ཕྱི་ཚེས་ ༢༧ ཉིན་ཝུན་ཇ་པའོ་ཡིས་ཁྲིམས་རྩོད་པ་བརྒྱུད་དེ། ནེའུ་ཡོག་དུས་བབ་ཀྱིས་ཁོའི་ནང་མིའི་རུལ་སུངས་མ་དངུལ་ ༢༧ བསྡུ་ཉར་བྱས་ཡོད་པའི་བཤད་ཚུལ་དེར་བདའ་འདེད་བྱས་ཡོད་འདུག
ཕྱི་ཚེས་ ༢༥ ཉིན་ནེའུ་ཡོག་དུས་བབ་གསར་ཤོག་སྟེང་། རྒྱ་གཞུང་སྲིད་བློན་ཝུན་ཇ་པའོ་ཡི་ནང་མི་ཉེ་འབྲེལ་གྱིས་རྒྱུན་ལྡན་མ་ཡིན་པའི་ཐབས་ལམ་སྤྱད་དེ། ཁྱིམ་ཚང་ལ་ཨ་སྒོར་དུང་ཕྱིར་ ༢༧ རུལ་སུངས་ལྐོག་ཉར་བྱས་པའི་གནས་ཚུལ་སྤེལ་བའི་ཐད། ཟླ་འདིའི་ཕྱི་ཚེས་ ༢༧ ཉིན། པེ་ཅིན་ཅོན་ཧི་ཁྲིམས་རྩོད་ལས་དོན་ཁང་གི་ཁྲིམས་རྩོད་པ་པའེ་ཐའོ་དང་། ཀོ་ཧོ་ཁྲིམས་རྩོད་ལས་དོན་ཁང་གི་ཁྲིམས་རྩོད་པ་ཝང་བའེ་ཏུང་གཉིས་ཀྱིས་གནས་ཚུལ་དེ་ནི་བདེན་པ་མིན་པའི་གསལ་བསྒྲགས་ཤིག་སྤེལ་འདུག
གསལ་བསྒྲགས་དེའི་ནང་། ནེའུ་ཡོག་དུས་བབ་ཀྱིས་སྤེལ་བའི་ཝུན་ཇ་པའོ་ནང་མིའི་མ་དངུལ་རུལ་སུངས་ཀྱི་གནས་ཚུལ་དེ་བདེན་པ་མིན་པ། གཉིས། ཝུན་ཇ་པའོ་ནང་མིའི་ཁྲོད་ཁག་ཅིག་རྩ་བ་ཉིད་ནས་དཔལ་འབྱོར་ཁེ་ལས་དང་འབྲེལ་བ་མེད་པ་མ་ཟད། དཔལ་འབྱོར་ཁེ་ལས་གཉེར་མཁན་ནང་མི་དག་གིས་ཀྱང་ཁྲིམས་མཐུན་མ་ཡིན་པའི་དཔའ་འབྱོར་འཚོལ་སྒྲུབ་ཀྱི་བྱ་སྤྱོད་གང་ཡང་སྤེལ་མེད་ལ། ཁོ་ཚོས་བཟོ་ཚོང་ཁེ་ལས་སུ་ཞིག་གི་མ་དངུལ་བེད་སྤྱོད་བྱས་མེད་པ། གསུམ། ཝུན་ཇ་པའོ་ཡི་ཨ་མར་ཁྲིམས་མཐུན་གྱི་ཕོགས་དངུལ་དང་རྒན་ཡོལ་རོགས་དངུལ་ལས་གཞན་པའི་ཁེ་སྤོགས་དང་ཐོན་འབབ་གང་ཡང་མེད་པ། བཞི། ཝུན་ཇ་པའོ་ཡི་ནང་མིའི་བཟོ་ཚོང་ཁེ་གཉེར་གྱི་ཚོང་དོན་ཐད་ཁོ་རང་ཉིད་ཀྱི་དབང་ཤུགས་གང་ཡང་ཐེབས་མེད་པ་མ་ཟད། ནང་མིས་བཟོ་ཚོང་ཁེ་ལས་ཀྱིས་ཁོས་གཏན་འབེབ་དང་ལག་བསྟར་བྱེད་བཞིན་པའི་གཞུང་གི་སྲིད་ཇུས་ལ་ཤུགས་རྐྱེན་གཅིག་ཀྱང་ཐེབས་མེད་པ། ལྔ་། ཝུན་ཇ་པའོ་ཡི་གཉེན་ཉེ་འབྲེལ་དང་། ཁོ་ཚོའི་གྲོགས་པོ་དང་ལས་གྲོགས་ཚང་མས་སོ་སོའི་བཟོ་ཚོང་ཁེ་ལས་བྱ་འགུལ་ལ་འགན་འཁྱེར་དགོས་པ། དྲུག ཁོ་ཚོས་མུ་མཐུད་ནས་ནེའུ་ཡོག་དུས་བབ་ཀྱི་དངོས་བདེན་མིན་པའི་གནས་ཚུལ་རིགས་མུ་མཐུད་གསལ་འདོན་བྱ་རྒྱུ་ཡིན་པ་མ་ཟད། ཁྲིམས་ཐོག་ནས་འགན་ལེན་པའི་ཁེ་དབང་བདའ་འདེད་རྒྱུན་སྐྱོང་བྱ་རྒྱུ་ཡིན་པ། བཅས་བཀོད་འདུག
སྐབས་དོན་དབྱེ་ཞིབ་པ་དག་གིས། ཝུན་ཇ་པའོ་ཡིས་ཁྲིམས་རྩོད་པ་བརྒྱུད་ཕྱིའི་གསར་ལམ་གྱིས་སྤེལ་བའི་གནས་ཚུལ་གསལ་འདོན་བྱེད་ཐབས་དེ་ནི། རྒྱ་གཞུང་མཐོ་རིམ་དཔོན་རིགས་ཁྲོད་ཧ་ཅང་མཐོན་དཀོན་པོའི་གནས་སྟངས་ཤིག་ཆགས་སྟབས། གནས་ཚུལ་འདིའི་སྟེང་ནས་རྒྱ་གཞུང་ཚོགས་ཆེན་ ༡༨ པ་བསླེབ་ལ་ཉེ་བའི་སྐབས་འདིར། རྒྱ་དམར་གཞུང་ནི་ནང་ཁུལ་འགལ་བ་ཧ་ཅང་ཛ་དྲག་གི་གནས་སྟངས་ཤིག་ལ་སླེབས་ཡོད་པའི་ངོས་འཛིན་བྱེད་བཞིན་པ་མ་ཟད། ཐེངས་འདིའི་ཝུན་ཇ་པའོ་ཡིས་ཁྲིམས་ལུགས་གཞིར་བཟུང་གནས་ཚུལ་དེར་བདའ་འདེད་ཀྱི་རྣམ་འགྱུར་དེས། ཅཱང་དང་ཀྲིག་གི་ཉེས་སྤྱོད་མཐའ་དག་ལ་རྣོ་ངར་ལྡན་པའི་ཁ་གཏད་ཅིག་ཆགས་ཡོད་སྐོར་བརྗོད་འདུག
གཞན་ཡང་སྲིད་དོན་དབྱེ་ཞིབ་པ་ཁག་གིས་བརྗོད་པ་ལྟར་ན། ཐེངས་འདིར་ཝུན་ཇ་པའོ་ཡི་ནང་མིའི་ཚུལ་མཐུན་མ་ཡིན་པའི་དཔལ་འབྱོར་མ་དངུལ་སྐོར་རྒྱལ་སྤྱིའི་གསར་ལམ་བརྒྱུད་ཕྱིར་སྒྲོག་བྱེད་མཁན་ནི། སྤྱིར་བཏང་གི་མི་མང་དཀྱིས་མ་ཞིག་མ་ཡིན་པར། ཅཱ་དང་ཀྲིག་སོགས་རྒྱ་གཞུང་གི་གསང་བའི་ལས་དོན་ལ་འབྲེལ་བ་ཡོད་མཁན་གནད་ཡོད་དཔོན་རིགས་ཁག་ཅིག་ཡིན་པ་མ་ཟད། ཝུན་གྱི་ནང་མིའི་དཔལ་འབྱོར་མ་དངུལ་ཕྱིར་སྒྲོག་བྱེད་དགོས་དོན་ནི། སྲིད་སྟེགས་ནས་འབབ་ལ་ཉེ་བའི་ཝུན་ཇ་པའོ་ལ་གནོན་ཤུགས་སྤྲོད་རྒྱུ་ཁོ་ན་ཙམ་མ་ཡིན་པར། ཝུན་གྱིས་རྒྱབ་སྐྱོར་དང་སྐོ་འཐེན་གནང་བཞིན་པའི་རྒྱ་གཞུང་གི་ད་ལྟའི་ཆབ་སྲིད་ལམ་ལུགས་ལ་བཅོས་བསྒྱུར་གྱི་འདུ་ཤེས་འཛིན་མཁན་གྱི་ཚབ་མཚོན་མི་སྣ་སྟེ། ད་ལྟའི་ཀུང་ཏུང་ཞིང་ཆེན་དམར་ཤོག་དྲུང་ཆེ་ཝང་ཡཱང་སྐབས་རྗེས་མའི་རྒྱ་གཞུང་ཆབ་སྲིད་ལྷན་ཁང་གི་རྒྱུན་ལས་མི་ ༧ གྱི་གྲས་སུ་བསླེབས་རྒྱུར་ཁ་གཏད་གཅོག་ཐབས་ཤིག་ཡིན་འདུག
གསར་འགོད་པ། ཚེ་རིང་རྒྱལ།
འདིར་ཨ་སྒོར་དུང་ཕྱིར་ཞེས་དུང་ཕྱིར་བྲིས་པ་དང་ཡང་མི་མང་དཀྱིས་མ་ཞེས་དཀྱིས་མ་ཞེས་བྲིས་པར་གོ་བ་ལྷག་པོ་ག་རེ་ལེན་རྒྱུ་ཡོད་ན།
སྲིད་བློན་ཝུན་ཅ་ཡི་ལྐོག་ཟ་རུལ་སུངས་བྱས་པའི་གནས་ཚུལ་གསལ་འདོན་བྱེད་ཚུལ་ལ་སུ་ཞིག་ཡིད་སྟོན་ནུས།
རྒྱ་ནག་གི་ཁྲིམས་རྩོད་ལས་དོན་ཁང་གི་ཁྲིམས་རྩོད་པ་ཚོ་ཡང་ཝུན་ཅ་པོ་རང་ཉིད་ལྟ་བུ་འབའ་ཞིག་རེད།
ཁྲམ་པའི་རྒྱབ་སྐྱོར་ཁྲམ་པའི་བྱེད་རྒྱུ་རེད།
འོན་ཅ་པོ་ལ་ནག་ཉེས་མེད་ན་བོད་པ་ཚོས་སྐད་བཅོལ་མ་རྒྱག་ན་བཟང་།
ཁྲིམས་ལྟར་བདའ་འདེད་ཀྱི་ཐོབ་ཐང་དོར་གྱི་མིན་ཞེས་པ་ལས་བདའ་འདེད་བྱེད་རྒྱུ་ཡིན་ལབ་ཐུབ་ཡོད་པ་མ་རེད། གང་ལྟར་ཝུན་ནི་བོད་མིའི་མེར་བསྲེག་དྲག་སྤྱོད་པར་བརྗོད་མཁན་གྱི་དགྲ་བོ་ལྟེ་བ་དེ་ཡིན་པས། ལྐོག་ཟ་རུལ་སུངས་ཐ་དག་ཐད་བོད་པ་ཚོས་ཀྱང་ཉམས་ཞིབ་ཀྱིས་ཐེར་འདོན་བྱེད་རོགས་གནང་རྒྱུ་བོད་མི་ཡིན་ཟེར་མཁན་དག་གི་ལས་འགན་རེད།
ཝུན་གྱི་བདེན་པ་ཉིད་རྒྱལ་འགྱུར་ཅིག འོནད་ཀྱང་། གལ་སྲིད་ཝུན་གྱིས་ལྐོག་ཟ་རུལ་སུངས་བྱས་ཡོད་ན། ཚོགས་ཆེན་མ་འཚོགས་གོང་ལ་ཐེར་འདོན་ཡོང་བའི་སྨོན་འདུན་ཡང་ཡོད་ལགས།
་་་་་ སྐབས་དོན་དབྱེ་ཞིབ་པ་དག་གིས། ཝུན་ཇ་པའོ་ཡིས་ཁྲིམས་རྩོད་པ་བརྒྱུད་ཕྱིའི་གསར་ལམ་གྱིས་སྤེལ་བའི་གནས་ཚུལ་གསལ་འདོན་བྱེད་ཐབས་དེ་ནི། རྒྱ་གཞུང་མཐོ་རིམ་དཔོན་རིགས་ཁྲོད་ཧ་ཅང་མཐོན་དཀོན་པོ་ཡིན་སྟབས། གནས་ཚུལ་འདིའི་སྟེང་ནས་རྒྱ་གཞུང་ཚོགས་ཆེན་ ༡༨ པ་བསླེབ་ལ་ཉེ་བའི་སྐབས་འདིར། རྒྱ་དམར་གཞུང་ནི་ནང་ཁུལ་འགལ་བ་ཧ་ཅང་ཛ་དྲག་གི་གནས་སྟངས་ཤིག་ལ་སླེབས་ཡོད་པའི་ངོས་འཛིན་བྱེད་བཞིན་པ་་་་་་ སོགས་ཟེར།