རྒྱ་སྒོར་ཁྲི་ ༡༠༠ སྤྲད་ཆོག་ཟེར།

ཟླ་འདིའི་ཕྱི་ཚེས་ ༦ ཉིན་གྱི་བོད་ནང་གི་ཉིན་གུང་ཆུ་ཚོད་ ༡༢ ཡོལ་ཙམ་ལ། མདོ་སྨད་གཙོད་གྲོང་ཁྱེར་དང་སྤྱི་ལེ་བཅུ་ཙམ་གྱི་སར་ཡོད་པའི་རྡོ་དཀར་དགོན་པའི་གཡོན་ངོས་མཆོད་རྟེན་ཉེ་འགྲམ་དུ། རྡོ་དཀར་ཡུལ་ཚོའི་རང་ལོ་ ༢༧ ཡིན་པ་སངས་རྒྱས་རྒྱ་མཚོ་ལགས་ཀྱིས་རང་ལུས་མེར་བསྲེཊ་ཀྱིས། སྐྱབས་མགོན་༸རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས་པ་དང་། བོད་ལ་སྐད་ཡིག་དང་ཆོས་དད་རང་དབང་དགོས་ཞེས་པ་སོགས་ཀྱི་སྐད་འབོད་གནང་སྟེ་འདས་གྲོངས་སུ་གྱུར་ཡོད་པ་ལྟར། ཉེ་ལམ་གཙོད་གྲོང་ཁྱེར་གྱི་སྤྱི་བདེ་ཉེན་རྟོག་མི་སྣ་དང་། ས་གནས་ལས་བྱེད་ཁག་ཅིག་གིས་ཁོང་གི་ནང་མི་སེམས་སྡུག་ཁྲོད་ལྷུང་ཡོད་མེད་ལ་མ་ལྟོས་པར་ཁྱིམ་དུ་ཡོང་སྟེ། ཉེ་ལམ་སངས་རྒྱས་རྒྱ་མཚོ་ལགས་ཀྱིས་རང་ལུས་མེར་བསྲེཊ་བཏང་བ་དེ་རྒྱ་ནག་གཞུང་ལ་ངོ་རྒོལ་བྱས་པ་མ་ཡིན་པར། བཟའ་ཚང་ནང་ཁུལ་མ་འཆམ་པའི་དཀའ་ངལ་འོག་རང་ལུས་མེར་བསྲེཊ་བཏང་ཡོད་པ་ཡི་གེ་བྲིས་པ་དང་མཚན་རྟགས་བཀོད་པ་ཡིན་ན། ནང་མིར་རྒྱ་སྒོར་ཁྲི་ ༡༠༠ སྤྲོད་རྒྱུ་ཡིན་ཚུལ་བརྗོད་ཡོད་འདུག

སྐབས་དེར་ཁོང་གི་ནང་མིས་ངོས་ལེན་བྱས་མེད་པ་མ་ཟད། རྒྱལ་གཅེས་དཔའ་བོ་སངས་རྒྱས་རྒྱ་མཚོ་ལགས་བཟའ་ཚང་ལ་འཆམ་མཐུན་བྱེད་མཁན་གྱི་སྐྱེ་ཕོ་རབས་ཤིག་ཡིན་པ་དང་། ལྷག་པར་དུ་བཟའ་མི་རྒན་གཞོན་མེད་པར་ཁོང་གི་འབད་བརྩོན་འོག་འཚོ་བ་སྐྱེལ་བཞིན་ཡོད་སྟབས། ཁོང་གིས་རང་ལུས་མེར་བསྲེཊ་ཀྱི་གནས་ཚུལ་དེ་བཟའ་ཚང་མ་འཆམ་པའི་གནས་ཚུལ་དང་འབྲེལ་བ་མེད་སྐོར་གསལ་བཤད་བྱས་ཡོད་སྐོར་བོད་ནས་འབྲེལ་ཡོད་མི་སྣ་ཞིག་གིས་ཨེ་ཤ་ཡ་རང་དབང་རླུང་འཕྲིན་ཁང་ལ་བརྗོད་ཡོད་འདུག  

རྒྱལ་གཅེས་དཔའ་བོ་སངས་རྒྱས་རྒྱ་མཚོ་ལགས་ཀྱི་ཕ་མིང་ལ་མགོན་པོ་དོན་འགྲུབ་དང་། མ་མིང་ལ་མགོན་པོ་འཚོ། བཟའ་ཟླའི་མིང་ལ་རྡོ་རྗེ་སྐྱིད་ཟེར་ཞིང་། ཁོང་ལ་རང་ལོ་ ༧ ཡིན་པའི་བུ་རྡོ་རྗེ་དོན་འགྲུབ་དང་། རང་ལོ་ ༥ ཡིན་པའི་བུ་མོ་ཏིང་འཛིན་འཚོ་བཅས་བྱིས་པ་གཉིས་ཡོད་འདུག