བོད་ཕྲུག་ཁྱིམ་སྡེ་དབུ་བརྙེས་ནས་ལོ་ ༥༢ འཁོར་པའི་དུས་དྲན།

བཀུར་འོས་སྤྱི་འཐུས་ཚོགས་གཙོ་མཆོག་གིས། “སློབ་ཕྲུག་ཚོས་ཀྱང་༸གོང་ས་མཆོག་གི་དགོངས་བཞེད་དང་ཤེས་ཡོན་སྲིད་བྱུས་གསར་པའི་དགོངས་དོན་ལྟར། དེང་དུས་ཀྱི་ཤེས་ཡོན་འཛམ་གླིང་ཐོག་དཔུང་པ་མཉམ་གཤིབས་ཐུབ་པ་དང་། ལྷག་པར་དུ་བོད་མི་རང་ཉིད་ཀྱི་ཆོས་དང་རིག་གཞུང་སྐད་ཡིག་བཅས་ལ་དོ་སྣང་ཆེན་པོས་སྦྱང་བརྩོན་ཐོག་འདབ་ཤོག་(གཤོག)གཉིས་ལྡན་ཞིག་ཆགས་རྒྱུར་འབད་བརྩོན་བྱ་དགོས་སྐོར། “ཞེས་གསུངས་པ་ལྟར།

“འཛིན་སྐྱོང་གི་ངོས་ནས་༸གོང་ས་མཆོག་གི་དགོངས་བཞེད་དང་། ཤེས་ཡོན་སྲིད་བྱུས་གསར་པའི་དགོངས་དོན་ལ་ཕྱར་གྲུ་མཉམ་འདེགས་གནང་ཐབས་ལ་འབད་དགོས་གསུངས་ན་ཅི་མ་རུང་སྙམ་བྱུང་། ”

༸གོང་ས་མཆོག་དང་བོད་མིའི་སྒྲིག་འཛུགས། འདས་དང་ད་ལྟའི་མཛད་རྗེས་ཅན་གྱི་འཛིན་སྐྱོང་གི་སྡེ་ཁག་དང་། དགེ་ལས། འབྱོར་ལྡན་གྱི་སྦྱིན་བདག་སོགས་ཀྱི་ཐུན་མོང་གི་ནུས་སྟོབས་དང་བཀའ་དྲིན་ཉག་ཅིག་ལ་བརྟེན་ནས་བོད་ཕྲུག་ཁྱིམ་སྡེའི་འདས་པའི་གྲུབ་འབྲས་དང་། ད་ལྟའི་གནས་སྟངས་འདི་ལྟ་བུ་བྱུང་ཡོད་སྟབས། དེར་ཡིད་ཚིམས་འདོད་ཁེངས་ཙམ་མ་ཡིན་པར་འབྱུང་འགྱུར་གྱི་བོད་མི་རིགས་ཀྱི་ཤེས་རིག་གི་ཞིང་ས་གཤིན་པོར་རེ་བའི་འབྲས་བཟང་སྔར་ལས་ལྷག་པ་སྨིན་པའི་ཆེད། ཐབས་བརྒྱ་བྱུས་སྟོང་དང་། དབུ་འོག་དཔུང་འདེགས། ལ་ཉག་མཛོ་གཟེངས་ལྟ་བུ་གནང་དགོས་པའི་གནད་འགག་ཅིག་ཀྱང་མཐོང་བས་དེ་དོན་ཐུགས་བསམ་བཞེས་དགོས་འདུག

ཀ་ནས་དག་ཞིང་ཡིན་པ་དྷ་སའི་གྲོང་། །
ཁ་བ་གངས་ལྗོངས་སློབ་གྲྭ་བུ་གསོ་ཁང་། །
ག་ནས་བསམས་ཀྱང་དགའ་བ་སྒོམ་ནའང་འགྲིག །
ང་ཅག་བོད་རིགས་ཤེས་ཡོན་དར་རྒྱས་ཤོག །