གཞུང་འབྲེལ་བསྔོ་སྨོན་མཆོད་འབུལ།

དེ་རིང་ཕྱི་དྲོ་དབུས་བོད་མིའི་སྒྲིག་འཛུགས་ཀྱི་གོ་སྒྲིག་འོག བཞུགས་སྒར་ཐེག་ཆེན་གཙུག་ལག་ཁང་དུ་བོད་ནང་དུ་རང་ལུས་མེར་བསྲེགས་གཏོང་མཁན་ཚོའི་ཆེད་མཆོད་འབུལ་སྨོན་ལམ་ཚོགས་ཡོད།

དེ་རིང་ཕྱི་ཚེས་ ༥ ཉིན་གྱི་ཕྱི་དྲོ་ཆུ་ཚོད་ ༤ སྟེང་དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག བཞུགས་སྒར་ཐེག་ཆེན་གཙུག་ལག་ཁང་དུ་རྣམ་རྒྱལ་གྲྭ་ཚང་གི་མཁན་རིན་པོ་ཆེ་དབུ་བཞུགས་ཐོག རྣམ་རྒྱལ་གྲྭ་ཚང་དང་ཉེ་འཁོར་དགོན་སྡེ་ཁག་གི་གྲྭ་མང་། བཙན་བྱོལ་བོད་མིའི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོས་སྲི་ཞུ་གཞུང་ཞབས་པ་ཡོངས་དང་།  ངྷ་སའི་མང་ཚོགས་བཅས་ལྷན་འཛོམས་ཐོག  བོད་བསྟན་སྲིད་དོན་དུ་རང་སྲོག་བློས་གཏོང་གནང་མཁན་དག་དང་། ལྷག་པར་དུ་འཇམ་དབྱངས་དཔལ་ལྡན་ལགས་དང་གཡུང་དྲུང་ལགས། དགུ་འགྲུབ་ལགས་གསུམ་གྱི་ཆེད་བསྔོ་སྨོན་མཆོད་འབུལ་གནང་སོང་།

བསྔོ་སྨོན་མཆོད་འབུལ་སྟེང་ཆོས་རིག་བཀའ་བློན་པདྨ་ཆོས་འབྱོར་མཆོག་སྲིད་སྐྱོང་གི་སྐུ་ཚབ་བྱས་ཏེ་ཚོགས་ཐོག་ནས་གཞུང་འབྲེལ་མཆོད་འབུལ་གནང་དགོས་པའི་རྒྱུ་མཚན་སྐོར་ངོ་སྤྲོད་གནང་སྐབས། ད་ལོའི་ཕྱི་ཟླ་ ༣ ཚེས་ ༡༤ ཉིན་མདོ་སྨད་རེབ་གོང་རོང་པོ་དགོན་གྱི་མདུན་ཐང་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གནང་མཁན་རོང་པོ་དགོན་ཆེན་གྱི་གྲྭ་འཇམ་དབྱངས་དཔལ་ལྡན་ལགས་ཕྱི་ཟླ་ ༩ ཚེས་ ༢༩ ཉིན་སྐུ་གྲོངས་ཡོད་པ་དང་། དེ་བཞིན་ཕྱི་ཟླ་ ༩ ཚེས་ ༢༩ ཉིན་ཆབ་མདོ་རྫོང་ཀརྨ་གཡུ་མཚོ་ནས་ཡིན་པ་གཡུང་དྲུང་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་སྐུ་གྲོངས་པ། ཟླ་འདིའི་ཕྱི་ཚེས་༤ ཉིན་ནག་ཆུ་ས་ཁུལ་དུ་དགུ་འགྲུབ་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་སྐད་འབོད་གནང་སྟེ་སྐུ་གྲོངས་ཡོད་པ་བཅས་ཀྱི་ནང་མི་གཉེན་ཉེ་རྣམས་ལ་སེམས་གསོའི་གདུང་སེམས་མཉམ་སྐྱེད་དང་། རྒྱལ་གཅེས་དཔའ་བོ་ཁོང་རྣམ་པའི་ཆེད་བསྔོ་སྨོན་མཆོད་འབུལ་གནང་པ་ཞིག་ཡིན་སྐོར་གསུངས་སོང་།

གཞན་ངྷ་སའི་སྦྲ་སོག་འབྲི་གསུམ་མཉམ་སྒྲིལ་སྐྱིད་སྡུག་ཚོགས་པའི་ངོས་ནས། གཞུང་འབྲེལ་མཆོད་འབུལ་སྨོན་ལམ་དང་བསྟུན་ནས་དགུ་འགྲུབ་ལགས་གཙོས་བོད་བསྟན་སྲིད་ཆེད་རང་ལུས་མེར་བསྲེགས་གཏོང་མཁན་ཚང་མའི་ཆེད་སྟོང་མཆོད་ཞུ་འབུལ་གནང་ཡོད།