ཆབ་སྲིད་ཀྱི་བཙོན་ཟུར་མདོ་ཁམས་སོག་རྫོང་རོང་པོ་རྒན་ཐུབ་བསྟན་མཐར་ཕྱིན་མཆོག་དགུང་གྲངས་ ༧༦ ཐོག་ ༢༠༡༢ ཟླ་ ༩པའི་ཚེས་ ༡༤ ཉིན་ཞོགས་པ་ཆུ་ཚོད་ ༦ དང་སྐར་མ་ ༢༥ ཙམ་ལ་གཞུགས་སྒར་དུ་སྤུན་མཆེད་ཀྱི་ནང་དུ་དགོངས་པ་རྫོགས་འདུག དམ་པ་དེ་ཉིད་ནི་སྤྱི་ལོ ༡༩༣༦ མདོ་ཁམས་སོག་རྫོང་རོང་པོ་བླ་མདའ་ཐང་དུ་ཞིང་པ་དབུལ་པོའི་ཁྱིམ་ཚང་ཞིག་ལ་སྐྱེས།
རང་ལོ་ ༡༣ སྟེང་ལ་རོང་པོ་རབ་བརྟན་དགོན་དུ་ཆོས་ཞུགས་བྱས་ཏེ་དགོན་པའི་ལས་སྣེ་གང་སར་འབད་པ་ལྷོད་མེད་གནང་འདུག རྒྱ་དམར་གྱིས་བོད་ས་ཡོངས་རྫོགས་བཙན་གཟུང་སྐབས་སུ་དམ་པ་དེ་ཉིད་ཀྱང་རྒྱ་དམར་ལ་ཕར་རྒོལ་གཡུལ་སར་ཞུགས་ཏེ་ལོ་ངོ་བཞིའི་རིང་ལ་རྒོལ་འཛིང་སྣ་ཚོགས་ཀྱི་རྒྱ་དམར་ལ་ཁ་གཏད་བྱས་མཐའ་ ༡༩༦༢ ལོར་རྒྱ་མིས་འཛིན་བཟུང་བྱས་ནས་ལོ་ངོ་ ༡༤ རིང་ལ་སྡུག་སྦྱོང་མནར་གཅོད་ཚད་ལས་རྒལ་བ་བཏང་མཐར་ཕྱི་ལོ་ ༡༩༧༦ ལོར་གློད་གྲོལ་ཐོབ་ནའང་སྔར་བཞིན་ཞྭ་མོ་གཡོགས། མདོར་ན་མི་ལོ་ཧྲིལ་པོ་ ༡༤ རིང་ལ་བཙོན་འོག་དུ་དམྱལ་བ་མི་ཡུལ་དུ་ལྷུང་པ་ལྟར་བུ་མྱངས་འདུག ༡༩༨༠ ལོར་ཞྭ་མོ་ཕུད་རྗེས་མི་མང་མཉམ་དུ་འདྲིས་གཤིབས་བྱེད་ཆོག་པ་བྱུང་འདུག རོང་པོ་རབ་བརྟན་དགོན་དགའ་ལྡན་རབ་བརྟན་གླིང་དེ་སྔོན་རྒྱ་མིས་ཤུལ་ཙམ་མེད་པར་རྩ་གཏོར་བཏང་ཡོད་ཀྱང་༡༩༨༢ ལོར་དམ་པ་དེ་ཉིད་དང་གཞན་ཁ་གཅིག་གིས་ལས་འགན་ཁུར་ཏེ་འདུ་ཁང་དང་སྐུ་གསུང་ཐུགས་རྟེན་སོགས་གསར་བཞེངས་གི་ལས་གཞི་འགོ་འཛུགས་བྱས་ཏེ་དུས་ཡུན་ལོ་ངོ་བརྒྱད་ཀྱི་རིང་ལ་འབད་པ་ལྷོད་མེད་གནང་རྗེས་ ༡༩༩༠ ཐམ་པ་ལོར་ལེགས་གྲུབ་བྱུང་བ་སོགས་རོང་པོ་སྡེ་དགོན་གཉིས་ལ་མཛད་རྗེས་ཅན་གྱི་མི་སྣ་གལ་ཆེན་ཞིག་ཆགས་འདུག
༡༩༩༢ ལོར་བཙན་བྱོལ་དུ་འབྱོར་ཏེ་མི་ལོ་དུ་མར་སྙིང་དབུས་སུ་བཅང་པའི་རེ་དོན་འདི་ཕྱི་གཉིས་ཀྱི་སྐྱབས་གནས་༧གོང་ས་ཡིད་བཞིན་ནོར་བུ་མཆོག་གི་གཟིམས་ཆུང་ནང་དམིགས་བསལ་མཇལ་ཁ་ཐོབ་པ་མ་ཟད་བསྟན་སྲུང་དཔའ་བོ་ཇི་སྙེད་ཅིག་རྒྱ་དམར་གྱི་མཚོན་འོག་དུ་འདས་གྲོངས་སུ་ཕྱིན་པ་རྣམས་ཀྱི་མཚན་ཐོ་དང་བསྔོ་སྨོན་སྐྱབས་འཇུག་མགོན་པོ་གང་ལ་ཞུ་རྒྱུའི་གོ་སྐབས་ཐོབ། སྐབས་དེར་བོད་དུ་ཕྱིར་ལོག་དགོས་མིན་ཞུ་སྐབས་༧གོང་ས་མཆོག་གིས་སྒྲིབ་བྲལ་ཡེ་ཤེས་ཀྱིས་དབྱིངས་དཔྱད་གནང་ཏེ་འདིར་བཞུགས་ན་ལེགས་པའི་བཀའ་གསུང་ཕེབས་པ་ལྟར་སྒོ་གསུམ་ཅི་ལྕོགས་ཀྱིས་མགོན་པོ་གང་གི་བཀའ་གསུང་ཅི་བསྒྲུབ་ཀྱིས་མཆོད་པ་འབུལ་བར་བགྱིས་པས་དམ་ཚིག་གཙང་མའི་རྟེན་འབྲེལ་གྱིས་དམ་པ་དེ་ཉིད་མ་གྲོངས་གོང་ཙམ་ལ་སླར་ཡང་མཇལ་ཁ་དང་ཡར་ཞུ་མར་གནང་ཀྱི་སྐལ་བ་བཟང་པོ་ཐོབ་འདུག་པ་བཅས་ལོ་རྒྱུས་མདོར་བསྡུས་སུ།
