གཟའ་སྤེན་པའི་ཉིན་རྒྱ་ནག་གཞུང་གིས་ཉ་འཚོ་ཟིལ་དཀར་བཤད་སྒྲུབ་དར་རྒྱས་གླིང་དགོན་པའི་གྲྭ་པ་ལྔ་འཛིན་བཟུང་བྱས་ཏེ། གར་ཡོད་ཅི་བྱུང་གནས་ཚུལ་ཅི་མ་ཤེས་པར་ལྷག་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༡ ཉིན་ཁམས་ཡུལ་ཤུལ་ཁྲི་འདུ་རྫོང་སྒ་སྟོད་ཡུལ་ཚོའི་མགོ་ཁྲིད་ཁག་ཅིག་གིས་ཉ་འཚོ་ཟིལ་དཀར་བཤད་སྒྲུབ་དར་རྒྱས་གླིང་དགོན་པའི་གཞུང་ལས་ཁང་དུ་ཁ་པར་བཏང་སྟེ། ༢༠༠༩ ལོར་ས་ཡོམ་རོཊ་སྐྱོར་གྱི་ཁང་པ་དེ་དག་རྩིས་ལེན་བྱེད་དུ་ཡོང་གི་ཡིན་ཞེས་བརྡ་སྤྲད་ཡོད་པ་མ་ཟད། ཉིན་དེའི་ཞོགས་པའི་ཆུ་ཚོད་ ༡༠།༠༠ ཡས་མས་སུ་གློ་བུར་དུ་དམག་མི་འབོར་ཆེན་དགོན་པར་ཡོང་སྟེ། རྒྱ་ཆེན་སྡེ་བའི་ཕ་བརྩོན་འགྲུས་དོན་ལྡན་གྱི་བུ། རང་ལོ་ ༤༥ ཡིན་པའི་གྲྭ་བསོད་ནམས་ཤེས་རབ་ལགས་དང་གེ་ཤིང་སྡེ་བའི་ཕ་རྟ་རྒྱལ་དང་མ་པདྨ་མཚོ་གཉིས་ཀྱི་བུ། རང་ལོ་ ༣༠ ཡིན་པའི་གྲྭ་བློ་བཟང་སྦྱིན་པ། མཁར་རོང་སྡེ་བའི་ཕ་ཨ་ཐུབ་དང་ཕ་ཨ་ཐུབ་དང་མ་སྒྲོལ་དཀར་གཉིས་ཀྱི་བུ། རང་ལོ་ ༢༤ ཡིན་པའི་གྲྭ་ཚུལ་ཁྲིམས་སྐལ་བཟང་། གེ་ཤིང་སྡེ་བའི་ཕ་བསམ་ཡག་དང་མ་ཚེ་དབང་པདྨ་གཉིས་ཀྱི་བུ། རང་ལོ་ ༣༠ ཡིན་པའི་གྲྭ་ངག་དབང་སྨོན་ལམ། རྒྱ་ཆེན་སྡེ་བའི་ཕ་བརྩོན་འགྲུས་བློ་ལྡན་དང་མ་དབང་མོ་སྒྲོལ་མ་གཉིས་ཀྱི་བུ། རང་ལོ་ ༤༤ ཡིན་པའི་གྲྭ་བསོད་ནམས་དབྱིག་གཉེན་བཅས་མི་ལྔ་འཛིན་བཟུང་བཙན་འཁྲིད་བྱས་ཏེ་གར་ཡོད་ཅི་བྱུང་གནས་ཚུལ་ཅི་ཡང་མ་ཤེས་པར་ལྷག་ཡོད་པ་མ་ཟད། ཁོང་ཚོས་གྲྭ་ཤག་སྔོག་བཤེར་གྱིས་གློག་ཀླད་དང་འོར་སྡེར་སོགས་གཞུང་བཞེས་བཏང་ཡོད་འདུག
གནས་ཚུལ་ནང་བཀོད་པ་ལྟར་ན། སྐབས་དེར་དགོན་པའི་གྲྭ་བ་གཞན་རྣམས་ཀྱིས་ཁོང་ཚོ་ཀློད་གྲོལ་གཏོང་དགོས་པའི་རེ་སྐུལ་ཞུས་ཀྱང་། ཉེན་རྟོག་པ་དང་དམག་མིས་གྲྭ་བ་ཚོས་རེ་སྐུལ་དང་ལེན་མ་བྱས་པའི་ཁར། གྲྭ་བ་ཁག་ཅིག་ལ་ཉེས་རྡུང་བཏང་སྟེ་རྨས་སྐྱོན་བཟོས་ཡོད་འདུག་ལ། ད་ལྟའི་ཆར་རྒྱ་གཞུང་གིས་ས་གནས་ཀྱི་བརྒྱུད་ལམ་ཆ་ཚང་ལ་བཀག་སྡོམ་དང་། དགོན་པར་ཉེན་རྟོག་པ་དང་དམག་མི་བརྒྱ་ཕྲག་མང་པོ་འགྲེམས་འཇོག་གིས་དམ་དྲག་བྱེད་ཀྱི་ཡོད་འདུག
ཟིལ་དཀར་དགོན་བཤད་སྒྲུབ་དར་རྒྱས་གླིང་ནི། ཕྱི་ལོ་ ༨༦༠ ཡས་མས་སུ་ཆོས་རྗེ་རྣམ་རྒྱལ་གྲཊ་པས་ད་ལྟའི་ཡུལ་ཤུལ་བོད་རིགས་རང་སྐྱོང་ཁུལ་ཁྲི་འདུ་
རྫོང་རྫ་སྟོད་ཡུལ་ཚོ་དང་སྤྱི་ལེ་ ༡༣ གྱི་ས་ཆར་ཐོག་མར་ཕྱག་བཏབ་པ་ཞིག་ཡིན་འདུག་ལ། དགོན་པ་འདི་ཐོག་མར་བཀའ་བརྒྱུད་པའི་ཆོས་རྒྱུད་འཛིན་མཁན་གྱི་དགོན་སྡེ་ཞིག་ཡིན་ཡང་། ཕྱིས་སུ་རྗེ་ཙོང་ཁ་པའི་དངོས་སློབ་དགོན་པའི་བླ་མ་མཁན་ཆེན་ཡོན་ཏན་དཔལ་བས་དགེ་ལུགས་སུ་བསྒྱུར་བ་ནས་བཟུང་། ཞྭ་སེར་བསྟན་པའི་རང་ལུཊ་དར་སྤེལ་གནང་སྟེ། དགེ་འདུན་པ་སྟོང་ཕྲག་ལས་བརྒལ་བ་ཡོད་པའི་རི་བོ་དགེ་ལྡན་པའི་དགོན་ཆེན་ཞིག་ཡིན་འདུག ད་ལྟའི་ཆར་དགོན་པ་འདིར་གྲྭ་བ་ ༥༠༠ ལྷག་ཡོད་འདུག་ལ། གཙོ་བོ་གཞུང་ཆེན་བཀའ་པོད་ལྔར་བཤད་སྒྲུབ་འཆད་ཉན་དང་ཐོས་བསམ་སྒོམ་སྒྲུབ་སོགས་ལ་ཉམས་ལེན་དང་། ས་གནས་ཀྱི་སློབ་མ་སྟོང་ཕྲག་མང་པོར་ནང་ཆོས་ངོ་སྤྲོད་དང་རིག་གནས་འཆད་ཁྲིད་གནང་གི་ཡོད་འདུག
