གཅན་ཚར་ངོ་རྒོལ་སྦྱར་ཡིག

མདོ་སྨད་གཅན་ཚའི་མདའ་རྩེད་འགྲན་བསྡུར་སྐབས། བོད་མི་ཚོས་རྫོང་གི་སྲང་ལམ་གཡས་གཡོན་སོགས་སུ་སྦྱར་ཡིག་དང་པར་རིས་འདྲ་མིན་སྦྱར་འགྲེམས་ཀྱིས་ངོ་རྒོལ་བྱས་ཡོད་འདུག 

འདི་ལོའི་ཕྱི་ཟླ་ ༩ པའི་ཚེས་ ༨  ནས་ ༡༡  བར་མཚོ་སྔོན་ཞིང་ཆེན་རྨ་ལྷོ་ཁུལ་གཅན་ཚ་རྫོང་མར་ཁུ་ཐང་གྲོང་རྡལ་དུ་ ༢༠༡༢ ལོའི་གཙན་ཚའི་གཡང་མདའ་རྟགས་མའི་རྒྱལ་སྤྱིའི་མི་རིགས་སྲོལ་རྒྱུན་མདའ་རྩེད་གདན་ཞུ་འགྲན་བསྡུར་སྐབས་གཉིས་པ་དང་མདའ་རྩེད་དུས་སྟོན། གཡང་མདའ་རྟགས་མའི་རྒྱ་ནག་སློབ་ཆེན་སློབ་མའི་སྲོལ་རྒྱུན་མདའ་རྩེད་འགྲན་བསྡུར་སྐབས་དང་པོ་བསྡུས་ཏེ། རྒྱལ་སྤྱི་དང་རྒྱལ་ནང་གི་འགྲན་ཞུགས་རུ་ཁག་ ༤༧ ལྷག་མཉམ་ཞུགས་དང་ལྟད་མོ་བ་སྟོང་ཕྲག་མང་པོ་འདུ་འཛོམས་བྱུང་ཡོད་པ་ལྟར། སྐབས་དེར་རྒྱ་གཞུང་གིས་ས་གནས་བོད་མི་ཚོར་གཅན་གཟན་གྱི་པགས་རིགས་ཡོད་པའི་གྱོན་གོས་དང་། གཡུ་བྱུར་སོགས་ཀྱི་རྒྱན་ཆ་སོགས་བཏགས་ཏེ་དུས་སྟོན་ཐོག་ཞུགས་དགོས་པའི་བཀའ་བཏང་ཡོད་པ་མ་ཟད། གལ་ཏེ། མི་མང་གིས་གོང་རིམ་གྱི་བཀའ་དང་ལེན་མ་བྱས་ཚེ་ས་གནས་ཀྱི་རོགས་རམ་ཁག་འགོག་རྒྱུ་ཡིན་པའི་ཉེན་བརྡ་བཏང་སྟབས། བོད་མི་མང་པོ་ཞིག་གིས་དུས་སྟོན་ཐོག་གཟབ་མཆོར་སྤྲས་པའི་གནས་ཚུལ་བྱུང་ཡོད་ཀྱང་། ས་གནས་བོད་མི་ཁག་ཅིག་གིས་མི་འདོད་པའི་རྣམ་འགྱུར་བསྟན་ཏེ་སྲང་ལམ་གཡས་གཡོན་གྱི་གྱང་ངོས་སོགས་སུ་སྦྱར་ཡིག་དང་པར་རིས་སྦྱར་འགྲེམས་ཀྱིས་ངོ་རྒོལ་བྱས་ཡོད་འདུག

སྐབས་དེར་སྦྱར་འགྲེམས་བྱས་པའི་ཡི་གེའི་ནང་། “ མི་རིགས་དང་རྒྱལ་ཁབ། འཛམ་གླིང་ཞི་བདེའི་ཆེད་དུ་སྟག་མོ་ལུས་སྦྱིན་བཞིན་རང་ཉིད་ཀྱི་ཚེ་སྲོག་ཕུལ་མཁན་དེ་སུ་རེད་དམ། དེ་དག་གཞན་མ་ཡིན་པར་ཕ་སྦྲེའུ་བྱང་ཆུབ་སེམས་དཔའ་དང་མ་བྲག་སྲིན་ལས་མཆེད་པའི་ང་ཚོ་བོད་རིཊ་སྤུན་ཟླ་ཚོ་མ་ཡིན་ནམ། བོད་པའི་མི་ཞིག་འཇིག་རྟེན་དང་ཁ་བྲལ་ཚེ་ཤ་ཉེ་རིང་ནི་སྨྲོས་མ་དགོས་པར། སྡེ་བ་ཚོས་ཀྱང་གླུ་ལེན་གར་རྩེད་དང་རྟ་རྒྱུགས་མདའ་འཕེན་ལ་སོགས་དགའ་སྟོན་ལ་མི་རོལ་བར་མྱ་ངན་བྱེད་པ་ནི། ང་ཚོ་བོད་པ་ཚོས་གནའ་ནས་ད་ལྟའི་བར་གྱི་གོམས་སྲོལ་ཡིན། འགྲོ་བ་མིའི་རིགས་ཀྱི་ཆེད་དུ་ཚེ་སྲོག་སྦྱིན་པའི་སྐྱེས་ཆེན་དམ་པ་དེ་དག་ལ་མྱ་ངན་མི་བྱེད་དོན་ཅི། ཁྱེད་ཚོས་རང་ཉིད་དེ་དག་དང་འབྲེལ་བ་མེད་པར་འདོད་པ་ཨེ་ཡིན། གལ་ཏེ་ཡིན་ན་ཞིབ་འདང་ཞིག་རྒྱོབས་དང་། ཁྱེད་ཚོ་ནོར་ཡོད་པ་ཐག་ཆོད་ཡིན།

རྒྱུ་མཚན་ནི། གཅིག་སྐྱེས་ཆེན་དམ་པ་དེ་དག་གིས་འགྲོ་བ་མིའི་རིགས་ཀྱི་ཞི་བདེ་རྩོད་ལེན་ཆེད་རང་ཉིད་གསོན་པའི་ལུས་པོ་མཆོད་མེར་བསྒྲོན། འགྲོ་བ་མིའི་རིགས་ཀྱི་ནང་དུ་ཁྱེད་རང་ཡང་འདུ་བས། ཁོང་ཚོ་ཁྱེད་ཀྱི་དོན་དུ་སྐུ་གཤེགས་སོང་ཟེར་ན་མི་ཆོག་པ་མེད། གཉིས། ང་ཚོ་ནང་ཆོས་ལ་དད་པ་བྱེད་མཁན་ཡིན་པས། ལས་རྒྱུ་འབྲས་ལ་སུས་ཀྱང་ཁས་ལེན་བྱེད། དེ་བས་ཕྱོགས་གང་ནས་བལྟས་ཀྱང་ང་ཚོས་ཁོང་ཆོར་མྱ་ངན་བྱེད་རྒྱུ་ལས་གླུ་ལེན་པ་དང་བྲོ་འཁྲབ་པ། མདའ་འཕེན་པ་དང་རྒྱན་གོས་ངོམ་པའི་ལས་སུ་ཞུགས་ན། དེ་ནི་མི་རིགས་ཀྱི་ཞབས་འདྲེན་མ་ཡིན་ནམ། རང་ཉིད་ཀྱི་ཕ་མ་མིང་སྲིང་ལ་སོགས་སྐུ་གཤེགས་ནའང་མྱ་ངན་མི་བྱེད་པར་མདའ་སྟོན་བྱེད་དོན་ཅི། རྒྱུ་ཚོགས་ངན་པ་བསགས་ན་འབྲས་བུ་རྣམ་སྨིན་འཁོར་བའི་ཁྱེད་རང་དམྱལ་བར་མི་ལྷུང་བའི་ངེས་པ་ག་ལ་ཡོད། ཁྱེད་ཚོས་དེ་དག་ཁས་ལེན་མི་འདོད་ནའང་མ་བླངས་ཀྱང་ཆོག་མོད། བོད་རིགས་མི་མང་ལ་ཕྱོགས་གང་ནས་བྱས་རྗེས་བླ་མེད་འཇོག་མཁན་༸པཎ་ཆེན་སྐུ་ཕྲེང་བཅུ་བ་ཆོས་ཀྱི་རྒྱལ་མཚན་མཆོག་ཁས་མི་ལེན་པ་ཞིག་གང་ན་ཡོད། ཁོང་གི་མ་ཡུམ་བསོད་ནམས་སྒྲོལ་མ་སྐུ་གཤེགས་ནས་ཅང་འགོར་མེད་པས། དེ་ལའང་མྱ་ངན་མི་བྱེད་ག་ལ་ཟེར། བརྒྱ་བཤད་ཚིག་གི་རྩ་བ་ནི་ད་ལོ་ང་ཚོར་དགའ་སྟོན་ལ་རོལ་བའི་སྐལ་བ་མེད་པས། གཞན་གྱིས་ཁ་ལ་ཉན་ནས་བཙན་ཚུགས་ཀྱིས་དགའ་སྟོན་ལ་རོལ་དགོས་པའི་རྒྱུ་མཚན་གང་ཡང་མེད་ལ། རྟ་འདོ་བ་ཞིག་ལ་རྒྱུགས་ལུཊ་ཤིག་དང་། བུ་སྣབས་ལུགས་ཤིག་ལ་རང་ལུགས་ཤིག་ཟེར་བའི་དཔེ་བཞིན། བོད་ཅིག་ཡིན་ཚེ་རང་ལུཊ་དགོས། ཀ་ཡེ་ཉོན་དང་བོད་ཀྱི་བུ་ཕྲུག་ཚོ། ག་ཡིན་འདི་ཡིན་མིན་པའི་ལས་མ་བྱེད། ཁ་བའི་ལྗོངས་ཀྱི་སྟག་ཤར་ཡིན་ཟེར་ན། ང་ཅག་བོད་པ་ཚང་གི་རྣ་མ་གཅོད། ”ཅེས་སོགས་འཁོད་འདུག

གཞན། སྐབས་དེར་གློག་ཀླད་ནང་བཟོས་པའི་འདྲ་པར། མདའ་འཕེན་མཁན་ཚོའི་མགོར་ཁྱི་མགོ་བཞག་ཡོད་པ་མ་ཟད། དེའི་སྟེང་།  “ རྒྱལ་ལོ། རྒྱལ་ལོ།  གུང་ཁྲན་ཏང་ཕ་མ་འདྲ་བོ་རྒྱལ་ལོ། ” ཞེས་བྲིས་འདུག་ལ། རྒྱན་གོས་ངོམས་མཁན་ཚོའི་མགོར་ཝ་མགོ་བཞག་ཏེ། དེའི་སྟེང་། “ ཁྱེད་ཀྱི་དྲིན་ལ་ང་ཚོ་ལྗིད་ཏིག་ཏིག ” ཅེས་དྲིས་པའི་འདྲ་པར་དང་སྦྱར་ཡིག་སོགས་སྲང་ལམ་གཡས་གཡོན་གྱི་གྱང་ངོས་དང་གློག་སྡོང་ངོས་སོགས་སུ་སྤྱར་འགྲེམས་བྱས་ཡོད་འདུག