བློ་གྲོས་རབ་བརྟན།
འདས་པའི་ལོ་འགའི་རིང་མི་རྣམས་ཀྱིས་རྔ་པ་ལ་དོ་སྣང་བསླེབས་ཡོད། དེ་ནི་རྔ་པ་ནས་མགོ་བཙུགས་ཏེ་བོད་དུ་རྒྱ་གཞུང་གི་སྲིད་ཇུས་ལ་རང་བསྲེགས་ཀྱི་ངོ་རྒོལ་བྱས་ཏེ། ད་བར་མི་གྲངས་ ༥༢ དང་། དེའི་ནང་ནས་ཕལ་མོ་ཆེ་རྔ་པ་ནས་བྱུང་བས་རེད།
ངའི་ཁྱིམ་མི་གཉེན་འབྲེལ་དང་གྲོགས་བཟང་དག་རྔ་པ་རྫོང་དུ་ཡོད། དེའི་རྐྱེན་གྱིས་གོ་སྐབས་ནམ་བྱུང་དང་། ཁ་པར་མཐུན་ཐུབ་པ་བྱུང་ན་ཁོང་ཚོར་སྐད་ཆ་བཤད་རྐྱང་ཡིན། སྐད་ཆ་འདྲ་མིན་ཁྲོད་ནས་ངའི་གྲོགས་ཤེས་ཡོན་ཅན་ཞིག་གིས། སྔོན་མ་ཡིན་ན་རྒྱ་མིའི་ཉེན་རྟོག་པ་ཟེར་ན་མི་ཚང་མ་སྐྲག་ས་ཞིག་རེད། ད་ལྟར་མཚོན་ན་ཁྱོད་ཡིན་ན་ང་ཡིན་རེད། ཚུར་གཅིག་བཤད་ན་ཕར་གཅིག་ཤོད་ཀྱིན་འདུག ཚུར་རྣམ་འགྱུར་བསྟན་ན་ཕར་རྣམ་འགྱུར་སྟོན་བཞིན་འདུག བོད་མི་ཚོའི་ངོས་ནས་སྐྲག་སྣང་ཚང་མ་རྫོགས་ཚར་འདུག་ལ། ཅི་ཞིག་བྱེད་དགོས་ན་བྱེད་རྐྱང་རེད་ཟེར། ངས་སྐད་ཆ་བཤད་ས་ནི་རྔ་རྫོང་གི་མི་རེད་ལ། ཁོ་ད་ལྟ་རྔ་རྫོང་ན་འཚོ་བཞིན་ཡོད་ཅིང་། ད་ལྟའི་རྔ་རྫོང་གི་བྲོ་བ་མྱོང་བཞིན་ཡོད། རྒྱ་བོད་གཉིས་ཀྱི་རྣམ་འགྱུར་མཐོང་བཞིན་ཡོད། རྔ་རྫོང་མི་དམངས་ཀྱི་སེམས་པ་ཤེས་ནས་ཡོད། འདི་ལ་ཆ་འཇོག་གི་རིན་ཐང་ཡོད་ལ། འདིས་ང་ལ་རྔ་པ་རྫོང་གི་འགྱུར་ལྡོག་ཅིག་ཤེས་བཅུག་སོང་།
ང་རང་ཉིད་རྔ་པ་རྫོང་དུ་ལོ་ཉི་ཤུར་བསྡད་མྱོང་ལ། བོད་མི་ཚོར་མཚོན་ན། ས་གནས་རྒྱ་གཞུང་དང་། ཉེན་རྟོག་པ། དམག་མི་བཅས་ནི་ཞེ་སྣང་བྱེད་ས་ཞིག་ལས་བདེ་སྡུག་ཞུ་ས་ཞིག་མིན། དོན་མེད་ལ་ཁོང་ཚོས་བརྙས་བཅོས་བྱེད་མི་ཡོང་ངམ་སྙམ་ནས་སྡོད་དགོས། ད་ལྟའི་ཆར་གནས་སྟངས་དེ་རྦད་དེ་འགྱུར་འདུག་པ་འདི་རེད། དང་པོ་ཞེ་སྣང་བྱེད་ཡུལ་དེར་ད་ལྟ་བོད་མི་ཚོ་ཁ་གཏད་དུ་ལངས་བཞིན་འདུག འདི་ནི་བོད་མི་ཚོའི་སེམས་ཀྱི་འགྱུར་ལྡོག་ཅིག་རེད། འདིའི་བྱུང་རྐྱེན་ཅི་རེད། ཡོང་སྟངས་ག་འདྲ་རེད། བསམ་བློ་མང་དུ་གཏོང་དགོས་འདུག
ངོ་མ་བཤད་ན། བོད་ཀྱི་བདག་པོ་བོད་མི་ལས་རྒྱ་མི་མ་རེད། འོན་ཀྱང་རྒྱ་དམར་གྱིས་བོད་དབང་སྒྱུར་བྱས་ནས་བཟུང་། བོད་ས་ན་བོད་མི་ཚོ་འཚོ་ཐབས་དཀའ་བ། བོད་མིའི་ངོ་རྟགས་རེ་རེ་བཞིན་ཉམས་བཞིན་པ། ད་དུང་མཐོང་ཆུང་དང་མི་རིགས་དབྱེ་འབྱེད་ཀྱིས་བོད་མི་ཚོ་ཕྱོགས་ཡོངས་ནས་བསྡམས་ཡོང་དུས། བོད་མི་ཚོའི་སེམས་ན་འདྲི་བ་མང་པོ་རང་ཤུགས་ཀྱིས་བསླེབས་ཡོད། འདྲི་བ་དེ་དག་གིས་འདས་པའི་ལོ་རྒྱུས་ལ་ཕྱིར་མིག་དང་། རྒྱལ་སྤྱིའི་སྤྱི་ཚོགས་ཀྱི་གནས་བབ་ལའང་རང་ཤུགས་ཀྱིས་དོ་སྣང་དྲངས་ཡོད། ལྷག་ཏུ་རྒྱ་གཞུང་གིས་སྔ་ཕྱི་བར་གསུམ་དུ་བོད་མིའི་ཐོག་གང་བྱས་ལ་དངོས་འཛིན་ཐོབ་བཅུག་ཡོད། ངོས་འཇིན་དེའི་ཁྲོད་དུ་བོད་མི་ཚོ་མིའི་གྲལ་དུ་ཚུད་མེད་པ་དེ་རེད། བོད་མི་ཚོ་ཡང་མིའི་རིགས་སྤྱི་མཚུངས་བཞིན། རང་ལ་ཐོབ་དགོས་པ་དང་རག་དགོས་པ། དབང་དགོས་པ་གང་ཡོད་པ་དག་དགོས་ཀྱི་ཡོད། དེའི་ཆེད་དུ་བོད་མི་ཚོ་ལངས་ཡོང་བ་རེད། དེའི་ཆེད་དུ་དཔའ་སྙིང་རྫོགས་པ་རེད། དེའི་ཆེད་དུ་ཡོངས་སུ་བློས་གཏོང་ཐུབ་ཀྱིན་ཡོད། འདི་ནི་བོད་དུ་བོད་མི་ཚོ་རྒྱལ་སྤྱིའི་རྣམ་པའི་གོ་རྟོགས་ཤིག་སད་པ་རེད་ལ། དེ་ནི་ཐོབ་ཐང་གཅིག་མཚུངས་འོག་འདྲ་མཉམ་གྱིས་འཚོ་བའི་དེང་གི་དཔལ་ཡོན་ལ་ཕྱོགས་པ་རེད།
རྒྱ་གཞུང་གིས་དུས་རབས་སྔོན་མའི་ལོ་རབས་དྲུག་ཅུ་དང་བདུན་ཅུའི་སྐབས་ཀྱི་བོད་ཐོག་ལྟ་སྟངས་དེ་ད་དུང་ཡང་བཟུང་ཡོད་ལ། བོད་མི་ཚོར་མགོ་སྐོར་དང་དོན་དངོས་གམ་སྟེ་གནས་ཚུལ་ངོ་མ་ཤེས་མ་བཅུག་པ། གནད་དོན་བྱུང་ཚད་ལ་དབང་ཡོད་ཁོ་ནས་ཐག་གཅོད་བྱེད་ཀྱིན་ཡོད། འོན་ཏེ་བོད་མི་ཚོ་མི་ཐོག་བརྗེ་བོ་བརྒྱབ་ཚར་བ་རེད་ལ། དེ་སྔའི་བོད་མི་དང་བསྡུར་ན་ད་ལྟའི་བོད་མི་ཚོ་སྤྱང་གྲུང་ལྡན་ལ། རྒྱལ་སྤྱིའི་རྣམ་པའི་གོ་རྟོགས་ཡག་ཏུ་ཕྱིན་ཡོད་པས། རྒྱ་གཞུང་གིས་བོད་ཐོག་ལས་དོན་ཅི་ཞིག་སྤེལ་ནའང་། དེ་སྔ་ནང་བཞིན་ལས་སླ་བོ་མེད་ལ་བོད་དུ་གནད་དོན་ཞིག་བྱུང་ན། བོད་མི་ཚོའི་གོ་བ་རྒྱ་གཞུང་གིས་བ?ད་པ་གཅིག་པུ་མ་རེད། ཕྱི་ལོགས་ནས་ཀྱང་སྐད་སྒྲ་མང་པོ་གོ་བཞིན་ཡོད་ལ། དོན་དངོས་ཅི་ཡིན་དང་རྒྱ་གཞུང་གིས་ཅི་ཞིག་བྱེད་བཞིན་ཡོད་པ་བོད་མི་ཚོས་ཤེས་ཀྱིན་ཡོད། དེས་རྒྱ་གཞུང་གིས་བོད་ཐོག་སྤེལ་བའི་ལས་དོན་ཡོངས་སུ་ཕམ་ཁའི་གནས་སུ་སྐྱེལ་བཞིན་ཡོད་ཅིང་། བོད་མི་ཚོ་བདེན་པ་དང་དོན་དངོས་ལ་ངང་གིས་ཕྱོགས་ཀྱིན་ཡོད།
བོད་མི་ཚོ་བོད་ས་ན་གནས་དགོས་ལ། བོད་མི་ཚོ་རང་ལ་དཔག་པའི་ཁོར་ཡུག་ཅིག་དགོས་ཀྱི་ཡོད་ཅིང་། རྒྱ་རིགས་ཚོ་ནང་བཞིན་རང་གི་མི་རིགས་དང་རིག་གཞུང་ལ་དགའ་ཞེན་དང་། དེར་བདག་པོར་རྒྱག་རྒྱུར་གོ་སྐབས་དགོས། དེ་མེད་ན་བོད་མི་ཚོ་ཡོངས་སུ་ཤི་བ་དང་གཅིག་པ་རེད། རྒྱ་གཞུང་གིས་བོད་ཐོག་བཟུང་བའི་ད་ལྟའི་སྲིད་ཇུས་དེའི་འོག་ན། བོད་མི་ཚོར་གསོན་ལམ་ཞིག་མེད་ཅིང་། འཆི་ལམ་དེ་ཡང་བོད་མིའི་ཐོག་ཧ་ཅང་གི་ཐག་ཉེ་བོར་སླེབས་ཀྱིན་ཡོད། དེར་བརྟེན་བོད་མི་ཚོས་རང་བསྲེགས་ཀྱི་ཞི་རྒོལ་འདི་མགོ་བརྩམས་པ་རེད།
རྒྱ་གཞུང་གིས་བོད་ཅེས་སྐད་ཆ་ཞིག་བཤད་དགོས་བྱུང་ན། བཙན་ཐབས་ཀྱིས་ཀྲུང་གོའི་བོད་ཅེས་ཤོད་འབྲི་བྱེད་ལ། རྒྱ་མི་འགས་བོད་མིང་ལ་ཡོངས་གྲགས་སུ་༼Tibet༽ལབ་ན་འགྲིག་གི་མ་རེད་ལ་༼ཤིས་ཚིང་༽ལབ་དགོས་ཟེར། བོད་རྒྱ་མིའི་མིན་པ་དེ་རྒྱ་གཞུང་དང་རྒྱ་རིགས་ཚོའི་བྱེད་སྟངས་དེས་ཀྱང་གསལ་བོ་བཟོ་བཞིན་འདུག་ཅིང་། རྒྱ་གཞུང་གིས་བོད་དུ་དབང་སྒྱུར་བྱས་པ་རེད། བོད་རྒྱ་གཞུང་གིས་དབང་བསྒྱར་བྱེད་མི་ཆོག་པ་དེ་འདྲ་ཡིན་རྒྱུ་མ་རེད་དེ། རྒྱ་གཞུང་གིས་དབང་བསྒྱུར་བྱས་པའི་ཁར། བོད་མི་རིགས་རྩ་མེད་བཟོ་བཞིན་ཡོད་པ་དེ་རེད། བོད་མི་ཚོར་གང་འཚམ་ཐོབ་ཐང་ཡོད་པ། རང་གི་ངོ་བོ་འཚོ་གནས་ལ་གཉེན་ཁ་མེད་པའི་གུ་ཡངས་བའི་སྲིད་ཇུས་ཤིག་རྒྱ་གཞུང་གིས་ལག་བསྟར་བྱས་ཡོད་ན། ད་ལྟའི་བོད་ནང་གི་གནས་སྟངས་ཛ་དྲག་དེ་མེད་ལ། རྒྱལ་སྤྱིའི་རྣམ་པའི་བོད་ཀྱི་གནད་དོན་ཟེར་བའི་དཀའ་རྙོག་དེ་ཡང་མེད་ཅིང་། དངོས་གནས་རྒྱ་ནག་རྒྱལ་ཁབ་འདི་བརྟན་བརླིང་དང་འཆམ་མཐུན་གྱི་མི་སྡེ་ཞིག་ལ། རྒྱལ་སྤྱིའི་སྤྱི་ཚོགས་ལ་བཟང་ཕྱོགས་ནས་ནུས་འདོན་ཐུབ་པའི་རྒྱལ་ཁབ་ཅིག་ཡིན་ངེས།
བོད་མི་ཚོས་རང་སྟེང་ནས་ཅི་ཞིག་བྱེད་དགོས་ན་བྱེད་ཐུབ་པར་གྱུར་འདུག་ལ། མི་རྣམས་ཀྱིས་མཐོང་བ་ཕར་ཟད་ཐོས་ནའང་བཟོད་དཀའ་བའི་རང་བསྲེགས་ཀྱི་ལས་འགུལ་ལྟ་བུ་རྒྱུན་མཐུན་བཞིན་ཡོད། དེ་ལས་ལྷག་གི་མནར་གཅོད་ཅིག་ས་སྟེང་འདི་ན་མེད། མི་རིགས་གཞན་པ་ལྟར་འགད་རྫས་ཐོགས་ཏེ་མི་མང་པོ་ལྡེབ་གསོད་ཀྱིས་ངོ་རྒོལ་ལྟ་བུར་མཚོན་ན་བོད་མི་ཚོར་ལས་སླ་བོ་ཞིག་རེད། འོན་ཀྱང་བོད་མི་ཚོའི་རིག་གཞུང་གི་རྒྱབ་ལྗོངས་དང་། དེའི་བསྐྱེད་པའི་མི་གཤིས་ཀྱིས་རང་ཉིད་ཀྱི་མངོན་འདོད་བསྒྲུབ་ཕྱིར་ནམ་ཡང་འཚེ་མེད་ཞི་བའི་རྒྱ་ལས་བརྒལ་རྒྱུ་མིན་པ་དང་། རང་ཉིད་ཀྱིོ་མངོན་འདོན་མ་འགྲུབ་པར་དུ་ནམ་ཡང་བློས་གཏོང་བྱ་རྒྱུ་མིན་པའི་ཆོད་སེམས་ཀྱང་བརྟན་པོ་རེད།
བོད་མི་ཚོས་རང་བསྲེགས་བྱེད་ཐུབ་པའི་སྙིང་སྟོབས་འདིའི་འབྱུང་ཁུངས་ལ་བསམ་ན། འདས་པའི་བོད་བཙན་པོའི་དུས་ཀྱི་དམག་རྟའི་རྨིག་སྒྲས་བསླངས་པའི་སྙིང་སྟོབས་དེ་ཡང་སེམས་ལ་འཁོར་ཡོང་ལ། བར་སྐབས་ཤིག་ནས་བཙན་པོའི་སྙིང་སྟོབས་ཀྱི་ངོ་བོ་གཞན་དུ་གྱུར་ཀྱང་། བོད་མི་ཚོའི་ཤ་གསེང་རུས་གསེང་ན་རྒྱུ་བའི་ཁྲག་དམར་དེ་ནི་བོད་བཙན་པོའི་ཁྲག་རྒྱུན་ཡིན་ལ། ད་ལྟའི་རང་བསྲེགས་བྱེད་ཐུབ་པའི་སྙིང་སྟོབས་དེ་ཡང་བོད་བཙན་པོའི་སྙིང་སྟོབས་ཡང་བསྐྱར་ས་སྟེང་འདིར་བུད་པ་རེད་ལ། ཐེངས་འདིའི་བཙན་པོའི་སྙིང་སྟོབས་ནི་དེ་སྔའི་རལ་གྲི་ཁྲག་ལ་བྱིང་བའི་སྙིང་སྟོབས་དེ་མ་རེད་ལ། འཚེ་མེད་ཞི་བའི་རང་བསྲེགས་ཀྱི་སྙིང་སྟོབས་ཚད་མཐོན་ཤོས་དེ་རེད།
བྱེས་ཀྱི་བོད་མི་ཚོས་བོད་དུ་བྱུང་བའི་གནས་ཚུལ་དག་ལ་ངོས་འཛིན་མ་ནོར་བ་བྱེད་གལ། བོད་དུ་བྱུང་བའི་ཞི་རྒོལ་དག་གང་ཟག་སྒེར་བ་ཞིག་གི་ལངས་ཕྱོགས་བསྒྲུབ་ཐབས་སུ་བཀོལ་མི་འོས། རང་ཉིད་ཀྱི་ལངས་ཕྱོགས་དང་ལྟ་བ་བཞག་སྟེ་བོད་དུ་བལྟ་ཐུབ་དགོས། བོད་ནས་བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་ཕེབས་དགོས་ཟེར་བར་འཇུས་ཏེ། རང་བཙན་སྒྲོག་མཁན་དང་ལམ་དབུ་མར་མོས་མཁན་ཚོས་ཡར་མར་འཐེན་བསྡད་པ་ཞིག་མ་རེད། ཕྱོགས་གང་ཐད་ནས་བོད་ཀྱི་གནས་བབ་ཁྱོན་ཡོངས་ལ་བལྟས་ཏེ་ཁ་གྲག་དགོས་པ་རེད། བོད་དུ་བོད་མི་ཚོ་འཚོ་ཐུབ་མིན་གྱི་འགག་རྩར་བསླེབས་ཡོད། དེར་གཞིགས་ན་ཁོང་ཚོའི་འཐབ་རྩོད་དེ་ཡང་འཚོ་གནས་ཀྱི་འཐབ་རྩོད་ཅིག་ཡིན་པ་དེ་རེད། ཁོང་ཚོས་མི་རིགས་ཤིག་གི་འཚོ་གནས་ཀྱི་ཆེད་དུ་རང་བསྲེགས་ཀྱི་ལམ་ནས་འཆི་བཞིན་ཡོད་ལ། མི་རིགས་དེ་ཡང་ཁོང་ཚོའི་ཆེད་དུ་ཁོང་ཚོའི་རེ་བའི་དོད་དུ་གཏན་དུ་གསོན་ཐུབ་དགོས་པ་རེད།
དྲང་མོ་བཤད་ན་རྔ་པ་ཞེས་བོས་དུས། འདི་ངའི་ཕ་ཡུལ་གྱི་མིང་ཡིན་གཏད་ནས་བསམ་གྱི་མི་འདུག རྔ་བའི་མི་ཚང་མ་ལ་སེམས་ཚོར་འདི་ཡོད་པ་འདྲ། གང་ལྟར་ངས་ནི་རང་ཉིད་རྔ་བ་ནས་ཡིན་པ་ལས་རྔ་པ་ནས་ཡིན་བསམ་ཐུབ་ཀྱི་མི་འདུག
དྲང་མོ་བཤད་ན་རྔ་པ་ཞེས་བོས་དུས་་་འདི་ངའི་ཕ་ཡུལ་གྱི་མིང་ཡིན་གཏད་ནས་བསམ་གྱི་མི་འདུག རྔ་བའི་མི་ཚང་མ་ལ་སེམས་ཚོར་འདི་ཡོད་པ་འདྲ། གང་ལྟར་ངས་རང་ཉིད་རྔ་བ་ནས་ཡིན་བསམ་པ་ལས་རྔ་པ་ནས་ཡིན་བསམ་ཐུབ་ཀྱི་མི་འདུག
རྩོམ་ཡིག་བྲིས་པ་ལེགས། བརྗོད་གཞི་གལ་ཆེན་ཞིག་བདམས་འདུག (ཤིས་ཚིང་) ཟེར་ན་མ་འགྲིག་པ་རེད། (ཤས་ཙང་།)ཞེས་བྲིས་ན་རྒྱའི་སྐད་(西藏)དང་མཐུན་པ་རེད། ཕྱོགས་གཅིག་ནས་ཨ་མདོ་བའི་ཀློག་སྟངས་ལ་རྗེས་འཇུག་ང་ཡིན་ཕྱིན་མིང་གཤིའི་དབྱངས་གི་གུ་ནུས་མེད་དུ་འགྱུར་འགྲོ་བ་འདིས་རྐྱེན་བྱས་པ་འདྲ། རྐྱེན་འདིས་གསར་འགོད་པ་མང་པོ་ཞིག་ལའང་སྐྱོན་ཡོང་གི་འདུག ཧ་ཧ་ཧ།
རྩོམ་དེ་ཡག་པོ་ཞིག་ཡིན་ཚེ་བརྗོད་བྱའི་ཐད་ནས་ཡིན་ངེས་བཀའ་དྲིན་ཆེ། རྔ་པ་ཞེས་པ་མཐོང་མ་ཐག་ཀློག་འདོད་མ་བྱུང་།སྐྱེས་གསར་ཞེས་པ་ཁྱེད་རང་གིས་མཁས་མདོག་དང་ཡིན་མདོག་མ་བྱེད།
རྔ་བ་དང་རྔ་པ་གཉིས་ལ་སྒྲ་ཙམ་ལས་ཁྱད་པར་མེད་ཚེ། ཁྱེད་ཚོའི་རིགས་སུ་གཏོགས་པ་ཀུན་གྱིས་རྔ་པ་ལབ་ན་བདག་སྒྲ་རེད། རྔ་བ་ལབ་ན་བདག་སྒྲ་མ་རེད་ཅེས་འུར་ག་རེ་བྱས་ནས་བརྒྱབས་པ་ཡིན།
རྔ་བ་དང་རྔ་པ་རྩོད་ནས་ཁྱོད་ཤི་ང་གསོན་བྱས་ཞེས་བསྙོན་འཛུགས་མ་བྱེད། ཆོས་གྲོགས་ཁྱོད་གཉིས་ཐུག་ཐུག་བྱས་ཡོད་པ་མ་རེད། ང་ཚོའི་རང་ཉིད་ཀྱི་ཕ་ཡུལ་གྱི་མིང་དེ་གནའ་ནས་བརྒྱུད་ཀྱང་ད་ཡང་སྤྱོད་བཞིན་པ་དེ་དགོས་ལབ་པ་ལས། ཁྱོད་ཤི་ང་གསོན་ཞིག་གང་ལ་བྱས་འདུག
པ་དང་བ་གཉིས་སྒྲ་ཙམ་མ་ཟད་དོན་སྟོན་སྟངས་དང་། མིང་མཐར་འཇུག་སྟངས་སོགས་ཕྱོགས་གང་ཐད་ནས་འདྲ་བོ་ཡོད་པ་མ་རེད། མཁས་མདོག་མ་བྱེད། བརྡ་སྤྲོད་ང་ཚོས་ཀྱང་སྦྱངས་མྱོང་ཡོད་པ་རེད།
ང་ཚོས་བཤད་བསྡད་པ་ནི་རྔ་བའི་ལོ་རྒྱུས་རྙིང་པ་རྣམས་དང་། རྔ་བའི་ཡུལ་མིས་རང་ཡུལ་གྱི་མིང་ལ་གང་ཞིག་འབོད་ཀྱིན་ཡོད་པ་དེ་ཉིད་རང་སོར་འཇོག་དགོས་ཟེར་བ་ལས། སྤྱིར་བཏང་བ་དང་པའི་ཁྱད་པར་ག་རེ་ཡིན་པ་ལ་རྩོད་པ་བྱེད་ཀྱིན་མེད་ལ། བྱ་དགོས་དོན་ཡང་མེད་དོ།
སུམ་རྟགས་གཞིར་བཞག་བྱས་ན། རྔ་བ་མ་རེད། རྔ་པ་རེད་འདུག
སྐུ་ཞབས་བློ་གྲོས་ཀྱིས་ཆེད་རྩོམ་ཡག་པོ་ཞིག་བྲིས་འདུག ད་ལྟའི་ཆར་ཕ་ཡུལ་ཕྱོགས་སུ་དགའ་འོས་པ་དང་། སྐྱོ་དགོས་པའི་གནས་ཚུལ་མང་པོ་མཐོང་རྒྱུ་འདུག དེའི་ཁྲོད་ཀྱི་གལ་ཆེན་གཅིག་ནི། མི་དམངས་ཀྱི་བསམ་བློའི་གོ་རྟོགས་གུ་ཡངས་པོ་ཆགས་བཞིན་ཡོད་པ་འདི་ཡིན་ལ། དེ་དང་མཉམ་དུ་ཆོས་དད་ཀྱི་ཆ་ནས་ཀྱང་བླ་མ་ག་གེ་མོའི་ཁ་བཤད་ཙམ་ལ་མི་ཉན་པར་རྒྱུ་མཚན་འཚོལ་བའི་གཤིས་ཀ་ཅིག་འདུག དེའང་འགྱུར་ལྡོག་ཅིག་དང་། འཕེལ་རྒྱས་ཤིག་རེད། ང་ཚོ་ཕྱི་ཕྱོགས་སུ་ཡོད་པ་ཚོས་གོ་སྐབས་ནམ་རེག་ལ་ཁོང་ཚོའི་བྱས་རྗེས་ལ་དགའ་བསུ་དང་། མུ་མཐུད་མདུན་བསྐྱོད་དགོས་རིགས་ཐད་སྐུལ་འདེད་བྱེད་དགོས་པ་དེ་ཧ་ཅང་གལ་ཆེན་པོ་རེད། དེ་ནས་དེང་སང་རྔ་བའི་ཕྱོགས་ཀྱི་མི་རེ་ཟུང་གིས། རྔ་པ་དང་རྔ་བ་གཉིས་ཀྱི་མིང་མཐའི་པ་བ་འབྲི་སྟངས་ཐད་དོ་སྣང་ཆེན་པོ་བྱས་ཏེ། ཁྱོད་ཤི་ང་གསོན་གྱི་སྐད་ཆ་རྫབ་ཆེན་པོ་དེ་འདྲ་ཤོད་མཁན་ཡང་ཡོང་གི་འདུག དེར་བརྟེན་འདི་ནས་ངས་ལྷན་རྒྱས་ཚོར་གཞེན་སྐུལ་ཞུ་དགོས་པ་ཞིག་ལ། ཕ་ཡུལ་ཕྱོགས་ཀྱི་སེམས་ཤུགས་དང་སྙིང་སྟོབས་ཀྱི་ལས་ཀ་དེ་འདྲ་གཉེར་བཞིན་པའི་སྐབས་སུ། འདི་ཕྱོགས་ནས་དེ་འདྲའི་ཅོལ་ཆུང་གི་ལས་ཀ་མ་སྤེལ་ན་འོས་ཤིང་འཚམ་པར་ངེས། སྤྱིར་མིང་མཐའི་པ་བའི་ཐད་འདོད་ཚུལ་མི་མཐུན་པ་སྔར་ནས་ཡོད་མུས་ཀྱང་། དེ་མཁས་པའི་བགྲོ་གླེང་ལྟ་བུ་བརྒྱུད་ནས་འགྲོ་དགོས་པ་ལས། ང་ཚོས་སྐད་བརྒྱབ་པ་ཙམ་གྱིས་ཡོང་བ་ཞིག་མིན། ད་དུང་ཞིབ་འདངས་གཞན་ཞིག་བརྒྱབ་ཚེ། རྔ་པ་་་་དང་་་་་རྔ་བ་གཉིས་ལ་སྒྲ་ཙམ་ལས་དོན་ལ་ཁྱད་པར་གང་ཡང་མེད་སྟབས་རང་ལ་བརྗོད་གང་བདེ་བྱས་ནས་བྲིས་ཀྱང་མཐའ་གཅིག་ཏུ་མི་འགྲིག་པ་མེད་སྙམ་ཡང་། ད་ལྟའི་དུས་སུ་འདི་རིགས་གླེང་དགོས་པ་ཞིག་མ་རེད།
འཇམ་དབྱངས་ཚུལ་ཁྲིམས་ལགས་ཀྱིས་བརྗོད་པ་རང་རེད་་་་་རྩོམ་ཡིག་འདི་ཐོན་པའི་ཉིན་དེར་་་་་ངས་རྔ་པ་མ་རེད་་རྔ་བ་རེད་་་་་་མཆན་ཞིག་བཀོད་པ་ཡིན་ཡང་རྩོམ་སྒྲིག་པས་དྲ་ངོས་སུ་བཀོད་མ་སོང་་་་་་འདི་ནི་སྔོན་མ་ནས་རྔ་བ་ཞེས་འབྲི་བ་ལས་རྔ་པ་ཞེས་བྲིས་པ་ཞིག་ཡོད་པ་མ་རེད་་་་དེང་སང་བཙན་བྱོལ་ནང་ནས་བསྒྱུར་ནས་འདི་འདྲ་ཞིག་འབྲི་བཞིན་པས་འདི་ནི་མ་དག་རྒྱུན་འབྱམས་སུ་གནས་པ་རེད་་་་་གུས་བཅས་རྗེས་ཕྱོགས་འདི་ལྟར་མ་སྒྱུར་རོགས་གནང་་་་་
རྩོམ་འདི་འབྲི་མཁན་བློ་གྲོས་རབ་བརྟན་ལགས། རྩོམ་འདི་ལྟ་བུ་ཞིག་བྲིས་པར་ངས་ང་རང་གི་ཕ་ཡུལ་གྱི་མི་མིང་གི་འཚབ་ཞུས་ནས་ང་ོ་མ་ཅན་གྱི་བཀའ་དྲིན་ཆེ། དེ་ཡང་བརྗོད་བྱའི་ངོ་ནས་ཞུ་བཞིན་ཡོད། ཞོར་ལ་ངས་ཞུ་འདོད་པ་ནི། གཅིག་བྱས་ན་ཁྱེད་ཀྱིས་ཉན་ན་མི་འདོད་པ་ཞིག་ཡིན་ལས་ཆེ། ཡང་གཅིག་བཤད་ན་རྩོམ་འདིའི་ཟུར་ནས་གླེང་རིན་མེད་པ་ཞིག་ཀྱང་ཚོར་ལས་ཆེ། དེས་སྟབས་ཀྱིས་མང་པོ་མི་ཞུ། གནད་ཀྱི་དམ་ནི་༼རྔ་པ་ཞེས་པ་ཕྱིས་སུ་རྔ་བ་ཞེས་འབྲི་རོགས་ཞེས་ཁྱེད་དང་གསར་འགོད་པ་འབྲེལ་ཡོད་ཚང་མ་ལ་རེ་སྐུལ་ཞིག་ཀྱང་ཡིན་ལ། རྒྱུ་མཚན་དང་འགན་འཁྲི་ཡོད་པས་གནས་ལུགས་ཤིག་ཀྱང་ཡིན། ཞེས་སེ་རའི་སློབ་གཉེར་བ་མདོ་སྨད་རྔ་བའི་སྤྲོ་ཚོགས་ཤིང་གི་རྡོ་བའི་འཇམ་དབྱངས་ཚུལ་ཁྲིམས་ནས།
ཡག་པོ་བྲིས་འདུག་་་གོང་གི་དེ་རྔ་བའི་གནས་སྟངས་གསལ་བོ་བཤད་འདུག་དེ་འདྲ་ཏག་ཏག་ཡིན། ང་རང་རྔ་བ་ནས་མཚར་ལོང་བྱུང་བ་ཞིག་ཡིན་པས་གནས་ཚུལ་ལ་ལ་ཞིག་ལ་རྒྱུས་གསལ་བོ་ཡོད། ཉིས་སྟོང་བརྒྱད་ཚུན་ནས་སྐྱག་ཟན་གི་ཉེན་རྟོག་པ་དག་ལ་ཞེན་གྱི་མི་འདུག ཁོང་ཚོ་་ཀྱང་སྐྲག་གི་ཡོད་པ་འདྲ། ༢༠༠༨ དེའི་སྔ་རོལ་དུ་སྐབས་སྐབས་སུ་ཉེན་རྟོག་པ་མང་པོ་སླེབས་ནས་འཕྲུལ་རྟ་（摩托）མང་པོ་བཙན་འཕྲོག་བྱེད་ཀི་རེད་འཕྲུལ་རྟ་སྐོར་ཆོག་པའི་ཡི་གེ་ཡོད་ཀྱང་ཕན་པར་མི་འདུག་ཟེར། རྒྱུ་མཚན་ཁོང་ཚོར་སྒོར་ལྡོག་ཉིས་བརྒྱ་སུམ་བརྒྱ་རེ་སྤྲོད་དགོས་པས་རྒྱུ་མཚན་གྱིས་རེད། ངོ་མ་ཁྱེད་ཚོ་རྔ་བར་བསྡད་མྱོང་མཁན་རེ་ཡིན་ན་ཤེས་ཀྱི་རེད། སྙིང་ལངས་ནི་ཞིག་ཡིན་ཁོང་ཚོར་གནས་ལུགས་དང་རྒྱུ་མཚན་གང་ལ་ཡང་མི་ཉན་མི་མང་གི་ལག་ནས་སྒོར་མོ་ལེན་བྱས་བྱེད་པར་བྲེལ་འདུག ཉིས་སྟོང་བརྒྱད་ཀྱི་ཕྱིན་ནས་དེ་འདྲའི་གནས་ཚུལ་ཞིག་བྱུང་བ་རིག་རྒྱུ་མ་དགོས་གོ་རྒྱུ་ཡང་མི་འདུག དེ་ནི་ཁོང་ཚོའི་སེམས་ལ་ཡང་བག་ཆགས་ཞིག་བཞག་ཡོད་པ་གསལ་བོ་རེད་དེ་འདྲ་བྱས་པ་ཡིན་ན་ཏག་ཏག་མི་མང་རང་བསྡད་རྒྱུ་མ་རེད། ངས་རྔ་བ་ལ་བསྟོད་པ་མིན་ང་རྔ་བ་མི་མང་གི་ལ་རྒྱ་དང་སེམས་ཤུགས་ལ་ངོ་གནས་ཡི་རངས་བྱེད་འོས་པ་ཞིག་ཡིན། ང་རང་ཕ་ཡུལ་དང་ཁ་བྲལ་ནས་ལོ་གཅིག་ལྷག་ཡིན།