ་བོ་ཡོད། ངའི་བསམ་པར་ད་ལྟའི་ཆར་བོད་ཀྱི་ལོ་རྒྱུས་སྨྲ་བའི་མཁས་དབང་རྩམ་དྲི་ཡོད་པ་ཞིག་ཡིན་ན་མཆོད་ཡོན་གསུམ་གྱི་ལོ་རྒྱུས་ཐོག་དག་སེལ་རྩལ་འདོན་གནང་དགོས་བསམ་གྱི་འདུག རྒྱ་ཕྱོགས་ནས་ཀྱང་མཆོད་ཡོན་གསུམ་གྱི་ལོ་རྒྱུས་ལ་ལོག་འགྲེལ་བྱ་རྒྱུར་དངོས་ཤུགས་རྒྱུད་གསུམ་ནས་འགྲོ་གྲོན་ཆེན་པོ་གཏོང་གི་ཡོད། བོད་ནང་གི་ལོ་རྒྱུས་སྨྲ་བ་མང་པོ་ཞིག་མཆོད་ཡོན་གསུམ་གྱི་ལོ་རྒྱུས་ཐོག་སེམས་ནང་བསམ་པའི་དངོས་ཡོད་མང་པོ་ཞིག་ཤོད་ཐུབ་པའི་ཁོར་ཡུག་མེད། མཆོད་ཡོན་གསུམ་དང་འབྲེལ་བའི་རྒྱལ་རབས་དངོས་ཡོད་ཅིག་ཤོད་རྒྱུའི་འགན་དེ་བཙན་བྱོལ་ནང་ཡོད་པའི་རྒྱལ་རབས་སྨྲ་བ་ཚོར་ཡོད། སྟབས་མ་ལེགས་པ་ཞིག་ལ་བཙན་བྱོལ་ནང་གི་རྒྱལ་རབས་སྨྲ་བའི་མིང་འཛིན་གྲགས་ཆེན་དེ་ཚོས་འདིའི་ཐོག་མི་སྨྲ་བའི་རྟུལ་ཞུགས་འཛིན་ནས་སྨྲ་བ་བཅད་ཡོད། ད་དུང་ཡ་མཚན་དགོས་པ་ཞིག་ལ་འགའ་ཤས་ཀྱིས་ཞྭ་སྒབ་པའི་སྲིད་དོན་རྒྱལ་རབས་ལ་དམའ་འབེབ་བྱེད་པ་དང་། ཡང་ལ་ལས་ཆེད་དུ་གཉེར་ནས་ལོ་ངོ་བཞི་བརྒྱ་མ་ཟིན་ཙམ་གྱི་གཞུང་འཛིན་ལོ་རྒྱུས་ཡོད་པའི་དགའ་ལྡན་ཕོ་བྲང་གཞུང་གི་ལོ་རྒྱུས་ལ་འཁྱོག་བརྗོད་དམའ་འབེབ་བྱས་ཡོད། བྱེད་སྟངས་འདི་ཚོའི་ཐོག་ང་ལ་ལྟ་ཚུལ་མང་པོ་ཡོད་ཀྱང་ད་ལྟ་གསལ་པོ་ཞིག་ཤོད་ཐུབ་ཀྱི་མི་འདུག གཅིག་བྱས་ན་ཁོང་ཚོ་པེ་ཅིང་ལ་ཡང་ཡང་ཕེབས་དགོས་ཀྱི་ཡོད་འདུག་པ་སྐབས་དེའི་ཕྱག་རྟགས་འདྲ་ཡིན་སྲིད། ཞྭ་སྒབ་པའི་སྲིད་དོན་རྒྱལ་རབས་ལ་རྒྱ་ཕྱོགས་ནས་དགག་རྒྱག་གི་དཔེ་དེབ་དྲུག་བཅུ་རེ་གྲངས་ཤིག་རྩོམ་སྒྲིག་བྱས་ནས་འགྲོ་གྲོན་ཆེན་པོ་བཏང་ཡོད། གང་ཟག་བྱེ་བྲག་པ་ཞིག་གིས་བརྩམས་པའི་དེབ་ལ་རྒྱལ་ཁབ་ཅིག་གིས་འགྲོ་གྲོན་བཏང་ནས་དགག་རྒྱག་གི་དེབ་རྩོམ་སྒྲིག་བྱས་པའི་གྲངས་ཚད་མཐོ་ཤོས་ཀྱི་གྲས་སུ་སླེབས་ཡོད། ཞྭ་སྒབ་པའི་སྲིད་དོན་རྒྱལ་རབས་ཀྱི་དམིགས་ས་གཙོ་བོ་དེ་མཆོད་ཡོན་གསུམ་དང་འབྲེལ་བའི་ལོ་རྒྱུས་ལ་དམིགས་ཡོད། གནས་ཚུལ་འདི་ཚོའི་ཐོག་ནས་ངས་བཤད་པའི་སྐད་ཆ་ལ་རྒྱུ་མཚན་ཡོད་མེད་མཁྱེན་ཐུབ་ཀྱི་རེད་སྙམ།

དྲུག་པ།  ང་ཚོའི་སྤྱི་ཚོགས་ནང་མི་མང་པོ་ཞིག་འུད་སྒྲོག་ལ་དགའ་ཞིང་དོན་དངོས་ལ་མི་དགའ་བ་འདི་ཅིས་ལེན་པ་རེད་དམ།

དམར་རྗེན་དུ་སྟོན་པའི་དྲི་བ་ཆེན་པོ་འདིའི་ལན་ད་ལྟ་ངས་འདི་རེད་ཅེས་ཐག་གཅོད་རང་བཞིན་གྱི་ཐོག་ནས་ཞུ་ཐུབ་པ་མི་འདུག འདིའི་ལན་ང་ཚོ་ཚང་མས་བློ་ཁ་ནང་དུ་ཕྱོགས་ནས་བཙལ་དགོས་ཀྱི་འདུག

མཐའ་དོན་དུ། གུས་པའི་རྩོམ་ཡིག་འདིའི་ནང་འཁོད་པའི་དྲི་བ་གང་ཞིག་ལ་གང་ཟག་སུ་ཞིག་གིས་ལན་འདེབས་བྱས་ཀྱང་དགའ་བསུ་ཡོད་པས་དེ་དོན་དགོངས་འཇགས་ཞུ།

ཕྱི་ལོ་ ༢༠༡༢ ཟླ་༨ ཚེས་ ༢༦ ཉིན་བྲིས།