བོད་ནང་གི་ལས་འགུལ་གང་ཞིག་འཕྲལ་ཕུཊ་ལ་དགེ་ཕན་ཆེ་བར་མཐོང་གི་ཡོད།

ངྷ་རམ་ས་ལར་བོད་ནང་གི་ཛ་དྲག་གི་གནས་སྟངས་ཐོག་བོད་གཞུང་དམངས་གཉིས་ཀྱིས་གདོང་ལེན་གནང་ཕྱོགས་ཐོག་དམིགས་བསལ་ཚོགས་ཆེན་ཐེངས་གཉིས་པ་འཚོགས་འཆར་ལ། གྲོས་གཞིའི་ནང་དོན་ཐོག་ས་རཱ་མཐོ་སློབ་ཀྱི་འགན་འཛིན་དང་ངྷ་སྟེང་བོད་ཁྱིམ་སྤྱི་ཁྱབ་ཡིག་ཚང་གི་འགན་འཛིན་རྣམ་གཉིས་ལ་དགོངས་འཆར་དྲིས་ཡོད། 

ས་རཱ་མཐོ་སློབ་ཀྱི་འགན་འཛིན་འཇམ་དཔལ་གྲགས་པ་ལགས།

དྲི་བ། བོད་ནང་གི་ཛ་དྲག་གནས་སྟངས་ཐོག་བོད་གཞུང་དམངས་གཉིས་ཀྱིས་གདོང་ལེན་ཇི་ལྟར་གནང་དགོས།

ལན། རྒྱ་ནག་གཞུང་གིས་ད་ལྟའི་བོད་ནང་འཛིན་པའི་དྲག་པོའི་སྲིད་བྱུས་སོགས་ལ་འགྱུར་བ་མ་བཏང་བར་དུ།  བོད་ནང་རང་ལུས་མེར་བསྲེགས་གཏོང་བའི་ལས་འགུལ་སོགས་མཚམས་འཇོག་དཀའ་བ་མ་ཟད།  ལྔ་བཅུས་མི་ཚད་བརྒྱ་དང་།  བརྒྱ་ཡིས་མི་ཚད་སྟོང་ཡང་ཡོང་ངེས་ཡིན་པ་ཞིག་རེད་དྲན་གྱི་ཡོད། དེ་ལྟ་བའི་ཡིད་སྐྱོའི་གནས་ཚུལ་དེ་རིགས་རྒྱ་ནག་གཞུང་གིས་བོད་ལ་འཛིན་པའི་འཁྲེགས་འཛིན་སྲིད་བྱུས་ངན་པའི་མཇུག་འབྲས་རེད། དེར་བརྟེན་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཞག་ཐོག ཕྱོགས་གཉིས་ཀ་ནས་ཉིན་འགྱངས་ཞག་འགྱངས་སུ་མ་བཏང་བར་ཛ་དྲག་གི་ཐོག་ནས་བོད་རྒྱ་ཞི་མོལ་སླར་གསོ་ཡོང་ཐབས་ཐོག་འབད་བརྩོན་གནང་རྒྱུ་གལ་འགངས་ཆེ་ཤོས་སུ་མཐོང་གི་ཡོད། དེ་ནས་གཞུང་དམངས་ཡོངས་ནས་གཅིག་གྱུར་ཐོག གོ་རིམ་དང་འཆར་གཞི་ལྡན་པའི་ཐོག་ནས་ལས་འགུལ་གཅིག་མཇུག་གཉིས་མཐུད་སྤེལ་ཏེ་བོད་ནང་གི་ཛ་དྲག་གནས་སྟངས་ཞི་འཇགས་ཡོངས་ཐབས་དང་། བོད་ཕྱི་ནང་གཉིས་ཀྱི་གནས་ཚུལ་རྣམས་རྒྱལ་སྤྱིའི་ཐོག་ཏུ་འཁྱོལ་ཐུབ་པ་བྱ་རྒྱུ་སོགས་རེད་དྲན་ཡོད། 

དྲི་བ། དེ་སྔའི་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་དང་། ཐེངས་འདིའི་གྲོས་ཆོད་ཁག་ལག་བསྟར་བྱེད་ཕྱོགས་ཐད་དགོངས་ཚུལ་ག་རེ་ཡོད། 

ལན། སྤྱིར་བཏང་གོང་གི་ཚོགས་ཆེན་ཁག་གཉིས་ཚོགས་ཐུབ་པ་ཙམ་གྱིས་གཞུང་དམངས་བར་འབྲེལ་བ་དམ་ཟབ་དང་། ལྷག་པར་དུ་དབུས་བོད་མིའི་སྒྲིག་བཙུགས་དེ་༧གོང་ས་ཏཱ་ལའི་བླ་མའི་ཐུགས་རྗེ་ཉག་གཅིག་ལ་བརྟེན་ནས་དམངས་གཙོ་ཡང་དག་པ་ཞིག་ཏུ་གྱུར་ཐུབ་པར་ངེས་པ་བརྟན་དུ་ཕྱིན་ཡོད།  གྲོས་ཆོད་ཁག་གི་ནང་ནས་ཀྱང་བོད་མིའི་རྩ་དོན་དང་འབྲེལ་བའི་འཕྲལ་ཕུགས་རྒྱང་གསུམ་ལ་ཕན་ཐོགས་ཡོད་པ་དག་འཛིན་སྐྱོང་བཀའ་ཤག་གི་ངོས་ནས་གང་ལ་གང་འཚམ་ཕྱག་ལེན་བསྟར་གང་ཐུབ་གནང་ཡོད། འཚོགས་ལ་ཉེ་བའི་ཚོགས་ཆེན་ཐོག་གྲོས་ཆོད་མང་པོ་ཞིག་ཡོང་གི་ཡོད་པ་གསལ་པོ་ཡིན། འོན་ཀྱང་གཞུང་དམངས་གཉིས་ངོས་ནས་ཐུགས་ལ་འཇགས་དགོས་པ་ཞིག་ལ།  ༧གོང་ས་ཏཱ་ལའི་བླ་མས་ཡེ་ཤེས་དབྱིངས་དཔྱད་དང་།  འདས་པའི་མི་ལོ་དྲུག་ཅུ་ལྷག་འཛམ་གླིང་སྤྱི་དང་། ལྷག་པར་རྒྱ་དཀར་ནག་དང་། བོད་རྒྱའི་དཀའ་རྙོག་ནང་འཚར་ལོངས་བྱུང་བའི་ཉམས་མྱོང་སོགས་ལས་འོད་སྟོང་ལྡན་པའི་གཉིས་སྨན་དབུ་མའི་ལམ་ཞིག་གསལ་བཏོན་གནང་ཡོད་པ་དང་། རྒྱ་བོད་གཉིས་ཞི་གྲོས་ལམ་ནས་དཀའ་རྙོག་སེལ་ཐབས།  རང་སྲིད་རང་སྐྱོང་གི་དམིགས་ཡུལ་འཛིན་དགོས་པའི་ལམ་སྟོན་དེ་དག་ནི་བོད་མི་རིགས་རིག་གཞུང་དང་བཅས་པ་འཇིག་ལ་ཉེ་བའི་གནས་སྟངས་ལས་སྐྱོབ་ཐབས་ཀྱི་བླ་ན་མེད་པའི་ལམ་སྟོན་ཞིག་ཡིན་པར་ངོས་འཛིན་གསལ་པོ་ཐུབ་པའི་ཐོག  ང་ཚོ་བོད་མི་སྤྱི་བོ་གནམ་བསྟན་ཡོངས་ཙམ་དུ་མ་ཟད།  རྒྱ་ནག་གཞུང་དམངས་ཡོངས་ནས་ཀྱང་ངོས་འཛིན་གསལ་པོ་ཐུབ་པ་བྱེད་དགོས།  ཐུགས་དགོངས་ཇི་བཞིན་བསྒྲུབ་པར་དམིགས་བསལ་དགོངས་ཚུལ་གནང་ན་དེ་ནི་བསྔགས་འོས་ཀྱི་གནས་རེད། ཡིན་ནའང་འཕྲལ་ཕུགས་ཀྱི་ཁེ་ཉེན་གསལ་བོ་མ་རྟོགས་པར། ལྷག་བསམ་ཆེ་ཁུལ་གྱིས་རྣམ་དཔྱོད་ཀྱི་རྒྱབ་མ་འཁྱོག་ན་འཕྲལ་ལ་ངོ་མཚར་ཆེ་བ་ལྟ་བུར་སྣང་ཡང་།  ཕུགས་སུ་ཕན་ལས་གནོད་ཆེ་བ་ཡོང་ངེས་དང་།  དེ་ལས་ལྡོག་སྟེ་༧གོང་ས་ཏཱ་བླའི་བླ་མ་སྐུ་འཚོ་བཞུགས་སྐབས་བོད་རྒྱའི་དཀའ་རྙོག་སེལ་སླད་བོད་གཞུང་དམངས་ཀྱིས་འབད་བརྩོན་ལྷོད་མེད་གནང་དགོས་པ་ཙམ་མ་ཟད།  རྒྱ་ནག་གཞུང་ཕྱོགས་ནས་ཀྱང་གུ་ཡངས་བསམ་བློ་མ་བཏང་བར། སྡིག་པ་མིག་བཙུམ་གྱིས་དུས་འགྱངས་བྱས་ཚེ་ནམ་ཞིག བོད་མི་རྣམས་རྒྱ་ནག་གཞུང་དམངས་ལ་རེ་ཐག་ཆད་པའི་འུ་ཐུག་སྐབས། བོད་མི་རྣམས་སྐྱིད་པའི་ཉི་མ་ཤར་རྒྱུ་མིན་པ་སྨྲོས་མེད་ཐོག  རྒྱ་ནག་གཞུང་དམངས་ལའང་གནས་བཟོད་མི་བདེ་བའི་དཀའ་ངལ་རིམ་འཕྲད་དང་།  བོད་རྒྱའི་དཀའ་རྙོག་ཇེ་ཞན་ཇེ་སྡུག་ཏུ་འགྲོ་ངེས་ཡིན། གནས་ཚུལ་དེའི་འགན་ཚང་མ་རྒྱ་ནག་དམར་པོའི་མགོ་ཁྲིད་ཚོས་འཁྱེར་དགོས་པ་ཡིན།  དེར་བརྟེན་ཚོགས་བཅར་བ་རྣམས་པས་དོན་སྙིང་ལྡན་པའི་དགོངས་ཚུལ་དང་།  བོད་ཀྱི་དངོས་ཡོད་གནས་ཚུལ་ལ་བསམ་གཞིགས་མང་ཙམ་ཡོང་བའི་འབོད་སྐུལ་ཞུ་རྒྱུ་ཡིན། 

དྲི་བ། བོད་ནང་རང་ལུས་མེར་བསྲེག་མ་ཡིན་པའི་ལས་འགུལ་གཞན་མང་པོ་ཞིག་སྤེལ་གྱིན་ཡོད་པ་ལས།  གང་ཞིག་འཕྲལ་ཕུགས་བོད་པའི་རྩ་དོན་ཐོག་གལ་ཆེན་དུ་མཐོང་གི་ཡོད།

ལན། བོད་ཀྱི་བདེན་མཐའ་གསལ་ཕྱིར་གཅེས་པའི་རང་ལུས་ཀྱང་ཞུགས་ལ་བསྒྲོན་པའི་རྒྱལ་གཅེས་དཔའ་བོ་དཔའ་མོ་རྣམས་ལ་གུས་འདུད་ཞུ་བ་དང་ཆབས་ཅིག འཕྲལ་ཕུགས་ཀྱི་བོད་པའི་རྩ་དོན་ཐོག་གལ་ཆེ་ཆུང་ནི་ལས་འགུལ་གྱི་ངོ་བོ་མིན་པར་དམིགས་ཡུལ་འཛིན་སྟངས་ལ་རག་ལས་པ་ཞིག་ཡིན།  བོད་མི་རིགས་རིག་གཞུང་དང་བཅས་པ་འཇིག་ལ་ཉེ་བའི་གནས་སྟངས་འདི་ལས་མྱུར་སྐྱོབ་ཆེད་བརྩམས་པའི་ལས་འགུལ་གང་ཡིན་པ་དེ། འཕྲལ་ཕུགས་བོད་པའི་རྩ་དོན་ཐོག་ཕན་ཐོགས་ཆེ་ཤོད་ཀྱི་ལས་འགུལ་ཞིག་ལ་ངོས་འཛིན་བྱེད་ཀྱི་ཡོད། རྗེ་བཙུན་མི་ལས། ངས་ཉིན་མོ་བཙལ་ནས་མ་བརྙེད་པ་ཞིག ཁྱེད་ཀྱིས་མཚན་མོ་བཙལ་ནས་བརྙེད་ཐབས་མེད་ཅེས་གསུངས་པ་བཞིན།  ༧གོང་ས་ཏཱ་ལའི་བླ་མའི་བླ་ན་མེད་པའི་ལམ་སྟོན་གནང་བ་བཞིན། ཆོལ་གསུམ་བོད་མི་ཡོངས་ལ་རང་སྲིད་རང་སྐྱོང་ཚད་ལྡན་ཞིག་མགྱོགས་ནས་མྱུར་དུ་རགས་ཐབས་སུ།  གཉིས་སྨན་དབུ་མའི་ལམ་ནས་བོད་རྒྱ་ཞི་གྲོས་ཀྱིས་དཀའ་རྙོག་སེལ་ཐབས་ཀྱི་ཐབས་ལམ་ནི་ཡག་ཤོས་ཡིན་པར་གཞིས་བྱེས་བོད་མི་ཡོངས་ནས་ངོས་འཛིན་གསལ་པོ་ཐུབ་པར་བྱས་ཏེ།  ལས་འགུལ་ཆེ་འབྲིང་ཆུང་གསུམ་གང་ཞིག་སྤེལ་ཡང་ཆར་པ་ཆུ་གྲོགས་སུ་འགྲོ་བར་གཞུང་དམངས་གཉིས་ཀྱིས་ནུས་ཤུགས་གཅིག་སྒྲིལ་གྱིས་འབད་བརྩོན་ལྷོད་མེད་གནང་དགོས་པ་ནི།  འཕྲལ་ཕུགས་ཀྱི་བོད་པའི་རྩ་དོན་ཐོག་ཕན་ཐོགས་ཆེ་ཤོས་ཤིག་ཏུ་མཐོང་གི་ཡོད།

ངྷ་སྟེང་བོད་ཁྱིམ་སྤྱི་ཁྱབ་ཡིག་ཚང་གི་འགན་འཛིན་ཚེ་དབང་ཡེ་ཤེས་ལགས།

དྲི་བ། བོད་ནང་གི་ཛ་དྲག་གནས་སྟངས་ཐོག་བོད་གཞུང་དམངས་གཉིས་ཀྱིས་གདོང་ལེན་ཇི་ལྟར་གནང་དགོས།

ལན། སྤྱིར་གནས་ཚུལ་འདིའི་ཐོག་ཐབས་ལམ་བྱེད་སྒོ་མང་པོ་ཡོད་ཀྱང་། ང་རང་སྒེར་གྱིས་སེམས་ལ་དྲན་ཚོད་ཅིག་ཞུས་པ་ཡིན་ན། ཀ༽གཞིས་བྱེས་གཉིས་ཀྱི་གོང་བུའི་ཆིག་སྒྲིལ་གྱི་ནུས་པ་གོང་འཕེལ་གནས་ཐུབ་ཐབས་ལ་ཐུགས་སྣང་རྒྱུན་པར་དགོས་པ། ཁ༽འཛམ་གླིང་སྤྱི་དང༌བྲེ་བྲག་རྒྱ་མི་རིགས་རྣམས་ལ་བོད་མི་རིགས་ཀྱི་ལོ་རྒྱུས་དང༌། བཙན་བྱོལ་གཞུང་གི་ཆབ་སྲིད་ཀྱི་ལྟ་གྲུབ་སོགས་གསལ་རྟོགས་ཐུབ་ཐབས་སུ་གཞུང་མང་གཉིས་ཕྱོགས་ནས་དེ་མཚུངས་ཀྱི་ཐབས་བྱུས་ཀྱི་སྒོ་ནས་ལས་འཆར་དམིགས་བསལ་སྤེལ་གལ། ག༽རིག་གཞུང་མི་ཉམས་རྒྱུན་འཛིན་བྱ་རྒྱུ་དེ་ནི་བྱེད་སྒོའི་ནང་ནས་ཀྱང་གལ་འགངས་ཆེ་ཤོས་ལ་བརྟེན། སྤྱི་སྒེར་ཡོངས་ནས་ཐུགས་སྣང་མ་དོར་བར་མུ་མཐུད་ནུས་ཤུགས་འདོན་སྤེལ་ཞུ་རྒྱུ། 

དྲི་བ། རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་སྐབས་ཀྱི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་ཐོག་གཟིགས་ཚུལ་གང་འདྲ་ཡོད།

ལན། སྤྱིར་དམངས་གཙོའི་གཞུང་ཞིག་དང༌། དེ་ཡང་སྐྱབས་བཅོལ་གྱི་གནས་སྟངས་སུ་གྱར་བའི་སྐབས་སུ། སྤྱིར་ཆབ་སྲིད་ཀྱི་ལངས་ཕྱོགས་མང་ཚོགས་ནས་གོ་རྟོགས་ཐུབ་ཆེད་དང༌། མང་ཚོགས་ཀྱི་བསམ་ཚུལ་དབུ་ཁྲིད་རྣམ་པའི་ཐོག་ནས་མཁྱེན་ཆུབ་ཡོང་ཆེད་ཀྱི་དགོངས་དོན་ལྟར་ཕན་རླབས་ཆེན་པོ་བྱུང་ཡོད་པར་ངོས་འཛིན་ཞུ་བཞིན་ཡོད། དགོངས་ཚུལ་བྱུང་བའི་ཡིག་ཆའི་ནང་ནས་ཕྱག་བཞེས་མཛད་ཐབས་གྱུར་མིན་སྣ་ཚོགས་ཡོད་ངེས་ཀྱང༌། མང་ཚོགས་ཀྱི་བསམ་ཚུལ་བསྡུ་བཞེས་གནང་བའི་ཡིག་ཆ་དེ་བཞིན་དཔྱད་གཞིའི་ཡིག་ཆ་གལ་ཆེན་ཞིག་ཆགས་ཡོད་ངེས། 

དྲི་བ། ཐེངས་འདིའི་ཚོགས་ཆེན་སྐབས་གྲོས་ཆོད་མང་པོ་ཡོང་གི་རེད། དེ་དག་ལག་བསྟར་བྱེད་ཕྱོགས་ཐོག་དགོངས་ཚུལ་ག་རེ་ཡོད།

ལན། བོད་མི་རིགས་སྤྱི་དང༌ལྷག་པར་བོད་ནང་རྒྱ་དམར་གཞུང་ནས་གཞིས་ལུས་སྤུན་ཟླ་རྣམ་པའི་ཐོག་འགྲོ་བ་མིའི་བྱ་སྤྱོད་ལས་འདས་པའི་ལུས་སེམས་འཚོ་གནས་མ་ཐུབ་པའི་དཀའ་སྡུག་སྤྱི་དང༌། བོད་མི་ཡོངས་ཀྱི་བླ་ན་མ་མཆིས་པའི་ཆོས་སྲིད་གཉིས་ཀྱི་དབུ་ཁྲིད། འདི་ཕྱིའི་མགོན་སྐྱབས་འཛམ་གླིང་ཞི་བདེའི་དེད་དཔོན་རྒྱལ་དབང་བསྟན་འཛིན་རྒྱ་མཚོ་མཆོག་གི་སྐུ་པར་ཙམ་ཡང་ཉར་མ་ཆོག་པའི་བཙན་བཀའ་བཏང་བ་            སོགས་བོད་མི་རིགས་ལ་འདི་ལས་ལྷག་པའི་སེམས་སྡུག་ཡོང་གཞི་མེད་པའི་གནས་སྟངས་འོག་བཟོད་ཐབས་བྲལ་ནས། དེ་སྔའི་བྱ་སྤྱོད་མཚམས་འཇོག་དགོས་པའི་ཞུ་འབོད་ལྟ་བུའི་སླད་དུ། རྒྱལ་གཅེས་དཔའ་བོ་དཔའ་མོ་རྣམས་ནས་གཅེས་པའི་ལུས་སྲོག་མཆོད་མེར་ཕུལ་བའི་གནས་ཚུལ་བྱུང་བ་ཙམ་དུ་མ་ཟད། ཁོང་རྣམ་པའི་རེ་འབོད་བཞིན། དཀའ་སྡུག་དེ་དག་ལས་བྲལ་ཐབས་དང༌། ྋགོང་ས་སྐྱབས་མགོན་ཆེན་པོ་མཆོག་བོད་ལ་གདན་ཞུ་ཐུབ་ཐབས་ཞུ་རྒྱུའི་ལས་འགན་རང་དབང་ལུང་པའི་ནང་ཡོད་པའི་བོད་མི་ཡོད་དོ་ཅོག་ལ་ཡོད་པ་བཞིན་འགྲུབ་ཐབས་སོགས་གྲོས་ཆོད་གང་བྱུང་ལ་རང་རེ་ཚང་མས་ནུས་པ་འདོན་གལ་ཞུ་རྒྱུ་ཡིན། 

དྲི་བ། ལོ་ལྔ་ཕྱིར་བོད་ནས་བཙན་བྱོལ་དུ་ཡོང་མཁན་ཇེ་ཉུང་དང༌། ཕྱིར་བོད་ནང་ལོག་མཁན་ཇེ་མང་དུ་འགྲོ་བཞིན་པའི་ཐད་བསམ་ཚུལ་ག་རེ་ཡོད།

ལན། དང་པོ། བཙན་བྱོལ་དུ་ཡོང་མཁན་ཉུང་དུ་ཕྱིན་པ་དེ་ནི་ས་མཚམས་ཁག་ནས་བཀག་འགོག་ཤུགས་ཆེན་བྱས་པའི་དབང་གིས་བྱུང་བ་དང་། འཛིན་བཟུང་བྱས་པ་དག་ལ་སྡུག་སྦྱོང་མནར་གཅོད་ཚད་མེད་བཏང་བ་སོགས་ལས་བྱུང་བ་ཞིག་ཏུ་ངོས་འཛིན་བྱེད་ཀྱི་ཡོད། གཉིས་པ། ཕྱིར་ལོག་བྱེད་མཁན་རྣམས་ཀྱང་ཕྱིར་ལོག་མི་བྱ་ཐབས་མེད་ཀྱི་གནས་ཚུལ་སྐྱོ་བོ་ཞིག་གི་འོག་ནས་ལོག་གི་ཡོད། རྩ་བའི་འགྲོ་འོང་གཉིས་ཀ་ཡོང་སྲིད་པ་ཞིག་ཡིན་རུང༌། དོན་སྙིང་རང་དབང་གི་ཐོག་ནས་ཐག་གཅོད་ལག་བསྟར་བྱ་རྒྱུའི་གོ་སྐབས་ཇི་བཞིན་མེད་པ་དེ་དང༌། ལྷག་པར་ཤེས་ཡོན་སློབ་སྦྱོང་གི་སྐབས་སུ་ཡུལ་གང་དུ་བྱེད་དང༌། སློབ་སྦྱོང་གང་བྱེད་སོགས་ཕ་མ་བུ་ཕྲུག་ལ་རང་དབང་དགོས་པ་བཞིན་མེད་པ་བཅས་ནི་བློ་ཕམ་གྱི་གནས་ཚུལ་ཞིག་རེད་སྙམ།

གསར་འགོད་པ། བནྟེ་སྐྱབས།

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽