ཧི་མ་ལ་ཡའི་མཛངས་མའི་བོད་དོན་ལས་འགུལ།

དེ་རིང་ཉིན་རྒྱབ་དྷ་སར་བོད་དོན་ལས་འགུལ་བ་མཱ་ཧེ་ཤ་དང་ཁོང་གིས་ཉེ་ཆར་གོ་སྒྲིག་བྱས་པའི་ཧི་མ་ལ་ཡའི་མཛངས་མའི་འགྲན་བསྡུར་ཁྲོད་ཨང་དང་པོ་ཐོབ་མཁན་ནེ་ཧཱ་གཉིས་ཀྱིས་ལས་འགུལ་སྤེལ་སོང་།

དེ་རིང་ཕྱི་ཚེས་ ༡༢ ཉིན་རྒྱབ་ཆུ་ཚོད་ ༢ པའི་སྟེང་མེག་གྷན་རླངས་འཁོར་འབབ་ཚུགས་སུ། རྒྱ་གར་བོད་དོན་ལས་འགུལ་བ་སྐུ་ཞབས་མཱ་ཧེ་ཤ་(Dr.Mahesh Yadav) དང་། ཉེ་ཆར་ཁོང་གིས་མཱ་ཌེ་ཡ་པར་ཌེ་ཤི་མངའ་སྡེ་ནང་གོ་སྒྲིག་བྱས་པའི་ཧི་མ་ལ་ཡའི་མཛངས་མ་འགྲན་བསྡུར་ཁྲོད། ཨང་དང་པོ་ཐོབ་མཁན་ནེ་ཧཱ་(Neha Saini) དང་ཨང་གསུམ་པ་ཐོབ་མཁན་བུ་མོ་མན་ཌེཔ་(Mandeep Kaur) བཅས་ཀྱིས་ཧུའུ་ཅིན་ཐའོ་ཡི་པར་རིས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་ལས་འགུལ་ཤིག་སྤེལ་སོང་།

རྒྱ་གཞུང་ལ་ངོ་རྒོལ་ལས་འགུལ་སྤེལ་སྐབས་མཱ་ཧེ་ཤ་ལགས་ཀྱིས་རང་ཉིད་འདས་པའི་ལོ་མང་རིང་ནས་བོད་དོན་འཐབ་རྩོད་ཀྱི་ལས་འགུལ་ནང་ཞུགས་ཡོད་པ་དང་། མ་འོངས་པར་མུ་མཐུད་ལས་འགུལ་སྤེལ་རྒྱུ་ཡིན་སྐོར། ཐེངས་འདིར་ཧུའུ་ཅིན་ཐའོ་ཡི་པར་རིས་མེར་བསྲེགས་བཏང་པ་དེ་ནི། རྒྱ་ནག་གཞུང་གི་སྲིད་འཛིན་ཧུའུ་ཅིན་ཐའོ་ཡི་མགོ་ཁྲིད་འོག བོད་ནང་ལ་གདུག་རྩུབ་དྲག་གནོན་གྱི་སྲིད་ཇུས་ལག་བསྟར་བྱས་དང་བྱེད་མུས་ལ་ངོ་རྒོལ་བྱེད་ཀྱི་ཡོད་སྐོར་བརྗོད་བྱུང་།

སྐུ་ཞབས་མཱ་ཧེ་ཤ་ལགས་ཀྱིས་ཉེ་མལ་བོད་དོན་འཐབ་རྩོད་ཀྱི་ལས་འགུལ་ཧི་མ་ལ་ཡའི་མཛངས་མ་འགྲན་བསྡུར་(Miss Himalaya-2012 “Beauty Pageant” awareness on Tibet Freedom) ཞིག་ཚོགས་ཡོད་ཅིང་། འགྲན་བསྡུར་དེར་འགྲན་ཞུགས་པ་བུ་མོ་༦༠བྱུང་པ་ལས་རྟིང་རྩོད་འགྲན་བསྡུར་ནང་བུ་མོ་ ༡༢ ཚུད་པའི་ཁྲོད།  ཨང་དང་པོ་ཧི་མ་ཅལ་མངའ་སྡེ་ཨོ་ཎ་ནས་ཡིན་པ་བུ་མོ་ནེ་ཧ་དང་། ཨང་གཉིས་པ་མཱ་ཌེ་ཡ་པར་ཌེ་ཤི་མངའ་སྡེ་ནས་ཡིན་པ་ཌོལ་ལེ་(Dolly Tongya) དང་། ཨང་གསུམ་པ་པུན་ཇབ་མངའ་སྡེ་ནས་ཡིན་པ་མན་ཌེཔ་(Mandeep Kaur) བཅས་ཡིན་འདུག་ལ། མཛངས་མའི་འགྲན་བསྡུར་དེར་ཞུགས་པའི་ཆ་རྐྱེན་ནི་བོད་དོན་ལས་འགུལ་གྱི་ངོ་བོའི་སྟེང་ཞུགས་དགོས་པ་དང་། འགྲན་བསྡུར་ཁྲོད་རྒྱལ་ཁ་ཐོབ་མཁན་དག་གིས་བོད་དོན་འཐབ་རྩོད་ལ་ཁ་ཞེ་གཉིས་མེད་ཀྱིས་ལས་དོན་སྤེལ་དགོས་པ་དེ་ཡིན་འདུག

ཨང་དང་པོ་ནེ་ཧཱ་དང་ཨང་གཉིས་པ་ཌོལ་ལེ། ཨང་གསུམ་པ་མན་ཌེབ་གསུམ།

གསར་འགོད་པ། བནྡེ་སྐྱབས།

(གནས་ཚུལ་རྒྱས་པ་ཚེས་ ༢༠ ཉིན་གྱི་དུས་བབ་ཚགས་ཤོག་ལ་གཟིགས།)