དེ་རིང་གཟའ་ཉི་མའི་ཉིན་དཔལ་ལྡན་རྒྱུད་སྟོད་གྲྭ་ཚང་དུ་བོད་ནང་རང་ལུས་མེར་བསྲེཊ་ཀྱིས་རྒྱ་གཞུང་ངོ་རྒོལ་གནང་བའི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་ཆེད། དཔལ་རྡོ་རྗེ་འཇིཊ་བྱེད་ཀྱི་བདག་འཇུག་གི་ཆོ་གའི་སྒོ་ནས་མཆོད་འབུལ་གནང་སོང་།
དེ་རིང་ཕྱི་ཚེས་ ༤ ཉིན་གྱི་ཞོགས་པའི་ཆུ་ཚོད་ ༩།༠༠ བའི་ཐོག བཞུགས་སྒར་ངྷ་རམ་ས་ལའི་ཉེ་མཁྲིས་དཔལ་ལྡན་རྒྱུད་སྟོད་གྲྭ་ཚང་དུ་མཁན་རིན་པོ་ཆེ་ལོ་དགོན་སྤྲུལ་སྐུ་བསྟན་འཛིན་ཆོས་བཟང་མཆོག་དང་བླ་དབུ་ཐུབ་བསྟན་བསྟན་འཛིན་མཆོག་རྣམ་གཉིས་དབུ་བཞུགས་ཐོག རྒྱུད་སྟོད་གྲྭ་ཚང་གི་མཁན་བླ་འདུས་མང་ཡོངས་དང་། བཙུན་དགོན་འཇམ་དབྱངས་ཆོས་གླིང་དང་སྒྲོལ་མ་གླིང་གི་བཙུན་མ། དེ་བཞིན་བཞུགས་སྒར་ངྷ་རམ་ས་ལ་དང་ནོར་གླིང་ཉེ་འཁྲིས་ཀྱི་སེར་སྐྱ་མི་མང་བཅས་མི་ ༥༠༠ ལྷག་འདུ་འཛོམས་ཀྱིས། བོད་ནང་བསྟན་སྲིད་མི་རིགས་དང་རང་དབང་དོན་དུ་རྩ་ཆེའི་རང་སྲོག་མཆོད་མེར་འབུལ་མཁན་གྱི་རྒྱལ་གཅེས་དཔའ་བོ་དཔའ་མོ་ཡོངས་དང་། ཁོང་རྣམ་པའི་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་ཆེད། རྒྱུད་སྟོད་གྲྭ་ཚང་གི་མཁན་བླ་འདུས་མང་ཡོངས་ནས་དཔལ་རྡོ་རྗེ་འཇིགས་བྱེད་ཀྱི་བདག་འཇུག་གི་ཆོ་གའི་སྒོ་ནས་མཆོད་འབུལ་སྨོན་ལམ་གནང་སོང་བ་མ་ཟད། ཉིན་གཅིག་རིང་གི་མཆོད་འབུལ་སྐབས་རྒྱུད་སྟོད་གྲྭ་ཚང་གིས་དེར་ཡོད་དགེ་བཙུན་སྔགས་གསུམ་ལ་སྐུ་འགྱེད་དང་གསོལ་ཇ། མི་མང་ལ་ཉིན་གུང་ཞལ་ལག་བཅས་གོ་སྒྲིག་གནང་འདུག
གསར་འགོད་པ། དོན་གོ
