ཁེ་ཎ་ཌར་རྐུན་མ་འགའ་འཛིན་བཟུང་།

ཁེ་ན་ཌའི་ནང་གཞོན་སྐྱེས་འགས་བྱང་བུ་རྫུན་བཟོ་བརྒྱུད། དངུལ་འབོར་ཆེན་རྐུ་འཁྱེར་བྱས་པའི་ཉེས་མིང་འོག་འཛིན་བཟུང་བཀག་ཉར་བྱས་ཡོད་འདུག

ཕྱི་ཚེས་ ༢ ཉིན་ཁེ་ཎ་ཌའི་ཊོ་རོན་ཊོ(Toronto) མངའ་སྡེ་ཉེན་རྟོག་ལས་ཁུངས་ནས་སྤེལ་བའི་གནས་ཚུལ་ལྟར་ན། ཕྱི་ཟླ་ ༩ ཚེས་ ༢༧ ཉིན་བྱང་བུ་རྫུན་བཟོ་བྱས་ཏེ་དངུལ་འབོར་ཆེན་རྐུ་འཁྱེར་བྱེད་མཁན་མི་ ༥ འཇུ་བཟུ་བཀག་ཉར་བྱས་ཡོད་འདུལ་ལ། མི་དེ་དག་ནི་ཊོ་རོན་ཊོ་མངའ་སྡེའི་ནང་གནས་སྡོད་རང་ལོ་ ༢༣ ཡིན་པ་འཇིགས་མེད་ལྷུན་འགྲུབ་(Jigme Lhundup)དང་། རང་ལོ་ ༢༤ ཡིན་པ་བསྟན་འཛིན་རྣམ་གསལ(Tenzin Namsal)། རང་ལོ་ ༢༨ ཡིན་པ་བསྟན་འཛིན་བདེ་ལེགས(Tenzin Delek)། རང་ལོ་ ༢༦ ཡིན་པ་ཚེ་རིང་ཆོས་ལྡན(Tsering Choden)། རང་ལོ་ ༣༣ ཡིན་པ་རཱ་མཱ་སཱ་མེ་(Umasangar Ramasamy) བཅས་ཡིན་པ་དང་། རཱ་མཱ་སཱ་མེ་ཟེར་པ་དེ་ཁོང་ཚོའི་ནང་གི་གཏེ་དཔོན་དེ་ཡིན་འདུག

དོགས་ཡོད་ཉེས་ཅན་པ་དེ་དག་གིས་ཁེ་ཎ་ཌའི་མངའ་སྡེ་ཊོ་རོན་ཊོའི་ནང་གི་མེ་འཁོར་བྱང་བུ་(TTC Metro) རྫུན་བཟོ་དང་ལྐོག་བཙོང་བྱས་ཡོད་འདུག མེ་འཁོར་བྱང་བུ་ནི་དངུལ་བྱང་ལྟ་བུ་ཞིག་ཡིན་པ་དང་། མེ་འཁོར་ནང་ཕན་ཚུན་འགྲུལ་བཞུད་སྐབས་མི་རྣམས་ཀྱིས་མེ་འཁོར་འཛིན་བྱང་ཐད་ཀར་ཉོ་མི་དགོས་པར་བྱང་བུ་དེ་སྤྱད་ནས་དངུལ་སྤྲོད་ཀྱི་ཡོད་སྟབས། ཁོ་ཚོས་གློག་ཀླད་བརྒྱུད་གཞུང་གི་མེ་འཁོར་བྱང་བུའི་གསང་གནས་ཀྱི་དངུལ་ཐད་ཀར་བྱང་བུ་རྫུན་མའི་ནང་འཕོ་འགྱུར་བཏང་སྟེ་བཙོང་ཡོད་འདུག

ཊོ་རོན་ཊོ་མངའ་སྡེའི་མེ་འཁོར་དངུལ་བྱང་བརྒྱུད་འདྲེན་ལས་ཁུངས་(TTC) ཀྱིས་བརྗོད་པ་ལྟར་ན། ཁོ་ཚོས་ད་ལོའི་ལོ་སྟོད་ཙམ་ནས་མེ་འཁོར་བྱང་བུའི་དངུལ་བརྒྱུད་འདྲེན་ནང་མིང་ཁ་གསལ་མེད་པའི་བྱང་བུའི་སྟེང་འཕོ་འགྱུར་འགྲོ་ཡི་ཡོད་པའི་གནས་ཚུལ་རིམ་པར་བྱུང་རྗེས། དོགས་གཞི་ཅན་གྱི་བྱང་བུ་དང་། བྱང་བུ་བཙོང་སའི་ས་ཚུགས་ཁག་བཅས་ལ་སོ་ལྟ་དང་། པར་དང་བརྙན་རིས་སོགས་ལེན་པའི་འཕྲུལ་ཆས་བཙུགས་པ། དམིགས་བསལ་ཞིབ་བཤེར་ཚན་ཆུང་ཟུར་འཛུགས་བྱས་པ་སོགས་བྱས་ཡོད་འདུག

དོགས་ཡོད་ཉེས་ཅན་པ་དེ་དག་ནི་ཊོ་རོན་ཊོ་མངའ་སྡེའི་ནང་གཏན་སྡོད་ཁེ་ཎ་ཌའི་མི་ཟེར་རྐྱང་ཡིན་པ་དང་། ཁོ་ཚོའི་ནག་ཉེས་དང་། མིང་། ལོ་སོགས་ལས་གཞན་པའི་ཞིབ་ཕྲའི་གནས་ཚུལ་གང་ཡང་བཀོད་མི་འདུག བྱང་བུ་རྗུན་བཟོ་བརྒྱུད་རྐུ་འཁྱེར་བྱས་པའི་དངུལ་གྲངས་ཨ་སྒོར་ ༡༨༠༠༠༠ ལྷག་ཡིན་པ་མ་ཟད། དོགས་ཡོད་ཉེས་ཅན་པ་དེ་དག་ལ་ནག་ཉེས་གཞན་ཡང་ཡོད་ཚུལ་གྱི་དོགས་གཞིའི་འོག་ཞིབ་བཤེར་བྱེད་ཀྱི་ཡོད་འདུག

གསར་འགོད་པ། བནྡེ་སྐྱབས།