ཁ་སང་གཟའ་ཉི་མའི་ཉིན་ནེའུ་ཛི་ལན་ཌིར་བོད་རྒྱའི་རིག་གཞུང་བརྗེ་རེས་བགྲོ་གླེང་ཚོགས་འདུ་ཞིག་ཚོགས་འདུག
ཁ་སང་གཟའ་ཉི་མའི་ཉིན་རྒྱབ་ཚུ་ཚོད་ ༢ ནས་ ༥ བར། ཨོ་སི་ཌི་ལི་ཡར་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་ཁང་དང་། ནེའུ་ཛི་ལན་ཌིའི་རྒྱ་བོད་མཐུན་ཚོགས་གཉིས་ཀྱི་གོ་སྒྲིག་འོག ནེའུ་ཛི་ལན་ཌིའི་གྲོང་ཁྱེར་ཨོག་ལན་ཌིའི་མའེ་མའོ་རེ་ཧོལ་ (Mt Eden War Memorial Hall) ཐོག་གི་ཡང་སྟེང་ཚོགས་ཁང་ནང་། བོད་རྒྱའི་རིག་གཞུང་བརྗེ་རེས་ཀྱི་བགྲོ་གླེང་ཚོགས་འདུ་ཐེངས་དང་པོ་དེ་ཚོགས་ཡོད་པ་དང་། ཚོགས་འདུའི་སྟེང་སྐུ་མགྲོན་གཙོ་བོ་སྐུ་ཚབ་དོན་གཅོད་དྭགས་པོ་བསོད་ནམས་ལགས་གཙོས། བོད་རྒྱ་མི་རིགས་གཉིས་ཀྱི་མི་སྣ་དང་ཕྱི་རྒྱལ་བ་བཅས་ཁྱོན་མི་གྲངས་ ༧༠ མཉམ་ཞུགས་བྱས་ཡོད་འདུག
རིན་ཆེན་དོན་གྲུབ་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཚོགས་འདུའི་ཐོག་མར་ཚོགས་བཅར་བ་ཡོངས་ནས་སྐར་མ་ཁ་ཤས་རིང་། ད་ལྟའི་བར་བོད་མིའི་རང་དབང་དང་རིག་གཞུང་། སྐད་ཡིག་བཅས་སྲུང་སྐྱོབ་དང་། ༸གོང་ས་མཆོག་ཕྱིར་བོད་ཡུལ་དུ་གདན་འདྲེན་ཞུ་ཆེད། རང་ལུས་མེར་བསྲེགས་བཏང་སྟེ་སྐུ་གཤེགས་པའི་དཔའ་བོ་དཔའ་མོ་རྣམས་ལ་མྱ་ངན་གུས་འདུད་དང་། དེ་དག་གི་རྗེས་ཤུལ་ནང་མི་བུ་ཕྲུག་བཅས་པར་གདུང་སེམས་མཉམ་སྐྱེད་མཚོན་ཆེད་དུ། སྐྱབས་འགྲོ་དང་མ་ཎི་གསོག་སྒྲུབ་གནང་ཡོད་ལ། དེ་བཞིན། ཚོགས་འདུའི་ཐོག་བོད་རྒྱ་མི་རིགས་གཉིས་ཀྱི་སྲོལ་རྒྱུན་རིག་སྐོར་ནས་འཁྲབ་སྟོན་བྱས་ཏེ་ཕན་ཚུན་རིག་གནས་བརྗེ་རེས་ཐད་གོ་རྟོགས་སྤེལ་ཡོད་པ་རེད།
ཚོགས་ཐོག་ཏུ་རྒྱ་རིགས་སྐུ་ཞབས་ཁྲེན་ལགས་ཀྱིས། ད་བར་བོད་མི་ ༦༢ ཙམ་གྱིས་སོ་སོའི་རང་དབང་གི་དོན་དུ་རང་ལུས་མེར་བསྲེག་བཏང་ཡོད་ཀྱང་། རྒྱ་གཞུང་གིས་ཁོང་རྣམས་ཀྱི་ཚེ་སྲོག་ལ་སེམས་ཁུར་སྤུ་ཙམ་མེད་པར། ད་དུང་ཁ་ནས་སྤུན་ཟླ་མི་རིགས་ང་དྲུག་ཅེས་བཤད་ཀྱིན་པ་དེ་ནི་སྐྱག་རྫུན་རང་རེད་ཅེས་ཚོར་ཤུགས་ཆེན་པོས་བརྗོད་ཡོད་པ་དང་། རྒྱ་རིགས་བགྲེས་སོང་ལོ་རྒྱུས་སྨྲ་བ་སྐུ་ཞབས་ཧྥན་ལགས་ཀྱིས་ཀྱང་། ༡༩༤༩ ལོར་རྒྱ་དམར་གྱིས་བོད་ལ་དྲག་པོས་དབང་སྒྱུར་བྱས་པ་ནས་བཟུང་བོད་ཡུལ་མུན་པས་སྒྲིབ་མགོ་ཚུགས་པ་དང་། གྲོས་མཐུན་དོན་ཚན་ ༡༧ ཟེར་བ་ཡང་བཙན་དབང་གི་འོག་ནས་བཞག་དགོས་བྱུང་བ། ཐ་ན་དེ་སྐབས་ཀྱི་ཐམ་ཀ་ཡང་རྫུན་མ་ཞིག་བཟོས་ནས་བེད་སྤྱོད་བྱས་ཡོད་ལ། བོད་ཀྱི་རིག་གཞུང་གི་བསྟི་གནས་ཆེས་གནའ་རབས་ཀྱི་དགོན་སྡེ་ ༦༠༠༠ ལྷག་ཙམ་རྩ་གཏོར་བཏང་ཡོད་པ་རྣམས་ལོ་རྒྱུས་ཀྱིས་བདེན་དཔང་བྱས་ཡོད་སྐོར་གསལ་བརྗོད་གནང་ཡོད་འདུག
མཇུག་མཐར་སྐུ་མགྲོན་གཙོ་བོ་སྐུ་ཚབ་དོན་གཅོད་དྭགས་པོ་བསོད་ནམས་ལགས་ཀྱིས། བཙན་བྱོལ་ནང་གི་མང་གཙོའི་འཕེལ་རིམ་སྐོར་ཚོགས་བཅར་བ་རྒྱ་རིགས་དང་ཕྱི་རྒྱལ་བ་དག་ལ་ངོ་སྤྲོད་གནང་བར་མ་ཟད། ཚོགས་བཅར་བ་རྣམས་ཀྱི་དྲི་བར་ལན་འདེབས་བཅས་གནང་སྟེ་ཚོགས་འདུ་མཇུག་སྒྲིལ་ཡོད་འདུག
