པའོ་ལ་སྲོག་ཁྲིམས་ཕོག་ཉེན།

ཉེ་ཆར་རྒྱ་གཞུང་དབུས་རུལ་སུངས་བཀག་སྡོམ་ཚོགས་ཆུང་གི་ཚོགས་འདུའི་ཐོག ཧི་ཀོ་ཆང་གིས་པའོ་ཞི་ལའེ་ཡི་མིང་བཏོན་ཏེ་ཐག་གཅོད་ནན་མོ་བྱ་རྒྱུ་ཡིན་སྐོར་གླེང་འདུག 

ཟླ་འདིའི་ཕྱི་ཚེས་ ༨ ཉིན་རྒྱ་གཞུང་སི་སི་ཌེ་ཝེ་བརྙན་འཕྲིན་ཁང་གིས། ཉེ་ཆར་རྒྱ་ནག་དབུས་རུལ་སུངས་བཀག་སྡོམ་མཐུན་འགྲིག་ཚོགས་ཆུང་གི་ཚོགས་འདུ་ཐེངས་ ༢༢ པའི་སྟེང་། རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་ཧི་ཀོ་ཆང་གིས། པའོ་ཞིས་ལའེ་དང་ལིག་ཀྲི་ཅོན། ཞིས་ཙུང་ཧིན་སོགས་ཀྱི་རྩ་འཛུགས་དང་ཁྲིམས་ལུགས་ལ་འགལ་བའི་གལ་ཆེའི་གྱོན་དོན་ཁག་ཅིག་བློ་ཐག་རྦད་ཆོད་ཀྱིས་ཐག་གཅོད་བྱུང་ཡོད་སྐོར་བརྗོད་ཡོད་པ་དང་། ཚོགས་འདུ་དེར་རྒྱ་གཞུང་དབུས་རྩ་འཛུགས་སྡེ་ཁག་གི་མགོ་གཙོ་ལིས་ཡོན་ཁྲའོ་དང་། དབུས་སྒྲིག་ཁྲིམས་ལྷན་ཁང་གི་དྲུང་ཆེ་གཞོན་པ་ཧི་ཡུང་། དབུས་ཉེན་རྟོག་སྡེ་ཁག་གི་མགོ་གཙོ་ལིས་ཅན་ཀྲུའུ། ཆེས་མཐོའི་མི་དམངས་ཁྲིམས་ཁང་གི་ཁྲིམས་དཔོན་ཝང་ཧྲིན་ཅོན། ཆེས་མཐོའི་མི་དམངས་ཞིབ་བཤེར་ཁང་གི་མགོ་གཙོ་ཚའོ་ཅན་མཱེན་བཅས་མཉམ་ཞུགས་བྱས་འདུག

དྲ་མིང་ལ་ལིག་ཅཱ་ཟེར་བ་ཞིག་གིས་གསར་ལམ་ཁག་ཏུ། ཟླ་འདིའི་ཕྱི་ཚེས་ ༡༥ ཉིན་པའོ་ཞི་ལའེ་ལ་ཁྲིམས་བཤེར་བྱ་མགོ་རྩོམ་རྒྱུ་ཡིན་པ་དང་། ཁོའི་ནག་ཉེས་ནི་ཉེ་སྔོན་རྒྱ་ནག་གཞུང་འབྲེལ་གསར་ལམ་ཁག་ནས་བརྗོད་པ་ལས་ཀྱང་ཧ་ཅང་ཚབས་ཆེ་བ་མ་ཟད། པའོ་ཞི་ལའེ་ལ་སྲོག་ཁྲིམས་གཅོད་སྲིད་པ་བརྗོད་ཡོད་ལ། དེ་བཞིན། ཧི་ཀོ་ཆང་གིས་ཀྱང་རུལ་སུངས་བཀག་སྡོམ་ཚོགས་འདུའི་ཐོག གྱོད་དོན་ཞིབ་བཤེར་ལས་དོན་དམིགས་སུ་བཏོན་ཏེ། རུལ་སུངས་པར་ཉེས་ཆད་གཅོད་པའི་ངར་ཤུགས་ཀྱི་གནས་བབ་རྒྱུན་འཁྱོངས་དང་། རུལ་སུངས་ཀྱི་གནད་དོན་དེ་མི་སུ་འདྲ་ཞིག་ལ་ཐུག་ཀྱང་ལག་གློད་རྒྱུ་མིན་པར་ཐག་གཅོད་ནན་མོ་བྱ་རྒྱུ་ཡིན་ཚུལ་བརྗོད་ཡོད་པ་རེད།  

༢༠༡༡ ཕྱི་ཟླ་ ༥ ཚེས་ ༩ ཉིན་དེ་སྔའི་ཧྲིན་ཁྲོན་གྲོང་ཁྱེར་གྱི་མགོ་གཙོ་ཞིས་ཙུང་ཧིན་ལ་ལོ་གཉིས་དུས་འགྱངས་ཀྱི་སྲོག་ཁྲིམས་བཅད་ཡོད་པ་དང་། ལིག་ཀྲི་ཅོན་ལ་ཟླ་སྔོན་མའི་ནང་ཁྲིམས་བཤེར་བྱེད་མགོ་བརྩམས་ཡོད་ཀྱང་། ད་ལྟའི་ཆར་ཐག་གཅོད་ཅི་བྱུང་གི་ཞིབ་ཕྲའི་གནས་ཚུལ་ཐོན་མེད་པ་རེད། སྐབས་དོན་དབྱེ་ཞིབ་པ་དག་གིས། ཧི་ཀོ་ཆང་གིས་རུལ་སུངས་པའི་མིང་བསྒྲགས་སྐབས། པའོ་ཞི་ལའེ་ཡི་མིང་དེ་ལིག་ཀྲི་ཅོན་དང་ཞིས་ཙུང་ཧིན་གཉིས་ཀྱི་སྔོན་ལ་བཞག་ཡོད་པ་དེས། པའོ་ཞི་ལའེ་ཡི་ཉེས་པ་དེ་གཉིས་ལས་ལྕི་བ་མཚོན་གྱི་ཡོད་པའི་ཚོད་དཔག་དང་། གྱོད་དོན་དེ་ནི་ཧི་དང་པའོ་དཔོན་རིགས་ཁྱིམ་རྒྱུད་དཔུང་ཁག་བར་གྱི་དམར་འཛིང་ཞིག་ཆགས་ཡོད་པ་མ་ཟད། ཅཱང་ཧྲང་ཧེ་ཤོག་ཁག་དང་། ཧུའུ་ཐཱོན་དབུས་གཞུང་། ཞིས་དཔོན་རྒྱུད་སྐུ་སྲས་ཚོགས་པ་སོགས་རྒྱ་གཞུང་དཔོན་རིགས་ནང་ཁུལ་གྱི་སྲིད་འབྱོར་ཁེ་དབང་འཐབ་རྩོད་དེ། ད་ལྟའི་ཆར་ཁྱོ་ཤི་ང་གསོན་གྱི་གནས་བབ་ཅིག་ལ་བསླེབས་ཡོད་པའི་ངོས་འཛིན་བྱེད་ཀྱིན་ཡོད་འདུག 

དེ་སྔོན་ཧི་ཀོ་ཆང་ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་ཡིན་པའི་སྐབས། ཁོས་བཀའ་རྒྱ་བཏང་སྟེ་རྒྱ་གཞུང་གསར་སྤེལ་དངུལ་ཁང་གི་མགོ་གཙོ་གཞོན་པ་ཝང་ཡུས་ཀྱི་གོ་གནས་ཕབ་པ་མ་ཟད། ཕྱི་ལོ་ ༢༠༡༠ ལོར་སྲོག་ཐོག་གི་ཁྲིམས་ཐག་བཅད་ཡོད་པ་རེད། ཝང་ཡུས་ནི་པའོ་ཞི་ལའེ་ཁྱིམ་རྒྱུད་དང་འབྲེལ་བ་དམ་ཟབ་ཡོད་འདུག 

༢༠༠༩ ལོར་ཁྲུང་ཆིན་གྲོང་ཁྱེར་དམར་ཤོག་དྲུང་ཆེ་པའོ་ཞི་ལའེ་ཡིས། ༼ནག་ཚོགས་ལ་རྡུང་རྡེག༽ ཅེས་པའི་ལས་འགུལ་སྤེལ་ཏེ། ཧི་ཀོ་ཆང་གི་བློ་ཐུབ་ལག་རོགས་དང་། དེ་སྔའི་ཁྲུང་ཆིན་གྲོང་ཁྱེར་ཁྲིམས་སྲིད་ལྷན་ཁང་གི་མགོ་གཙོ་ཝུན་ཆང་བཙོན་འཇུག་བྱས་ཏེ། ༢༠༡༠ ལོར་ཝུན་ཆང་ལ་སྲོག་ཁྲིམས་བཅད་ཡོད་པ་རེད།

གཞན་ཡང་། ཧི་ཀོ་ཆང་གི་བསྒྲགས་གཏམ་དེའི་ནང་།  ༢༠༠༧ ཕྱི་ཟླ་ ༡༡ ནས་ ༢༠༡༢ ཕྱི་ཟླ་ ༦ བར་རྒྱ་ནག་རྒྱལ་ཡོངས་རྩ་འཛུགས་ཞིབ་བཤེར་སྡེ་ཁག་གིས་ཁྱོན་བསྡོམས་གྱོད་དོན་ཁྲི་ ༦༤ ལ་ཞིབ་བཤེར་བྱས་པའི་ཁྲོད་ནས་ཁྲི་ ༦༣ རྩད་གཅོད་བྱུང་ཡོད་པ་དང་། དམར་ཤོག་པའི་རྩ་འཛུགས་དང་སྲིད་གཞུང་སྒྲིག་ཁྲིམས་ལྟར་མི་ ༦༦༠༠༠༠ ཉེས་ཆད་བཅད་ཡོད་ལ། མི་ ༢༤༠༠༠ ཁྲིམས་ཁང་དུ་བསྐྱལ་ཏེ་ཁྲིམས་གཅོད་བྱས་ཡོད་སྐོར་བཀོད་འདུག