མགོ་ལོག་འཇིཊ་མེད་ལན་ཀྲོའུ་ནས་ཕྱིར་ལོག་པའི་ལམ་བར་དུ་འཇུ་བཟུང་བྱས་འདུག

བོད་ནས་གནས་ཚུལ་འབྱོར་པ་ལྟར་ན། མགོ་ལོག་འཇིགས་མེད་ལགས་འདི་ལོའི་ཕྱི་ཟླ་ ༩ ཚེས་ ༢༠ ཉིན་ལན་ཀྲོའུ་ནས་ཕྱིར་ལོག་པའི་ལམ་བར་ནས་རྒྱ་གཞུང་གིས་འཇུ་བཟུང་བཀག་ཉར་བྱས་ཡོད་འདུག

ཟླ་འདིའི་ཕྱི་ཚེས་ ༣ ཉིན་མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་གྱིས་གནས་ཚུལ་བཏང་འབྱོར་བྱུང་བ་ལྟར་ན། འདི་ལོའི་ཕྱི་ཟླ་ ༩ ཚེས་ ༥ ཉིན་རྒྱ་གཞུང་གིས་མགོ་ལོག་འཇིགས་མེད་ལགས་ལ་ཁོ་རང་སྡོད་སའི་བླ་བྲང་གི་ཁང་པ་དེར་བཟོས་རྒྱག་དགོས་ཚུལ་བརྗོད་དེ་གཞན་དུ་སྤོར་བཅུག་རྗེས། དེ་སྔོན་མཐོང་མ་མྱོང་བའི་རྒྱ་མི་ཁག་གཅིག་ཡོང་སྟེ་ཉིན་དཀར་སྡོད་ཁང་གཏོར་པ་མ་ཟད། དགོང་མོ་ས་རུབ་རྗེས་ས་རྐོ་འཕྲུལ་འཁོར་ཡོང་སྟེ་ཁང་ཤུལ་བསྔོགས་བཤེར་ཀྱང་བྱས་ཡོད་འདུག དེ་རྗེས་མགོ་ལོག་འཇིགས་མེད་ལགས་སྒེར་དོན་ཞིག་གི་ཆེད་རྒྱ་ནག་གྲོང་ཁྱེར་ལན་ཀྲོའུ་ལ་ཕྱིན་ཡོད་པ་དང་། ཕྱི་ཟླ་ ༩ ཚེས་ ༢༠ ཉིན་ཁོང་རྒྱ་ནག་གི་གྲོང་ཁྱེར་ལན་ཀྲོའུ་ནས་ཕྱིར་ཕེབས་པའི་ལམ་བར་ནས་རྒྱ་གཞུང་གིས་གསང་བའི་འཇུ་བཟུང་བྱས་ཏེ་གར་སོང་ཆ་མེད་དུ་གྱུར་འདུག་ཡོད།

སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལགས་ཀྱིས་བརྗོད་པ་ལྟར་ན། ཉེ་བའི་ཉིན་ཤས་གོང་ལ་གསེར་རྟ་རྫོང་གི་བཀའ་མངགས་བརྒྱུད། མགོ་ལོག་འཇིགས་མེད་ལགས་ཀྱི་ཕ་ཡུལ་རག་ཁྲམ་ཡུལ་ཚོའི་ས་གནས་རྒྱ་གཞུང་གིས། མགོ་ལོག་འཇིགས་མེད་ལགས་ལ་རང་གི་ཕ་ཡུལ་དུ་གནས་ཚུལ་ག་རེ་ཡོད་མེད་ཐད་གསང་བའི་ཞིབ་འཇུག་བྱས་ཡོད་པའི་སྐོར་ས་གནས་མང་ཚོགས་ཁྲོད་ཁྱབ་ཡོད་འདུག་ལ། བོད་ནང་ནས་གནས་ཚུལ་མཁོ་གཏོང་གནང་མཁན་གྱིས། “མགོ་ལོག་འཇིགས་མེད་ལགས་དེང་སྐབས་སླར་ཡང་རྒྱ་གཞུང་གིས་བཙོན་འཇུག་བྱས་ཏེ། མ་ཉེས་ཁག་གཡོགས་དང་མནར་གཅོད་གཏོང་བཞིན་ཡོད་ངེས་སྟབས། འཛམ་གླིང་གི་དྲང་བདེན་ལ་དགའ་བའི་གཞུང་སྒེར་ཡོངས་ཀྱིས་བོད་མིའི་རྩ་དོན་སྤྱི་དང་། མགོ་ལོག་འཇིགས་མེད་ཀྱི་ཆེད་རྒྱབ་སྐྱོར་ནུས་ལྡན་གནང་རྒྱུར་ང་ཚོས་རེ་བ་ཆེན་པོ་བྱས་ཡོད།’’ ཅེས་འབོད་སྐུལ་གནང་ཡོད་འདུག

དེ་སྔོན་རྒྱ་དམར་གཞུང་གིས་མགོ་ལོག་འཇིགས་མེད་ལ། ད་ལྟ་རྒྱ་དམར་གྱི་བཙོན་འཇུག་འོག་ཡོད་པའི་འཇིགས་བྲལ་གློག་བརྙན་བཟོ་མཁན་དོན་གྲུབ་དབང་ཆེན་ལགས་ཀྱི་ལས་རོགས་ཡིན་པའི་ཉེས་འཛུགས་དང་། ༢༠༠༨ ལོའི་བོད་ནང་གི་ས་བྱི་ཞི་རྒོལ་ཆེན་མོ་སློང་མཁན་གྱི་ཉེས་འཛུགས་སོགས་བྱས་ཏེ། ད་ལྟའི་བར་སྔ་ཕྱིར་འཇུ་བཟུང་བཙོན་འཇུག་ཐེངས་མང་བྱས་ཏེ་གཅར་རྡུང་མནར་གཅོད་ཚད་མེད་བཏང་ཡོད་པ་ལྟར། སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལགས་ལ་བོད་ནས་གནས་ཚུལ་མཁོ་སྤྲོད་པས། “༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོ་མགོ་ཚུགས་རྗེས། ཕྱི་ཟླ་ ༣ ཚེས་ ༢༣ ཉིན་རྒྱ་གཞུང་ཉེན་རྟོག་པས་མགོ་ལོག་འཇིགས་མེད་ལགས་བླ་བྲང་བཀྲ་ཤིས་འཁྱིལ་ནས་བཙན་ཁྲིད་ཀྱིས་ཀ་ཆུའི་ཉེས་ཆེན་པའི་བཙོན་ཁང་སོགས་བཙོན་ཁང་འདྲ་མིན་ནང་ཟླ་ ༧ ཙམ་ལ་བཙོན་བཅུག་བྱས་སྐབས། ཉིན་གྲངས་ ༥༣ དང་ཉིན་མཚན་བསྡོམས་ན་ཉིན་ཞག་ ༡༠༦ རིང་། ཉེན་རྟོག་པ་དང་དམག་མི་སོགས་རེས་མོས་ཀྱིས་གཅར་རྡུང་དྲག་པོ་བཏང་ཡོད་པ་མ་ཟད། ཁོང་གི་རྐང་ལག་བཞི་ལ་གཟུགས་པོའི་རྒྱབ་ལོགས་ནས་ལྕགས་བརྒྱབ་སྟེ། བཙོན་ཁང་ནང་གནམ་ལ་བཏགས་ནས་ཆུ་ཚོད་མང་པོར་བཞག་པར་བརྟེན། ལན་མང་དྲན་མེད་དུ་བརྒྱལ་ཡོད་པ་དང་། གཞན་གློག་རྒྱུགས་འདྲ་མིན་ཁ་ནང་དང་། མིག་ནང་སོགས་ལ་བཙུགས་ཏེ་གློག་གིས་རྒྱག་བཅུག་པ། གཉིད་བཀག་པ། ཟས་བཅད་པ། ཐ་ན་གཙང་སྤྱོད་ལ་མ་མངག་པ་སོགས་སྡུག་སྦྱོང་མནར་གཅོད་ཚབས་ཆེན་བཏང་མཐར། ༢༠༠༨ ལོའི་ཕྱི་ཟླ་ ༡༠ ནང་རྒྱ་གཞུང་གིས་དོ་དམ་བཀག་ཉར་འགན་ལེན་གྱི་གན་གྱའི་འོག་མགོ་ལོག་འཇིགས་མེད་ལགས་གློད་ཡོད་ཀྱང་། བཙོན་ཁང་ནང་མནར་གཅོད་ཚད་མེད་བཏང་བར་བརྟེན། ཁོང་གི་རྩིབ་མ་གཡས་གཡོན་གཉིས་ཀྱི་རྩིབ་རུས་མང་པོ་བཅག་སྟེ་དེང་སྐབས་ཀྱང་དྲག་སྐྱེད་ཡག་པོ་བྱུང་མེད་པ་དང་། ཁོང་གི་ལག་པ་གཉིས་ནད་པར་གྱུར་ཏེ་རང་ཉིད་ཀྱི་ཤམ་ཐབས་སྒང་ལ་སྐེད་རགས་བཅང་ཐུབ་མི་ཐུབ་ཙམ་དུ་གྱུར་ཡོད།” ཅེས་བརྗོད་འདུག

བོད་ནས་གནས་ཚུལ་མཁོ་སྤྲོད་པས་བརྗོད་པ་ལྟར་ན། ༢༠༠༩ ལོའི་ཕྱི་ཟླ་ ༣ ཚེས་ ༡༣ ཉིན་རྒྱ་དམར་ཉེན་རྟོག་པས་མགོ་ལོག་འཇིགས་མེད་བཙོན་འཇུག་ཐེངས་གཉིས་པ་བྱས་ཏེ། ཕྱི་ཟླ་ ༤ ཚེས་ ༢༠ བར་ཟླ་ ༡ དང་ཉིན་ ༨ རིང་བཀག་ཉར་བྱས་ཡོད་ལ། དེ་བཞིན་མཚམས་རེར་བདུན་ཕྲག་རེ་གཉིས་ཙམ་དང་། ཉིན་ཁ་ཤས་རེ་ལ་བཀག་ཉར་བྱེད་པ་དང་། སྐབས་རེར་ཟླ་བ་འདི་ནས་འདིའི་བར་ལ་ཁྱོད་དགོན་པའི་ནང་བསྡད་མི་ཆོག་ཟེར་ནས། ཉེན་རྟོག་པས་ཁོང་དགོན་པ་ནས་ཕྱིར་འབུད་ཐེངས་མང་བཏང་བ་སོགས་ནི། ཁོང་ལ་མཚོན་ན་འཆར་ཅན་གྱི་གནས་ཚུལ་ལྟ་བུ་ཞིག་ཆགས་ཡོད་འདུག

གཞན་ཡང་། བོད་ནས་གནས་ཚུལ་གཏོང་གནང་མཁན་གྱིས། མགོ་ལོག་འཇིགས་མེད་ལགས་ཀྱིས་རང་གི་ཕ་ཡུལ་མགོ་ལོག་གསེར་རྟ་རག་ཁྲམ་ཡུལ་ཚོའི་ས་གནས་སུ་བླངས་པའི་འདྲ་པར་ཞིག་བཏང་ཡོད་པ་མ་ཟད། དེང་སྐབས་རྒྱ་གཞུང་གིས་བོད་ཀྱི་འབྲོག་པ་གྲོང་སྡེར་བསྒྱུར་རྒྱུའི་སྲིད་ཇུས་ལག་བསྟར་འདེབས་བཞིན་པ་ལྟར། པར་སྟེང་གི་མགོ་ལོག་འཇིགས་མེད་ལགས་ཀྱི་རྒྱབ་ཕྱོགས་ཀྱི་ཁང་ཤར་དེ་དག་ནི། རྒྱ་གཞུང་གིས་མགོ་ལོག་འཇིགས་མེད་ལགས་ཀྱི་ཕ་ཡུལ་ཏོག་ཚ་སྡེ་བའི་འབྲོག་སྡེ་རྣམས་གྲོང་སྡེར་བསྒྱུར་ཡོད་རྣམ་པ་ཡིན་སྐོར་གསལ་བཤད་གནང་ཡོད་འདུག