མཆན་གྲོཊ་ལྷག་བསམ་གྱི་དྲི་བར་འབྲོང་གིས་ལན་འདེབས།

འབྲོང་དཀར་པོ།

ཉེ་སྔོན་གུས་པས་དུས་བབ་དྲ་ཐོག་ཏུ་༼འབྲོང་གི་གཏམ་གླེང་དྲི་ལན་དྲུག་མ།༽ཞེས་པའི་རྩོམ་ཡིག་ཅིག་བཀོད་ཡོད་པའི་གཤམ་དུ། མིང་དངོས་རྫུན་གང་ཡིན་ཤེས་དཀའ་ཡང་ལྷག་བསམ་ཞུ་བ་ཞིག་གིས་དྲི་བ་གསུམ་བཀོད་དེ་དེ་ཚོར་ཆབ་སྲིད་ཐོག་མཁྱེན་རྒྱ་ཡངས་པའི་བོད་མི་སུས་ལན་འདེབས་བྱས་ཀྱང་དགའ་བོ་ཡོང་བ་འདུག་ཅེས་གསུངས་འདུག ང་རང་ཆབ་སྲིད་ཐོག་མཁྱེན་པ་ཡོད་མཁན་དེ་འདྲ་རྩ་བ་ནས་མིན་ཡང་ཁོང་གི་དྲི་བ་གསུམ་དེར་ལན་འདེབས་བྱ་རྒྱུའི་འདོད་པ་ཅན་དུ་གྱུར་སོང་། ཁྱེད་ནས་ཆབ་སྲིད་ཐོག་མཁྱེན་པ་ཡོད་མཁན་ཚོར་བཏང་བའི་དྲི་བར་ཆབ་སྲིད་ཐོག་གོ་རྟོགས་དམན་པ་ངས་དོན་མེད་ཀྱི་ལན་བཏབ་པར་དགོངས་གསོལ་ཞུ་རྒྱུ་ཡིན། གུས་པས་ལན་འདེབས་འདི་མཆན་གྱི་ཚུལ་དུ་མ་བཀོད་པར་མང་པོའི་མཁྱེན་རྟོགས་སླད་རྩོམ་ཡིག་གི་ཚུལ་དུ་བྲིས་པ་ཡིན། ཁྱེད་ཀྱི་དྲི་བ་རྣམས་རྒྱ་ཆེའི་ཀློག་པ་པོ་ཚོའི་ཆེད་འདིར་མཉམ་བཀོད་བྱེད་རྒྱུ་ཡིན།

དྲི་བ་དང་པོ། “ བཙན་བྱོལ་སྒྲིག་འཛུགས་དང་ཀྲུང་དབྱང་སྲིད་གཞུང་གཉིས་ལོ་མང་རིང་གྲོས་མོལ་བྱས་པ་རེད། འཐབ་ཕྱོགས་གཅིག་གྱུར་ཁང་གིས་བོད་མི་མང་གི་གནད་དོན་ཞེས་པ་ཞིག་གྲོས་མོལ་བྱེད་དགོས་དོན་མེད། ཏཱ་ལའི་བླ་མ་དང་དེའི་ཉེ་འཁོར་གྱི་མི་ཁ་ཤས་ཀྱི་མདུན་ལམ་ཐོག་ཏུ་གྲོས་བསྡུར་བྱེད་ཀྱི་ཡིན་ཞེས་བཤད་ཡོད། བཙན་བྱོལ་བའི་ངོས་ནས་ང་ཚོའི་བདེ་སྡུག་བཤད་ཀྱི་མེད། བོད་རིགས་ཡོངས་ཀྱི་བདེ་སྡུག་གྲོས་མོལ་བྱེད་དགོས་ཡོད་ཅེས་གསུངས་ཡོད། སྔོན་མ་བཙན་བྱོལ་གཞུང་ཡོད་དུས་ཀྱང་སྐུ་ཚབ་གཉིས་ཀྱིས་བོད་མི་རིགས་ཀྱི་བདེ་སྡུག་བཤད་ཡག་གི་དབང་ཆ་མེད་གསུང་དུས་དེང་སང་སྒྲིག་འཛུགས་ཤིག་ལ་བོད་མི་རིགས་ཡོངས་ཀྱི་བདེ་སྡུག་གྲོས་མོལ་བྱེད་པའི་ཐོབ་ཐང་ཀྲུང་དབྱང་སྲིད་གཞུང་གིས་ངོས་ལེན་བྱེད་ཀྱི་རེད་དམ།”  ཁྱེད་ཀྱི་དྲི་བ་དང་པོའི་ལན་ཞུ་རྒྱུར། ཁྱེད་རང་ནས་གསུངས་པ་བཞིན་བོད་རྒྱ་འབྲེལ་མོལ་ཐེངས་ག་ཚོད་བྱས་མིན་ལ་མ་ལྟོས་པར་རྒྱ་ཕྱོགས་ནས་ག་དུས་ཡིན་ནའང་ཏཱ་ལའི་བླ་མ་དང་ཁོང་གི་ཉེ་འཁོར་ཉུང་ཤས་ཀྱི་གནད་དོན་ཐག་གཅོད་བྱེད་རྒྱུ་ལས་གཞན་པའི་གནད་དོན་མེད་ཚུལ་ཕྱིར་བསྒྲགས་བྱེད་ཀྱི་ཡོད། འོན་ཀྱང་འདི་ནི་ཕྱིར་བསྒྲགས་ཙམ་ལས་དོན་དམ་དུ་ཀྲུང་དབྱང་འཐབ་ཕྱོགས་གཅིག་གྱུར་ཁང་གི་དབུ་ཁྲིད་རྣམ་པ་དང་། ༸གོང་ས་༸སྐྱབས་མགོན་ཆེན་པོའི་སྐུ་ཚབ་རྣམ་པའི་བར་འབྲེལ་མོལ་བྱེད་སྐབས་༸གོང་ས་མཆོག་དང་ཁོང་གི་ཉེ་འཁོར་ཉུང་ཤས་ཀྱི་དོན་དག་གླེང་རྒྱུའི་རེ་བ་བྱས་པ་བྱུང་མེད། བོད་རྒྱ་འབྲེལ་མོལ་ཐེངས་བདུན་པ་ཕྱི་ལོ་ ༢༠༠༨ ཟླ་ ༧ ཚེས་ ༡ ནས་ ༢ བར་ཚུགས་སྐབས་རྒྱ་ཕྱོགས་ནས་རང་སྐྱོང་སྐོར་གྱི་ང་ཚོའི་བསམ་འཆར་ཉན་འདོད་ཡོད་སྐོར་བཤད་པ་བཞིན་ཕྱི་ལོ་ ༢༠༠༨ ཟླ་ ༡༠ ཚེས་ ༣༡ ནས་ཟླ་ ༡༡ ཚེས་ ༥ ཉིན་བར་འབྲེལ་མོལ་ཐེངས་དགུ་པ་ཚུགས་སྐབས་༼ བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་༽ཞེས་པའི་ཡིག་ཆ་སྤྲད་ཡོད།

ཕྱི་ཟླ་ ༡༡ ཚེས་ ༡༠ ཉིན་རྒྱལ་སྲིད་སྤྱི་ཁྱབ་ཁང་གིས་གསར་འགོད་གསལ་བསྒྲགས་ཀྱི་ཚོགས་འདུ་ཚོགས་པའི་སྐབས་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ་ཀྲུའུ་ཝུའི་ཆུན་ལ་ཀྲུང་གོ་ཉིན་རེའི་ཚགས་པར་ཁང་གི་གསར་འགོད་པས་བཏང་བའི་དྲི་བའི་ལན་ཞིག་ཏུ་འདི་ལྟར་བཤད་ཡོད། <བོད་ལྗོངས་ཉིན་རེའི་ཚགས་པར་>འབྲེལ་ཐུག་གྲོས་མོལ་བྱས་ནས་ད་བར་ག་དུས་ཡིན་རུང་རྒྱ་རི་བློ་རྒྱན་ཁོ་ཚོས་བཏོན་པའི་གནད་དོན་ཚང་མ་དེ་དག་ཡིན་ལ་ང་ཚོས་ཀྱང་ལན་འདེབས་བྱེད་པ་དེ་དེ་རིང་ངས་ཚང་མར་ལན་འདེབས་བྱེད་པ་དེ་ག་ཡིན་པ་ལས་ངོ་བོའི་རང་བཞིན་གྱི་འགྱུར་བ་གང་ཡང་བྱུང་མེད་པས་ཡིན། ཞེས་བཤད་ཡོད། ཀྲུའུ་ཡི་སྐད་ཆ་འདིའི་ཐོག་ནས་ང་ཚོས་བསམ་གཞིགས་ཤིག་བྱས་ན་གསར་འགོད་ཚོགས་འདུའི་ཐོག་གི་སྐད་ཆ་སྔ་ཕྱི་བར་གསུམ་གང་དུ་ཡང་ཏཱ་ལའི་བླ་མ་མི་སྒེར་གྱི་གནད་དོན་འདི་ཡིན་ཞེས་པ་གླེང་རྒྱུ་མ་བྱུང་ཞིང་། ཀྲུའུ་ཡིས་བཤད་པ་ལྟར་ན་འབྲེལ་མོལ་སྔ་ཕྱི་ཚང་མར་སྐད་ཆ་འདི་ཚོའི་ཐོག་གྲོས་མོལ་བྱས་ཡོད་ན་འབྲེལ་མོལ་ཐེངས་དགུ་པ་བར་རྒྱ་ཕྱོགས་ནས་དོན་དམ་པར་ཏཱ་ལའི་བླ་མ་སྒེར་གྱི་གནད་དོན་འདི་ཡིན་གླེང་བའི་གཞི་མེད་པ་གསལ་པོ་མཁྱེན་ཐུབ། རང་ཕྱོགས་ནས་བོད་མི་ཡོངས་ཀྱི་བདེ་སྡུག་གླེང་རྒྱུའི་རེ་བ་བྱས་པ་བཞིན་ང་ཚོ་བོད་མི་ས་ཡ་དྲུག་གི་བདེ་སྡུག་གླེང་བའི་ཐོབ་ཐང་ཡོད་པར་རྒྱལ་སྤྱིའི་ངོས་འཛིན་ཐོབ་ཡོད། བཙན་བྱོལ་གཞུང་གི་མིང་བྱང་གཞུང་དང་སྒྲིག་འཛུགས་གང་དུ་བསྒྱུར་ཀྱང་རུང་རྒྱ་ཕྱོགས་ནས་ད་བར་ཏཱ་ལའི་བླ་མ་སྒེར་གྱི་སྐུ་ཚབ་དང་ཐུག་འཕྲད་བྱས་ཚུལ་སོགས་བཤད་པ་ལས་བཙན་བྱོལ་གཞུང་གི་སྐུ་ཚབ་ངོས་ལེན་བྱེད་ཀྱི་མེད། དེ་བཞིན་ཕྱི་རྒྱལ་ཁག་གི་གཞུང་འབྲེལ་མི་སྣ་སུ་འདྲ་ཞིག་ནས་རྒྱ་བོད་འབྲེལ་མོལ་སྐོར་གླེང་སྐབས་ཀྲུང་དབྱང་སྲིད་གཞུང་དང་། ༸གོང་ས་མཆོག་གི་སྐུ་ཚབ་བར་འབྲེལ་མོལ་གནང་དགོས་ཚུལ་གསུངས་པ་མ་གཏོགས་བཙན་བྱོལ་གཞུང་ལ་བཀའ་མོལ་གནང་དགོས་ཚུལ་ཤོད་ཀྱི་མེད། དཔེར་ན། ས་བྱི་ལོའི་ཞི་རྒོལ་བྱུང་བའི་རྒྱུད་རིམ་ཁྲོད་དུ་ཨ་རིས་གཙོས་པའི་རྒྱལ་ཁབ་འདྲ་མིན་གྱི་གཞུང་འཛིན་མི་སྣས་རྒྱ་བོད་འབྲེལ་མོལ་ཐོག་བཀའ་སློབ་གནང་བ་ཚང་མར་བསྐྱར་གཟིགས་གནང་ན་མཁྱེན་ཐུབ། དེས་ན་ད་བར་གྱི་འབྲེལ་མོལ་ཐམས་ཅད་༸གོང་མཆོག་གི་སྐུ་ཚབ་ཀྱི་མིང་ཐོག་ནས་གནང་ཡོད། རྒྱ་ཕྱོགས་ནས་གངས་ཅན་སྐྱིད་གཤོངས་ཀྱི་སྒྲིག་འཛུགས་དེར་མིང་གང་བཏགས་ཀྱང་རུང་དོན་དངོས་ཐོག་ཁྲིམས་མཐུན་མ་ཡིན་པའི་ཡུལ་གྱར་སྲིད་གཞུང་ཞིག་ཏུ་ངོས་འཛིན་བྱས་ཏེ་དེའི་སྐུ་ཚབ་དང་ངོ་ཐུག་མི་བྱེད་པའི་རྣམ་འགྱུར་སྟོན་གྱི་ཡོད། མདོར་བསྡུས་ནས་བཤད་ན་བཙན་བྱོལ་སྒྲིག་འཛུགས་འདིར་མིང་གང་ཞིག་བཏགས་མིན་ལ་མ་ལྟོས་པར་གང་ལྟར་ཡང་གཞུང་ཞིག་ཏུ་ངོས་འཛིན་བྱེད་པ་ནི་རྒྱ་བོད་གཉིས་ཀ་ཐུན་སྣང་དུ་གྲུབ་ཡོད་སྙམ།

དྲི་བ་གཉིས་པ། “གཉིས་སྨན་དབུ་མའི་ལམ་གྱིས་བོད་མི་རིགས་ཀྱི་ཆོས་དང་རིག་གཞུང་། སྐད་ཡིག་ཉེན་ཁ་ལས་བསྐྱབ་ཀྱི་ཡིན་གསུངས་འདུག གང་འདྲ་བྱས་ནས་ཉེན་སྐྱོབ་བྱ་ཐུབ་བམ། དེང་སང་ཡོད་བཞིན་པའི་ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་གི་ས་གནས་མི་རིགས་རང་སྐྱོང་གི་བཅའ་ཁྲིམས་ནང་དུ་ཆོས་དད་རང་མོས་དང་། སྐད་ཡིག་དར་སྤེལ་གཏོང་ཆོག་ཅེས་བཀོད་ཡོད། དེ་ནི་ཀྲུང་དབྱང་སྲིད་གཞུང་གིས་བཟོས་པའི་ཁྲིམས་ལུགས་རེད། མ་འོངས་པར་ཀྲུང་ཧ་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཞིག་རག་པ་ཡིན་ན་ཆོས་དད་རང་མོས་དང་སྐད་ཡིག་དར་རྒྱས་གཏོང་ཐུབ་པ་ལ་ཁྱད་པར་ག་རེ་ཡོད་དམ” ཁྱེད་ཀྱི་དྲི་བ་གཉིས་པའི་ལན་ཞུ་རྒྱུར། ཁྱེད་རང་གི་དྲི་བར་སྡོམ་ཚིག་བརྒྱབ་ན་གལ་ཏེ་གཉིས་སྨན་དབུ་མའི་ལམ་གྱི་ཐོག་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་མིང་དོན་མཚུངས་པའི་རང་སྐྱོང་ཞིག་རག་ན་ད་ལྟའི་མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་བ་ལས་ལྷག་ཆོས་དད་དང་སྐད་ཡིག་སོགས་ཀྱི་ཡར་རྒྱས་གོང་སྤེལ་ཇི་ལྟར་གཏོང་ཐུབ་བམ་སྙམ་པ་དེ་རེད། ད་ལྟའི་དུས་སྐབས་འདིར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། རང་སྐྱོང་ས་ཁུལ་གྱི་བཅའ་ཁྲིམས། དེ་བཞིན་ཁྲིམས་སྲོལ་རིམ་པའི་ནང་གསལ་བའི་གྲངས་ཉུང་མི་རིགས་ཀྱི་ཆོས་དད་དང་། རིག་གཞུང་། སྐད་ཡིག་སོགས་སྲུང་སྐྱོབ་བྱ་རྒྱུ་ཡིན་སྐོར་བཤད་པ་རྣམས་ནི་ཡིག་ཐོག་ཁྲིམས་ཡིག་ཙམ་ལས་གཞན་པའི་དོན་དངོས་ཀྱི་ལག་ལེན་བསྟར་མེད་པ་ཧ་ཅང་གསལ་པོ་ཡིན། དཔེར་ན་རྩ་ཁྲིམས་ལེའུ་གཉིས་པ། སྤྱི་དམངས་ཀྱི་གཞི་རྩའི་ཁེ་དབང་དང་འོས་འགན། དོན་ཚན་སོ་གསུམ་པ་ནས་དོན་ཚན་ཞེ་གཉིས་ཀྱི་བར་གསལ་བའི་སྤྱི་དམངས་ཀྱི་ཐོབ་ཐང་དེ་ཚོ་གྲངས་ཉུང་མི་རིགས་སྨོས་ཅི་དགོས་ཏེ་རྒྱ་རིགས་མི་མང་ཚོ་ལའང་ལོངས་སྤྱོད་བྱེད་པའི་རང་དབང་མེད་པ་གསལ་པོ་ཡིན། དེར་བརྟེན་མིང་དང་དོན་མཚུངས་ཐུབ་ཀྱི་མེད།

ཁྱེད་ཀྱིས་གསུངས་པ་བཞིན་གལ་སྲིད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་ང་ཚོར་མིང་དོན་མཚུངས་པའི་རང་སྐྱོང་ཞིག་རག་པ་ཡིན་ན། ང་ཚོས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ལེའུ་གསུམ་པའི་ས་བཅད་ལྔ་པ་དང་། དྲུག་པར་གསལ་བའི་གཞི་རྩའི་རྩ་དོན་གཞིར་བཟུང་གིས་རང་སྐྱོང་ལྗོངས་དང་། རང་སྐྱོང་ཁུལ་སོགས་ཀྱི་རང་སྐྱོང་ལས་ཁུངས་ལ་ལེགས་བཅོས་དང་། མི་རིགས་རང་སྐྱོང་གི་བཅའ་ཁྲིམས་ལ་བསྐྱར་བཅོས། ས་གནས་དང་འཚམ་པའི་ཁྲིམས་སྲོལ་གསར་བཟོ་སོགས་བྱས་ཏེ་རྩ་ཁྲིམས་ལེའུ་དང་པོའི་དོན་ཚན་བཞི་པ་དང་། ལེའི་གཉིས་པའི་དོན་ཚན་སོ་དྲུག་པ། ལེའུ་གསུམ་པའི་ས་བཅད་དྲུག་པའི་ནང་གསལ་བའི་མི་རིགས་རང་སྐྱོང་གི་ཆོས་རིག་སྐད་ཡིག་སོགས་སྲུང་སྐྱོབ་དར་སྤེལ་གཏོང་ཕྱོགས་སྐོར་གྱི་ཁྲིམས་ཡིག་གཞིར་བཟུང་ཐོག་བོད་རིགས་ཡོངས་པ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆའི་ས་བཅད་བཞི་པ། བོད་མིའི་གཞི་རྩའི་དགོས་མཁོ། རང་སྲིད་རང་སྐྱོང་བྱེད་རྒྱུའི་གནད་དོན་ཁག ཅེས་པའི་ནང་གསེས་དོན་ཚན་ཁག་རྩོད་ལེན་བྱས་ཆོག ཐོབ་ཐང་འདི་ཚོའི་ཐད་ང་ཚོས་ད་དུང་ལེའུ་གཉིས་པའི་དོན་ཚན་སོ་ལྔ་བའི་དགོངས་དོན་འོག་གཏམ་བརྗོད་བྱེད་པ་དང་། ཚོགས་འདུ་བྱེད་པ། ཁྲོམ་སྐོར་བྱེད་པ། ཞི་བའི་རྔམ་སྟོན་བྱེད་པ་སོགས་ཀྱང་བྱས་ཆོག  ང་ཚོས་དམའ་མཐར་ཡང་ད་ཡོད་ཀྱི་རྩ་ཁྲིམས་དང་། བཅའ་ཁྲིམས་ནང་གསལ་བའི་ཁྲིམས་ཡིག་ཁག་དོན་དམ་པར་ལག་བསྟར་བྱས་ཏེ་མི་རིགས་རང་སྐྱོང་གི་སྲིད་འཛིན་ས་ཁུལ་དུ་མི་རིགས་རང་ཉིད་ཀྱི་སྐད་ཡིག་གཞུང་ཡིག་ཏུ་སྤྱོད་པ་དང་། རང་གི་མ་སྐད་ནང་མི་རིགས་སློབ་གྲྭ་ཁག་གི་སློབ་ཚན་ཁྲིད་ཐུབ་པ་སོགས་བྱེད་ཐུབ། དཔེར་ན་དེ་སྔོན་༸ཀུན་གཟིགས་པཎ་ཆེན་རིན་པོ་ཆེས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། རང་སྐྱོང་ལྗོངས་ཀྱི་བཅའ་ཁྲིམས་ཀྱི་དགོངས་དོན་འོག་བོད་རང་སྐྱོང་ལྗོངས་ནང་གི་གཞི་རིམ་སློབ་གྲྭ་ཁག་གི་སློབ་ཚན་མི་རིགས་རང་ཉིད་ཀྱི་མ་སྐད་ནང་བསླབ་བཅུག་པ་ལྟ་བུ་ཡིན། སྐབས་དེར་སླེབས་ན་ང་ཚོར་ཆོས་རིག་དང་སྐད་ཡིག་སྲུང་སྐྱོབ་ཙམ་མ་ཡིན་པར་གང་སྤྱིར་མང་པོ་བྱེད་རྒྱུ་རག་གི་རེད།

དྲི་བ་གསུམ་པ། “ བོད་འདིར་མི་སེར་སྤེལ་ཡུལ་ཆགས་ཡོད་པ་རེད། རྒྱ་རིགས་མང་པོ་བོད་ལ་གནས་སྤོས་བྱས་ཏེ་བོད་ནང་བོད་མི་གྲངས་ཉུང་ཆགས་བཞིན་པ་རེད། ལྷ་ས་ལྟ་བུ་ལ་རྒྱ་སྐད་མི་ཤེས་ན་རང་མགོ་མི་ཐོན་པའི་ས་མཚམས་ལ་སླེབས་ཡོད་རེད། མིང་དོན་མཚུངས་པའི་རང་སྐྱོང་རག་ན་ལྷ་སར་རྒྱ་མི་ཉུང་དུ་འགྲོ་གི་རེད་དམ། དེ་ལས་མང་དུ་འགྲོ་གི་རེད།” ཁྱེད་ཀྱི་དྲི་བ་གསུམ་པའི་ལན་དུ། འདིའི་སྐོར་དེ་སྔོན་ང་ཚོས་རྒྱ་ཕྱོགས་ལ་སྤྲད་ཟིན་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆའི་ནང་ཕྱོགས་མི་དོ་དམ་བྱེད་ཕྱོགས་ཀྱི་སྲོལ་ཡིག་སྐོར་གསལ་པོ་བཤད་ཡོད། གལ་སྲིད་རྒྱ་བོད་བར་འགྲིག་མཐུན་གྱིས་མིང་དོན་མཚུངས་པའི་རང་སྐྱོང་ཞིག་རག་ན་དེ་དུས་གནད་དོན་འདིའི་ཐད་གཅོད་ཡོང་ངེས་རེད། དམའ་མཐར་ཡང་དམག་དཔུང་དང་། རྫོང་ཡན་གྱི་རྒྱ་རིགས་ལས་བྱེད་པ་མང་པོ་ཞིག་ཕྱིར་ལོག་བྱེད་ཀྱི་རེད། སྔར་བཤད་པ་བཞིན་ང་ཚོས་མིང་དོན་མཚུངས་པའི་རང་སྐྱོང་གི་སྲིད་འཛིན་ས་ཁུལ་གསར་འཛུགས་བྱས་མཚམས་རྩ་ཁྲིམས་ཀྱི་སྒྲོམ་གཞིའི་འོག་ང་ཚོའི་བསམ་འཆར་ཡིག་ཆའི་ནང་གསལ་བ་བཞིན་ཁོར་ཡུག་སྲུང་སྐྱོབ་དང་། རང་བྱུང་ཐོན་ཁུངས་བེད་སྤྱོད་བྱེད་ཕྱོགས། དཔལ་འབྱོར་ཡར་རྒྱས་དང་ཚོང་འབྲེལ། མང་ཚོགས་ཀྱི་འཕྲོད་བསྟེན། བདེ་འཇགས། སོགས་ཀྱི་ཐད་ཁྲིམས་ཐོགས་ནས་དོ་དམ་ཚད་ལྡན་བྱས་ཚེ་ད་ལྟ་ཁྲིམས་ལུང་བྱེད་པར་གང་བྱུང་དུ་གནས་སྡོད་བྱེད་བཞིན་པའི་རྒྱ་མི་སོགས་མང་པོ་ཞིག་རང་བཞིན་གྱིས་བུད་འགྲོ་གི་རེད། དེས་ན་ང་ཚོར་རྒྱ་མི་ཉུང་དུ་གཏོང་བའི་བྱ་ཐབས་མེད་པ་མིན། དཔེར་ན་དེ་སྔོན་རང་སྐྱོང་ལྗོངས་ནང་སློབ་ཆུང་སློབ་གྲྭའི་སློབ་ཚན་ཁག་མི་རིགས་རང་གི་སྐད་ཡིག་ནང་སློབ་ཁྲིད་བྱེད་པའི་དུས་བཟང་སྐབས་ས་གནས་རྒྱ་རིགས་ལས་བྱེད་པའི་ཕྲུ་གུ་ཚོར་རྒྱ་ཡིག་ནང་སློབ་ཁྲིད་བྱེད་པའི་སློབ་ཆུང་ཟུར་འཛུགས་བྱེད་དགོས་བྱུང་ཡོད། ས་ཁུལ་འགའ་ཤས་ལ་སློབ་ཆུང་ཟུར་འཛུགས་ཀྱི་ཆ་རྐྱེན་མེད་སར་རྒྱ་རིགས་ལས་བྱེད་དམ། རྒྱ་རིགས་དགེ་རྒན་སོ་སོས་རང་གི་ཕྲུ་གུར་ཟུར་ཁྲིད་བྱེད་པ་ལས་སློབ་གྲྭར་གཏོང་ས་མེད་པའི་དཀའ་ངལ་འོག་བཟའ་ཚང་གཉིས་ནས་གཅིག་རྒྱ་ཡུལ་དུ་ཕྲུ་གུའི་སློབ་སྦྱོང་ཆེད་གཏན་སྡོད་དམ་འགྲོ་སྐྱོད་བྱེད་དགོས་པ་ཡོང་གི་ཡོད། ད་ལྟ་བོད་ཀྱི་ས་ཁུལ་གང་དུའང་རྒྱ་ཕྲུག་སློབ་ཆུང་ནས་སློབ་ཆེན་བར་ག་བར་འགྲོ་འདོད་ཀྱང་འགྲོ་ས་ཡོད། འདི་དག་དཔེ་མཚོན་ཙམ་ཡིན། ང་ཚོས་རྒྱ་མི་རིགས་དེ་ཚོ་ཕྱིར་འབུད་ཆ་ཚང་བྱེད་མ་ཐུབ་ཀྱང་ཁོ་ཚོ་ང་ཚོའི་གྲོགས་པོ་ཡག་པོ་ཞིག་བཟོ་ཐུབ་ཅིང་རྒྱ་ཡུལ་གྱི་རྒྱ་མི་དང་བོད་སྡོད་རྒྱ་མིའི་བར་ལ་ཁྱད་པར་ཆེན་པོ་འདུག་ཟེར་རྒྱུ་ཞིག་བཟོ་ཐུབ་པར་ང་རང་ཡིད་ཆེས་ཡོད།  དེ་ནི་རྨོངས་པའི་ཡིད་ཆེས་དེ་འདྲ་མིན། མཐའ་དོན་གུས་པས་ཁྱེད་ཀྱི་དྲི་བར་ལན་གཟབ་ནན་གྱིས་འདེབས་ཁུལ་བྱས་ཡོད་ཀྱང་རང་ཉིད་ཆབ་སྲིད་ཀྱི་གོ་རྟོགས་དམན་རྐྱེན་ཐུགས་བློ་མ་ཁེངས་པ་བྱུང་ཡོད་ན་བཟོད་པ་གསོལ་རྒྱུ་ཡིན།