བོད་ཀྱི་གནད་དོན་དེ་མ་འོངས་པར་ཛ་དྲག་ཆགས་མི་སྲིད་པ་མ་རེད།

དམིགས་བསལ་ཚོགས་ཆེན་ཐེངས་གཉིས་པ་ངྷ་སར་ཚོགས་པ་དང་བསྟུན་ཏེ་ཧྥ་རན་སིའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཐུབ་བསྟན་རྒྱ་མཚོ་ལགས་སུ་གནས་ཚུལ་ཁག་ཅིག་གི་ཐོག་བཅར་འདྲི་ཞུས་ཡོད།

    དྲི་བ། སྤྱི་ཚོགས་ནང་དམིགས་བསལ་ཚོགས་ཆེན་གྱི་གྲོས་ཆོད་མང་ཆེ་བ་ནི་བསམ་ཚུལ་དང་རེ་འདུན་ཙམ་ལས།  ཉམས་ཞིབ་རང་བཞིན་ལྡན་པའི་ཐབས་ལམ་རིགས་མི་འདུག་པའི་བསམ་ཚུལ་གླེང་མཁན་འདུག  ཐེངས་འདིའི་ཚོགས་ཞུགས་མི་འགྲོའི་ཐད་དགོངས་ཚུལ་ག་རེ་ཡོད་དམ།

    ལན། ཆབ་སྲིད་ཀྱི་ལས་དོན་ཆེ་ཆུང་གང་བསྒྲུབས་ཀྱང་། སྤྱི་ཚོགས་ནང་སྐད་ཆ་འདྲ་མིན་བཤད་མཁན་ཡོང་གི་རེད། ཚོགས་བཅར་བ་སུ་ཡོང་མིན་ཐད་འདས་པའི་ཉམས་མྱོང་ལ་གཞིགས་ཏེ་གནད་ཡོད་མི་སྣ་གདན་ཞུ་གནང་འདུག ཚོགས་བཅར་བ་སྒེར་གྱི་བསམ་ཚུལ་ཙམ་མིན་པར་ས་གནས་ཁག་གི་བསམ་ཚུལ་ཁྱེར་ཡོང་ཡོད་པ་རེད། གཞི་རིམ་མང་ཚོགས་ཀྱི་ངོས་ནས་བསམ་ཚུལ་ཡག་པོ་ཞིག་ཁྱེར་ཡོང་ཐུབ་ཡོད་མེད་དེ། གཞི་རིམ་མང་ཚོགས་རང་ངོས་ཀྱི་ཤེས་འཇོན་ལ་རག་ལས་ཡོད་རེད། མང་ཚོགས་ཀྱི་བསམ་ཚུལ་ལེགས་ཉེས་དང་ཚོགས་ཆེན་ལ་འབྲེལ་བ་ཡོད་མེད་ཐད། གང་ཟག་སོ་སོའི་ལྟ་ཚུལ་འཁྱེར་སྟངས་ཀྱི་ཐོག་ནས་མཐའ་གཅིག་ཏུ་འདི་རེད་དང་འདི་མ་རེད་ཀྱི་སྐད་ཆ་བཤད་ཁག་པོ་རེད། ད་རེབ་ཕྱོགས་མཐའ་ཁག་ནས་ལས་རིགས་འདྲ་མིན་དང་ལས་ཀ་འདྲ་མིན་བྱེད་མཁན་གྱི་མི་སྣ་མང་པོ་ཞིག་འཛོམས་ཏེ་བསམ་ཚུལ་ཕྱོགས་གཅིག་ཏུ་སྤུངས་ཡོད་པ་རེད། རིག་པའི་སྒོ་མོ་འབྱེད་ཐུབ་པ་དང་ཐབས་ལམ་འདྲ་མིན་གང་ལ་གང་འཚམ་བསྡུ་ཐུབ་ཡོད་པ་རེད་བསམ། 

    དྲི་བ། ཐེངས་འདིའི་ཚོགས་ཆེན་ལ་འགྲོ་གྲོན་ཧིན་སྒོར་འབུམ་ ༦༠ ལྷག་བཏང་ཡོད་པ་རེད། ཚོགས་ཆེན་གྱི་གྲོས་ཆོད་ཁག་ལ་ཁྲིམས་ཀྱི་ནུས་པ་མེད་པའི་ཐད། ཁྱེད་རང་ཚོགས་ཞུགས་པ་ཞིག་གི་ངོས་ནས་བསལ་ཚུལ་ག་རེ་ཡོད། 

    ལན། ཚོགས་ཆེན་སྐབས་ཀྱི་མི་སྒེར་གྱི་བསམ་ཚུལ་ཡོངས་རྫོགས་གྲོས་ཆོད་དང་སྲིད་ཇུས་ཀྱི་ངོ་བོར་ལག་ལེན་བསྟར་ཐབས་ཡོད་པ་མ་རེད། ཚོགས་ཆེན་ཐོག་གི་བསམ་ཚུལ་དེ་སྤྱི་ཚོགས་ཀྱི་གནས་སྟངས་མཚོན་པའི་མེ་ལོང་ལྟ་བུ་ཞིག་རེད་མ་གཏོགས། གང་ཟག་བྱེ་བྲག་པའི་བསམ་ཚུལ་རྣམས་ལམ་སེང་ངོས་ལེན་དང་འདོད་པ་ཁེངས་པ་ཞིག་འཛམ་གླིང་གི་དམངས་གཙོའི་རྒྱལ་ཁབ་གང་འདྲ་ཞིག་གིས་ཀྱང་གནང་ཐབས་ཡོད་པ་མ་རེད། རྒྱལ་ཁབ་ཀྱི་ཁྲིམས་བཟོའི་དབང་ཆ་གྲོས་ཚོགས་ལ་ཡོད་པ་རེད། གྲོས་ཚོགས་ཀྱིས་ལག་པ་མ་འཆང་བ་ཡིན་ན་ཁྲིམས་ཀྱི་ནུས་པ་ཤིག་ཡོང་ས་ཡོད་པ་མ་རེད། ཁྲིམས་ཀྱི་ནུས་པ་ཡོད་པ་མ་རེད་ཅེས་སྒྲོག་པ་དང་བློ་ཕམ་བྱེད་པ་དེ་ནི། དམངས་གཙོའི་སློབ་སྦྱོང་དང་འགྲོ་སྟངས་ཤེས་ཀྱི་མེད་པའི་རྟགས་རེད། ཚོགས་ཆེན་ཐོག་བསམ་ཚུལ་ཁྱེར་ཤོག་ལབ་ཡོད་པ་ལས་ཁྲིམས་འཆར་ཁྱེར་ཤོག་ལབ་ཡོད་པ་མ་རེད། དེ་བཞིན། བསམ་ཚུལ་ཚང་མ་གྲོས་ཚོགས་ལ་འགྲོ་དགོས་པའི་ཁྱབ་ཀྱི་མ་རེད། རིགས་གཅིག་ཁྲིམས་ཀྱི་ངོ་བོར་འགྲོ་མི་དགོས་པར་འཛིན་སྐྱོང་བཀའ་ཤག་གིས་བཀའ་རྒྱའི་ཚུལ་དུ་ལམ་སེང་ལག་བསྟར་བྱེད་རྒྱུའི་རིགས་ཤིག་ཡོད་པ་རེད། དེ་གཞི་འཛིན་ས་ནི་ཚོགས་བཅར་བའི་བསམ་ཚུལ་དང་གྲོས་ཆོད་ལྟར་ལག་བསྟར་བྱེད་ཀྱིན་ཡོད་པ་རེད། གཞུང་དང་མི་མང་བར་ཡིད་ཆེས་དགོས་པ་གལ་ཆེན་པོ་རེད། མི་མང་གི་འོས་ཤོག་བླུགས་ས་དེར་ཡིད་ཆེས་བྱས་ཏེ་འོས་ཤོག་བླུགས་ཡོད་པ་རེད། ཁོང་ཚོས་ལག་ལེན་བསྟར་གྱི་ཡིན་ཞེས་ལབ་སྐབས་ང་ཚོའི་ངོས་ནས་ཡིད་ཆེས་དང་ཆ་འཇོག་བྱ་རྒྱུ་དེ་དམངས་གཙོའི་འགྲོ་སྟངས་རེད། ལས་དོན་རིགས་གཅིག་ཁྲིམས་བཟོ་ལྷན་ཚོགས་ཀྱིས་ལག་པ་འཆང་སྟེ་བགྲོ་གླེང་བྱས་རྗེས།  ཕུགས་རྒྱང་རིང་པོའི་ལས་དོན་ཐོག་འགྲོ་དགོས་པའི་རིགས་ཁྲིམས་ཐོག་ལ་བསྒྱུར་ཐུབ་པ་རེད་བསམ།

      དྲི་བ།  ད་ལྟའི་བཀའ་ཤག་གི་ངོས་ནས་རྒྱལ་སྤྱིའི་ཐོག་འབྲེལ་ལམ་འཛུགས་ཕྱོགས་ཐད་དགོངས་ཚུལ་ག་རེ་ཡོད་དམ།

    ལན།  དེང་སྐབས་ཕྱི་རྒྱལ་ཁག་ཏུ་བོད་དོན་རྒྱབ་སྐྱོར་ཚོགས་པའི་གྲོས་ཚོགས་ཀྱི་ངོས་ནས་གྲོས་ཆོད་རག་རྒྱུའི་རིམ་པ་ཞིག་འགྲོ་བསྡད་ཡོད་པ་རེད། ང་སྒེར་གྱི་བསམ་ཚུལ་ལྟར་ན། གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་འབྲེལ་ཡོད་བོད་དོན་རྒྱབ་སྐྱོར་གྱི་ལས་ཀ་དེ་བོད་མི་མང་སྤྱི་འཐུས་ལྷན་ཚོགས་ཀྱིས་གནང་དགོས་པ་ཞིག་རེད་བསམ། འཛིན་སྐྱོང་བཀའ་ཤག་གིས་མ་འོངས་པར་གནང་དགོས་པ་དེ་ནི། ཨ་རི་དང་ཧྥ་རན་སི་སོགས་སྟོབས་ཆེན་རྒྱལ་ཁབ་དག་གི་གཞུང་གི་སྐུ་ཚབ་ཕྱི་སྲིད་ལས་ཁུངས་རྣམས་རེད། དེའི་སྐོར་གྱི་མི་སྣ་དང་། དེ་དང་འབྲེལ་ཡོད་སྲིད་བློན་དང་སྲིད་འཛིན་ལས་ཁུངས་ཁག་ལ་འབྲེལ་བ་བཙུགས་ཏེ། བོད་ནང་རང་ལུས་མེར་བསྲེགས་བཏང་སྟེ་རྒྱ་ནག་དྲག་པོའི་གཞུང་ལ་ངོ་རྒོལ་བྱེད་བཞིན་པ་དེར། ཁོ་ཚོར་ལྟ་ཚུལ་ཅི་ཞིག་ཡོད་མེད་དང་། རང་ལུས་མེར་བསྲེགས་གཏོང་མཁན་རྣམས་ཀྱིས་བོད་ལ་རང་དབང་དང་འགྲོ་བ་མིའི་ཐོབ་ཐང་དགོས། ༸གོང་ས་མཆོག་བོད་ལ་གདན་འདྲེན་བྱེད་དགོས་ཞེས་པའི་མངོན་འདོད་ཁག་ལ། ཁོ་ཚོའི་ངོས་ནས་རྒྱབ་སྐྱོར་ཡོད་མེད་གསལ་པོ་འདྲི་དགོས་པ་རེད། དེར་ངོ་ཚ་དགོས་པ་དང་འཁུམ་དགོས་པ་གང་ཡང་མི་འདུག་བསམ། དེ་རྒྱལ་སྤྱིའི་ཆབ་སྲིད་ཀྱི་འགྲོ་སྟངས་ཤིག་རེད་མ་གཏོགས། ལྟོ་གོས་སློང་མོ་རྒྱག་གི་ཡོད་པ་མ་རེད། མི་རིགས་ཤིག་གི་ཆེ་མཐོང་ཁུར་ཏེ་མི་རིགས་དེའི་བདེ་སྡུག་རྒྱལ་ཁབ་གཞན་དག་ལ་ཞུ་དགོས་པ་དེ་ང་ཚོའི་མཐོ་རིམ་མི་སྣ་ཚོའི་འགན་རེད།

   དྲི་བ། བོད་ནང་རང་ལུས་མེར་བསྲེགས་གཏོང་མཁན་ ༥༡ བྱུང་ཡོད་པ་རེད། རྒྱལ་སྤྱིའི་ཆབ་སྲིད་སྡིངས་ཆའི་སྟེང་ནུས་པ་ག་འདྲ་ཞིག་ཐོན་མེད་ཐད་དགོངས་ཚུལ་ག་རེ་ཡོད་དམ། 

    ལན།  ད་ལྟའི་ཆར་བོད་ནང་ཛ་དྲག་གནས་སྟངས་ཆགས་ཡོད་པ་དེ། བོད་ཕྱི་ནང་གཉིས་ཀྱི་བོད་མི་ཡོངས་ཀྱིས་གཅིག་གྱུར་ཐོག་ངོས་འཛིན་ཡོད་པ་རེད། ཡིན་ནའང་། རྒྱལ་སྤྱིའི་ཐོག་ནས་བོད་མི་ ༥༡ རང་ལུས་མེར་བསྲེགས་བཏང་བ་ནང་བཞིན་གྱི་རིན་ཐང་ཞིག་ང་ཚོར་རག་ཐུབ་ཡོད་པ་མ་རེད། དེ་རྒྱུ་མཚན་གང་ལ་ཐུག་ཡོད་མེད་ངས་གསལ་པོ་ཤེས་ཀྱི་མེད། ནུབ་ཕྱོགས་རྒྱལ་ཁབ་མང་པོ་ཞིག་གིས་བོད་ནང་ཛ་དྲག་གནས་སྟངས་ལ་གཞིགས་པའི་བློ་འཚབ་ཡོད། སེམས་ཁྲལ་ཡོད་ཟེར་བའི་གསར་འགོད་བསྒྲགས་གཏམ་དེ་འདྲ་ཡོང་གི་འདུག ཡིན་ནའང་། དོན་དམ་པའི་ཐོག་ནས་འཛམ་གླིང་ཐོག་གནས་ཚུལ་ཛ་དྲག་བྱུང་བའི་སྐབས་ལ། ནུབ་ཕྱོགས་རྒྱལ་ཁབ་ཀྱི་རྣམ་འགྱུར་སྟོན་སྟངས་དེ་འདྲ་ཞིག་མ་རེད། ནུབ་ཕྱོགས་རྒྱལ་ཁབ་དག་གིས་ཕྱི་འབྲེལ་མི་སྣ་དང་སྲིད་འཛིན་གྱི་མགྲིན་ཚབ་པས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་དང་མི་མང་ལ་དྲག་གནོན་བྱས་པའི་གནད་དོན་ལ་མཐའ་གཅིག་ཏུ་སྐྱོན་བརྗོད་དང་། མི་གསོད་ཁྲག་སྦྱོར་གྱི་བྱ་སྤྱོད་མཚམས་འཇོག་བྱེད་དགོས་པ་སོགས། ཁྲིམས་དང་ཆབ་སྲིད་ཀྱི་ཐ་སྙད་བེད་སྤྱོད་བཏང་སྟེ། ཆབ་སྲིད་ཀྱི་བརྒྱུད་ལམ་ཁག་ནས་དྲིལ་བསྒྲགས་གནང་དགོས་ཀྱི་ཡོད་པ་རེད།

    དྲི་བ།  རྒྱ་གཞུང་གིས་ཕྱོགས་ཡོངས་ནས་བོད་མི་རིགས་རྩ་མེད་དུ་གཏོང་བའི་གོམ་སྟབས་ཇེ་མགྱོགས་སུ་གཏོང་བཞིན་ཡོད་པ་རེད།  ཁྱོད་ཀྱིས་བོད་ནང་རང་ལུས་མེར་བསྲེགས་མ་ཡིན་པའི་གདོང་ལེན་བྱེད་ཐབས་གཞན་གང་འདྲ་མཐོང་གི་ཡོད། 

    ལན། དེའི་ཕྱོགས་ནས་ལས་འགུལ་མང་པོ་ཡོད་པ་རེད་བསམ་གྱི་འདུག བོད་ནང་རྒྱ་གཞུང་གིས་ཐབས་ལམ་འདྲ་མིན་ཐོག་འབྲོག་པ་གནས་སྤོར་བྱ་དགོས་པའི་བཙན་བཀའ་གཏོང་གི་ཡོད་པ་རེད། འདིའི་ཐད་བོད་ནང་གི་བོད་མི་ཚོས་དབང་བསྒྱུར་བའི་འཆར་འགོད་ལ་མཉམ་འབྲེལ་མི་བྱེད་པའི་ལས་འགུལ་ཞིག་སྤེལ་དགོས་ཀྱི་འདུག བོད་མིའི་འཚོ་བའི་གོམས་གཤིས་དང་ཁོར་ཡུག ཡུལ་མི་དང་ལྷ་ཀླུ་གཞི་བདག་གི་འབྲེལ་བ། བོད་མི་རིགས་ཀྱི་ཐུན་མོང་མ་ཡིན་པའི་རིག་གནས་སྲུང་སྐྱོབ་ཆེད་འགྲོ་རྒྱུ་མིན་ཞེས་བཤད་ཆོག་གི་རེད། ཡིན་ནའང་འཚེ་མེད་ཞི་བའི་རྒྱ་ལས་མ་བརྒལ་བ་གནང་རྒྱུ་གལ་ཆེན་པོ་རེད། རྒྱ་གཞུང་གིས་ཟ་མ་འདི་ཟོ་དང་ཆང་འདི་འཐུང་ཞེས་བཤད་སྐབས་འཐུང་རྒྱུ་ཡོད་པ་མ་རེད། ང་ཚོ་བོད་པ་ཚོའི་ངོས་ནས་བོད་ཆས་དང་བོད་ཟས་སྤྱོད་པ། རྒྱ་མིར་དཔལ་འབྱོར་གྱི་མཐུན་རྐྱེན་མ་སྤྲད་པར་བོད་པ་རང་གི་ལག་ནས་ཉོ་ཚོང་བྱེད་པ། བོད་པའི་ལས་བྱེད་ཚོའི་ངོས་ནས་ཀྱང་རྒྱ་ནག་གཞུང་གིས་བཀའ་གང་བཏང་བ་དེ་ལག་ལེན་བསྟར་རྐྱང་བྱས་ན་དེ་ནོར་འཁྲུལ་རེད། མི་རིགས་ཀྱི་ལྟ་བ་དང་ལངས་ཕྱོགས་འཛིན་དགོས་པ་རེད། དེང་སྐབས་རྒྱ་གཞུང་གི་ལས་ཁུངས་ནང་ལས་ཀ་བྱེད་རྒྱུ་ཞིག་ཡོད་པ་དེ་ཡང་གཞི་རིམ་བོད་རིགས་མི་མང་ལ་བརྟེན་ནས་བྱུང་བ་ཡིན་སྟབས། བོད་ཅེས་པའི་མི་རིགས་འདི་མེད་པ་ཆགས་ན་ནམ་ཞིག་ཁོང་ཚོ་ཡང་ལས་མེད་ཆགས་རྒྱུ་ཡིན་པ་དང་། རྒྱ་ནག་གཞུང་ལ་མི་བསྟུན་པའི་ལས་འགུལ་སྣ་ཚོགས་སྤེལ་དགོས་རེད་བསམ། 

    དྲི་བ། ཕྱིའི་རྒྱལ་ཁབ་ཁག་ཏུ་ཡོད་པའི་བོད་པའི་ཆོས་ཚོགས་དང་བོད་རིགས་ཚོགས་པ་ཁག་གི་ངོས་ནས་ཁྲོམ་སྐོར་ཙམ་མིན་པར། ཕྱིའི་རྒྱལ་ཁབ་ཀྱི་འགྲོ་ལུགས་དང་མཐུན་པའི་སྒོ་ནས་གཞུང་དང་མི་མང་ནང་ནུས་པ་ཐོན་པའི་ལས་འགུལ་ག་རེ་སྤེལ་དགོས་ཀྱི་འདུག  

      ལན། ཁྲོམ་ལམ་དུ་ངོ་རྒོལ་བྱེད་ཀྱིན་པ་དེ་བཙན་བྱོལ་སྤྱི་ཚོགས་ནང་སྔོན་མ་ནས་ཡོད་པ་རེད། དེར་གྲུབ་འབྲས་ཆེན་པོ་ཞིག་ཐོན་རྒྱུ་ཁག་པོ་རེད། ཕྱི་རྒྱལ་ན་ཡོད་པའི་བོད་མི་ཚོས་བོད་ཀྱི་ནང་ཆོས་དང་འབྲེལ་བའི་ཐོག་ནས་ང་ཚོར་སྟོབས་དང་ནུས་པ་ཞིག་ཡོད་པ་དེ་བེད་སྤྱད་ནས། རིག་གཞུང་དུས་ཆེན་སོགས་ཀྱི་ལས་འགུལ་སྤེལ་དགོས་པ་རེད་བསམ་གྱི་འདུག  ཧྥ་རན་སིར་མཚོན་ན་འདས་པའི་ལོ་བཞི་ལྷག་གི་རིང་རིག་གཞུང་དུས་སྟོན་ཚོགས་ཡོད་པ་རེད།  ཉིན་གཅིག་རིང་མི་ ༣༠༠༠ ཡས་མས་ཤིག་འཛོམས་ཐུབ་ཀྱི་འདུག དེས་ཕྱོགས་གཅིག་ནས་བོད་ཀྱི་ཟས་གོས་དང་། ཟློས་གར། ཆོས་དང་རིག་གཞུང་ཁྱབ་བསྒྲགས་དང་། དེ་དང་བསྟུན་ནས་བོད་ནང་གི་ཆབ་སྲིད་གནས་སྟངས་སྐོར་གྱི་པར་རིས་འགྲེམས་སྟོན་གྱིས་བོད་ནང་གི་ཛ་དྲག་གནས་སྟངས་ངོ་སྤྲོད་བྱེད་ཐུབ་ཀྱི་འདུག དེ་བཞིན། ཧྥ་རན་སི་དང་ཡུ་རོབ། བྱང་ཨ་རི་བཅས་ཀྱི་བོད་མི་མང་པོ་ཞིག་ལ་རིམ་གྱིས་ཡུལ་མིའི་ཐོབ་ཐང་ལག་འཁྱེར་རག་གི་ཡོད་པ་རེད། ལག་འཁྱེར་རག་མཁན་ཚོས་བོད་མི་སྐྱབས་བཅོལ་བ་ཡིན་པའི་ངོས་ནས་སྐྱིད་སྡུག་ཞུ་རྒྱུ་ཙམ་མིན་པར། སོ་སོ་སྡོད་སའི་རྒྱལ་ཁབ་དེའི་མི་སེར་གྱི་ཐོབ་ཐང་བེད་སྤྱད་ནས། རྒྱལ་ཁབ་སོ་སོའི་ཁྲིམས་བཟོ་ལྷན་ཚོགས་ཀྱི་འཐུས་མི་རྣམས་ལ་འབྲེལ་བ་བྱས་ཏེ། རང་ཉིད་བོད་ནང་ཡོང་མཁན་གནས་སྡོད་རྒྱལ་ཁབ་གང་དེའི་མི་སེར་ཞིག་ཡིན་པའི་ངོས་ནས། བོད་ནང་གི་ཛ་དྲག་གནད་དོན་ལ་བློ་འཚབ་དང་དོ་སྣང་ཡོད་པ། བོད་ནང་གི་བོད་མིའི་དཀའ་ངལ་ལ་རྒྱབ་སྐྱོར་ཡོད་པ་དེ་གྲོས་ཚོགས་འཐུས་མི་ཚོར་ཕར་བརྡ་ལན་སྤྲོད་ཐུབ་རྒྱུར་འབད་བརྩོན་གནང་དགོས་པ་རེད། དེ་ལྟར་བྱས་ན་རིམ་པས་ནུས་པ་ཆེན་པོ་འཐོན་ཐུབ་ཀྱི་རེད་བསམ་གྱི་འདུག 

     དྲི་བ།  ཉིས་སྟོང་བརྒྱད་ལོའི་ས་བྱི་ཞི་རྒོལ་ཆེན་མོ་ནས་བཟུང་རྒྱལ་སྤྱིའི་སྤྱི་ཚོགས་ཀྱིས་བོད་ཀྱི་གནད་དོན་ཐོག་འཛིན་པའི་ལྟ་སྟངས་ལ་འགྱུར་བ་ག་རེ་ཕྱིན་ཡོད་པ་རེད།

    ལན།  སྔོན་ཆད་རྒྱ་ནག་གཞུང་ཚབ་ཁག་དང་དྲིལ་བསྒྲགས་ལས་ཁུངས་ཀྱིས་ཁྱབ་བསྒྲགས་ལྟར། བོད་ནི་ད་ལྟའི་རྒྱ་གཞུང་གིས་བོད་རང་སྐྱོང་ལྗོངས་སུ་འབོད་པ་དེ་འདྲ་ཞིག་ལ་གོ་བཞིན་པ་ཙམ་ལས། རྒྱ་ནག་གི་ཞིང་ཆེན་གཞན་དག་ནང་ཡོད་པའི་བོད་ཀྱི་ས་ཁུལ་རྣམས་ཞེ་དྲག་མགོ་འཚོས་ཀྱི་ཡོད་པ་མ་རེད། ༢༠༠༨ ལོའི་ས་བྱི་ཞི་རྒོལ་ཆེན་མོ་དེ་བྱུང་བ་ནས་བཟུང་། ང་ཚོ་བོད་པའི་ངོས་ནས་ཕར་འགྲེལ་བཤད་རྒྱག་བཞིན་པའི་དངོས་ཡོད་ལོ་རྒྱུས་ནང་ཡོད་པའི་བོད་ཆོལ་ཁ་གསུམ་ཡོངས་སུ་རྫོགས་པ་དེ་ཀོང་བུ་གཅིག་ལ་ངོས་འཛིན་ཡོང་གི་ཡོད་པ་རེད། ཆབ་སྲིད་ཀྱི་ས་ཁྲའི་ཐོག་ལ་ཕྱིའི་རྒྱལ་ཁབ་ཁག་གི་སྔར་གྱི་ལྟ་ཚུལ་ལ་འགྱུར་བ་ཐེབས་གྱི་འདུག དེ་ང་ཚོའི་རྒྱལ་ཁ་ཆེན་པོ་ཞིག་རེད་བསམ་གྱི་ཡོད། ཕྱོགས་གཞན་ཞིག་ནས་ང་ཚོ་བཙན་བྱོལ་སྤྱི་ཚོགས་ནང་ལའང་འགྱུར་བ་ཞིག་ཐེབས་ཡོད་པ་རེད།  སྔོན་ཆད་ང་ཚོ་བཙན་བྱོལ་བོད་མི་ནང་ཁུལ་ལ་མཚོན་ནའང་། བོད་ལ་ས་རྒྱ་ཆེན་པོ་ཡོད་པ་རེད་ཟེར་བ་ཙམ་ལས་མདོ་སྟོད་སྨད་ཀྱི་ས་ཆ་རྣམས་ག་འདྲ་ཡིན་པ་ཤེས་ཀྱི་མེད། ས་བྱི་ཞི་རྒོལ་ཆེན་མོས་རྗེས་ནས་བཟུང་། བཙན་བྱོལ་བོད་མིའི་ཁྲོད་དུའང་བོད་ཀྱི་ས་ཁམས་ལ་ཆ་རྒྱུས་དང་གོ་རྟོགས་མཐོ་རུ་སོང་འདུག 

     དྲི་བ། ད་ལྟའི་ཆར་ཧྥ་རན་སིའི་ནང་གཞུང་མང་གཉིས་ཀྱི་ངོས་ནས་བོད་དོན་ཐོག་དོ་སྣང་དང་རྒྱབ་སྐྱོར་གྱི་གནས་སྟངས་ག་འདྲ་འདུག

    ལན། ང་རང་ཧྥ་རན་སིར་སོང་ནས་ལོ་ ༡༤ ལྷག་ཕྱིན་སོང་། ཧྥ་རན་སིའི་མི་མང་གི་ངོས་ནས་བོད་པར་དགའ་བོ་དང་རྒྱབ་སྐྱོར་ཡོད་པ་རེད། དེང་སང་ལས་ཁུངས་འདྲ་མིན་ནང་བོད་མི་མང་པོར་ལས་ཀ་རག་བསྡད་ཡོད་པ་རེད། དེ་དག་གི་ལས་ཀ་བྱེད་རོགས་རྣམས་འཛམ་གླིང་ས་ཆ་གང་ས་གང་ནས་ཡོད། དེ་དག་གིས་བོད་པ་ཟེར་དུས་ཕྱིའི་གཟུགས་གཞིའི་ཆ་ན་ག་འདྲ་ཡོད་པ། བསམ་བློ་གཏོང་སྟངས་ག་འདྲ་ཡིན་པ། གཤིས་ཀ་ག་འདྲ་ཡིན་པ། བོད་པའི་འཐབ་རྩོད་དང་བདེ་སྡུག་སོགས་ཤེས་རྟོག་བྱུང་སྟེ་དེ་ཡིས་བོད་དོན་དྲིལ་བསྒྲགས་ཤུགས་ཆེན་པོ་འགྲོ་བཞིན་འདུག  ཧྥ་རན་སི་དང་ཨ་རི་ལྟ་བུར་མཚོན་ན་འཛམ་གླིང་རྒྱལ་ཁབ་མང་པོའི་མི་འགྲོ་ས་ཞིག་ཆགས་ཡོད་པ་རེད། དེར་དེང་སང་བོད་པ་མང་པོ་ཞིག་ནུབ་ཕྱོགས་ལ་ཡོང་བཞིན་པ་དེ་ལེགས་ཆ་ཞིག་རེད་བསམ་གྱི་འདུག ཧྥ་རན་སི་ལ་མཚོན་ན་བརྙན་འཕྲིན་ནང་ཟླ་བ་གཅིག་རེའི་ནང་བོད་ཀྱི་གནས་ཚུལ་དང་འབྲེལ་བའི་དངོས་བྱུང་གློག་བརྙན་ཞིག་མ་བསྟན་པ་ཧ་ལམ་ཡོད་པ་མ་རེད། བོད་དོན་དང་ཐད་ཀར་འབྲེལ་བ་ཡོད་པ་སྟོན་མ་ཐུབ་པ་ཡིན་ན་ལ་དྭགས་སྐོར་སྟོན་གི་རེད། གང་ལྟར་བོད་ཀྱི་ཆོས་དང་རིག་གནས་ཀྱི་ཤུགས་རྐྱེན་ཡོད་པའི་ས་ཞིག་ཏན་ཏན་སྟོན་གི་རེད། དེའི་རྒྱུ་མཚན། མང་ཚོགས་ལྟད་མོ་ལྟ་མཁན་ཚོའི་ནང་ན་དེའི་སྐོར་གྱི་དགོས་འདུན་དང་ལྟ་འདོད་ཡོད་མཁན་མང་པོ་ཡོད་སྟབས། དེ་ཡིན་གཅིག་མིན་གཅིག་སྟོན་དགོས་ཆགས་ཀྱི་ཡོད་པ་རེད། 

    དྲི་བ། ད་ལྟའི་བར་གྱི་བོད་རྒྱ་འབྲེལ་མོལ་གྱི་གྲུབ་འབྲས་ཐད་གདེང་འཇོག་དང་། མ་འོངས་པར་བོད་རྒྱའི་གནད་དོན་སེལ་ཐབས་ཐད་བསམ་ཚུལ་ག་རེ་ཡོད། 

     ལན། ཡུ་རོབ་གྲོས་ཚོགས་ཀྱིས་ ༢༠༠༡ ཕྱི་ཟླ་ ༦ པའི་ནང་། རྒྱ་ནག་གིས་བོད་དང་སྐད་ཆ་མ་བཤད་པ་ཡིན་ན། དྷ་རམ་སའི་བོད་མིའི་སྒྲིག་འཛུགས་ཏེ་ལོ་རྒྱུས་རང་བཞིན་ལྡན་པའི་བོད་མིའི་ཁྲིམས་མཐུན་སྲིད་གཞུང་ལ་ངོས་འཛིན་བྱ་རྒྱུ་ཡིན་སྐོར་བཤད་ཡོད་སྟབས། གཅིག་ནས་སྐབས་དེར་རྒྱ་ནག་ཏུ་ཨོ་ལིམ་ཕིག་རྩེད་འགྲན་གྲ་སྒྲིག་བྱེད་ཀྱིན་ཡོད་པ་དང་། གཉིས་ནས་བོད་ཀྱི་གནད་དོན་དེ་རྒྱལ་སྤྱིའི་སྒང་ལ་གལ་ཆེན་པོ་ཆགས་རྒྱུ་རེད་བསམ་སྟེ། རྒྱ་གཞུང་གིས་ ༢༠༠༢ ནས་གྲོས་མོལ་གྱི་སྒོ་བསྐྱར་དུ་ཕྱེས་པ་རེད། དེ་དུས་ང་ཚོའི་བོད་གཞུང་གིས་གོ་སྐབས་ཤིག་དམ་འཛིན་བྱེད་ཐུབ་ཡོད་པ་མ་རེད། རྒྱ་མིས་སྐད་ཆ་བཤད་རྒྱུ་ཡིན་ཞེས་བརྗོད་པ་ལ་བརྟེན་ནས་ང་ཚོའི་ངོས་ནས་སྐད་ཆ་བཤད་པ་རེད། ཡིན་ནའང་། དེ་རྒྱ་གཞུང་གི་འཁྲབ་སྟོན་གྱི་རྣམ་པ་ཞིག་རེད་མ་གཏོགས་དོན་དམ་པའི་ཐོག་བོད་ཀྱི་དཀའ་ངལ་སེལ་རྒྱུའི་འདོད་པ་ཡོད་པ་མ་རེད། མ་འོངས་པར་རྒྱ་ནག་གི་མགོ་ཁྲིད་གསར་བ་དེ་ཚོས་བསམ་བློ་གཏོང་སྟངས་ཡག་པོ་བྱུང་བ་ཡིན་ན། བོད་ཀྱི་གནད་དོན་དེ་རྒྱ་ནག་དང་ཐད་ཀར་བཀའ་མོལ་གྱི་ལམ་ནས་སེལ་རྒྱུ་ནི་དབུ་མའི་ལམ་གྱི་དམིགས་ཡུལ་རེད། ཡིན་ནའང་། བོད་ཀྱི་གནད་དོན་དེ་མ་འོངས་པར་ཛ་དྲག་ཆགས་མི་སྲིད་པ་མ་རེད། རྒྱ་ནག་གིས་དམག་བེད་སྤྱོད་བཏང་སྟེ་དམར་གསོད་དྲག་གནོན་བྱས་པ་ལ་བརྟེན་ནས་རྒྱལ་སྤྱིའི་སྤྱི་ཚོགས་ཀྱིས་ཐེ་གཏོགས་བྱེད་དགོས་པ་ཡོང་སྲིད་ཀྱི་རེད། ང་ཚོས་ད་ལྟ་ནས་གཞི་རྩའི་ཁོར་ཡུག་ཅིག་བསྐྲུན་རྒྱུར་གྲ་སྒྲིག་བྱེད་དགོས་པ་རེད། བོད་འདི་མ་འོང་པར་དམག་དོན་གྱི་ས་ཆ་དང་རྡུལ་ཕྲན་ཚོད་ལྟ་བྱེད་ས། ཚད་བརྒལ་གྱི་གཏེར་ཁ་སྔོག་འདོན་བྱ་ཡུལ་དུ་མི་འགྱུར་བའི་ཆེད། ལྷོ་ཤར་ཨེ་ཤ་ཡའི་འཛམ་གླིང་གི་མི་འབོར་གྱི་བཞི་ཆ་གཅིག་གི་འཐུང་ཆུ་དང་འཚོ་གནས་བདེ་འཇགས་འབྲེལ་བ་ཡོད་པ་དེ་ཨེ་ཤ་ཡའི་རྒྱལ་ཁབ་ཚོར་ངོ་སྤྲད་དེ།  བོད་དོན་འདི་མི་རིགས་ཤིག་གི་རང་དབང་འཐབ་རྩོད་ཙམ་ཞིག་མ་ཡིན་པར། ཁོ་ཚོའི་རྒྱལ་ཁབ་ཀྱི་བདེ་འཇགས་དང་འཚོ་གནས་ཁོར་ཡུག་ལ་ཐད་ཀར་འབྲེལ་བ་ཡོད་པ་ཧ་གོ་བ་ཡིན་ན། ལྷོ་ཤར་ཨེ་ཤ་ཡའི་རྒྱལ་ཁབ་ཁག་ཕྱོགས་གཅིག་ཏུ་སྒྲིལ་བའི་ཐོག་ནས་ཤ་ཚ་དང་རྒྱབ་སྐྱོར་རག་ཡོང་གི་རེད།

གསར་འགོད་པ། ཚེ་རིང་རྒྱལ།

༼བོད་ཀྱི་དུས་བབ་ཚགས་ཤོག་སྤྱིའི་འདོན་ཐེངས་ ༥༦༨ ལས་བདམས་བཀོད་བྱས།༽