ཕྱི་ཟླ་ ༡༡ ཚེས་༡ ནས་ ༤ བར་དྷ་ས་བོད་ཀྱི་ཟློས་གར་ཚོགས་ཁང་དུ། རྒྱལ་སྤྱིའི་གློག་བརྙན་དུས་སྟོན་ཐེངས་དང་པོ་འཚོག་རྒྱུ་རེད།
ཁ་སང་ཕྱི་ཚེས་༣༠ ཉིན། གློག་བརྙན་བཟོ་སྐྲུན་པ་བསྟན་འཛིན་བསོད་ནམས་དང་ཁོང་གི་བཟའ་ཟླ་རི་ཏུ་གཉིས་ཀྱིས། དྷ་ཤོད་པན་ཇབ་དངུལ་ཁང་ཡང་སྟེང་དུ་གསར་འགོད་གསལ་བསྒྲགས་ཤིག་སྤེལ་ཏེ། ཕྱི་ཟླ་ ༡༡ ཚེས་ ༡ ཉིན་མགོ་འཛུགས་ཀྱིས་ཉིན་ ༤ རིང་དྷ་ས་བོད་ཀྱི་ཟློས་གར་ཚོགས་ཁང་དུ། རྒྱལ་སྤྱིའི་གློག་བརྙན་དུས་སྟོན་ཐེངས་དང་པོ་འཚོག་རྒྱུ་ཡིན་པ་བསྒྲགས་སོང་།
དྷ་སར་འཚོག་འཆར་གྱི་ཐེངས་འདིའི་རྒྱལ་སྤྱིའི་གློག་བརྙན་དུས་སྟོན་ཐོག རྒྱལ་སྤྱིའི་གློག་བརྙན་འདྲ་མིན་ཁག་ ༢༦ གཟིགས་འབུལ་ཞུ་རྒྱུ་ཡིན་པ་དང་། གློག་བརྙན་དེ་དག་ཁྲོད་དངོས་བྱུང་གློག་བརྙན་ ༡༢ དང་། བོད་དོན་དང་འབྲེལ་བའི་གློག་བརྙན་ ༣ ། དེ་མིན་གློག་བརྙན་ཐུང་གྲས་ ༡ བཅས་ཡོད་པ་དང་། ཐེངས་འདིའི་གློག་བརྙན་དུས་སྟོན་སྐབས་ཆེད་ལས་གློག་བརྙན་བཟོ་སྐྲུན་པ་ ༡༢ ཙམ་དྷ་སར་ཆེད་བཅར་གནང་རྒྱུ་ཡིན་པ་མ་ཟད། གློག་བརྙན་བཟོ་སྐྲུན་པ་གྲགས་ཅན་རྣམས་དང་ལྷན་དྲི་བ་དྲིས་ལན་དང་ཟབ་སྦྱོང་གི་ལས་རིམ་སོགས་ཀྱང་གོ་སྒྲིག་གནང་རྒྱུ་ཡིན་འདུག
གསར་འགོད་གསལ་བསྒྲགས་སྐབས་བསྟན་འཛིན་བསོད་ནམས་ལགས་ཀྱིས། རྒྱལ་སྤྱིའི་གློག་བརྙན་དུས་སྟོན་དེ་འདྲ་ཞིག་དྷ་སར་གོ་སྒྲིག་གནང་དགོས་དོན་གཙོ་བོ་ནི། ཁོང་གཟའ་ཚོ་གཉིས་དྷ་རམ་ས་ལར་ལོ་ ༡༦ ལྷག་ལ་བསྡད་པཔའི་རིང་། བོད་པ་དང་རྒྱ་གར་སྤྱི་ཚོགས་གཉིས་བར་འབྲེལ་འདྲིས་ཤུགས་ཆེན་པའི་གནས་སྟངས་མཐོང་གི་འདུག་སྟབས། རྒྱལ་སྤྱིའི་གློག་བརྙན་དུས་སྟོན་གྱི་སྡིངས་ཆ་བརྒྱུད་དེ་རྒྱ་གར་དང་བོད་པའི་སྤྱི་ཚོགས་བར་འབྲེལ་འདྲིས་ཡོང་ཐབས་དང་། དེ་བཞིན། གློག་བརྙན་དུས་སྟོན་འདི་དམིགས་བསལ་བོད་དོན་ཆབ་སྲིད་དང་འབྲེལ་བ་མེད་ཀྱང་། དུས་སྟོན་ཚོགས་ས་བཞུགས་སྒར་ཁུལ་ཡིན་སྟབས། བོད་དོན་དྲིལ་བསྒྲགས་ཞོར་དུ་རང་བཞིན་གྱིས་ཡོང་རྒྱུ་ཡིན་སྐོར་བརྗོད་ཡོད་པ་རེད།
བཞུགས་སྒར་དྷ་སར་འཚོགས་འཆར་གྱི་རྒྱལ་སྤྱིའི་གློག་བརྙན་དུས་སྟོན་དེར། རྒྱ་གར་ཧི་མ་ཅལ་མངའ་སྡེ་གཞུང་དང་། མངའ་སྡེ་ཡུལ་སྐོར་སྤྲོ་འཁྱམ་ལས་ཁུངས་ནས་རྒྱབ་སྐྱོར་དང་མཐུན་འགྱུར་གནང་རྒྱུ་ཡིན་འདུག
དེ་ལྟ་བུའི་གོ་སྒྲིགས་བྱས་པ་དགའ་བསུ་ཡོད། པར་ལེན་སྟངས་གཅིག་བུ་མ་ཡིན་པར་ད་དུང་བུ་དང་བུ་མོ་ཁ་ཤས་ལ་ཁྲོམ་སྟངས་སོགས་སློབ་ཐུབ་ན་ངོ་མ་འདམ་གཤོག་གཉིས་ལྡན་ཞིག་ཆགས་ཀྱི་རེད།རྩོམ་སྒྲུང་ལ་དཀའ་ངལ་ཡོད་ལེ་མ་རེད་གང་ལ་ཞུས་ན་ང་ཚོའི་སྤྱི་ཚོགས་ནང་སྔར་དང་མི་འདྲ་བ་རྩོམ་པ་པོ་མང་པོ་ཡོང་གི་ཡོད་རེད།