ཁ་སང་རྒྱ་ནག་རྩོམ་པ་པོ་མའོ་ཡཱན་ལ་ནོ་སྦེལ་རྩོམ་རིག་གཟེངས་རྟགས་ཐོབ་པ་བསྒྲགས་རྗེས། རྒྱའི་སྒེར་གཅོད་སྲིད་དབང་འོག་མནར་གཅོད་ཕོག་མྱོང་མཁན་རྒྱ་རིགས་རྩོམ་པ་པོ་མང་པོར་བློ་ཕམ་བྱུང་ཡོད་འདུག
ཁ་སང་ཕྱི་ཚེས་ ༡༡ ཉིན། སི་ཝེ་ཌེན་(Sweden) རྩོམ་རིག་གླིང་གི་ནོ་སྦེལ་རྩོམ་རིག་གཟེངས་རྟགས་དཔྱད་འདེམས་ལྷན་ཚོགས་ཀྱིས། རྒྱ་ནག་གི་རྩོམ་པ་པོ་མའོ་ཡཱན་ལ་ ༢༠༡༢ ལོའི་ནོ་སྦེལ་རྩོམ་རིག་བྱ་དགའ་ཐོབ་ཡོད་པ་བསྒྲགས་རྗེས། འདས་པའི་ལོ་གཉིས་ཀྱི་སྔོན་ལ་རྒྱ་རིགས་རྩོམ་པ་པོ་ལིག་ཞའོ་པའོ་ལ་ནོ་སྦེལ་ཞི་བདེ་གཟེངས་རྟགས་ཐོབ་པའི་སྐབས་དང་མ་འདྲ་བར། རྒྱ་གཞུང་གསར་ལམ་ཁག་གིས་རྒྱ་ནག་སྤྱི་ཚོགས་ནང་དྲིལ་བསྒྲགས་ཤུགས་ཆེན་བྱས་ཡོད་འདུག་ལ། ལོ་སྔོན་མར་ཨ་རིར་བྲོས་བྱོལ་དུ་འབྱོར་བའི་རྒྱ་རིགས་རྩོམ་པ་པོ་ཡུས་ཅའེ་ལགས་ཀྱིས། སྒེར་གཅོད་པར་བསྟོད་བསྔགས་བྱེད་མཁན་ཞིག་ལ་གཟེངས་རྟགས་སྤྲད་པ་དེ་ནི། ནོ་སྦེལ་རྩོམ་རིག་གཟེངས་རྟགས་ཀྱི་ལོ་རྒྱུས་ནང་ཆེས་ཞབས་འདྲེན་གྱི་གནས་ཚུལ་དེ་ཆགས་ཡོད་པའི་སྐྱོན་བརྗོད་བྱས་འདུག
རྒྱ་རིགས་རྩོམ་པ་པོ་མའོ་ཡཱན་ལ་འདི་ལོའི་ནོ་སྦེལ་རྩོམ་རིགས་གཟེངས་རྟགས་ཐོབ་པའི་རྗེས། རྒྱ་གཞུང་གིས་དེ་སྔོན་རྒྱ་ནག་ནང་བཀག་སྡོམ་བྱས་ཡོད་པའི་ནོ་སྦེལ་གཟེངས་རྟགས་ཀྱི་དྲ་རྒྱ་བསྐྱར་དུ་སྒོ་འབྱེད་ཡོད་པ་རེད། ཡིན་ནའང་། ༡༩༨༩ ལོར་ནོ་སྦེལ་ཞི་བདེ་གཟེངས་རྟགས་བཞེས་མཁན་བོད་ཀྱི་དབུ་ཁྲིད་༸གོང་ས་མཆོག་དང་། ༢༠༡༠ ལོར་ནོ་སྦེལ་ཞི་བདེ་གཟེངས་རྟགས་ཐོབ་མཁན་རྒྱ་རིགས་རྩོམ་པ་པོ་ལིག་ཞོ་པའོ། ༢༠༠༠ ལོར་ནོ་སྦེལ་རྩོམ་རིག་བྱ་དགའ་ཐོབ་མཁན་ཕྱི་སྡོད་རྒྱ་རིགས་རྩོམ་པ་པོ་ཀའོ་ཞན་ཅེན་གསུམ་གྱི་གནས་ཚུལ་སྔར་བཞིན་བཀག་སྡོམ་བྱས་ཡོད་འདུག
༢༠༠༩ ལོར་འཇར་མན་གྱི་ཧྥ་རན་ཁི་ཧྥའོ་ཋི་ (Frankfurt Book Fair) དཔེ་དེབ་འགྲེམས་སྟོན་སྐབས། མའོ་ཡཱན་རྒྱ་ནག་གཞུང་འབྲེལ་རྩོམ་པ་པོའི་མིང་ཐོག་ནས་མཉམ་ཞུགས་ཆེད་བསླེབས་ཡོད་ཀྱང་། རྒྱ་གཞུང་དང་ལྟ་བ་མི་མཐུན་པའི་རྩོམ་པ་པོ་པའེ་ལིན་དང་ཏའེ་ཆིན་གཉིས་ཚོགས་འདུར་མགྲོན་འབོད་བྱས་པར་ངོ་རྒོལ་གྱིས་འགྲེམས་སྟོན་དེར་མཉམ་ཞུགས་བྱས་མེད་པ་རེད། དེ་བཞིན། ༢༠༠༩ ལོར་ལིག་ཞོ་པའོ་བཙོན་འཇུག་ཁྲིམས་ཐག་བཅད་རྗེས། པེ་ཅིན་གློག་བརྙན་གཙུག་ལག་སློབ་ཆེན་ཀྱི་དགེ་རྒན་ཆེན་མོ་ཚའེ་ཝེ་ཕིན་གྱིས། ཁ་པར་བརྒྱུད་བཅར་འདྲི་བྱས་ཏེ་རྒྱ་གཞུང་གིས་ལིག་ཞོ་པའོ་བཙོན་འཇུག་བྱས་པའི་གནས་སྟངས་ཐད་ཤེས་ལྡན་པ་དག་ལ་དཔྱད་བརྗོད་བསྡུ་ལེན་བྱས་སྐབས། མའོ་ཡུས་ཀྱིས་ཁོའི་ཁྱིམ་དུ་མགྲོན་པོ་ཡོད་པར་ཁ་གཡར་ཏེ་དང་ལེན་བྱས་མེད་པ་རེད། ༢༠༡༢ ཕྱི་ཟླ་ ༥ ནང་རྒྱ་གཞུང་རྩོམ་པ་པོའི་མཐུན་ཚོགས་ཀྱི་པར་སྐྲུན་ཁང་གིས། མའོ་ཙེ་ཏུང་གི་ཡཱན་ཨན་རིག་གནས་སྒྱུ་རྩལ་གཏམ་གླེང་ཚོགས་འདུའི་ཐོག་བཤད་པའི་སྐད་ཆ་དག་རྩོམ་པ་པོ་ ༡༠༠ ཡིས་བཤུ་འབྲི་བྱས་པ་ཕྱོགས་སྒྲིག་གི་དེབ་ཅིག་བཏོན་ཡོད་པའི་ནང་མའོ་ཡཱན་ཀྱང་གཙོ་གྲས་སུ་ཚུད་ཡོད་པ་རེད།
འདི་ལོ་ཨ་རིར་བྲོས་བྱོལ་དུ་བསླེབས་པའི་རྒྱ་རིགས་རྩོམ་པ་པོ་ཡུས་ཅའེ་ཡིས། “ གལ་སྲིད། ནུབ་ཕྱོགས་སྤྱི་ཚོགས་ནང་རྩོམ་པ་པོ་གང་རུང་ཞིག་གིས་ཞི་ཐི་ལི་ལ་བསྟོད་བསྔགས་བྱས་ཚེ། ཁོ་ལ་གཟེངས་རྟགས་དེ་ཐོབ་མི་སྲིད་པ་ནི་འཛམ་གླིང་སྤྱི་ཡོངས་ཀྱི་གཞི་རྩའི་རྒྱུན་ཤེས་ཤིག་ཆགས་ཡོད་པ་རེད། ཡིན་ནའང་། མའོ་ཙེ་ཏུང་ལ་བསྟོད་བསྔགས་བྱེད་མཁན་རྒྱ་རིགས་རྩོམ་པ་པོ་ཞིག་ལ་གཟེངས་རྟགས་དེ་སྤྲད་ཡོད་པ་རེད། མའོ་ཡིས་འགྲོ་བ་མིའི་རིགས་ཀྱི་ཚེ་སྲོག་འཕྲོག་པའི་གྲངས་འབོར་ནི་སི་ཏ་ལེན་དང་ཞི་ཐི་ལི་གཉིས་ལ་ཆེས་ཆེར་བརྒལ་ཡོད་པ་རེད། དེ་གཉིས་ཕན་ཚུན་གཤིབ་བསྡུར་གྱི་ཐོག་ནས་བལྟས་ཚེ་ནུབ་ཕྱོགས་སྤྱི་ཚོགས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་སྣང་མེད་གཏོང་བཞིན་པ་མཐོང་ཐུབ། འདི་ནི་ཆབ་སྲིད་ཀྱི་ལངས་ཕྱོགས་གཅིག་པུའི་ངོས་ཐད་ཙམ་མ་ཡིན་པར། འགྲོ་བ་མིའི་ཐོབ་ཐང་དང་རང་དབང་། དམངས་གཙོ་བཅས་འཛམ་གླིང་གི་ཡོངས་ཁྱབ་རིན་ཐང་གི་ངོས་ནས་ཀྱང་རྒྱབ་འགལ་དུ་གྱུར་ཡོད། ནོ་སྦེལ་རྩོམ་རིག་གཟེངས་རྟགས་མའོ་ཡཱན་ལ་སྤྲད་པ་དེ་ནི་ཧ་ཅང་དགོད་བྲོ་བའི་མཇུག་འབྲས་ཤིག་རེད།” ཅེས་བརྗོད་དེ། རྩོམ་རིག་རྐྱང་པའི་ངོས་ཐད་ནས་མའོ་ཡཱན་གྱི་བརྩམས་ཆོས་དག་ནི། དེང་སྐབས་རྒྱ་ནག་ནང་ཡོད་པའི་རྩོམ་པ་པོ་གང་མང་ཞིག་དང་བསྡུར་ཐབས་མེད་པ་མ་ཟད། རྒྱའི་སྐད་ཡིག་གི་གསར་གཏོད་རྣམ་པའི་གྲུབ་འབྲས་ཀྱི་ཆ་ནས་བལྟས་པ་ཡིན་ནའང་། མའོ་ཡཱན་གྱི་བརྩམས་ཆོས་ཁྲོད་དྲག་སྤྱོད་དང་འདོད་སྲེད་ཀྱི་རྙོག་མ་འདྲེས་ཏེ་སྐད་ཡིག་གི་མཛེས་ཚོར་གྱི་རྣམ་པ་བོར་ཡོད་པ་ཐེར་འདོན་བྱས་ཡོད་འདུག
མའོ་ཡཱན་ནི་ ༡༩༥༥ ལོར་རྒྱ་ནག་ཧྲན་ཏུང་ཀོ་མིས་གྲོང་ཁྱེར་ཏཱ་ལེན་ཞང་དུ་སྐྱེས་པ་དང་། ༡༩༧༦ ལོར་རྒྱ་ནག་བཅིངས་གྲོལ་དམག་ནང་ཞུགས་ཏེ། རུ་དཔོན་དང་གསང་གཉེར་བ། གཙོ་འགན་པ་བཅས་བྱས་ཡོད་པ་དང་། ༡༩༨༦ ལོར་བཅིངས་འགྲོལ་དམག་སྒྱུ་རྩལ་སློབ་གླིང་གི་རྩོམ་རིག་སྡེ་ཚན་ནས་སློབ་མཐར་ཕྱིན་ཡོད་ལ། ད་ལྟ་རྒྱ་ནག་རྩོམ་པ་པོའི་མཐུན་ཚོགས་ཀྱི་དྲུང་ཆེ་གཞོན་པ་ཡིན་འདུག ༢༠༡༡ ལོར་ཁོ་རང་གི་སྒྲུང་རིང་༼སྦལ་བ༽ལ་སྐབས་བརྒྱད་པའི་མའོ་ཏོན་རྩོམ་རིག་བྱ་དགའ་སྤྲད་ཡོད་པ་རེད། མའོ་ཡཱན་གྱིས་ཁོ་རང་ལ་ནོ་སྦེལ་རྩོམ་རིག་གཟེངས་རྟགས་ཐོབ་པའི་རྗེས་རྒྱ་གཞུང་ཤིན་ཧྭ་གསར་ཁང་གི་བཅར་འདྲི་དང་ལེན་བྱས་ཐོག མུ་མཐུད་དུ་གསར་རྩོམ་གྱི་ཕྱོགས་ལ་འབད་པ་བྱ་རྒྱུ་ཡིན་ཚུལ་བརྗོད་འདུག ཡིན་ནའང་། འཇར་མན་རླུང་འཕྲིན་གིས་ཁོ་ལ་ཐད་ཀར་བཅར་འདྲི་བྱེད་ཐུབ་མེད་པ་རེད།
འཇར་མན་སྤྱི་ཚོགས་རིག་གནས་ཀྱི་ཆེས་མཐོའི་གཟེངས་རྟགས་ཐོབ་མཁན་ལེའོ་ཡུས་ཝུ་ཡིས། འདི་ལོའི་ནོ་སྦེལ་རྩོམ་རིག་གཟེངས་རྟགས་དཔྱད་འདེམས་བྱེད་སྟངས་ནི། སྲིད་གཞུང་ཕན་ཚུན་བར་སྙོམས་སྒྲིག་བྱེད་ཐབས་ཤིག་ཏུ་གྱུར་ཡོད་ལ། ལོ་གཉིས་ཀྱི་སྔོན་དུ་ལིག་ཞོ་པའོ་ལ་ཞི་བདེ་གཟེངས་རྟགས་ཕུལ་བའི་གནོན་ཤུགས་དེ། འདི་ལོ་མའོ་ཡཱན་ལ་རྩོམ་རིག་གཟེངས་རྟགས་སྤྲད་ནས་ཞི་འཇགས་བཟོས་པ་ཞིག་ལ་ངོས་འཛིན་བྱས་ཡོད། དེ་བཞིན། ཡུས་ཅའེ་ཡིས་ཀྱང་རྒྱ་གཞུང་གིས་ནོ་སྦེལ་གཟེངས་རྟགས་དཔྱད་འདེམས་ལྷན་ཚོགས་ལ་གནོན་ཤུགས་སྤྲད་པ་ལ་བརྟེན་ནས་བྱུང་བ་ཞིག་ཡིན་པར་བརྗོད་འདུག པེ་ཅིན་གློག་བརྙན་གཙུག་ལག་སློབ་གླིང་གི་དགེ་རྒན་ཆེན་མོ་ཚའེ་ཝེ་ཕིན་ཀྱིས། “ ངན་རྒྱབ་དཔུང་འདེགས་བྱེད་པའི་འཛམ་གླིང་འདིར། དེ་ནི་བཙོན་འོག་ཏུ་མནར་གཅོད་མྱོང་བཞིན་པའི་རྩོམ་པ་པོ་རྣམས་དང་། སྔོག་བཤེར་བཀག་སྡོམ་གྱི་གནོན་ཤུགས་འོག་ལྷག་པའི་མི་མང་ལ་གནག་སེམས་ཀྱི་རྒོལ་བ་ཆེན་པོ་ཞིག་ཆགས་ཡོད། ” ཅེས་བརྗོད་འདུག
སི་ཝེ་ཌེན་གྱི་ནོ་སྦེལ་རྩོམ་རིག་གཟེངས་རྟགས་དཔྱད་འདེམས་ལྷན་ཚོགས་ལ་མི་ ༡༨ ཡོད་པའི་ཁྲོད་ནས། རྒྱའི་རིག་གནས་ལ་ཞིབ་འཇུག་དང་རྒྱུས་མངའ་ཡོད་མཁན་ནི། ད་ལྟ་ལོ་ ༧༦ ཡིན་པའི་ཇའོ་རན་མའེ་ལམ་ཁའེ་སི་ཋི་ (Goeran Malmqvist) ཆགས་ཡོད་འདུག ཁོ་ནི་ ༡༩༤༨ ལོར་རྒྱ་ནག་ཟི་ཁྲོན་དུ་རྒྱའི་སྐད་ཡིག་ཉམས་ཞིབ་ཆེད་བསྐྱོད་ཡོད་པ་མ་ཟད། རིག་གསར་སྐབས་རྒྱ་ནག་ནང་ལས་ཀ་བྱས་ཏེ་བསྡད་མྱོང་ཡོད་འདུག ཁོའི་ཆུང་མ་དང་པོ་རྒྱ་མོ་ཁྲིན་ཉཱིན་ཙུའུ་ ༡༩༩༦ ལོར་འདས་རྗེས། ༢༠༠༥ ལོར་རྒྱ་ནག་ཧྲན་ཞི་རུ་ཐེ་ཝན་གྱི་གསར་འགོད་ལས་གཉེར་བ་ཁྲིན་ཝུན་ཧྥུན་དང་བསྐྱར་དུ་གཉེན་སྒྲིག་ཡོད་འདུག
སི་ཝེ་ཌེན་གྱིས་ ༡༩༥༠ ལོའི་ཟླ་ ༡ ཚེས་ ༡༤ ཉིན་རྒྱ་ནག་དམར་ཤོག་ཚོགས་པའི་དབང་སྒྱུར་འོག་ཡོད་པའི་རྒྱལ་ཁབ་དེ་ངོས་ལེན་བྱས་ཡོད་པ་དང་། ལོ་དེའི་ཕྱི་ཟླ་ ༥ ཚེས་ ༩ ཉིན་རྒྱ་གཞུང་དང་འབྲེལ་བ་བཙུགས་ཡོད་ལ། དེ་ནི་ནུབ་ཕྱོགས་རྒྱལ་ཁབ་ཁག་གི་ནང་ཐོག་དང་པོར་རྒྱ་ནག་དམར་ཤོག་གཞུང་ལ་རྒྱལ་ཁབ་ཀྱིས་འབྲེལ་བ་འཛུགས་མཁན་དེ་ཆགས་ཡོད།
མའོ་ལ་སྤྲད་པའི་རྔན་པ་དེ་གཟེངས་རྟགས་སེ་ག་ཡང་མ་རེད། འདི་རྔན་པ་ཞིག་རེད། རྒྱ་ཡིས་ཉོས། ནོ་སྦེལ་གྱིས་བཙོང་། འོ་ཡ་ད་ང་ཚོ་རྩམ་གཟན་ཚོ་ཡང་གཟབ་དགོས་པ་ཅི་མི་མཐོང་། མི་རིགས་བཙན་དབང་འོག་མནར་གཅོད་མྱོང་བ་ནི་ཉིན་མ་རེ་རེར་ཡི་དོན་ཡིན་པ་ལས་གཞན་ག་ཡང་མིན་ དེ་བརྟེན་རང་ནུས་ཀྱི་མེ་ཕུང་སྦྱིན་པ་ནི་བདག་ཅག་སྟོད་པས་སྟག་མོར་ལུས་སྦྱིན་དང་ཅི་མི་ཁྱད།
ཧིཊ་ལར་དང་སི་ཏྰ་ལིན་གཉིས་བསྡོམས་ནས། དེ་ལས་ལྷག་པའི་མི་གསོད་མཁན་རྒྱ་མི་མའོ་ཡིས་མི་གསོད་ཁྲག་སྦྱོར་བྱེད་མཁན་ཡིན་པ་དེ། རྒྱ་རིགས་རང་གི་རྩོམ་པ་པོས་ཁ་ཐོན་པ་འདིས། ད་ལྟའི་རྒྱ་གཞུང་ལ་ཡང་འགྲམ་ལྕག་ཚ་ཐག་གཅོད་ཅིག་ཞུས་པ་གཅིག་པ་མ་རེད་པེ། ཧ་ཧ་ཧ།
འདི་ལོ་ནོ་སྤེལ་རྩོམ་རིག་གཟེངས་རྟགས་དེ་སྒེར་གཅོད་ལམ་ལུག་ལ་བསྔགས་བརྗོད་བྱེད་མཁན་རྩོམ་པ་པོ་མའོ་ཡཱན་ལ་ཐོབ་པ་དེའི་ རྒྱའི་སྒེར་གཅོད་སྲིད་དབང་འོག་མནར་གཅོད་ཕོག་མྱོང་མཁན་རྒྱ་རིགས་རྩོམ་པ་པོ་མང་པོར་བློ་ཕམ་བྱུང་ཡོད་
ཁོ་བྲོས་བྱོད་དུ་མ་སོང་གོང་རྒྱ་ནག་གཞུང་དང་འབྲེལ་བ་ཡོད་པའི་གནས་ཚུལ་ཞིག་ཅང་འདུག
ད་སྐྱོན་བརྗོད་འདྲ་བྱས་ནས་སྡོད་པ་ལས་མདོ་དོན་རྡོག་རྡོག་དེ་ཤེས་རྒྱུ་ཧ་ཅང་གི་གལ་ཆེན་རེད། དེ་ལྟར་བོད་དོན་ལའང་གོ་བ་གསར་བ་ཞིག་ལོན་ཐུབ་པར་སྣང་། རྒྱ་རིགས་རྩོམ་པ་པོ་འདིར་ད་ལོ་ནའོ་པེལ་རྩོམ་རིགས་རྟགས་མ་རེག་གི་རེད་ཅེས་ཟླ་ཁ་ཤས་སྔོན་ནས་གླེང་གི་འདུག ཁོང་གི་བརྩམས་ཆོས་གསུམ་རྒྱ་ཡིག་ལས་ཕར་བསྒྱུར་སྐབས་བསྒྱུར་གླ་འབོར་ཆེན་ཞིག་སྤྲད་ཡོད་པ་དང་རྒྱ་ནག་གཞུང་གིས་རྒྱབ་ལོགས་སུ་ལས་ཀ་ཤུགས་ཆེན་ལས་ཡོད་པ་གསལ་བོ་རེད། ནུབ་ཕྱོགས་པ་ཚོས་ད་ལོ་རྟགས་མ་འདི་ཅིའི་ཕྱིར་དམར་ཤོག་དཔོན་རིགས་རྩོམ་པ་པོ་ཞིག་ལ་སྤྲད་དགོས་པ་རེད་དམ་ཞེ་ན། ད་ལྟའི་རྒྱ་གཞུང་ནི་ནུབ་ཕྱོགས་ཀྱི་ཕྱུག་པོ་དང་དཔོན་རིགས་ཁྱིམ་རྒྱུད་ཀྱིས་དངུལ་དངོས་བཟོ་ས་ཡག་ཤོས་དེ་ཆགས་ཡོད་པས། རྒྱ་ནག་ནང་སྔར་བྱུང་མ་མྱོང་བའི་དབང་ཆ་འཐབ་རྩོད་ད་ལོ་བྱུང་བར་བརྟེན་ནས་གུང་ཁྲན་ཏང་ཉེན་ཁ་དེ་ལས་གཞོལ་ཐབས་ཀྱི་རོགས་འདེགས་རེད། ནུབ་ཕྱོགས་ཀྱི་རྩ་བའི་བྱེད་སྟངས་འདི་རྡ་རམ་ས་ལ། རྒྱ་ནག་མང་གཙོ་དོན་གཉེར་བ། ཤར་ཏིར་ཀི་སི་ཐན་གྲོས་ཚོགས་སོགས་ཀྱི་མགོ་ལའང་མི་མངོན་པའི་ལམ་ནས་བཙན་འགེལ་བྱས་ཡོད་པ་རེད། གལ་སྲིད་ཁ་མ་ཉན་པ་ཡིན་ན། རོགས་དངུལ་སྤྲད་ཀྱི་མ་རེད། མདོར་བསྡུས་བཤད་ན། རྒྱལ་སྤྱིའི་ནོར་ཞེན་ཅན་དང་རྒྱ་ནག་དབང་ཞེན་ཅན་གྱི་མནའ་འབྲེལ་གསར་བ་ཞིག་ཆགས་ཚར་ཡོད་པས། ཕྱི་ཚུལ་དུ་ག་ལེར་མང་གཙོར་བསྐུལ་འདེད་གཏོང་བཞིན་པ་ལྟ་བུར་མངོན་ནའང་། དོན་ལ་རྒྱ་གཞུང་མུ་མཐུད་དུ་གནས་པར་རྒྱབ་བསྐྱོར་རྒྱག་གི་ཡོད་པ་རེད། གནས་སྟངས་འདི་ག་དུས་རྒྱ་ནག་ནང་དངུལ་དངོས་བཟོ་མི་ཐུབ་པའི་དུས་སུ་འགྱུར་བ་ཏན་ཏན་བྱུང་གི་རེད། དེའི་ཡར་སྔོན་འདི་ལྟར་མཁྲེགས་བསྐྱོར་བྱེད་བསམ་གྱི་ཡོད་པ་རེད། ད་མཁྱེན་སོང་ངམ།
་་་་་ མའོ་ཡིས་འགྲོ་བ་མིའི་རིགས་ཀྱི་ཚེ་སྲོག་འཕྲོག་པའི་གྲངས་འབོར་ནི་སི་ཏ་ལེན་དང་ཞི་ཐི་ལི་གཉིས་ལ་ཆེས་ཆེར་བརྒལ་ཡོད་པ་རེད། དེ་གཉིས་ཕན་ཚུན་གཤིབ་བསྡུར་གྱི་ཐོག་ནས་བལྟས་ཚེ་ནུབ་ཕྱོགས་སྤྱི་ཚོགས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་སྣང་མེད་གཏོང་བཞིན་པ་མཐོང་ཐུབ། ་་་ཟེར།
་་་་ ལོ་སྔོན་མར་ཨ་རིར་བྲོས་བྱོལ་དུ་འབྱོར་བའི་རྒྱ་རིགས་རྩོམ་པ་པོ་ཡུས་ཅའེ་ལགས་ཀྱིས། སྒེར་གཅོད་པར་བསྟོད་བསྔགས་བྱེད་མཁན་ཞིག་ལ་གཟེངས་རྟགས་སྤྲད་པ་དེ་ནི། ནོ་སྦེལ་རྩོམ་རིག་གཟེངས་རྟགས་ཀྱི་ལོ་རྒྱུས་ནང་ཆེས་ཞབས་འདྲེན་གྱི་གནས་ཚུལ་དེ་ཆགས་ཡོད་པའི་སྐྱོན་བརྗོད་བྱས་འདུག ་་ཟེར།