གཟའ་ལྷག་པའི་ཉིན་རྒྱ་གཞུང་གིས་ཝང་ལིས་ཅོན་ལ་ཉེས་དོན་ཁག་བཞིའི་ཐོག་ནས་ཁྲིམས་བཤེར་བྱ་རྒྱུ་ཡིན་པ་བསྒྲགས་འདུག
ཟླ་འདིའི་ཕྱི་ཚེས་ ༥ ཉིན། རྒྱ་གཞུང་ཞིན་ཧྭ་གསར་ཁང་གིས། དེ་སྔའི་ཁྲུང་ཆིན་གྲོང་ཁྱེར་སྲིད་གཞུང་གི་མགོ་གཙོ་གཞོན་པ་དང་ཉེན་རྟོག་སྡེ་ཁག་གི་མགོ་གཙོ་ཝང་ལིས་ཅོན་ལ། ཉེ་རིང་དོགས་འཛིན་གྱིས་བཅའ་ཁྲིམས་ལ་གཏོར་བཤིག་དང་། ངོ་ལོག་བྲོས་བྱོལ། དབང་ཆ་ཐལ་སྤྱོད། ལྐོག་ཟ་རུ་སུངས་བཅས་ཀྱི་ཉེས་མིང་འོག ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་མི་དམངས་ཞིབ་བཤེར་ཁང་གིས་གྲོང་ཁྱེར་མི་དམངས་ཁྲིམས་ཁང་ལ་ཁྲིམས་གཏུགས་བྱས་ཡོད་པ་དང་། ཁྲིན་ཏུའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་གྱོད་དོན་དེ་དང་ལེན་གྱིས་ཁྲིམས་ར་འཚོགས་འཆར་ཡོད་སྐོར་བརྗོད་འདུག
ཁྲིམས་གཏུགས་ངོས་སྦྱོར་ཡི་གེ་དེའི་ནང་། གཅིག ཀུའུ་ཁའེ་ལའེ་ཡི་མི་གསོད་ཉེས་དོན་སྐབས། ཝང་ལིས་ཅོན་གྱིས་ཉེ་རིང་ཕྱོགས་ལྷུང་གྱི་བསམ་བློ་ཁྱེར་ཏེ། ཀུའུ་ཡི་ནག་ཉེས་ལ་ཐད་ཀར་འདྲི་གཅོད་ཞིབ་བཤེར་མ་བྱས་པ་བརྟེན་ནས། ཉེ་རིང་དོགས་འཛིན་གྱིས་བཅའ་ཁྲིམས་ལ་གཏོར་བཤིག་བཏང་བའི་ཉེས་བ་བསགས་པ།
གཉིས། ཝང་ལིས་ཅོན་གྱིས་གཞུང་དོན་སྒྲུབ་པའི་དུས་སྐབས་སུ། ལས་གནས་དང་ཁ་བྲལ་ཏེ་ཨ་རིའི་གཞུང་ཚབ་ཁང་དུ་བྲོས་བྱོལ་བྱས་པར་བརྟེན། ངོ་ལོག་བྲོས་བྱོལ་ཉེས་བ་བསགས་པ།
གསུམ། ཝང་ལིས་ཅོན་གྱིས་ཆོག་མཆན་མེད་པ་དང་ཆོག་མཆན་རྫུན་བཟོས་བྱས་ཏེ། ཁྲིམས་འགལ་ཐོག་ནས་ཆེད་ལས་ལག་རྩལ་གྱི་ལྐོག་ཉན་བྱ་སྤྱོད་སྤེལ་ཏེ། དབང་ཆ་ཐལ་སྤྱོད་ཀྱི་ཉེས་པ་བསགས་པ།
བཞི། ཝང་ལིས་ཅོན་གྱིས་གོ་གནས་བེད་སྤྱོད་ཀྱིས་ལྐོག་དངུལ་འབོར་ཆེན་བླངས་ཏེ། མི་གཞན་ཞིག་གི་ཁེ་ཕན་རྩོད་ལེན་བྱས་ཏེ་དབང་ཆ་ཐལ་སྤྱོད་ཀྱི་ཉེས་པ་བསགས་པ་བཅས། གོང་གསལ་ཉེས་པ་ཁག་བཞིའི་ཐོག་ནས་ཉེས་དོན་གྱི་འགན་ལེན་གྱི་ཁྲིམས་བཤེར་ཐག་གཅོད་དགོས་སྐོར་བརྗོད་ཡོད་པ་རེད།
སོག་པོའི་ཕོ་རྒོད་ཝང་ལི་ཅོན་ལ་གུས་འདུད་ཡོད། ཉེས་མིང་བཞིའི་འོག་ནས་དུས་ཡུན་གང་འཚམས་འགོར་རྗེས་གསོན་པོར་ཕྱི་ལ་ཐར་བ་མེད་པའི་རྟགས་མཚན་གསལ་བོ་ཞིག་རེད། གལ་སྲིད་ཨ་རིའི་རོགས་པ་ཞིག་གནང་ཡོད་ན་རྒྱ་གཞུང་དགུང་ལ་སྤུར་ཟིན་ནའང་། དེ་ལྟར་བྱུང་ཐུབ་ཡོད་པ་མ་རེད། ཡིན་ནའི། གཡོ་ཡོམ་ཐེངས་ཤིག་བསླངས་པ་རེད།