མི་འགྱངས་པར་ངྷ་སར་འཚོགས་འཆར་གྱི་དམིགས་བསལ་ཚོགས་ཆེན་ཐེངས་གཉིས་པའི་གྲོས་གཞི་དང་འབྲེལ་བའི་དོན་གནས་ཁག་ཅིག་གི་ཐོག་དབུ་མའི་ལམ་མི་མང་ལས་འགུལ་ཁང་གི་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་སུ་བཅར་འདྲི་ཞུས།
དྲི་བ། བོད་ནང་གི་ཛ་དྲག་གནས་སྟངས་ཐད་བོད་གཞུང་མང་གཉིས་ཀྱིས་གདོང་ལེན་ཇི་ལྟར་གནང་དགོས།
ལན། ༸གོང་ས་མཆོག་གཙོ་བྱས་པའི་བཙན་བྱོལ་བོད་མི་ཚོས། བོད་ནང་གི་བོད་མིའི་སྙིང་སྟོབས་དང་ལྷག་བསམ་གཞི་བྱས་ཏེ། སོ་སོའི་དཔག་ཚོད་ཀྱིས་འདས་པའི་ལོ་ ༥༠ ལྷག་གི་རིང་གདོང་ལེན་གནང་བ་རེད། ཁོང་ཚོའི་ལྷག་བསམ་དང་སྙིང་སྟོབས་མུ་མཐུད་གནས་པ་དང་བཙན་བྱོལ་ནང་གདོང་ལེན་བྱས་པའི་བཀའ་དྲིན་གྱིས། བོད་ཀྱི་གནས་སྟངས་རྒྱལ་སྤྱིའི་ནང་མ་ཤི་གསོན་གནས་ཐུབ་པ་བྱུང་ཡོད། རང་ལུས་མེར་བསྲེཊ་ཀྱི་ཐད་ནས། དབུ་མའི་ལམ་ལས་འགུལ་ཁང་གིས་ཁོང་ཚོའི་བློས་གཏོང་ཆེན་པོར་གུས་བརྩི་ཞུ་རྒྱུ་ལས། བཤད་པ་རྒྱག་ཐུབ་པ་ཞིག་མ་རེད། ཡིན་ནའང་། ང་ཚོའི་ངོས་ནས་ལུས་སྲོག་མེར་བསྲེཊ་མ་བཏང་བར་སོ་སོའི་མི་རིགས་ཀྱི་འཐབ་རྩོད་དེ། རྒྱ་ནག་གི་རྩ་ཁྲིམས་དང་བཅའ་ཁྲིམས་གཞིར་བཟུང་མུ་མཐུད་འཐབ་རྩོད་བྱ་ཐུབ་ན་བསམ་སྟེ། ད་ལྟའི་བར་འབོད་སྐུལ་ཞུས་པ་རེད། རྒྱུ་མཚན་ནི་ཁོང་ཚོ་ང་ཚོའི་འཐབ་རྩོད་ཀྱི་མེ་ལྕེ་གནས་པ་ལ་མེད་དུ་མི་རུང་བ་ཞིག་ཡིན་སྟབས། ལུས་སྲོེག་མེར་བསྲེགས་མ་བཏང་བའི་ཐོག་གནས་ཐུབ་པ་བྱ་རྒྱུ་དེ་གལ་ཆེན་པོར་རྩི་ཡི་ཡོད།
ང་ཚོའི་ངོས་ནས་དེའི་ཐད་སྔོན་མར་གསར་འགོད་གསལ་བསྒྲགས་གནང་བ་ཡིན་ལ། ད་ལྟ་ཡང་དེ་ལྟར་བསམ་གྱི་ཡོད། གནས་སྟངས་དེ་དག་ལ་གཞིགས་ཏེ། ང་ཚོ་བཙན་བྱོལ་བོད་མི་ཚོ་ཨ་རི་སོགས་འཛམ་གླིང་ཡུལ་གྲུ་གང་དུ་ཡོད་ཀྱང་། སོ་སོ་མི་རིགས་ཀྱི་སྐད་ཡིག་དང་རིག་གཞུང་། མི་རིགས་ཀྱི་ངོ་བོ་མི་བརླགས་པ་བྱ་རྒྱུ་དང་། རང་མགོ་རང་ཐོན་བྱས་ནས་མི་འདུག་པར། སྤྱི་བ་དང་མང་ཚོགས། གཞིས་ལུས་མི་མང་གི་བློས་གཏོང་གཞི་ལ་བཞག་ཏེ། རིག་གཞུང་ལ་བདག་པོ་རྒྱབ་སྟེ་སྲ་ཐག་ཐག་བསྡད་པ་ཡིན་ན། དགྲ་ཕྱོགས་ནས་ཕྱིའི་རྣམ་པ་སྡུག་པོ་དང་འགྱུར་བ་གཏོང་སྲིད་ཀྱང་། ནང་གི་སེམས་འགྱུར་བ་གཏོང་མི་ཐུབ་པར་བོད་པའི་ངོ་བོ་རང་འཇགས་གནས་ཐུབ་ཀྱི་རེད། དེ་བཙན་བྱོལ་བོད་མིའི་སྒྲིག་འཛུགས་དང་མི་མང་གི་ལས་འགན་གཙོ་བོ་རེད་བསམ་གྱི་ཡོད།
འདས་པའི་ལོ་ ༥༠ ལྷག་གི་རིང་ང་ཚོའི་རིག་གཞུང་དང་མི་རིགས་ཀྱི་ངོ་བོ་གནས་མེད་པ་ཡིན་ན། ད་ལྟའི་དུས་སྐབས་འདིར་བོད་པའི་གནས་ཚུལ་གླེང་སློང་བྱེད་མཁན་རྩ་བ་ཉིད་ནས་ཡོང་གི་མ་རེད། དེ་དག་དཔེ་དང་རྒྱུ་མཚན་དུ་བཞག་ཏེ་མུ་མཐུད་གང་དུ་ཡོད་པའི་བོད་མི་ཚོས་སོ་སོའི་རིག་གཞུང་ལ་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད་ལ། དེ་དང་ཆབས་ཅིག་ང་ཚོའི་ཚོགས་སྡེ་ཁག་ཡོངས་ཀྱིས་རྒྱལ་སྤྱིར་གནོན་ཤུགས་སྤྲོད་རྒྱུ་གལ་ཆེན་པོ་རེད། རྒྱ་མིར་ང་ཚོས་བཤད་མ་བཤད་ཡོད་པ་མ་རེད། འདས་པའི་ལོ་ ༥༠ རིང་ང་ཚོས་བཤད་པ་རེད། ལྷག་པར་དུ་༸གོང་ས་མཆོག་གིས་ཐུགས་གུ་ཡངས་ཆེན་པོ་དེ་འདྲ་ཞིག་གནང་སྟེ། ཁོང་ཚོར་གོ་སྐབས་སྤྲད་ཀྱང་ཡ་ལན་བྱེད་ཀྱི་ཡོད་པ་མ་རེད། ང་ཚོས་མི་རིགས་ཀྱི་ངོ་བོ་རང་འཇགས་གནས་ཐུབ་པའི་ཐོག རྒྱལ་སྤྱིའི་ཐོག་རེ་སྐུལ་དང་གོ་རྟོགས་སྤེལ་རྒྱུ། ཁྱབ་བསྒྲགས་བཅས་བྱས་ཏེ་རྒྱ་མིར་གནོན་ཤུགས་སྤྲོད་རྒྱུ་དང་། ཚོགས་པ་ཁག་གིས་གདུང་སེམས་མཉམ་སྐྱེད་ཀྱི་ལས་འགུལ་སྤེལ་བསྡད་ཡོད་པ་དེ་མུ་མཐུད་སྤེལ་རྒྱུ་ལས་ལྷག་པ་ཞིག་ང་ཚོས་བྱེད་དགོས་བསམ་ཡང་བྱ་རྒྱུ་ལྷག་ཡོད་པ་མ་རེད།
དྲི་བ། དེ་སྔའི་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་དང་། ཐེངས་འདིའི་གྲོས་ཆོད་ཁག་ལག་བསྟར་བྱེད་ཕྱོགས་ཐད་དགོངས་ཚུལ་ག་རེ་ཡོད།
ལན། ད་ལྟའི་བར་རྒྱལ་ཡོངས་ཚོགས་ཆེན་ཐེངས་གཉིས་དང་། དམིགས་བསལ་ཚོགས་ཆེན་ཐེངས་གཅིག་ཚོགས་པ་རེད། ཚོགས་ཆེན་རིམ་པའི་གྲོས་ཆོད་ཁག་ཚང་མར་གྲུབ་འབྲས་བྱུང་བ་དང་ལག་ལེན་ཁེལ་ཡོད་དམ་ཟེར་ན། ཁེལ་ཡོད་ཀྱི་མ་རེད་དེ། ད་ལྟའི་བར་སྤྱི་འཐུས་དང་འཛིན་སྐྱོང་། མི་མང་བཅས་ཀྱིས་གང་ལ་གང་འཚམ་བསྒྲུབས་ཡོད་པ་རེད། འདོད་པ་ཁེངས་པའི་གྲུབ་འབྲས་བྱུང་ཡོད་མེད་ང་ཚོའི་སྤྱི་ཚོགས་འདི་རྒྱ་གར་གྱི་སྤྱི་ཚོགས་ལྟ་བུའི་ཆེན་པོ་དེ་འདྲ་མ་རེད། ག་རེ་བསྒྲུབས་ཡོད་མེད་གཅིག་གིས་གཅིག་ལ་འགྲེལ་བཤད་རྒྱག་དགོས་པ་ཞིག་མ་རེད། བསྒྲུབས་མེད་ན་ཡོད་མདོག་མདོག་བཤད་ན་དེ་ལས་ཀྱང་ཡག་པོ་མ་རེད། དེང་སང་ང་ཚོའི་སྤྱི་ཚོགས་ནང་མི་ཁག་ཅིག་གིས་གཅིག་བསྒྲུབས་ཡོད་མ་རེད། གཉིས་ལས་ཡོད་པ་མ་རེད་ཅེས་མེད་པའི་རིགས་རྐྱང་རྩིས་བསྡད་ཡོད། དེ་ལྟར་བཤད་ན་རྒྱུ་མཚན་གང་ཡང་མེད། མི་ཞིག་ལ་མཚོན་ན། མི་ཚེའི་ནང་འགྲུབ་མ་འགྲུབ་མང་པོ་ཡོང་གི་རེད། རྒྱལ་ཁབ་ཅིག་ལ་མཚོན་ནའང་མགོ་ཁྲིད་ཀྱི་ དྲན་པ་ལྟར་ལག་ལེན་མ་ཁེལ་བའི་རིགས་ཡོང་སྲིད་པ་རེད། ལྷག་པར་དུ་ང་ཚོ་མིའི་ལུང་པའི་ནང་བསྡད་ཡོད་པ་དང་ཡུལ་ཁྲིམས་དང་བསྟུན་དགོས་སྟབས། བསམ་ཚད་ཚང་མ་འགྲུབ་པ་དེ་འདྲ་ཡོད་པ་མ་རེད། འདས་པའི་ལོ་ ༥༠ རང་བོད་གཞུང་གིས་གང་འཚམ་ཞིག་བསྒྲུབ་ཐུབ་ཡོད་སྟབས། ང་ཚོའི་གནས་སྟངས་དེ་སྲ་ཐག་ཐག་ཅིག་གནས་ཐུབ་ཡོད་པ་རེད་བསམ་གྱི་ཡོད།
ཐེངས་འདིའི་དམིགས་བསལ་ཚོགས་ཆེན་ལ་མཚོན་ནའང་། གཅིག་བྱས་ན་སྔོན་མ་བཤད་པ་རང་འཇགས་ཡོང་སྲིད་པ་རེད་ལ། བསྒྱུར་བཅོས་ཏོག་ཙམ་གཏོང་རྒྱུ་ཡང་ཡོང་སྲིད་པ་རེད། ཚོགས་འདུའི་སྐབས་མི་རེར་བསམ་ཚུལ་རེ་ཡོད་ངེས་ཀྱང་། དངོས་སུ་ལག་ལེན་བསྟར་སྐབས་རྒྱལ་ཁབ་གཞན་དུ་བསྡད་ཡོད་པ་དང་། ཁོང་ཚོའི་ཁྲིམས་ལུགས་སོགས་ལ་བསྟུན་དགོས་པ། མཐུན་རྐྱེན་སོགས་མང་པོ་ཞིག་ལ་བལྟ་དགོས་སྟབས། དྲན་པ་བཞིན་བསྒྲུབ་མི་ཐུབ་པ་མང་པོ་ཡོང་གི་རེད་བསམ་གྱི་འདུག ༸གོང་ས་མཆོག་གཙོས་པའི་ང་ཚོ་བོད་མི་ཚང་མས་སེམས་སུ་བོད་རང་བཙན་མི་འདོད་མཁན་ཡོད་པ་མ་རེད། ཡིན་ནའང་ང་ཚོས་འདོད་བཞིན་དུ་ལམ་ཁ་གཞན་ཞིག་བདམས་དགོས་པ་དེ་ད་ལྟའི་ཆར་དགོས་པ་རྒྱུ་མཚན་མང་པོ་ཞིག་གི་དབང་གིས་བྱུང་བ་རེད།
དྲི་བ། ཐེངས་འདིའི་ཚོགས་ཆེན་གྱི་གོ་སྒྲིག་དང་ཚོགས་མི་འདེམས་སྒྲིག་བྱེད་ཕྱོགས་ཐད་དགོངས་ཚུལ་ག་རེ་ཡོད།
ལན། སྤྱིར་བཏང་ད་རེབ་ཀྱི་ཚོགས་འདུའི་ཐོག་བཀའ་ཟུར་དང་སྤྱི་ཟུར་སོགས་མང་པོ་ཞིག་ཡོང་གི་ཡོད་པ་རེད། དེའི་ཐད་དམིགས་བསལ་ཞུ་རྒྱུ་མེད། ཡིན་ནའང་། གཞུང་འབྲེལ་མིན་པའི་ཚོགས་པའི་ཚོགས་མི་ཡོང་སྟངས་ཀྱི་ཐོག་ནས། ཡོངས་གྲགས་སུ་ཡོད་པའི་ཚོགས་པ་ཁག་ལས། ཚོགས་པ་གསར་བ་དང་སྤྱི་ཚོགས་ནང་ལས་ཀ་བྱེད་བཞིན་པ་དག་ལ་གོ་སྐབས་སྤྲོད་ཀྱི་མེད་པ་དེ་འགྲིག་མི་འདུག་བསམ་གྱི་ཡོད། སྔོན་མ་སྤྱི་འཐུས་རྒྱུན་ལས་གནང་སྐབས་བཀའ་སྤྱི་ལྷན་འཛོམས་ཐོག་བཤད་རྒྱུ་བྱུང་། ང་ཚོས་གཞུང་འབྲེལ་མིན་པའི་ཚོགས་པ་ཁག་ཚང་མ་གཅིག་གྱུར་ཐོག་ངོས་ལེན་བྱ་རྒྱུ་ལས། ཁག་ཅིག་ལ་གཞུང་གི་ངོས་ལེན་ཡོད་པ་ལྟ་བུ་དང་། ཁག་ཅིག་ལ་ངོས་ལེན་མེད་པ་ལྟ་བུ་བྱས་ན་ཡག་པོ་མི་འདུག ད་རེབ་ཀྱི་ཚོགས་འདུའི་ཐོག་ཏུའང་གནས་ཚུལ་དེའི་རིགས་ཡོད་ས་རེད། དེ་ཏག་ཏག་བསྡད་མི་འདུག ད་ལྟའི་བར་གཞུང་འབྲེལ་མིན་པའི་ཚོགས་ཁག་གིས་གཞུང་གིས་བཀའ་རྒྱ་གནང་བ་ལྟར། ལས་ཀ་བྱེད་བསྡད་ཡོད་པ་རེད། བཅའ་ཁྲིམས་ནང་གཞུང་འབྲེལ་མིན་པའི་ཚོགས་པ་བཙུགས་ཆོག་པ་འཁོད་ཡོད་པ་ལྟར། གནས་ཚུལ་འདི་འདྲའི་སྐབས་སུ་གཅིག་མཚུངས་ཀྱི་ཐོབ་ཐང་སྤྲོད་དགོས་ཀྱི་འདུག་ལ། ལྷག་པར་དུ་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་དེ་མི་མང་པོ་ཞིག་གི་སྐུ་ཚབ་མཚོན་པའི་ཚོགས་འདུ་ཡིན་སྟབས། གཅིག་མཚུངས་ཀྱི་གོ་སྐབས་སྤྲོད་རྒྱུ་ཧ་ཅང་གལ་ཆེན་པོ་རེད།
གསར་འགོད་པ། དོན་གོ
སྐུ་ངོ་རྩོམ་སྒྲིག་པ་ལགས། གཤམ་གྱི་དོན་དག་འདི་གསར་འགྱུར་སྒང་གཏོང་གནང་ཡོད་པ་ཞུ། ཐུགས་རྗེ་གཟིགས།
ཚོང་དཔོན་ནང་ཆེན་བཀྲ་ཤིས་ཚང་ལ་ཆག་སྒོ་བྱུང་སོང་།
[ སྨིན་དྲུག ] [ 2012-9-15 ] སེང་རྡོར་དྲ་བ།
ནང་ཆེན་བཀྲ་ཤིས་ནི་ཧ་ལམ་ཕོ་ལོ47ལ་སོན་པའི་ཡུལ་ཤུལ་ཁུལ་ནང་ཆེན་རྫོང་གི་ཚོང་པ་ཡག་པོའི་གྲས་ཀྱི་གཅིག་ཡིན་པ་རེད། ཁོ་ནི། བོད་ཀྱི་རིག་གནས་དང་ཆོས་ལུགས་སྐད་དང་ཡི་གེ་ལ་དགའ་ཞིང་བློ་དཀར་མཁན་ཞིག་ཡིན་པས། ལོ་ངོ་བཅུ་ལྷག་གི་ཡར་སྔོན་ནས་བཟུང་། ཁོས། རང་མི་རིགས་ཀྱི་རིག་གནས་དང་སྐད་ཡིག་གི་འདུ་ཤེས་ཉམས་བཞིན་པའི་སྐྱེ་རྒུ་གྲོང་བརྡལ་དུ། ཆོས་ལུགས་གྲུབ་མཐའ་དང་སེར་སྐྱ་རིས་མེད་ཀྱིས་བགྲོ་གླེང་བྱེད་པར་མཐུན་རྐྱེན་མང་པོ་སྦྱར་ཏེ་སྣང་ཚུལ་དེ་ལྡོག་པའི་ཐབས་ལམ་གང་བཟང་དང་བྱེད་ཕྱོགས་གང་ཡག་འཚོལ་བའི་ལས་ལ་བརྩོན་མཁན་ཞིག་ཡིན་པར་མ་ཟད། ད་དུང་ས་དེ་གའི་ཉམ་ཆུང་དབུལ་པོ་ལ་འཚོ་བའི་ཁ་གསབ་ཀྱི་དངུལ་དངོས་དང་། སློབ་མ་དང་སློབ་གཉེར་མཁན་ལ་སློབ་སྦྱོང་གི་མཐུན་རྐྱེན་ཡང་མང་པོ་སྦྱར་དང་སྦྱོར་གིན་ཡོད་མཁན་ཞིག་ཡིན་པ་རེད།།
དེ་མིན། ཁོ་ནི་ཚོང་གི་སྟེང་དུ་ཡང་བློ་མིག་ཡོད་མཁན་ཞིག་ཡིན་པས་ན། ལོ་དྲུག་བདུན་ཙམ་གྱི་སྔོན་ལ། ཡུལ་ཤུལ་གྲོང་བརྡལ་གྱི་སུམ་མདོ་ཆེན་མོ་སྟེ་དམར་སྲུང་ལམ་དུ་འབོད་པའི་ས་ཆེས་ཡག་ས་དེ་རུ། ས་མུའུ་ལྔ་ཉོས་ཤིང་བསྡོམས་འབོར་ཤོག་སྒོར་ཁྲི་སྟོང་གསུམ་ལྷག་གི་མ་རྩ་བཏང་ནས་དེའི་སྟེང་དུ་མགྲོན་ཁང་དང་རང་གི་སྡོད་ཁང་། ཚོང་ཁང་དང་ཟ་ཁང་སོགས་ཀྱི་ཁང་མིག་མང་པོ་བརྒྱབ་པ་རེད། “འཛམ་གླིང་ཞི་བདེ”ཞེས་པའི་མགྲོན་ཁང་དེ་རང་གིས་གཉེར་གྱི་ཡོད་པ་ལས། གཞན་ཚང་མ་བོད་རིགས་དང་རྒྱ་རིགས་ཚོང་པ་ཚོར་གླས་ཡོད་རེད། ཡིན་ཡང་ཚོང་དེ་གཉེར་ནས་ལོ་མང་ཕྱིན་མེད་པས། ཁོ་ལ་ད་སྔ་ད་དུང་གཞན་ལས་བསྐྱིས་པའི་སྒོར་ཁྲི་སྟོང་གཅིག་ལྷག་གི་བུན་ཡོད་པ་རེད། ས་འགུལ་སྐབས་ཁོའི་ཁང་པ་ཚང་མ་ལ་གནོད་སྐྱོན་ཅི་ཡང་མ་ཕོགས་ཟེར། ཡིན་ཡང་། གྲོང་ཁྱེར་འཆར་འགོར་བྱེད་སྐབས། སྲིད་གཞུང་གིས་ནང་ཆེན་བཀྲ་ཤིས་ལ་གཞུང་ལམ་འགྲམ་གྱི་ས་མུའུ0.7གྱི་ཚོང་ཁང་གི་ས་དེ་སྲིད་གཞུང་ལ་སྤྲད་པ་ཡིན་ན། ཚོང་ས་མུའུ4.3པོ་མ་སྒུལ་རང་འཇོག་བྱེད་རྒྱུའི་ཁས་ལེན་ཆ་རྐྱེན་འོག་ནང་ཆེན་བཀྲ་ཤིས་ཀྱང་མོས་མཐུན་བྱུང་ནས། སྲིད་གཞུང་གིས་ས་མུའུ0.7གྱི་ཚོང་ཁང་གི་གུན་ཚབ་ཏུ་ཁོ་ལ་སྒོར་མོ་ཁྲི་ཁ་ཤས་སྤྲད་པ་རེད།།
ཡིན་ཡང་། 2012ལོའི་ཟླ9པའི12ཉིན་གྱི་མཚན་གུང་ཆུ་ཚོད12སྟེང་། ནང་ཆེན་བཀྲ་ཤིས་ཁྱིམ་དུ་མེད་པའི་བབ་དང་བསྟུན་ནས། མི་སྐོར་ཞིག་ཁྱིམ་ནང་འཛུལ་ཡོང་ནས་ཁང་པ་གཏོར་ཞིག་བྱེད་རྒྱུའི་བཙན་བཀའ་བཏང་མུར་ཁྱིམ་མིས་ངོ་རྒོལ་བྱས་མཐར། ནང་ཆེན་བཀྲ་ཤིས་ཀྱི་ཆུང་མ་བོད་བདེ་དང་། བུ་ཤེས་རབ་རྡོ་རྗེ།(པེ་ཅིན་གྱི་སློབ་ཆེན་ཞིག་ཏུ་ཚོང་ལས་དོ་དམ་གྱི་སློབ་གཉེར་བྱེད་ཀྱི་ཡོད)དང་། བསོད་ནམས་སྟོབས་རྒྱལ།(དཀར་མཛེས་ཁུལ་རྫོང་གསར་དགོན་པའི་གྲྭ་པ།)བུ་མོ་གཅིག་སྟེ་གཡང་འཛོམས་(ཟི་ལིང་གི་སློབ་ཆེན་ཞིག་ཏུ་ཡོད)བཅས་བསྡོམས་པས་ཁྱིམ་མི་བཞི་འཛིན་བཟུང་བྱས། ཁོ་ཚོས་ཁ་ནག་ངོ་ནག་གི་མཚན་གུང་དེ་ལ་ནང་ཆེན་བཀྲ་ཤིས་ཀྱི་ནང་མི་བཞི་བོ་འཛིན་བཟུང་བྱས་རྗེས། མིས་མི་ཤེས་ཤིང་ཁྱིས་མི་ཚོར་བའི་སྒོ་ནས་ཁོ་ཚང་གི་སྡོད་ཁང་མགྲོན་ཁང་། ཟ་ཁང་ཚོང་ཁང་དང་ཅ་ལག་ཡོད་ཚད། འདེད་འཁོར་གྱིས་དེད་ནས་ཤུལ་མེད་བཟོས་པར་མ་ཟད། ཕྱི་ཉིན་ས་དེར་ར་བ་ཡང་བསྐོར་འདུག་སྐད།།
གོ་ཐོས་སུ་ད་ཆ་ནང་ཆེན་བཀྲ་ཤིས་ཡང་བསྐྱར་གང་སོང་ཆ་མེད་དུ་སོང་འདུག་པ་རེད་ཟེར།།
མི་བུ་འདི་ཡུལ་ཤུལ་ས་འགུལ་སྐབས་སུ་ཡང་གློ་བུར་བོར་བརླག་ཐེབས་ཏེ་ཟླ་གསུམ་ལྷག་འགོར་ཡོད། ཁྱིམ་མིས་ཀྱང་ཟླ་གཅིག་ཙམ་གྱི་རྗེས་སུ་མ་གཏོགས་ཁོ་རང་གང་དུ་ཡོད་པ་ཧ་གོ་གི་མེད་པ་རེད། ཁོ་རང་འཛིན་བཟུང་བྱས་རྗེས་བོད་ལྗོངས་ཀྱི་ཆབ་མདོ་རུ་ཁྲིད་པ་རེད། འཇུ་ཁྲིད་བྱེད་སྐབས་ཁོའི་མགོ་བོར་རས་ཁུག་ནག་པོ་གཡོགས་ཤིང་། ས་དེར་སླེབས་རྗེས་ལྷམ་ནང་དུ་རྡོ་ཧྲུག་མང་པོ་བླུགས་ནས་གྱོན་བཅུག་རྗེས་ལངས་ཆད་རྫོགས་མེད་བཅད་ཅིང་གཅར་རྡུང་དྲག་པོ་བྱས་ཡོད་པ་རེད། འཇུ་བཟུང་བྱེད་དོན། ཁོས་མང་ཚོགས་ལ“ངན་སྐུལ”ཐེབས་འདོད་པར་སྐྲག་པས་རེད་ཟེར།།
རང་ལ་འབྱོར་བ་ཡོད་དུས་གཞན་ལ་རོགས་སྐྱོར་བྱེད་མཁན་གྱི་ལྷག་བསམ་ཅན་དག་ལ། ང་ནི་གོང་བཀུར་དང་རྗེས་སུ་ཡི་རངས་བྱེད་མཁན་ཞིག་ཡིན་པས་རྒྱུ་འབྲས་ཀྱི་སྐད་ཆ་བཤད་འདོད་འགོག་མེད་སྐྱེས་ཡོང། ཁ་སང་ཁོ་ཚང་གི་ཆག་སྒོ་དེ་གོ་བ་ནས་བཟུང་། ངའི་སེམས་པ་གྲང་ཤུར་ཤུར་དུ་གྱུར། ཁྱིམ་བདག་ཅིག་གི་ཚད་ནས་བཤད་ན་ཡང་། རང་གིས་ཚེ་གང་པོར་བསོག་བསོག་པའི་རྒྱུ་ནོར་རྣམས་ཞག་མ་གཅིག་རིང་ལ་ཐལ་དང་རྡུལ་དུ་བཏང་ཞིང་། རང་གི་སྙིང་ཉེ་བའི་ཁྱིམ་མི་ཚོ་བཙོན་འཇུག་བྱས་ཏེ། རང་ཉིད་ཞག་པོ་གཅིག་གི་རིང་ལ་མ་མེད་བྱིའུ་ཕྲུག་ཐང་གྱར་གྱི་ཚུལ་དུ་ལུས་སུ་བཅུག་ན་ནི་སུ་ཞིག་གིས་བཟོད་བསྲན་བྱེད་ཐུབ་བམ།།
ཁོ་ནི་ལོ་འདིའི་བགྲོ་གླེང་ཞིག་སྐབས་ངོ་ཤེས་པ་ཞིག་ཡིན་ན་ཡང་། ང་ལ་བརྗེད་མི་ཐུབ་པའི་བག་ཆགས་བཞག་བྱུང་། གང་ཡིན་ཞེ་ན། ཁོ་ནི་རང་རིགས་ཀྱི་རིག་གནས་ལ་དུངས་ཀ་ཆེ་དྲག་པའི་རྐྱེན་གྱིས། སྡུག་དང་ཚེགས་ལ་མ་འཛེམས་པར་རང་གི་ཆུང་མ་དང་བུ་བུ་མོ་ཚང་མར་སྡོད་ས་རས་དཀར་དང་ཁ་ཟས་མར་རྩམ་སོགས་ཁྱེར་ནས་བགྲོ་གླེང་དེར་ཞུགས་ནས། སྤྱི་ཚོགས་ཀྱི་དཀའ་སྡུག་དང་གནད་དོན་མང་པོ་རང་གིས་ཅི་ནུས་གང་ལྕོགས་ཀྱིས་ཨེ་ཤོད་བལྟ་ཡི་ཡོད་པ་དང་། དེ་བཞིན། ཇོ་མོ་དགོན་གྱི་བགྲོ་གླེང་དེའི་སྟེང་ལ་ཡང་ཁོ་ཁྱིམ་ཚང་གང་པོ་ཁྱོག་ཁྱོག་དྲུད་དྲུད་དུ་ཐོན་ནས་རང་གི་སེམས་ཀྱི་ན་ཟུག་བརྗོད་དེ་ཉམ་ཆུང་ཚོ་དང་སྐྱིད་སྡུག་མཉམ་མྱོང་བྱེད་པའི་ཚུལ་དེ་ལ་སོགས་ཀྱིས་སོ།།
ཁ་སང་ངས་ཁོ་ཚང་གི་ཆག་སྒོ་ནག་པོ་དེ་ཐོས་རྗེས། བསམ་ཞིང་བསམ་དུས་སྡོད་ལོང་མེད་པར་བཏང་། ད་ནངས་ང་རང་ཆུ་ཚོད་དྲུག་པར་གཉིད་ལས་སད་ཅིང་ཉལ་འདུན་མེད་པར་གྱུར་ནས། དུས་ཚོད་བདུན་གྱི་སྟེང་མལ་ལས་ལངས་ཏེ་སྐད་ཆ་འདི་འབྲི་ཁུལ་བྱས་པ་ཡིན། དེ་ནི། ཁོ་ལ་ཡང་དང་བསྐྱར་དུ་དཀའ་ལས་བྱུང་བ་འདི་ཡང་ཁོ་པ་རང་གི་ཁེ་ཕན་ཙམ་གྱི་ཆེད་དུ་མིན་པ་ཤེས་པས་ཡིན་ལ། ཁོ་དང་ཁྱིམ་མི་གང་པོས་རྡོག་རྩ་ཆིག་སྒྲིལ་དང་སེམས་ཤུགས་མ་ཆག་པར་ཆག་སྒོ་འདི་ཟློག་པའི་ལས་ལ་རྩོམ་ན། འཇིག་རྟེན་འདི་རུ་ཁོ་དང་ཁོ་འདྲ་བའི་སྙིང་རྗེ་བྱམས་སེམས་ཅན་ལོས་ཡོད་འདོད་པས་ཀྱང་ཡིན་ནོ།།
ར་རྫ་འཇམ་དབྱངས་སྐྱིད་ཅེས་པ་ནས།
2012/09/15
་་་་་་༸གོང་ས་མཆོག་གཙོས་པའི་ང་ཚོ་བོད་མི་ཚང་མས་སེམས་སུ་བོད་རང་བཙན་མི་འདོད་མཁན་ཡོད་པ་མ་རེད། ཡིན་ནའང་ང་ཚོས་༼མི་༽འདོད་བཞིན་དུ་ལམ་ཁ་གཞན་ཞིག་བདམས་དགོས་པ་དེ་ད་ལྟའི་ཆར་དགོས་པ་རྒྱུ་མཚན་མང་པོ་ཞིག་གི་དབང་གིས་བྱུང་བ་རེད། ་་་་་་་ཟེར།