༄༅ །། སུད་སིར་བརྟེན་གཞི་བྱས་པའི་བོད་ཀྱི་མི་རབས་གསར་པའི་མཐུན་ཚོགས་ཀྱི་གོ་སྒྲིག་འོག བཞུགས་སྒར་ངྷ་རམ་ས་ལར་སྤྱི་འཐུས་སྐབས་བཅོ་ལྔ་པའི་ཚོགས་དུས་བཞི་པ་འཚོགས་བཞིན་ཡོད་པ་དང་། མི་འགྱངས་པར་བོད་ནང་གི་ཛ་དྲག་གནས་སྟངས་ལ་བོད་གཞུང་དམངས་གཉིས་ཀྱིས་གདོང་ལེན་གནང་ཕྱོགས་ཐོག བོད་རྒྱལ་ཡོངས་དམིགས་བསལ་ཚོགས་ཆེན་ཐེངས་གཉིས་པ་ཚོགས་འཆར་ཡོད་པའི་གོ་སྐབས་བཅས་ལ་བསྟུན་ཏེ། ཁ་བྱང་ལ་༼ ཆོལ་གསུམ་གཞུང་མང་མཉམ་འབྲེལ་དང་བོད་དོན་འཐབ་རྩོད་ཀྱི་སྟོབས་ཤུགས་གཅིག་སྒྲིལ་ཡོང་ཐབས་སྐོར། ༽ཞེས་པའི་བརྗོད་གཞིའི་ཐོག བཞུགས་སྒར་ཁུལ་གྱི་གཞུང་འབྲེལ་མིན་པའི་ཆབ་སྲིད་ལས་འགུལ་ཚོགས་པ་ཁག་དང་ཆོལ་ཁ་གསུམ་གྱི་སྐུ་ཚབ་བོད་མི་མང་སྤྱི་འཐུས་རེ་བཅས་ཀྱི་བགྲོ་གླེང་ཞིག་གོ་སྒྲིག་ཞུ་རྒྱུ་ལེགས་ན། སྐུ་མགྲོན་གང་མང་མང་བགྲོ་གླེང་ལ་གསན་གཟིགས་དང་དྲི་བ་དྲིས་ལན་གྱི་ཆ་ཤས་བཞེས་པར་ཕེབས་གནང་ཡོང་རྒྱུར་ངེད་མཐུན་ཚོགས་ཀྱི་ངོས་ནས་དགའ་བསུ་ཞུ་བཞིན་ཡོད།
ཚོགས་ཡུལ། ངྷ་ས་ཉིན་མོའི་སློབ་གྲྭའི་རྒྱལ་ཡུམ་ཆེན་མོའི་ཚོགས་ཁང་།
ཚོགས་དུས། ཕྱི་ལོ་ ༢༠༡༢ ཟླ་ ༩ ཚེས་ ༢༣ ཉིན། ཕྱི་དྲོའི་ཆུ་ཚོད་ ༥།༣༠ ། གཟའ་ཉི་མ།
གཏམ་བཤད་པ།
ཐུབ་བསྟན་ལུང་རིགས། ་་་་་་་་་་་་་་་་་་་་་་་་་་་་་་་་་་་་་་་་་་་་་་མདོ་སྨད་སྤྱི་འཐུས།
པདྨ་འབྱུང་གནས། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་དབུས་གཙང་སྤྱི་འཐུས།
འབའ་བ་སྐལ་བཟང་རྒྱལ་མཚན། ་་་་་་་་་་་་་་་་་་་་་་་་་་་་་་་་་མདོ་སྟོད་སྤྱི་འཐུས།
ཚེ་དབང་རིག་འཛིན། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་བོད་ཀྱི་གཞོན་ནུའི་ཚོགས་གཙོ།
པདྨ་ཆོས་སྒྲོན། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་བོད་ཀྱི་བུད་མེད་ལྷན་ཚོགས་ཀྱི་དྲུང་ཆེ།
ཀླུ་མཁར་བྱམས། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་དགུ་བཅུ་གསུམ་ལས་འགུལ་ཚོཊ་པའི་ཚོཊ་གཞོན།
དགེ་ལེགས་འཇམ་དབྱངས།་་་་་་་་་་་་་་་་་་་་་་་་་་་་་་་་་་་་་་་་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ།
རྡོ་རྗེ་ཚེ་བརྟན། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་བོད་རང་བཙན་སློབ་ཕྲུག་ཚོགས་པའི་རྒྱ་གར་ཚོགས་གཙོ།
བློ་བཟང་ཆོས་འབྱོར། ་་་་་་་་་་་་་་་་་་་་་་་་་་་་་་་་་་་་་་་་་་་་་་་དབུ་མའི་ལམ་མི་མང་ལས་འགུལ་ཁང་གི་དྲུང་ཆེ།
༼ བོད་ཀྱི་མི་རབས་གསར་བའི་མཐུན་ཚོགས་ངོ་སྤྲོད ༽
བོད་ཀྱི་མི་རབས་གསར་པའི་མཐུན་ཚོགས་ཞེས་པའི་ཚོགས་པ་འདི་ནི་བཙན་བྱོལ་སྤྱི་ཚོགས་ནང་བོད་དོན་ལ་ཤ་ཚ་སེམས་ཁུར་ཡོད་པའི་བོད་མི་སྐོར་ཞིག་ཉམས་རུབ་བྱས་ཏེ། གོང་ས་མཆོག་གི་ཐུགས་དགོངས་དང་དབུས་བོད་མིའི་བསྒྲིགས་འཛུགས་ཀྱི་སྲིད་བྱུས་ལངས་ཕྱོགས་གང་ཡིན་ལ་རྒྱབ་སྐྱོར་གཙང་མ་ཡོད་པའི་ཐོག བཙན་བྱོལ་སྤྱི་ཚོགས་ནང་བོད་དོན་འཐབ་རྩོད་ཀྱི་སྟོབས་ཤུགས་ཁ་འཐོར་དུ་འགྲོ་གཞིའི་ལས་རིགས་སྔོན་འགག་དང་། བོད་རིགས་ནང་ཁུལ་མཐུན་སྒྲིལ་རྡོག་རྩ་གཅིག་སྒྲིལ་ཡོང་ཐབས་ཐད་ལས་འགུལ་ཅི་འོས་སྤེལ་བའི་ཚོགས་པ་ཞིག་ཡིན་ལ།
ཚོགས་པ་འདི་བཙུགས་ཏེ་མི་ལོ་གཅིག་ལྷག་འཁོར་བའི་ནང་ཚོགས་པ་གཏན་སྡོད་བྱེད་སའི་སུད་སིའི་བོད་རིགས་མི་མང་ཁྲོད་ལས་འགུལ་སྣང་མང་སྤེལ་ཞིང་། ལས་འགུལ་དེ་རིགས་བརྒྱུད་སུད་སི་གཙོས་ཡུ་རོབ་སྤྱི་ཚོགས་ཁག་ལ་བོད་དོན་ཁྱབ་བསྒྲགས་དང་། ཡུ་རོབ་བོད་རིགས་མི་མང་ཁྲོད་བོད་དོན་ཐད་སེམས་ཤུགས་དང་ངེས་ཤེས་བཅས་ཡོང་བར་སྐུལ་འདེད་གང་འཚམ་ཐོན་པ་བྱས་ཡོད། ད་དུང་ཚོགས་པའི་ངོས་ནས་མུ་མཐུད་བཙན་བྱོལ་སྤྱི་ཚོགས་ནང་མུ་མཐུད་ལས་འགུལ་ཅི་འོས་སྤེལ་རྒྱུའི་ལས་འཆར་སྒྲིག་བཞིན་ཡོད།
ཚོགས་པའི་ངེས་ཤེས།
བོད་ཀྱི་དངོས་ཡོད་སྤྱི་ཚོགས་ཀྱི་དཀའ་ངལ་སྤྱི་དང་། སྒོས་སུ་བོད་ཀྱི་རིགས་གནས་དང་གོམས་སྲོལ། ཉེ་རབས་ལོ་རྒྱུས་དང་འདུ་ཤེས་སེམས་ཁམས་སོགས་ལ་ཕྱིར་བལྟ་དང་། ད་ལྟའི་ཛ་དྲག་གི་སྤྱི་ཚོགས་གནས་བབ་ཉག་ཕྲ་བ་མང་པོ་ཞིག་ལ་བསམ་ཞིབ་གང་ལེགས་བྱས་ཏེ་གླེང་ན། སྤྱིར་མི་རིགས་ཞིག་གི་རང་དབང་འཐབ་རྩོད་ཀྱི་རྒྱུད་རིམ་ཁྲོད་ཆབ་སྲིད་ཀྱི་ལྟ་བ་མི་མཐུན་པ་དང་། ལངས་ཕྱོགས་མི་མཐུན་པ། དེ་བཞིན་འཐབ་རྩོད་ཀྱི་རྣམ་པ་མི་འདྲ་བ་སོགས་མང་དྲག་པ་ནི་ལས་དོན་ལམ་ལྷོང་མི་ཡོང་བའི་རྐྱེན་གཙོ་བོ་ཞིག་ཡིན་པ་བོད་ཀྱི་འདས་པའི་ལོ་རྒྱུས་བྱུང་རབས་ལས་ཉམས་མྱོང་ལེན་ཐུབ་པ་ཞིག་ཡིན་པ་དང་། ཁྱད་པར་ང་ཚོའི་མིག་མདུན་གྱི་གཉན་ཕྲེང་གི་དུས་སྐབས་འདི་དང་དཀའ་ངལ་རིམ་བརྩེགས་ཀྱི་དུས་ཚོད་འདི་ལ། སྤྱི་བའི་བསྒྲིགས་འཛུགས་ཀྱི་གལ་ཆེན་རང་བཞིན་ངོས་མ་ཟིན་པར་མི་སྒེར་དང་ཚོགས་པ་སྒེར་གྱི་བསམ་ཚུལ་ཙམ་གཙོ་བོ་བྱས་ཏེ། རང་ཉིད་ཀྱི་རྐང་པ་སྤོ་སའི་སྤྱི་ཚོགས་ཀྱི་གནས་བབ་ལས་བརྒལ་བའི་འུར་གཏམ་ཅི་ཆེ་སྒྲོག་པ། སྤྱིི་བའི་སྒྲིག་འཛུགས་ཀྱི་ལངས་ཕྱོགས་དང་ལྟ་བར་སྣང་འཇགས་མི་བྱེད་པ། དེ་བཞིན་ཆོལ་ཀ་དང་ཆོས་ལུགས། ལུང་ཚན་དང་གང་ཟག་སྒེར་གྱི་ལྟ་བའམ་ཚོར་བའི་ཞེན་ཁོག་ཤུགས་དྲག་སྤེལ་བ་ལས། དངོས་ཡོད་སྤྱི་ཚོགས་ཀྱི་གནས་སྟངས་ངོ་མར་འགན་མི་འཁུར་བའི་ཤེས་ཡོན་པ་དང་མི་སྣ་གང་མང་མངོན་འདོད་དང་མངོན་འདོད་མ་ཡིན་པའི་གནས་ཚུལ་འོག་བྱུང་དང་འབྱུང་བཞིན་ཡོད་པ་བཅས་ནི། ཆབ་སྲིད་འཐབ་རྩོད་ཀྱི་རྩ་བའི་ལངས་ཕྱོགས་གཅིག་སྒྲིལ་ལ་ཉེན་ཚབ་ཆེ་བ་དང་། དེ་བཞིན་བོད་ཀྱི་ཉེ་རབས་ལོ་རྒྱུས་ཁྲོད་འདས་ཚར་ཞིང་རུལ་ཚར་པའི་སྐུ་དྲག་དང་དཔོན་འཛིན་རིང་ལུགས་པའི་ལོ་རྒྱུས་ཙམ་བསྐྱར་ཟློས་ཁོ་ན་བྱས་ཏེ། བོད་ཀྱི་འབྱུང་འགྱུར་མི་རབས་གསར་པ་གང་མང་ཞིག་ལ་རིགས་ཞེན་གྱི་འདུ་ཤེས་དང་། གཅིག་སྒྲིལ་གྱི་བག་ཆག མཉམ་ལས་ཀྱི་གོམས་གཤིས་བཅས་འབྱུང་བར་གཏོར་བཤིག་ཚད་མེད་གཏོང་བཞིན་པ་དང་། སྤྱི་ཚོགས་ཀྱི་ཆབ་སྲིད་གོ་རྟོགས་ཤིན་ཏུ་སྐྱོ་བའི་ཁོར་ཡུག་གི་གནས་བབ་བེད་སྤྱད་དེ། གཞུང་དང་མི་མང་གཉིས་ཀྱི་བར་ཐག་རིང་དུ་གཏོང་བ་སོགས་བོད་ཀྱི་ཆབ་སྲིད་ལངས་ཕྱོགས་གཅིག་སྒྲིལ་ཐད་འགག་རྐྱེན་ཅི་ཆེ་སྤྲོད་ཀྱིན་པ་རྣམས་ནི་བོད་དོན་འཐབ་རྩོད་ལམ་ལྷོང་མི་ཡོང་པའི་ནང་རྐྱེན་གཙོ་བོ་ཞིག་ཏུ་ངོས་འཛིན་བྱས་ཡོད།
ཚོགས་པའི་དམིགས་ཡུལ།
དང་པོ། ༧གོང་ས་མཆོག་གི་ཐུགས་ཀྱི་བཞེད་དགོངས་དང་། དབུས་བོད་མིའི་སྒྲིགས་འཛུགས་ཀྱི་སྲིད་བྱུས་ལངས་ཕྱོགས་ལ་རྒྱབ་སྐྱོར་གཙང་མ་བྱ་རྒྱུ།
གཉིས་པ། ཆོལ་ཁའི་འཐེན་ཁྱེར་དང་ཆོས་ལུགས་ཀྱི་ཞེན་ཁོག་རྩོད་མཁན། གཞུང་གི་དབང་གཅོད་དང་གོ་མིང་བེད་སྤྱོད་ཀྱིས་གཞུང་དང་སྤྱི་ཚོགས་ལ་བརྡབ་གསིག་གཏོང་མཁན།དེ་བཞིན་བོད་ཀྱི་སྤྱི་ཚོགས་རྡོག་རྩ་གཅིག་སྒྲིལ་ལ་གཏོར་བཤིག་གཏོང་མཁན་མཐའ་དག་ལ་ཁ་གཏད་དང་གནས་ལུགས་གསལ་བརྗོད་བྱ་རྒྱུ།
གསུམ་པ། བཙན་བྱོལ་སྤྱི་ཚོགས་ཁྲོད་བོད་ཀྱི་བདེན་དོན་དང་འཐབ་རྩོད་ལ་ཤ་ཚ་ཞེན་ཁོག་ཡོད་མཁན་གང་མང་མཉམ་རུབ་ཡོང་ཐབས་དང་། ལངས་ཕྱོགས་གཅིག་གྱུར་གྱི་ཐོག་ནས་བོད་ཀྱི་རྩ་དོན་འཐབ་རྩོད་ལ་ནུས་ཤུགས་གང་ཡོད་འདོན་ཐབས་བྱ་རྒྱུ།
བཞི་བ། བཙན་བྱོལ་ཁག་གཙོས་བའི་བོད་ཀྱི་སྤྱི་ཚོགས་ནང་ཆབ་སྲིད་ཀྱི་གོ་རྟོགས་གོང་འཕེལ་གཏོང་ཐབས་དང་། སྤྱི་ཚོགས་ཀྱི་ཆབ་སྲིད་གོ་རྟོགས་ལམ་འགག་མ་ནོར་བ་ཞིག་ལ་འཁྲིད་ཐབས་བྱ་ཆེད་ལས་འགུལ་གང་འོས་སྤེལ་རྒྱུ།
ལྔ་བ། བཙན་བྱོལ་སྤྱི་ཚོགས་ནང་མི་ཤེས་ཡོན་དང་ལྷག་བསམ་རྣམ་དག་ཡོད་མཁན་རྣམས་དབུས་བོད་མིའི་སྒྲིག་འཛུགས་ཀྱི་གོ་གནས་ལ་འགོད་ཐབས་ཐད་ལས་འགུལ་སྣ་མང་སྤེལ་རྒྱུ།
དྲུག་པ། སྤྱི་ལོ༡༩༤༩ནས་ད་བར་དུ་བོད་མི་རིགས་དང་རྒྱལ་ཁབ་གྱི་དོན་དུ་ཚེ་སྲོག་ཤོར་བ་རྣམས་དང་མནར་གཅོད་མྱོང་མཁན་རྣམས་ལ་དྲན་གསོ་དང་། དེང་སྐབས་བོད་དོན་ཆེད་དཀའ་ལས་རྒྱག་བཞིན་པ་རྣམས་ལ་གུས་བརྩི་དང་རྒྱབ་སྐྱོར་ཡང་དག་བྱ་རྒྱུ།
བདུན་པ། བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་སོགས་སྤྱི་ཚོགས་ཀྱི་དགོས་མཁོ་གང་ཡོད་དང་བསྟུན་ནས་ལས་འགུལ་འདྲ་མིན་སྤེལ་རྒྱུ།
བརྒྱད་པ། ཚོགས་པ་འདིའི་དམིགས་ཡུལ་དང་ལས་འགན་གལ་ཆེན་དུ་བརྩིས་ཏེ་ཚོགས་མི་ཚང་མ་སྤུན་མཆེད་ཀྱི་འདུ་ཤེས་ཐོག གཅིག་གྲོགས་གཅིག་ཕན་རྡོག་རྩ་གཅིག་སྒྲིལ་གྱི་སྒོ་ནས་ལས་དོན་ལམ་ལྷོང་ཡོང་བ་བྱ་རྒྱུ།
བོད་ཀྱི་མི་རབས་གསར་བའི་མཐུན་ཚོགས།
སྤྱི་ལོ་ ༢༠༡༢ ལོའི་ཟླ་ ༩ ཚེས་ ༢༣ ཉིན།
