དེ་རིང་གནས་ཚུལ་ཐོན་པ་ལྟར་ན། རྒྱ་གཞུང་གི་སྐབས་རྗེས་མའི་རྒྱུན་ལས་མི་བདུན་པོ་གཏན་ཁེལ་པ་མ་ཟད། ཅཱང་ཤོག་ཁག་ལ་ཕམ་ཉེས་ཆེན་པོ་བྱུང་ཡོད་འདུག
དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་གཞུང་དམར་ཤོག་སྐབས་ ༡༨ པའི་ཆབ་སྲིད་ལྷན་ཁང་གི་རྒྱུན་ལས་མི་བདུན་ལ་གཏན་ཁེལ་ཡོད་པ་དང་། ཁོ་ཚོ་ཞིས་ཅིན་ཕེན་དང་། ཡུས་ཀྲིན་ཧྲན། ལིས་ཁི་ཆིང་། ཝང་ཀྲི་ཧྲན། ཀྲང་ཏིག་ཅང་། ལིས་ཡོན་ཁྲའོ། ཝང་ཡཱང་བཅས་ཡིན་པ་དང་། དེ་སྔའི་རྒྱ་གཞུང་ཁྲིམས་སྲིད་ལྷན་ཁང་གི་དྲུང་ཆེ་དང་དྲིལ་བསྒྲགས་ལྷན་ཁང་གི་མགོ་གཙོ་གོ་གནས་གཉིས་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ཁྲོད་ནས་ཕྱིར་ཕུད་བཏང་ཡོད་འདུག
རྒྱ་ནག་གནད་དོན་ཉམས་ཞིབ་པ་ཧྲི་ཙང་ཧྲན་གྱིས། དེ་སྔོན་ཅཱང་ཤོག་ཁག་གིས་ ༦༡༠ གཞུང་ལས་ཁང་ནི་ཁྲིམས་སྲིད་ལྷན་ཁང་གི་ངོ་བོར་རྒྱ་སྐྱེད་བྱས་ཤིང་། བརྟན་ལྷིང་ཁ་གཡར་ཏེ་ཆོས་འཁོར་རྩ་རླུང་སྒོམ་སྒྲུབ་པ་དང་དམངས་གཙོ་དོན་གཉེར་པ་སོགས་ལ་གཅར་རྡུང་ཁྲིམས་གཅོད་བྱས་ཡོད་པ་མ་ཟད། འདས་པའི་ལོ་ ༡༠ ལྷག་གི་རིང་རྒྱ་གཞུང་གི་གཞི་རྩའི་དབང་ཤུགས་ལ་རྟིང་འཛིན་བྱས་ཏེ། དོན་གྱིས་རྒྱ་ནག་དབུས་གཞུང་གཉིས་པ་ལྟ་བུ་ཆགས་ཡོད་ལ། ཐེངས་འདིར་ཅཱང་ཤོག་ཁག་གི་དབང་ཤུགས་ཀྱི་གཞི་རྟེན་ཁྲིམས་སྲིད་ལྷན་ཁང་དང་དྲིལ་བསྒྲགས་ལྷན་ཁང་གཉིས། རྒྱ་གཞུང་གི་ཆེས་མཐོའི་དབང་འཛིན་སྡེ་ཁག་གི་གྲས་ནས་ཕྱིར་ཕུད་བཏང་བ་དེས། མ་འོངས་པར་རྒྱ་ནག་གི་ཆབ་སྲིད་ལ་འགྱུར་ལྡོག་ཆེན་པོ་འགྲོ་སྲིད་པ་བརྗོད་འདུག
རུའི་ཊིར་གསར་ཁང་གིས་རྒྱ་གཞུང་མཐོ་རིམ་དཔོན་རིགས་ཀྱིས་བརྗོད་པའི་གནས་ཚུལ་ལུང་འདྲེན་བྱས་པ་ལྟར་ན། རྒྱ་གཞུང་དམར་ཤོག་སྐབས་ ༡༨ ཚོགས་ཆེན་དེ་ཕྱི་ཟླ་ ༡༠ ཚེས་ ༡༠ ནས་ ༡༨ འཚོགས་རྒྱུ་ཡིན་པ་དང་། རྒྱ་གཞུང་སྲིད་འཛིན་ཧུའུ་ཅིན་ཐའོ་ཡིས་ ༢༠༡༣ ལོར་དབང་ཆ་ཡོང་རྫོགས་རྩིས་སྤྲོད་བྱ་གཏན་ཁེལ་ཡོད་པ་དང་། ཁོས་མ་འོངས་པའི་ཟླ་ ༧ ནང་རྒྱལ་ཁབ་ཀྱི་སྲིད་འཛིན་དང་དམག་དོན་སྲིད་འཛིན་གྱི་དབང་ཆ་གཉིས་ཀ་མཉམ་དུ་ཞིས་ཅིན་ཕེན་ལ་རྩིས་སྤྲོད་བྱས་ཏེ། ཁོ་རང་གིས་བསྐོ་འཐེན་བྱས་པའི་སྲིན་བློན་གཞོན་པ་ལི་ཁི་ཆཱང་ལ་དམག་དོན་སྲིད་འཛིན་གཞོན་པའི་གོ་གནས་སྤྲོད་རྒྱུའི་རེ་བ་བཅིངས་ཡོད་པ་དང་། ཧུའུ་ཅིན་ཐའོ་ཡིས་དེ་ལྟར་སྒྲུབ་པའི་དམིགས་ཡུལ་གཙོ་བོ་ནི་དཔོན་རིགས་གསར་རྙིང་བརྗེ་སྤོར་གྱི་བརྒྱུད་རིམ་ཁྲོད་དཀའ་རྙོག་དེ་དག་བསྐྱར་དུ་མི་འབྱུང་བའི་ཆེད་དུ་ཡིན་འདུག
ཞིས་ཅིན་ཕེན་གྱིས་རྒྱ་ནག་དམར་གཞུང་སྤྱི་ཁྱབ་དྲུང་ཆེ་དང་རྒྱལ་ཁབ་ཀྱི་སྲིད་འཛིན། ཡུས་ཀྲིན་ཧྲན་གྱིས་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ལྷན་ཚོགས་ཀྱི་ཚོགས་གཙོ། ལི་ཁི་ཆང་གིས་རྒྱལ་ཁབ་ཀྱི་སྲིད་བློན། ཝང་ཀྲི་ཧྲན་གྱིས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་སྲིད་བློན་གཞོན་པ། ཀྲང་ཏིག་ཅཱང་གིས་རྒྱལ་ཡོངས་སྲིད་གྲོས་ཀྱི་ཚོགས་གཙོ། ལི་ཡོན་ཁྲའོ་ཡིས་རྒྱལ་ཁབ་ཀྱི་སྲིད་འཛིན་གཞོན་པ། ཝང་ཀྲི་ཧྲན་གྱིས་རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ། ཝང་ཡཱང་གིས་རྒྱ་དམར་དབུས་རྩ་འཛུགས་སྡེ་ཁག་དྲུང་ཆེ་བཅས་ཀྱི་འགན་འཁུར་རྒྱུ་ཡིན་འདུག
གསར་འགོད་པ། ཚེ་རིང་རྒྱལ།
ཏང་གི་རྒྱུགས་ཁྱི་རྐྱང་རྐྱང་འདེམས་ཡོད་པ་ཤ་རྟགས་རེད་གོ
ཧཧཧཧ
དྲ་གྲོགས་གནས་ཚང་ལགས། གནས་ཚུལ་འདི་རྒྱ་ནག་ཕྱི་ལོག་གི་རྒྱ་ཡིག་གསར་ལམ་ཁག་མང་པོའི་ནང་ཐོན་འདུག དེ་བཞིན། ཕྲན་གྱིས་རྒྱ་གཞུང་གི་ངོས་ནས་ཕྱིར་བསྒྲགས་བྱས་འདུག་གཏན་ནས་ལབ་མེད། རྒྱ་གཞུང་དཔོན་རིགས་ནང་ཁུལ་གཏན་འབེབས་ཀྱི་གནས་ཚུལ་རྣམས་ཕྱིར་གྱར་ཏེ་གསར་ལམ་ཁག་ཏུ་ཐོན་པ་ཞིག་རེད།
གྲོགས་པོ་ལགས། གསར་འགྱུར་ཨེ་འདྲ་ཞིག་ག་བ་འདུག གལ་སྲིད་འདི་ལྟར་ཐོན་ཡོད་པ་ཡིན་ན། རྒྱ་གཞུང་ལ་མང་གཙོ་མེད་པ་མཚོན་གྱི་ཡོད་པ་རེད། ཡིན་ནའི། རྒྱ་གཞུང་གིས་དེང་གི་བར་དུ་ཚོགས་འདུ་མ་བསྐོང་བའི་ཡར་སྔོན་འདི་ལྟར་ཕྱི་བསྒྲགས་བྱེད་མྱོང་ཡོད་པ་མ་རེད། མིང་ཐོག་ནས་ཚོགས་འདུ་བརྒྱུད་ནས་འོས་འདེམས་ལས་ཐོན་པ་ལྟ་བུའི་རྣམ་པ་ཤུགས་ཆེར་སྟོན་ངེས་ཡིན།
ངོ་བལྟས་ན་དགའ་ཏག་ཏག་མ་རེད