ཉེ་ཆར་པེ་ཅིན་ནས་ནེའུ་ཡོག་ཏུ་བསྐྱོད་པའི་གནམ་གྲུའི་ནང་། རུས་ཏཱེན་ཅན་གྱི་བུད་མེད་ཅིག་འཇུ་བཟུང་བྱས་ཡོད་པ་དེས། ཀྲུང་ནན་ཧེ་རུ་ཡང་བསྐྱར་འགལ་རྫས་གསར་བ་བཞག་ཡོད་འདུག
ཉེ་སྔོན་ཕྱི་ཟླ་ ༨ ཚེས་ ༢༩ ཉིན་པེ་ཅིན་ནས་ནེའུ་ཡོག་ཏུ་བསྐྱོད་པའི་རྒྱ་ནག་གི་གནམ་གྲུ་ཞིག་གློ་བུར་མཁའ་ལམ་ནས་ཕྱིར་ལོག་དགོས་བྱུང་ཡོད་པ་ལྟར། གནམ་གྲུ་དེའི་ནང་འཇུ་བཟུང་བྱས་པའི་མི་སྣ་དེ་ནི། རྒྱ་གཞུང་འཐབ་ཕྱོགས་གཅིག་གྱུར་ཁང་གི་ཐེ་ཝན་ཕྱོགས་ཀྱི་གསང་འཕྲིན་སྡེ་ཁག་གི་རུས་ཏཱེན་ཅན་གྱི་བུད་མེད་ཅིག་ཡིན་པ་དང་། ཁོ་མོ་ནི་འཐབ་ཕྱོགས་གཅིག་གྱུར་ཁང་གི་ཐེ་ཝན་འབྲེལ་མཐུན་པའི་འགན་འཁྱེར་མཁན་ཡིན་འདུག གནད་དོན་དེ་ནི་ཀྲུང་ནན་ཧེ་ཡི་རྒྱ་གཞུང་དཔོན་རིགས་ནང་ཁུལ་འཐབ་རྩོད་ཀྱི་འགལ་རྫས་གསར་བ་ཞིག་ཆགས་ཡོད་འདུག
གསར་ལམ་ཁག་ཏུ་གནས་ཚུལ་ཐོན་པ་ལྟར་ན། བུད་མེད་དེ་ཨ་རིར་བྲོས་བྱོལ་བྱེད་དགོས་པའི་གནད་དོན་དེ་ནི། རྒྱ་ནག་འཐབ་ཕྱོགས་གཅིག་གྱུར་ཁང་གི་མགོ་གཙོ་ཏུའུ་ཆིན་ལིན་དང་། རྒྱ་གཞུང་གི་སྲིད་བློན་གཞོན་པ་ཧའེ་ལཱང་ཡུས་གཉིས་ལ་འབྲེལ་བ་ཆགས་ཡོད་སྟབས། ཕྱི་ཟླ་ ༩ ཚེས་ ༡ ཉིན་གློ་བུར་དུ་ཏུའུ་ཆིན་ལིན་ལས་གནས་ནས་ཕུད་པ་མ་ཟད། དེའི་ཚབ་དུ་ཧུའུ་ཅིན་ཐའོ་ཡི་བློས་འཁེལ་དཔོན་རིགས་ལེན་ཅིས་ཧྭ་བསྐོ་འཇོག་བྱས་ཡོད་ལ། དེ་ནི་ཧུའུ་ཅིན་ཐའོ་ཡིས་ཐད་ཀར་བཀོད་འདོམས་བྱས་པ་ཞིག་ཡིན་འདུག
གནད་དོན་དེའི་གཞི་རྩ་ནི་རྒྱ་གཞུང་དཔོན་རིགས་རྒན་གྲས་ཙུན་ཆིན་ཧུང་གཙོས། ད་ལྟའི་ཁྲིམས་སྲིད་ལྷན་ཁང་གི་མགོ་གཙོ་ཀྲིག་ཡུང་ཁཱང་། རྒྱ་གཞུང་གི་སྲིད་བློན་གཞོན་པ་ཧའེ་ལཱང་ཡུས་སོགས་ཅཱང་ཤོག་ཁག་གིས། ཞི་ཅིན་ཕེན་ཕམ་ཉེས་བཏང་སྟེ་པའོ་ཞི་ལའེ་རྒྱ་གཞུང་གི་དབང་འཛིན་པར་འཇོག་རྒྱུའི་གསང་གྲོས་དང་འབྲེལ་བ་ཆགས་ཡོད་པ་དང་། ཉེ་སྔོན་རྒྱ་གཞུང་བདེ་སྲུང་མི་སྣས་རུས་ཏཱེན་ཅན་གྱི་བུད་མེད་དེར་རྩད་ཞིབ་བྱེད་བཞིན་པ་ཤེས་འཕྲལ། ཕྱི་ཟླ་ ༨ ཚེས་ ༢༩ ཉིན་ཏུའུ་ཆིན་ལེན་གྱིས་བུད་མེད་དེ་ཆེད་མངགས་ཨ་རིར་བྲོས་བྱོལ་དུ་བཏང་ཡོད་ཀྱང་། རྒྱ་གཞུང་བདེ་སྲུང་མི་སྣ་གནས་ཚུལ་དེ་ཤེས་རྟོག་བྱུང་སྟེ་གནམ་གྲུ་མཁའ་ལམ་ནས་ཕྱིར་སྐོང་འགུག་གིས། རུས་ཏཱེན་ཅན་གྱི་བུད་མེད་དེ་འཇུ་བཟུང་བྱས་ཡོད་འདུག
འདི་ལོའི་ཕྱི་ཟླ་ ༤ ཚེས་ ༡༠ ཉིན་པའོ་ཞི་ལའེ་ཡི་རྒྱ་གཞུང་ཆབ་སྲིད་ལྷན་ཁང་གི་འཐུས་མིའི་གོ་གནས་ཕྱིར་བསྡུ་བྱས་རྗེས། དེ་སྔོན་པའོ་ཞིས་ལའེ་དང་འབྲེལ་ཡོད་མཐོ་རིམ་དཔོན་རིགས་ཡུས་ཀྲིན་ཧྲིན་དང་། ཀྲང་ཏིག་ཅཱང་། ཀྲང་ཀོ་ལིན། དེ་བཞིན། དམག་ཁུལ་དཔོན་རིགས་ཀའོ་པའོ་ཞུང་། ཡུས་ཚེ་ཧུའུ། ལིག་ཡོན་སོགས་མང་ཆེ་བས་པའོ་ཞི་ལའེ་དང་འབྲེལ་བ་བཅད་དེ། ཧུའུ་ཅིན་ཐའོ་ཡི་སྣེ་ཁྲིད་དང་བཀའ་མངག་དང་ལེན་བྱ་རྒྱུ་ཡིན་པའི་རྣམ་འགྱུར་བསྟན་ཡོད་ལ། དེ་བཞིན། པའོ་ཞི་ལའེ་དང་འབྲེལ་ཡོད་ཀྱི་དམག་ཁུལ་དཔོན་རིགས་མང་པོ་ཞིག་ཀྱང་བརྗེ་སྒྱུར་བྱ་དགོས་བྱུང་ཡོད་པ་རེད།
ཡིན་ནའང་། ཧའེ་ལཱང་ཡུས་ནི་ཅཱང་ཤོག་གི་གསང་གྲོས་དེའི་མི་སྣ་གཙོ་བོ་ཆགས་ཡོད་སྟབས། ཁོས་ཏུའུ་ཆིན་ལེན་གསང་བའི་ཐོག་ཙུན་ཆིན་ཧོང་དང་ཐུག་འཕྲད་བྱེད་བཅུག་ཐོག ཕྱི་ཟླ་ ༧ མཇུག་ཙམ་ལ་ཏུའུ་ཆིན་ལེན་གྱིས་རྒྱ་གཞུང་དམར་ཤོག་ལས་བྱེད་རྒན་པ་ ༡༦༤༤ ཙམ་གྱིས་མིང་རྟགས་བཀོད་དེ། པའོ་ཞི་ལའེ་ལ་རྒྱབ་སྐྱོར་དང་ཝུན་ཇ་པའོ་རྩ་དགོངས་གཏོང་དགོས་པའི་འབོད་སྐུལ་ཡིག་ཆ་བསྡུ་རུབ་ཀྱིས། སྲིད་བློན་གཞོན་པ་ཧའེ་ལཱང་ཡུས་ལ་སྤྲད་དེ་ཧུའུ་དང་ཝུན་ལ་ཐད་ཀར་གནོན་ཤུགས་སྤྲོད་ཐབས་བྱས་ཡོད་འདུག
ཆབ་སྲིད་དབྱེ་ཞིབ་པ་དག་གིས་བརྗོད་ན། དེ་སྔའི་ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་ཁྲིན་ལཱང་ཡུས་ནི་ཅཱང་ཙེ་མེན་གྱིས་རང་ཉིད་ཀྱི་རྒྱུན་འཛིན་པར་གཏན་འཁེལ་ཡོད་ཀྱང་། ༢༠༠༨ ལོར་ཧུའུ་དང་ཝུན་གྱིས་ཁྲིན་ལཱང་ཡུས་སྲིད་སྟེགས་ནས་མར་གཡུག་སྟེ་བཙོན་འཇུག་ཁྲིམས་ཐག་བཅད་རྗེས། ཅཱང་ཤོག་ཁག་གིས་པའོ་ཞིས་ལའེ་མ་འོངས་པའི་རྒྱུན་འཛིན་པར་བསྐོ་འཇོག་གི་དམིགས་ཡུལ་བཟུང་པ་མ་ཟད། ཀྲིག་ཡུང་ཁཱང་དང་ཧའེ་ལཱང་ཡུས་གཉིས་ཀྱིས་ཅཱང་ཤོག་ཁག་གི་ཏུའུ་ཆིན་ལེན་རྒྱ་ནག་འཐབ་ཕྱོགས་གཅིག་གྱུར་ཁང་གི་མགོ་གཙོར་བསྐོ་འཐེན་བྱས་རྗེས། འཐབ་ཕྱོགས་གཅིག་གྱུར་ཁང་གི་མི་ཤུགས་དང་རྒྱུ་སྟོབས་གཉིས་ཀ་བེད་སྤྱོད་ཀྱིས། ཕྱི་ནང་གི་གསང་མྱུལ་བ་རྣམས་བརྒྱུད་དེ་ཧུའུ་དང་ཝུན་གྱི་ནག་ཉེས་བརྩད་གཅོད་དང་། ཕྱི་ཕྱོགས་ཀྱི་གསར་ལམ་ཁག་ལ་ལྐོག་འབྲེལ་གྱིས་པའོ་ཞིས་ལའེ་ཡི་སྣང་བརྙན་དང་ཁྲུང་ཆིན་གྲོང་ཁྱེར་གྱི་ཆབ་སྲིད་རྣམ་པ་དྲིལ་བསྒྲགས་ཡོང་ཐབས་བྱས་ཡོད་འདུག
གཟའ་འཁོར་སྔོན་མའི་ནང་ཧུའུ་ཅིན་ཐའོ་ནི་ཨུ་རུ་སུར་ཚོགས་བཞིན་པའི་ཨེ་ཤ་ཡའི་དཔལ་འབྱོར་མཉམ་ལས་ཚོགས་འདུར་བཅར་ཡོད་ཀྱང་། ཚོགས་འདུའི་བར་ལོག་ནས་རྒྱ་ནག་ནང་ཁུལ་གྱི་གནད་དོན་གལ་ཆེན་ཞིག་ཐག་གཅོད་བྱ་དགོས་བྱུང་སྟེ་གློ་བུར་དུ་ཕྱིར་ལོག་དགོས་བྱུང་སྟབས། ཚོགས་འདུ་དེ་དང་འབྲེལ་བའི་མཐོ་རིམ་དཔོན་རིགས་ཀྱི་གྲོས་བསྡུར་ཚོགས་འདུ་ཞིག་ཀྱང་ཕྱིར་འགྱངས་བྱེད་དགོས་བྱུང་ཡོད་པ་རེད།
གསར་འགོད་པ། ཚེ་རིང་རྒྱལ།
དངོས་གནས་གསར་འགྱུར་ཡག་པོ་འདུག།བོད་ལ་རེ་བ་འདུག།བཀའ་ཁྲི་ཤུགརྒྱགས།
རྒྱ་གཞུང་གི་གདོང་པགས་དངོས་གནས་དེ། ཉིན་རེར་ནས་ཉིན་རེར་གསལ་སྟོན་གསལ་སྟོན་ཆེ་རུ་འགྲོ་བགྱིད། མཐོང་འགྱུར་མྱོང་འགྱུར་ལས་ཀྱི་འབྲས་བུ་མཐོང་བའི་སྨོན་འདུན་ཡང་ཡོད་ལགས།
གསར་འགྱུར་སྙན་མོ་འདུག བོད་ཀྱི་དུས་བབ་ཚང་ལ་ཐུགས་རྗེ་ཆེ། གསར་འགྱུར་འདི་འདྲ་རྟག་ཏུ་སླེབས་པར་སྨོན།