གྲྭ་པ་ ༦ འཛིན་བཟུང་།

ཁ་སང་གཟའ་སྤེན་པའི་ཉིན་རྒྱ་གཞུང་གིས་བསྐྱར་དུ་དབོན་པོ་དགོན་པའི་གྲྭ་པ་དྲུག་འཛིན་བཟུང་བྱས་ཏེ། ད་ཆར་དབོན་པོ་ཞང་ཐོག་ཏུ་བཀག་ཉར་བྱས་འདུག

རྒྱ་གར་ལྷོ་ཕྱོགས་སེ་ར་དགོན་པའི་གྲྭ་བྱམས་པ་ཡོན་ཏན་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༡༥ ནས་ ༡༩ བར་རྒྱ་ནག་གཞུང་གིས་རྫ་ཆུ་ཁ་དབོན་པོ་ཞང་དུ་རྒྱ་དར་བསྒྲེངས་འཛུགས་དང་། ངོ་རྒོལ་གྱི་ལས་འགུལ་རིམ་པ་བྱུང་བའི་ཐད་དོགས་གཞི་ཡོད་པའི་ཉེས་འཛུགས་འོག་སྔ་ཕྱིར་གྲྭ་པ་ ༡༢ འཛིན་བཟུང་བཙན་འཁྲིད་བྱས་ཡོད་པ་མ་ཟད། ཁ་སང་ཕྱི་ཚེས་ ༢༠ ཉིན་ཡང་བསྐྱར་དབོན་པོ་དགོན་པའི་གྲྭ་ཐབས་མཁས་དང་འཕགས་གྲོལ། ཤེས་རབ། ཟླ་བ། མགོན་པོ། སྐྱ་པོ་བཅས་གྲྭ་པ་ ༦ ཉེན་རྟོག་པས་འཛིན་བཟུང་བཙན་འཁྲིད་བྱས་ཏེ། ད་ཆར་དབོན་པོ་ཞང་ཐོག་ཏུ་བཀག་ཉར་བྱས་ཡོད་འདུག

གནས་ཚུལ་ཤེས་རྟོགས་བྱུང་བ་ལྟར་ན། རྒྱ་གཞུང་གིས་ཟླ་འདིའི་ཕྱི་ཚེས་ ༡༥ ཉིན་དབོན་པོ་དགོན་པའི་གྲྭ་བ་ལྔ་འཛིན་བཟུང་དང་། ཕྱི་ཚེས་ ༡༨ ཉིན་གྲྭ་ཀླུ་སྒྲུབ་དང་རྒན་བློ་བཟང་སྒྲུབ་གསལ། བློ་བཟང་མཐར་ཕྱིན་བཅས་གྲྭ་པ་གསུམ་འཛིན་བཟུང་། ཕྱི་ཚེས་ ༡༩ ཉིན་དགོན་པའི་དྲུང་ཡིག་བསོད་བཟང་དང་རྒན་བསོད་ཉི། ཐག་མཆོག དབང་རྒྱལ་བཅས་འཛིན་བཟུང་བྱས་ཡོད་པ་མ་ཟད། གྲྭ་ཤག་སྔོག་བཤེར་སྐབས་གྲྭ་པ་ཞིག་གི་རྒྱ་སྒོར་ཁྲི་ ༦ ཉེན་རྟོག་མི་སྣས་ཁྱེར་ཡོད་པའི་གནས་ཚུལ་བྱུང་ཡོད་འདུག་ལ། ཕྱི་ཚེས་ ༡༩ ཉིན་གྱི་ཕྱི་དྲོ་གྲྭ་བ་རེ་རེ་བཞིན་ཡི་གེ་འབྲི་རུ་བཅུག་ཏེ་ཡིག་གཟུགས་ལ་བརྟག་དཔྱད་བྱས་རྗེས། ཁ་སང་བསྐྱར་དུ་དགོན་པའི་གྲྭ་པ་ ༦ བཅས་ཁྱོན་གྲྭ་པ་ ༡༨ འཛིན་བཟུང་བཀག་ཉར་བྱས་ཡོད་འདུག

ད་ལྟའི་ཆར་ཁོང་ཚོའི་ཁྲོད་ཀྱི་ཁག་ཅིག་རྫ་སྟོད་དུ་བཀག་ཉར་གྱིས་ནང་མིར་ཐུག་འཕྲད་བྱེད་པར་བཀག་འགོག་བྱས་ཡོད་འདུག་ལ།  ཕྱི་ཚེས་ ༡༨ ཉིན་འཛིན་བཟུང་བྱས་པའི་རྒན་བློ་བཟང་སྒྲུབ་སེལ་དང་བློ་བཟང་མཐར་ཕྱིན། རྒྱལ་མཚན་བཅས་མི་གསུམ་སེལ་ཤུལ་རྫོང་དུ་འཁྲིད་ཡོད་སྟབས། དགོན་པའི་རྨང་གཞིའི་རིག་གནས་སློབ་གྲྭ་ཚོགས་མ་ཐུབ་པར་ལྷག་ཡོད་འདུག

དབོན་པོ་དགོན་དགའ་ལྡན་བཤད་སྒྲུབ་དར་རྒྱས་གླིང་ནི། ༡༧༠༨ ལོར་གོ་རྒྱལ་དགེ་བ་ཚུལ་ཁྲིམས་མཆོག་གིས་ཕྱག་བཏབ་པ་དང་། ད་ལྟའི་བར་རྒྱུད་གྲྭ་སྟོད་སྨད་ཀྱི་ཕྱག་བཞེས་ལྟར་གནས་ཡོད་འདུག ༡༩༩༩ ལོའི་བོད་ཟླ་ ༨ པར་དགོན་པ་འདིར་མདོ་ཁམས་འཇང་དགུན་ཆོས་ཆེན་མོ་གསར་འཛུགས་དང་། ༢༠༠༥ ལོའི་བོད་ཟླ་ ༤ བའི་ནང་དགོན་པའི་ནང་རྨང་གཞིའི་རིག་གནས་སློབ་གླིང་གསར་འཛུགས་བཅས་གནང་ཡོད་པ་དང་། ད་ལྟའི་ཆར་དགོན་པར་ཁྱོན་གྲྭ་པ་ ༣༥༠ ཡས་མས་ཤིག་ཡོད་འདུག

གསར་འགོད་པ། དོན་གོ