གྲྭ་པ་ཞིག་འཛིན་བཟུང་།

རྒྱ་གཞུང་གིས་ཀུ་ཤུ་རྟགས་ཅན་གྱི་ཁ་པར་ཡོད་པའི་ཉེས་མིང་འོག་ཁམས་སོག་རྫོང་གི་གྲྭ་བ་ཞིག་འཛིན་བཟུང་བྱས་འདུག

སྦྲ་སོག་འབྲི་གསུམ་སྐྱིད་སྡུག་ཚོགས་པའི་ཚོགས་གཙོ་ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཚེས་ ༢༣ ཉིན་རྒྱ་ནག་གཞུང་གིས། ཁམས་སོག་རྫོང་ཚ་དབྲོག་གྲོང་རྡལ་གྲོང་ཚོ་བདུན་པའི་ཕ་མགོན་རྣམ་གྱི་བུ། སྲིང་མོ་རྫོང་ཆགས་རི་དགོན་ནམ། སྲིང་རྫོང་འོད་གསལ་སྒྲུབ་སྡེ་ཨོ་རྒྱན་དམ་ཆོས་གླིང་དགོན་པའི་རང་ལོ་ ༡༩ ཡིན་པའི་གྲྭ་བཀྲ་ཤིས་ནོར་བུ་ཞུ་བ།  ཀུ་ཤུ་རྟགས་ཅན་གྱི་ཁ་པར་ཡོད་པའི་ཉེས་མིང་འོག་འཛིན་བཟུང་བྱས་ཏེ་རྫོང་ཐོག་ཏུ་འཁྲིད་ཡོད་འདུག

སྲིང་རྫོང་འོད་གསལ་སྒྲུབ་སྡེ་ཨོ་རྒྱན་དམ་ཆོས་གླིང་ནི། གཏེར་སྟོན་ཆེན་པོ་ཁམས་པ་ཉི་མ་གྲགས་པའི་གདན་ས་དང་། སྔ་འགྱུར་རྙིང་མའི་དགོན་པ་ཞིག་ཡིན་འདུག་ལ། ཁམས་སྲིང་མོ་རྫོང་ནི་འབྲི་རུ་རྫོང་དང་སོག་རྫོང་གི་གཉིས་ཀྱི་བར་མཚམས་སུ་ཡོད་པའི་གནས་རི་ཞིག་གི་མིང་ཡིན་འདུག

ད་ཆར་རྒྱ་གཞུང་གིས། འབྲི་རུ་རྫོང་དང་སོག་རྫོང་གི་ས་གནས་མི་མང་ལ་སྔར་ལས་ལྷག་པའི་དམ་དྲག་བྱས་ཏེ། གྲོང་ཚོ་རེའི་བར་ན་ལག་འཁྱེར་ཞིབ་བཤེར་ས་ཚུགས་རེ་བཙུགས་ནས་ཞིབ་གཤེར་བྱེད་པ་དང་། ཀུ་ཤུ་རྟགས་ཅན་གྱི་ཁ་པར་ཡོད་མཁན་རྣམས་འཛིན་བཟུང་བཀག་ཉར་གྱིས་སྐར་འཕྲིན་ (wechat)  མཉེན་ཆས་ནང་ཕྱི་སྡོད་བོད་མིར་འབྲེལ་བ་བྱས་ཡོད་མེད་བརྩད་གཅོད་བྱེད་ཀྱི་ཡོད་འདུག་ལ། མི་འགྱངས་པར་རྒྱ་ནག་གི་ཚོགས་ཆེན་ཐེངས་༡༨ པ་འཚོགས་ལ་ཉེ་སྟབས། ས་གནས་སུ་སྔར་ལྷག་དམ་དྲག་བྱེད་ཀྱི་ཡོད་འདུག

གསར་འགོད་པ། དོན་གོ