དེ་རིང་ཕྱི་ཚེས་ ༢༨ ཉིན་རྒྱ་ནག་ཆབ་སྲིད་ལྷན་ཁང་གིས་ཚོགས་འདུ་ཚོགས་ཏེ། ཕྱི་ཟླ་ ༡༡ ཚེས་ ༡ ཉིན་རྒྱ་ནག་དམར་ཤོག་སྐབས་བཅུ་བདུན་པའི་ཚོགས་འདུ་ཐེངས་བདུན་པ་འཚོགས་རྒྱུ་དང་། ཕྱི་ཟླ་ ༡༡ ཚེས་ ༨ ཉིན་རྒྱ་ནག་དམར་ཤོག་འཐུས་མིའི་ཚོགས་ཆེན་ཐེངས་ ༡༨ པ་འཚོགས་རྒྱུ་གཏན་འབེབ་དང་། རྒྱ་གཞུང་སྲིད་འཛིན་ཧུའུ་ཅིན་ཐའོ་ཡིས་ཚོགས་འདུ་གཙོ་སྐྱོང་བྱ་རྒྱུ་ཡིན་པ་བསྒྲགས་འདུག
རྒྱ་གཞུང་ཞིན་ཧྭ་གསར་ཁང་གིས་སྤེལ་བའི་གནས་ཚུལ་ནང་། རྒྱ་གཞུང་དམར་ཤོག་ཚོགས་ཆེན་ ༡༨ པའི་ཐོག སྐབས་རྗེས་མའི་རྒྱ་གཞུང་ཆབ་སྲིད་ལྷན་ཁང་གི་འཐུས་མི་དང་རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་འཐུས་མི་བཅས་འདེམས་སྒྲིག་བྱ་རྒྱུ་ཡིན་པ་དང་། རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་ངོས་ནས། ཚོགས་ཆེན་ ༡༨ པའི་ལས་དོན་སྙན་ཐོ་རྣམས་སྐབས་བཅུ་བདུན་པའི་ཚོགས་འདུ་ཐེངས་ ༧ ཐོག་སྤྲད་དེ་ཚོགས་ཐོག་ཏུ་བགྲོ་གླེང་བྱ་རྒྱུ་ཡིན་སྐོར་དང་། ཚོགས་ཆེན་ ༡༨ པ་དེ་ནི་འབྱོར་འབྲིང་སྤྱི་ཚོགས་འཛུགས་སྐྲུན་གྱི་གནད་འགག་དུས་སྐབས་དང་། བཅོས་སྒྱུར་སྒོ་འབྱེད་གཏིང་ཟབ་དང་དཔལ་འབྱོར་ཡར་རྒྱས་གཏོང་ཕྱོགས་མགྱོགས་མྱུར་བཅོས་སྒྱུར་བྱེད་པའི་འགག་འཕྲེང་གི་དུས་སྐབས་ཤིག་ལ་ཚོགས་པའི་ཧ་ཅང་གལ་གནད་ཅན་གྱི་ཚོགས་ཆེན་ཞིག་ཆགས་ཡོད་པ་བརྗོད་འདུག
དེ་བཞིན། ཐེངས་འདིའི་རྒྱ་གཞུང་ཆབ་སྲིད་ལྷན་ཁང་གི་ཚོགས་འདུའི་ཐོག རྒྱ་གཞུང་དབུས་དམར་ཤོག་སྒྲིག་འཛུགས་ཞིབ་བཤེར་ལྷན་ཁང་གི་༼པའོ་ཞི་ལའེ་ཡི་ཚབས་ཆེ་བའི་རྩ་འཛུགས་སྒྲིག་འགལ་གྱི་གྱོད་དོན་ཞིབ་བཤེར་སྙན་ཐོ༽ ལག་བསྟར་བྱ་རྒྱུ་ཆོག་མཆན་སྤྲད་ཡོད་པ་མ་ཟད། པའོ་ཞི་ལའེ་ཡི་དམར་ཤོག་ཚོགས་མི་དང་གཞུང་གི་ལས་གནས་གཉིས་ཕྱིར་བསྡུ་བྱས་ཡོད་པ་དང་། པའོ་ཞི་ལའེ་ཡི་ནག་ཉེས་རྣམས་ཁྲིམས་ཐོག་ནས་ཐག་གཅོད་བྱ་རྒྱུ་ཡིན་པ་བསྒྲགས་ཡོད་པ་མ་ཟད། “རྒྱ་ནག་དབུས་གཞུང་གི་ངོས་ནས། རྒྱ་ནག་རྒྱལ་ཡོངས་དམར་ཤོག་པ་དང་རྒྱལ་ཡོངས་རིགས་སོ་སོའི་མི་དམངས་ཀྱིས། བློ་མཐུན་ཧུའུ་ཅིན་ཐའོ་སྤྱི་ཁྱབ་དྲུང་ཆེ་ཡིན་པའི་རྒྱ་དམར་དབུས་གཞུང་གི་མཐའ་འཁོར་དུ། མཐུན་ལམ་རྡོག་རྩ་ཆིག་སྒྲིལ་བྱེད་དགོས་པའི་འབོད་སྐུལ་ཞུ། ” ཅེས་བཀོད་འདུག
ད་ཐེངས་རྒྱ་ནག་གི་ཚོགས་ཆེན་ཐེངས་བཅོ་བརྒྱད་པ་འཚོགས་སྐབས་དཔོན་རིགས་ཕན་ཚུན་བར་འགལ་རྐྱེན་ཡོང་རྒྱུ་ནི་གཏན་ཁེལ་རེད་བསམ་གྱི་ཡོད། ད་ཐེངས་ད་ལྟད་མོ་འདུག
གསལ་བསྒྲགས་མ་དག་རྒྱུ་འབྱམས་ལས། །
ད་ནས་གསལ་སྒྲག་རྒྱུན་འཇགས་དགོས། །
ཡང་ན་གསལ་སྒྲོག་བྲིས་ཀྱང་དག །
ཏང་གི་ཚོགས་ཆེན་བཅོ་བརྒྱད་ཨ་ཡིན་ནམ། །
ཏང་གི་ཛབ་ཆེན་བཅོ་བརྒྱད་ཚོགས་འདུས་རེད། །
ཏང་གི་ནང་གི་ངན་པ་དགུ་འཛོམས་དང་། །
ཏང་གི་ཕྱི་ཡི་ངན་པ་དགུ་འཛོམས་འཚོགས། །
ངན་པ་དགུ་འཇོམས་གཉིས་ཀྱི་འདུ་འཛོམས་འདི། །
ད་གཟོད་མགྱོགས་ནས་མྱུར་དུ་མཚམས་ཆད་ཤོག །
གང་ལྟར་ད་ཐེངས་ཀྱི་ཚོགས་ཆེན་ཐེངས་བཅོ་བརྒྱད་པ་འཇིགས་སྣང་གི་ངང་འཚོགས་རྒྱུ་ཡིན་པ་གཏན་ཁེལ་ཚར་འདུག རྒྱ་ནག་གི་འགོ་འཁྲིད་མང་པོ་ཞིག་གིས་སེམས་འཚབ་བྱེད་བཞིན་ཡོད་པ་གསལ་བོ་རེད། ཕྱིར་འགྱིངས་དང་ཕྱིར་འགྱིངས་བྱས་པ་དེ་ལ་རྒྱུ་མཚན་ངེས་ཅན་ཞིག་ཡོད་པ་ཤ་རྟག་རེད་བསམ་གྱི་ཡོད།
ད་ཐེངས་ཀྱི་ཚོགས་ཆེན་དེར་བོད་རང་སྐྱོང་ལྗོངས་ཀྱི་ཚོགས་མི་ ༢༨ ཙམ་མཉམ་ཞུགས་བྱ་རྒྱུ་རེད། དེ་དག་ཁྲོད་ཀྱི་མི་ ༢༧ ཙམ་བོད་རིགས་ཡིན་ཚོད་འདུག གཞན་པ་གཅིག་དེ་ད་ལྟའི་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ཡིན་རྒྱུ་རེད།