ཟླ་བ་བཀྲིས། རྡ་རམ་ས་ལ།
རྒྱ་ནག་དམར་ཤོག་ཚོགས་པའི་ཏང་གི་རྒྱལ་ཡོངས་ཚོགས་ཆེན་བཅོ་བརྒྱད་པ་དེ། འདི་ཟླའི་ཚེས་ ༨ ཉིན་ནས་སྐོང་འཚོགས་བྱ་བཞིན་ཡོད་ཅིང། ད་ལྟ་རྒྱལ་ཡོངས་ཀྱི་བརྙན་འཕྲིན་དང། རླུང་འཕྲིན། ཚགས་པར། དུས་དེབ། དྲ་རྒྱ་སོགས་དྲིལ་བསྒྲགས་ཀྱི་འཕྲུལ་འཁོར་ཡོད་ཚད་སྒོ་ཕྱེ་ནས་ཚོགས་ཆེན་བཅོ་བརྒྱད་པ་བདེ་བླག་ཡོང་ཆེད་དང། ཐ་ན་བྱིས་པ་ལོ་བརྒྱད་ཀྱིས་ཀྱང་ད་ཐེངས་ཀྱི་ཚོགས་ཆེན་དེར་དོ་སྣང་དང་། མ་མཐར་ཡང་ཀླད་པའི་ནང་བག་ཆགས་ཡོང་ཐབས་བྱེད་ཀྱི་ཡོད། དེང་སྐབས་རྒྱལ་སྤྱི་དང་རྒྱ་ནང་གང་སར་ཚོགས་ཆེན་དེ་དང་འབྲེལ་བའི་གླེང་ཕྱོགས་སྣ་ཚོགས་ཡོད་ཅིང། ཕྱོགས་གཅིག་གིས་ད་རེས་ཀྱི་ཚོགས་ཆེན་དེ་བརྒྱུད་གོམས་པ་རིམ་བགྲོད་ཀྱིས་ཞི་ཅིན་ཕེན་གཙོ་བོ་བྱས་པའི་མི་རབས་ལྔ་པའི་དབང་འཛིན་པའི་དཔུང་ཁག་གིས་རྒྱ་ནག་ནང་ལོ་རྒྱུས་རང་བཞིན་གྱི་དམངས་གཙོའི་གོམས་སྟབས་ཆེན་པོ་ཞིག་སྤོ་སྲིད་པའི་ངོས་འཛིན་བྱེད་མཁན་ཡོད་པ་དང། ཡང་རིགས་འགའ་ཤས་ཀྱིས་ཚོགས་ཆེན་དེ་བརྒྱུད་ནས་རྒྱ་ནག་གི་མི་རིགས་སྲིད་ཇུས་དང་ཆོས་ལུགས་སྲིད་ཇུས་སོགས་ལའང་བཟང་ཕྱོགས་ཀྱི་འགྱུར་ལྡོག་ཡོང་རྒྱུའི་རེ་སྒུག་བྱེད་མཁན་ཡང་ཡོད། བཙན་བྱོལ་བོད་མི་ནི་རེ་སྒུག་དེ་ལྟར་བྱེད་མཁན་གྱི་གྲས་ཤིག་རེད།
དང་པོ། མི་རབས་ལྔ་པའི་དབང་འཛིན་དཔུང་ཁག
ཚོགས་ཆེན་བཅོ་བརྒྱད་པའི་ཐོག་ད་ལྟའི་ལས་ཐོག་སྲིད་འཛིན་གཞོན་པ་ཞི་ཅིན་ཕིང་དང། སྲིད་བློན་གཞོན་པ་ལིས་ཁི་ཆཱང་ཕུད་པའི་དེ་མིན་ཚང་མ་རྒན་ཡོལ་འགྲོ་གི་ཡོད་པར་བརྟེན། མི་རབས་ལྔ་པའི་དབང་འཛིན་པའི་དཔུང་ཁག་ནང་མི་སྣ་ག་ཚོད་བསླེབ་ཀྱི་ཡོད་པ་དང་། སུ་ཞིག་བསླེབ་ཀྱི་ཡོད་མེད་ཀྱི་གནད་དོན་དེར་དོ་སྣང་དང་། དེའི་ཐད་མི་སྣ་མང་པོ་ཞིག་གིས་ཚོད་དཔག་སྣ་ཚོགས་བྱེད་ཀྱི་ཡོད་ཅིང། ཞི་ཅིན་ཕེན་དང་ལིས་ཁི་ཆཱང་གཉིས་ཀྱི་ཐད་རྩོད་པ་དེ་ཙམ་མེད་པ་ལས། དེ་མིན་གྱི་མི་སྣ་ཞན་དག་སུ་ཞིག་སླེབས་མིན་ཐད་རྩོད་པ་རྒྱག་གི་ཡོད། ང་རང་གི་ལྟ་ཚུལ་ལྟར་ན་ཞི་ལིས་གཉིས་ཕུད་པའི་དེ་མིན་ལི་ཡོན་ཁྲའོ་དང། ཀྲང་ཏིག་ཅང། ཝང་ཡང ། ཝང་ཆིས་ཧྲན། ཡུས་ཀྲན་ཧྲན། ལེའུ་ཡུན་ཧྲན། ཀྲང་ཀའོ་ལིན་བཅས་རེད། གལ་ཏེ། མི་བདུན་ལ་ཉུང་འཕྲི་བྱས་པའི་དབང་དུ་བཏང་ན། དྲིལ་བསྒྲགས་དྲུང་ཆེ་ལེའུ་ཡུན་ཧྲན་དང་། ཐན་ཅིང་དམར་ཤོག་དྲུང་ཆེ་ཀྲང་ཀའོ་ལིན་ཕྱིར་འབུད་རྒྱུའི་ཉེན་ཁ་ཡོད། ཡང་མི་མང་པོས་ད་ལྟའི་མི་དགུ་ནས་མི་བདུན་ལ་ཉུང་འཕྲི་བྱས་ཏེ། དབུས་སྲིད་ཁྲིམས་ལྷན་ཁང་དང་དྲིལ་བསྒྲགས་ལྷན་ཁང་གཉིས་ཁུ་བསྡུ་བྱ་རྒྱུ་ཡིན་པ་དང། དེ་ནི་བཟང་ཕྱོགས་ཀྱི་འགྱུར་བ་ཆེན་པོ་ཞིག་ཡིན་པ་མ་ཟད། པའོ་ཞི་ལའེ་གཏོར་ཕམ་བཏང་བ་དེ་ནི་དཔེ་མཚོན་ཞིག་དང་། ཧུའུ་ཅིན་ཐའོ་དང་ཝུན་ཅཱ་པའོ་ཡིས་སྣེ་ཁྲིད་བྱས་པའི་བསྒྱུར་བཅོས་ཤོག་ཁག་གི་རྒྱལ་ཁ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། ཡང་སྙིང་རྒྱ་ནག་ནང་འབྱུང་འགྱུར་མི་རྣམས་ཀྱིས་རེ་བའི་ཚོད་དཔག་ལྟ་བུའི་བཟང་ཕྱོགས་ཀྱི་འགྱུར་བ་དེ་འདྲ་ཞིག་ཡོང་སྲིད་དམ། ཞེ་ན། གཙོ་ཆེ་ཤོས་དེ་འབྱུང་འགྱུར་ལོ་ལྔའམ་བཅུའི་ནང་རྒྱ་ནང་དང་རྒྱལ་སྤྱིའི་འགྱུར་ལྡོག་སོགས་རྒྱུ་རྐྱེན་མང་པོ་དང་འབྲེལ་བ་ཡོད་པས། འདི་ལྟར་ཡོང་གི་རེད་། འདི་ལྟར་ཡོང་གི་མ་རེད་ཅེས་སུས་ཀྱང་ལུང་བསྟན་བམ་པོ་ཞིག་རྒྱག་མི་ཐུབ། ཡིན་ནའང། དམར་ཤོག་རང་ངོས་ནས་བཤད་ན་མི་རྣམས་ཀྱིས་རེ་བ་བྱས་པ་ལྟ་བུའི་འགྱུར་བ་དེ་འདྲ་ཞིག་གཏོང་མི་སྲིད།
རྒྱ་ནག་གཞུང་གི་བཤད་སྟངས་ལྟར་བྱས་ན། བརྟན་ལྷིང་དང་འཕེལ་རྒྱས་ནི་ལྟེ་བའི་གནད་དོན་ཡིན་པ་དང། འཕེལ་རྒྱས་ལ་བརྟེན་ནས་བརྟན་ལྷིང་ཡོང་ཐབས་བྱེད་དགོས་པ་དང། བརྟན་ལྷིང་གི་ཁོར་ཡུག་ཞིག་མེད་ན་འཕེལ་རྒྱས་ཡོང་མི་སྲིད་པའི་ངོས་འཛིན་བྱེད་ཀྱི་ཡོད། རྒྱ་ནང་གི་བརྟན་ལྷིང་དང་བདེ་འཇགས་ཀྱི་གནད་དོན་ཡིན་ནའང་འདྲ། རྒྱལ་སྤྱིའི་མཚན་སྙན་གྱི་ཐོག་ནས་བཤད་ནའང་འདྲ་། སྲིད་ཁྲིམས་ལྷན་ཁང་དང་དྲིལ་བསྒྲགས་ལྷན་ཁང་གཉིས་ནི་ལྷན་ཁང་གཞན་དག་ལས་དགོས་མཁོ་ཆེ་བ་མེད་ནའང་ཆུང་བ་མེད། བརྟན་ལྷིང་དང་བདེ་འཇགས་ཀྱི་འགྲོ་སོང་དེ་རྒྱལ་སྲུང་གི་འགྲོ་སོང་ལས་མང་བ་གཏོང་དགོས་པའི་ཚད་ལ་བསླེབས་ཟིན་པས། འདི་ལྟ་བུའི་གཉན་འཕྲང་ཆེ་བའི་སྐབས་སྲིད་ཁྲིམས་ལྷན་ཁང་ཁུ་བསྡུ་བྱ་རྒྱུའི་གནད་དོན་དེ་བས་ཀྱང་ཡོང་མི་སྲིད། ཅི་སྟེ་ལྷན་ཁང་དེ་གཉིས་ཁུ་བསྡུ་བྱས་པའི་དབང་ཏུ་བཏང་ནའང། དེ་ནི་ཐབས་བྱུས་རང་བཞིན་གྱི་རྣམ་པ་ཞིག་སྟེ། ཕྱི་ཡི་རྣམ་པ་འགྱུར་བ་ལས་ནང་གི་ངོ་བོ་འགྱུར་མི་སྲིད་ལ། མི་ལ་འགྱུར་བ་བཏང་བ་ཙམ་ལས་སྲིད་ཇུས་ལ་འགྱུར་བ་ཡོང་མི་སྲིད།
དཔེར་ན། བོད་ཚུད་པའི་གྲངས་ཉུང་མི་རིགས་ཙམ་མ་ཟད། རྒྱ་ནག་ནང་ཁུལ་གྱི་ཞིང་ཆེན་དང། གྲོང་ཁྱེར། ས་གནས་གང་སར་སྤྱི་ཚོགས་བརྟན་སྲུང་གི་ཚན་པ་དང་ལས་ཁུངས་རྒྱ་སྐྱེད་བྱེད་བཞིན་པའི་སྒང་ཡིན་པ་ལས་ཁུ་བསྡུ་བྱེད་པའི་དུས་ཚོད་མ་རེད། དཔེར་ན། སྤྱི་ལོ ༢༠༡༡ ལོར་བོད་གཅིག་པུར་ཉེན་རྟོག་ས་ཚིགས་ ༡༣༤ གསར་འཛུགས་བྱས་ཡོད་པ་དང། དེ་མིན་གྱི་གཞིས་རྩེ་དང། ལྷོ་ཁ། ནག་ཆུ། ཉིང་ཁྲི། ཆབ་མདོ། མངའ་རིས་བཅས་ཀྱི་ནང་ ༦༧༦ གསར་འཛུགས་བྱ་རྒྱུའི་འཆར་གཞི་ཡོད། ཐ་ན་ད་ལྟའི་དུས་སྐབས་སུ་རྒྱ་ནག་གི་པེ་ཅིང་གྲོང་ཁྱེར་གཅིག་པུའི་ནང་ས་གནས་བདེ་སྲུང་གི་མི་སྣ་ཁྲི་ཚོ་ ༡༤༠ ལྷག་ཙམ་འགྲེམས་འཇོགས་བྱས་ཡོད་པ་མ་ཟད། པེ་ཅིང་གྲོང་མིས་ཁང་པའི་སྒེའུ་ཕྱེ་མི་ཆོག་པ་དང། ཚལ་འཚོང་མཁན་ཚོས་ཚལ་གྲི་ཉར་མི་ཆོག་པ། རླང་འཁོར་གྱི་སྒེའུ་ཁུང་ཕྱེ་མི་ཆོག་པ། ཁྲོམ་རྭའི་ཐོག་ཕྲུ་གུའི་རྩེད་ཆས་ཀྱི་གནམ་གྲུའི་རིགས་ཀྱང་འཚོང་མི་ཆོག་པ་བཅས། ད་ལྟའི་བ་ཉལ་སྟངས་ལ་བལྟས་ན་འབྱུང་འགྱུར་བེའུ་གང་འདྲ་ཞིག་སྐྱེ་སྲིད་པ་ཤེས་ཐུབ།
གནད་དོན་གཞན་ཞིག་ནི་དྲིལ་བསྒྲགས་ལས་དོན་རེད། རྒྱ་ནག་དམར་ཤོག་ཚོགས་པའི་གསར་བརྗེ་དང་། འཛུགས་སྐྲུན། བསྒྱུར་བཅོས་བཅས་ཀྱི་ནང་དྲིལ་བསྒྲགས་ལས་དོན་ཀྱིས་ནུས་པ་ངེས་ཅན་ཞིག་ཐོན་ཡོད་ལ། རྒྱ་ནག་དམར་ཤོག་ཚོགས་པ་ད་བར་གནས་ཐུབ་པ་དེ་ནི་ཕྱོགས་གཅིག་ནས་དྲིལ་བསྒྲགས་ཀྱི་ལས་དོན་དང་འབྲེལ་བ་ཡོད་པར་ངོས་འཛིན་བྱེད་མཁན་མང་པོ་ཡོད་ལ། དེར་རྒྱུ་མཚན་ཡང་ངེས་ཅན་ཞིག་ཡོད། གཞུང་འབྲེལ་གྱི་བརྙན་འཕྲིན་དང། རླུང་འཕྲིན། ཚགས་པར། དུས་དེབ། དྲ་རྒྱ་ཙམ་མ་ཟད། ཟློས་གར་དང། རོལ་དབྱངས། སྒྱུ་རྩལ། གཏམ་བརྗོད། གློག་བརྙན་སོགས་རིག་གནས་ཀྱི་ཁྱབ་ཁོངས་ཚང་མ་དྲིལ་བསྒྲགས་ལས་དོན་གྱི་ཁྱབ་ཁོངས་ཡིན་པ་དང། ཁོང་ཚོས་སོ་སོའི་ལས་རིགས་མི་འདྲ་བ་དང་ངོ་བོ་མི་འདྲ་བའི་ཐོག་ནས་རྒྱ་ནག་དམར་ཤོག་ཚོགས་པར་སྲུང་སྐྱོབ་བྱེད་དགོས་པ་སྟེ། རྩོམ་པ་པོ་ཞིག་ཡིན་ན་རང་གི་རྩོམ་ཡིག་གི་ལམ་ནས་དམར་ཤོག་ཚོག་པར་བསྟོད་ཚིག་འབྲི་དགོས་པ་དང། གཞས་པ་ཞིག་ཡིན་ན་རང་གི་སྙན་འཇེབས་ལྡན་པའི་གླུ་དབྱངས་ལ་བརྟེན་ནས་དམར་ཤོག་ཚོགས་པར་བསྟོད་གླུ་ལེན་དགོས་པ། རི་མོའི་སྒྱུ་རྩལ་མཁན་ཞིག་ཡིན་ན་རང་གི་ལག་པའི་པིར་རྩལ་ལ་བརྟེན་ནས་དམར་ཤོག་ཚོགས་པར་བསྟོད་གླུ་ལེན་པའི་རི་མོ་འབྲི་དགོས་པ། དགོད་བྲོའི་གཏམ་བརྗོད་མཁས་པ་ཞིག་ཡིན་ཚེ། རང་གི་ལུས་ངག་ཡིད་གསུམ་གྱི་སྒྱུ་རྩལ་ལ་བརྟེན་ནས། དམར་ཤོག་ཚོགས་པར་བསྟོད་བསྔགས་ཀྱི་གཏམ་བརྗོད་འཁྲབ་སྟོན་བྱེད་དགོས་པ་སོགས་ལུས་ངག་ཡིད་གསུམ་གྱིས་དམར་ཤོག་ཚོགས་པར་བསྟོད་གླུ་ལེན་དགོས།
དེའི་རྐྱེན་གྱིས་དྲིལ་བསྒྲགས་ལྷན་ཁང་ནི་ཞི་བའི་ཐབས་ལ་བརྟེན་ནས་དམར་ཤོག་སྲུང་སྐྱོབ་བྱེད་མཁན་དང། སྲིད་ཁྲིམས་ལྷན་ཁང་ནི་དྲག་ཤུགས་ལ་བརྟེན་ནས་དམར་ཤོག་སྲུང་སྐྱོབ་བྱེད་མཁན་ཞིག་རེད། ཞི་དྲག་ཟུང་འབྲེལ་གྱི་མ་ལག་དེ་གཉིས་མེད་ན། དམར་ཤོག་ཚོགས་པའི་ལས་དབང་དེ་ད་ལྟ་གནས་སྟངས་གཞན་ཞིག་ཡིན་སྲིད་ལ། ད་བར་རྒྱུན་གནས་ཐུབ་པ་དེ་ཡང་ཞི་དྲག་གི་མ་ལག་དེ་གཉིས་དང་འབྲེལ་བ་ཡོད། རྒྱལ་ཡོངས་རང་བཞིན་གྱི་དྲིལ་བསྒྲགས་ཀྱི་འཕྲུལ་ཆས་དག་སྒོ་ཕྱེ་བ་ཙམ་གྱིས་རྒྱ་ནག་གི་གནམ་སའི་ཁྱོན་ལ་དམར་ཤོག་ཚོགས་པ་ནི་རྒྱལ་སྲས་བྱང་ཆུབ་སེམས་དཔའ་ལྟ་བུའི་གཟུགས་བརྙན་ཞིག་བསྐྲུན་ཐུབ་ཀྱི་ཡོད་ལ། མི་སྣ་མང་པོ་ཞིག་ཀྱང་རྣམ་པ་འདྲ་མིན་གྱིས་དམར་ཤོག་ལ་བསྟོད་གླུ་ལེན་པའི་གསར་བརྗེའི་བྱེད་སྒོའི་ནང་བློ་འགུག་ཐུབ་ཀྱི་ཡོད། དེའི་རྐྱེན་གྱིས་མི་བདུན་ལ་ཉུང་འཕྲི་བྱས་ཏེ་དབུས་སྲིད་ཁྲིམས་ལྷན་ཁང་དང་དྲིལ་བསྒྲགས་ལྷན་ཁང་གཉིས་ཁུ་བསྡུ་བྱས་པའི་དབང་དུ་བཏང་ནའང། ཞི་དྲག་ཟུང་འབྲེལ་གྱི་མ་ལག་ལྡན་པའི་ལམ་ལུགས་དེ་གཉིས་ཁུ་བསྡུ་བྱེད་མི་སྲིད་པར། དེ་ལས་ལྡོག་ཏེ་དེའི་སྔར་ཡོད་ཀྱི་ནུས་པ་ཆེ་རུ་གཏོང་ངེས་རེད།
གཉིས་པ། འཐབ་རྩོད་དང་མཉལ་ལས།
དམར་ཤོག་རྒྱལ་ཁབ་མང་པོ་ཞིག་འཐོར་བཤིག་སོང་ཡོད་ཀྱང། རྒྱ་ནག་དམར་ཤོག་ཚོགས་པ་ད་དུང་ཡང་འཐོར་བཤིག་ཕྱིན་མེད་པར་དེ་ལས་ལྡོག་སྟེ་དེའི་ཤུགས་རྐྱེན་གྱི་ནུས་པ་ཆེ་རུ་འགྲོ་ཐུབ་པ་ནི། གོང་གི་ཞི་དྲག་ཟུང་འབྲེལ་གྱི་ཐབས་བྱུས་དེ་གཉིས་ཕུད། ད་དུང་གལ་ཆེའི་གནད་དོན་གཞན་ཞིག་ནི། རྒྱ་ནག་གཞུང་གིས་ཚོགས་པ་གཅིག་གིས་སྲིད་དབང་སྒེར་གཅོད་བྱས་ཡོད་ཀྱང། སྲིད་འཛིན་དང། སྲིད་བློན། གྲོས་ཚོགས་ཀྱི་ཚོགས་གཙོ་ཙམ་མ་ཟད། ཁོང་ཚོའི་ལས་རོགས་ཀྱི་དབུས་ཆབ་སྲིད་ལྷན་ཁང་གི་རྒྱུན་ལས་མི་སྣ་ཚང་མ་དུས་ཡུན་ལོ་ལྔའི་ཐོག་བརྗེ་རེས་བྱེད་པའི་ལམ་ལུགས་གསར་འཛུགས་བྱས་པ་དེས། མི་གཅིག་གིས་ཚེ་གང་མགོ་ཁྲིད་བྱེད་པའི་དཀའ་ངལ་སེལ་ཐུབ་པ་མ་ཟད། དེ་ཡང་ལོ་ན་ ༦༨ ཡན་རྒྱལ་ཁབ་ཀྱི་སྲིད་འཛིན་ཙམ་མ་ཟད། དབུས་རྒྱུན་ནང་འགྲོ་མི་ཆོག་པའི་གཏན་འབེབས་བཟོས་པ་དེས་ལོ་ན་རྒས་དྲགས་པའི་དབང་གིས་འབྱུང་སྲིད་པའི་དཀའ་ངལ་དང་ལས་འཛོལ་ལས་གཡོལ་ཐུབ་ཀྱི་ཡོད། གནད་དོན་འདིས་རྒྱ་ནག་མི་མང་གི་ཁྲོད་དུ་དམངས་གཙོའི་ལམ་ལུགས་ལག་ལེན་བྱས་པའི་ཚོར་སྣང་སྐྲུན་གྱི་ཡོད་པ་མ་ཟད། དེ་ཡང་ལོའི་ཚད་གཞི་དང་དུས་ཚོད་ཀྱི་ཚད་གཞི་གཏན་འབེབས་བྱས་པ་དེས་དེ་བས་ཀྱང་མི་མང་གི་བསམ་བློའི་ནང་གསར་གཏོད་ཀྱི་བག་ཆགས་བསྐྲུན་གྱི་ཡོད།
དེ་དང་ཆབས་ཅིག་ཏུ་ད་ཡོད་ཀྱི་རྒྱུན་ལས་མི་སྣ་ཚང་མའི་ལོ་རྒྱུས་ཀྱི་རྒྱབ་ལྗོངས་དང་འབྱུང་ཁུངས་གཅིག་པ་ཡིན་པའི་ཁར། ཁོང་ཚོའི་ཐུན་མོང་གི་ཁེ་ཕན་ཡང་སྡིངས་ཆ་གཅིག་གི་ཐོག་ལ་གནས་ཡོད་ཅིང། སྡིངས་ཆ་དེ་ཤོར་ན་སྡིངས་ཆ་གཞན་ཞིག་གི་ཐོག་ནས་ཁེ་ཕན་ལེན་ས་མེད་པ་མ་ཟད། ཐ་ན་སོ་སོའི་ནང་མི་བུ་ཕྲུག་གི་ཁེ་ཕན་ཡང་སྡིངས་ཆ་དེ་རང་གི་ཐོག་གནས་ཡོད་པར་བརྟེན། ཐུན་མོང་གི་ཁེ་ཕན་སྲུང་སྐྱོབ་བྱ་རྒྱུ་གཙོ་བོ་དང་བསམ་ཚུལ་མི་མཐུན་པ་ཕལ་པ་ཙམ་རེད། ཅི་སྟེ་སྡིངས་ཆ་དེ་ཤོར་ན་རང་ཉིད་ཀྱི་ཁེ་ཕན་ཤོར་བ་ཙམ་མ་ཟད། རང་གི་ཚེ་སྲོག་བདེ་འཇགས་ལའང་ཉེན་ཁ་ཡོད་པར་བརྟེན། སྡིངས་ཆ་དེའི་དོན་དུ་བློས་གཏོང་ག་རེ་ཡིན་ནའང་བྱེད་སྲིད། པའོ་ཞི་ལའེ་གཏོར་ཕམ་བཏང་དེ་ནི་དཔེ་མཚོན་ཡག་ཤོས་ཞིག་རེད། པའོ་ཞི་ལའེ་གཏོར་ཕམ་གཏོང་རྒྱུར་ཧུའུ་ཅིན་ཐའོ་དང་ཝན་ཅཱ་པའོ་ཡིས་འཛེམ་ཟོན་གང་ཡང་བྱས་མེད་ལ། ཐ་ན་ཁོ་པའི་ཕྱོགས་གཏོགས་ཅང་ཙེ་མཱེན་དང་ཀྲིག་ཡུང་ཁཱང་གིས་ཀྱང་པའོ་ཞི་ལའེ་སྲུང་སྐྱོབ་བྱ་རྒྱུ་དང། དམར་ཤོག་སྲུང་སྐྱོབ་བྱ་རྒྱུ་གཉིས་ཀྱི་ནང་ནས་དམར་ཤོག་སྲུང་སྐྱོབ་བྱ་རྒྱུ་གཙོ་བོར་བཞག་ཡོད་པ་དེ་ཁོ་ནས་ཀྱང་ར་སྤྲོད་བྱས་ཡོད། དམར་ཤོག་ཚོགས་པ་ནི་ཁོང་ཚོའི་ཚེ་སྲོག་གི་བརྟེན་ས་ཡིན་པ་དང། དམར་ཤོག་འཆི་ན་ཁོ་ཚོ་རང་ཉིད་ཀྱང་འཆི་ལམ་དུ་འགྲོ་གི་ཡོད། དེའི་རྐྱེན་གྱིས་དམར་ཤོག་ཚོགས་པའི་ནང་ཁུལ་དུ་འཐབ་རྩོད་ཇི་ཙམ་ཡོད་ཀྱང། ཁོང་ཚོའི་ཐུན་མོང་གི་ཁེ་ཕན་སྲུང་སྐྱོབ་བྱ་རྒྱུའི་ཐད་འཛེམ་ཟོན་གང་ཡང་བྱེད་མི་སྲིད།
རྒྱལ་ཁབ་ཀྱི་དོན་ཆེན་ཚང་མ་ཁོང་ཚོས་ཐག་གཅོད་བྱེད་ཀྱི་ཡོད་པ་མ་ཟད། ཁ་གཏད་ཀྱི་ཚོགས་པ་མེད་པར་བརྟེན། མི་སྣ་དགུ་བོ་ཙམ་མ་ཟད་རྒྱལ་ཡོངས་ཀྱི་སྟོབས་ཤུགས་ཚང་མ་རྡོག་རྩ་ཆིག་སྒྲིལ་ཐུབ་ཀྱི་ཡོད་སྟབས། སྟོབས་ཤུགས་ཁ་འཐོར་འགྲོ་བའི་གནས་ཚུལ་སྔོན་འགོག་བྱུང་ཡོད། དམངས་གཙོའི་ནང་མ་མཐར་ཡང་ཆབ་སྲིད་ཀྱི་ཚོགས་པ་གཉིས་སམ་གསུམ་དང་། ཐ་ན་བཞི་ལྔ་སོགས་ཡོད་པའི་དབང་གིས་འབྱུང་སྲིད་པའི་གནས་ཚུལ་གཅིག་ནི། ཚོགས་པ་ཕན་ཚུན་དང་ཤོག་ཁག་ཕན་ཚུན་དབར་ཁེ་ཕན་འཕྲོག་རེས་དང་མཚན་སྙན་རྩོད་རེས་ཀྱི་ཆེད་ཕན་ཚུན་སྐྱོན་མེད་སྐྱོན་འདོགས་བྱེད་པའི་གནས་ཚུལ་རྟག་ཏུ་འཕྲད་མུས་ཡིན་པ་དང། ཐ་ན་སོ་སོའི་ཤོག་ཁག་གི་མི་མང་བེད་སྤྱོད་བྱས་ཏེ་གང་སར་ངོ་རྒོལ་དང་སྐྱོན་བརྗོད་བྱེད་པའི་གནས་ཚུལ་ཐོན་མུས་རེད། གཞུང་འཛིན་ཚོགས་པས་དྲང་བཞག་ལུགས་མཐུན་གྱི་སྲིད་ཇུས་ཇི་འདྲ་ཞིག་ལག་སྟར་བྱས་ནའང། ཁ་གཏད་ཚོགས་པས་སྐྱོན་མེད་སྐྱོན་འདོགས་དང། ཐ་ན་གཞུང་འཛིན་ཚོགས་པའི་ལས་གཞིའི་གོ་རིམ་དཀྲུག་པ་སོགས་རྒྱལ་ཁབ་ཀྱི་ལས་དོན་ལ་བར་ཆད་ཡོང་བ་དེ་ཡང་རྒྱུན་མཐོང་གི་གནས་ཚུལ་ཞིག་རེད། གནས་ཚུལ་འདི་རིགས་ཀྱི་ཐོག་ནས་བལྟས་ན་བོད་དོན་འཐབ་རྩོད་ཀྱི་ལས་དབང་དེ་སྔར་བཞིན་རབ་རིབ་ཀྱི་སྣང་བ་ཙམ་ལས་མེད།
མཁྱེན་ལྡན་རྣམ་དཔྱོད་ཡངས་པའི་ཉམ་ཞིབ་པ་ཟླ་བ་བཀྲིས་ལགས་ཀྱི་རྒྱ་ནག་གི་སྐོར་ལ་སྤྱི་ཡོངས་ནས་དཔྱད་གཅོད་ཧ་ཅང་གི་ཡག་པོ་ཞེ་དྲག་བྲིས་འདུག འདིར་རྒྱ་ནག་ཐོག་ལ་ཉམ་ཞིབ་པ་ཁྱེད་ལྟ་བུ་ཉི་མོའི་སྐར་མ་དང་མཚུངས། ཁྱེད་ཀྱིས་མུ་མཐུད་ནས་དེ་ལྟར་སྤེལ་རོགས།
ད་ལྟའི་རྒྱའི་དམར་གཞུང་ནང་ལ་གུང་བྲན་ཏང་པ་ཁྱོན་སྡོམ་མི་གྲངས་༨༢ ༠༠༠ ༠༠༠ ས་ཡ་བརྒྱད་ཅུ་གྱ་གཉིས་ཡོད་པ་བཤད་འདུག་པས། དེའི་ནང་ལ་བོད་རིགས་ཁ་གྲངས་ག་ཚོད་ལོངས་ཡོད་དམ། འདིའི་གྲངས་ཚད་འདི། སུའི་གསུང་ཐུབ་བམ། ལགས།
རྒྱ་ནག་གི་ཚོགས་ཆེན་བཅོ་བརྒྱད་པ་ཚོགས་པའི་རྒྱུན་རིམ་དང་། ཚོགས་ཆེན་དབུ་འཛུགས་མཛད་སྒོའི་གཏམ་བཤད་སོགས་ལ་བལྟས་པ་ཡིན་ན་གྲོས་མོལ་ལམ་ནས་བོད་པ་ཚང་གི་སྡུག་ངལ་སེལ་རྒྱུར་ད་དུང་མི་ལོ་བཞི་བཅུ་ལྔ་བཅུ་ལྷག་རྒྱུ་རེད་བསམ། འོན་ཀྱང་་་་་་་་་་་་་་་་་་་་་་་་་
ང་ཚོའི་དགྲ་བོ་ནི་རྒྱ་ནག་དམར་པོ་ཡིན་པས་རྒྱ་ནག་གི་ཆབ་སྲིད་ཀྱི་གསང་གནད་ང་ཚོས་ཤེས་པ་བྱ་རྒྱུ་ནི་དོན་དམ་གྱི་གལ་གནད་ཤིན་ཏུ་ཆེ་བས་རྩོམ་པ་པོར་རྒྱ་ནག་གི་བསྐོར་མང་ཙམ་དྲྭ་ཐོག་སྤེལ་རོགས་བྱེད་ཐུགས་རྗེ་ཆེ་ཞུ།
ལྟ་ཚུལ་མི་མཐུན་པ་རེ་གཉིས་འདུག་ཀྱང་། སྤྱི་ཡོངས་ནས་ཚིག་ཚོགས་ཉུང་ཞིང་། དོན་མང་བ་ཧ་ཅང་ཞིབ་འབྲི་ཡག་པོ་བྱས་འདུག ད་དུང་ཡང་རྒྱ་ནག་དཔྱད་ཞིབ་ཀྱི་རྩོམ་ཡིག་འདི་རིགས་རྣ་བ་ཀྲོང་ངེར་རེ་སྒུག་བྱེད་ཀྱིན་ཡོད།
ཁ་ཉིན་དགྱ་ནག་གི་ཚོགས་ཆེན་བཅོ་བརྒྱད་པ་མ་འཚོགས་སྔོན་དེར་དབུས་བོད་མིའི་སྒྲིག་འཛུགས་ཀྱི་སྤྱི་འཐུས་ལྷན་ཚོགས་ནས་གསར་འགོད་གསལ་བསྒྲགས་ཤིག་སྤེལ་ནས། ད་ཐེངས་ཀྱི་ཚོགས་ཆེན་ཐོག་བོད་དོན་ཤུགས་ཆེར་གླེང་རྒྱུའི་རེ་བ་ཡོད་སྐོར་གསུང་སོང་། དྲ་གྲོགས་རྣམས་ཀྱིས་ལྟོས་དང་། དགྱ་ནག་གྲོགས་ཚོགས་དེ་རྒྱ་གར་གྲོས་ཚོགས་ལྟ་བུ་ཞིག་སྟེ། སུ་ཞིག་གིས་ཅི་ཞིག་གླེང་འདོད་པ་དེ་བཤད་ཆོག་པ་ཞིག་རེད་དམ། དགྱ་ནག་གི་གྲོས་ཚོགས་དེ་གཏོར་མ་དང་གཅིག་པ་རེད། ཕར་བཤམས་འཇོག་རྒྱུ་མ་གཏོགས་ཐ་ན་འགུལ་དཀྱོགས་ཙམ་ཡང་བྱེད་མི་ཆོག་ས་ནས་བོད་དོན་གླེང་ཕོད་མཁན་དང་གླེང་ས་ཞིག་གང་ན་ཡོད། མདོ་དོན་ངས་བཤད་འདོད་པ་བཙན་བྱོལ་གྱི་སྐུ་ངོ་འདི་དག་གིས་དགྱ་ནག་གི་སྐོར་ལ་རྒྱུས་མངའ་མེད་པའི་རྟགས་རེད་ཟེར་འདོད། རེ་བ་འཛིན་པ་ལས་དེ་ལས་ལྡོག་ནས་མཐོང་ཆུང་གི་སྐད་ཆ་ཞིག་བཤད་ན་དེས་ཉམས་ཆེ་ཡི་རེད། ཕར་ཕྱོགས་དགྱ་ནག་གི་ངོས་ནས་དགད་མོ་ལང་ནས་བསྡད་ཡོད་ངེས། དེའི་སྟབས་ཀྱིས་དགྱ་ནག་ཉམས་ཞིབ་པ་ཟླ་བ་བཀྲིས་ལྟ་བུས་འདི་ལྟར་དགྱ་ནག་གི་ཚད་ལྡན་དཔྱད་བརྗོད་པ་ཚོ་ལས་བརྒལ་བའི་དཔྱད་གླེང་གནང་བ་འདི་ངས་བལྟས་ན་ཡག་གི་འདོད། རང་རེའི་སྤྱི་ཚོགས་ལ་འདི་ལྟ་བུ་ངེས་པར་དུ་མཁོ་བར་འདོད།
ང་ཚོར་ཆེས་དཀོན་པ་ནི་རྒྱ་ནག་དམར་ཤོག་ཚོགས་པའི་ཆབ་སྲིད་ལ་ཞིབ་འཇུག་ཕུགས་རྩ་འཕེར་བ་གནང་མཁན་མེད་པ་དེ་རེད། དགྲ་བོ་ལས་རྣམ་པར་རྒྱལ་དགོས་ན། དགྲ་བོའི་ཆབ་སྲིད་ཀྱི་ལམ་ལུགས་དང་གནས་ཚུལ་ཤེས་དགོས། དེར་བརྟེན། ཟླ་བ་བཀྲ་ཤིས་ལགས་ནས་ཞིབ་ཚགས་པའི་ཉམས་ཞིབ་དང་། རང་གི་ལྟ་ཚུལ་གསུང་པ་དེས་བདག་ལ་དྲི་རྟགས་ཤིག་བཀོད་སོང་། ངས་རྒྱ་ནག་གི་ཆབ་སྲིད་ལ་དོ་སྣང་བྱེད་རྒྱུ་ཆུང་དྲགས་འདུག ངས་ཨོའོ་བྷའི་རྒྱབ་ལྗོངས་ལས་ཞི་ཆིན་ཕིང་གི་རྒྱབ་ལྗོངས་མ་རྩད་པ་དེ་རྦད་དེ་ནོར་འདུག ངས་ཁ་ནུབ་ལ་གཏད་དེ་བོད་དོན་རྩོད་པ་ལས་ཁ་ཤར་ལ་གཏད་དེ་བོད་དོན་མ་རྩོད་པ་དེ་ནོར་འདུག
ཟླ་བ་བཀྲིས་ལགས་ཀྱིས་གོ་རིམ་ལྡན་པའི་ཐོག་ནས། དྲང་བདེན་དང་དངོས་ཡོད་ལ་གཞིག་ནས་དཔྱད་བརྗོད་ལེགས་པོ་ཞིག་སྤེལ་གནང་འདུག རྗེས་ཕྱོགས་མང་ཙམ་སྤེལ་གནང་ཡོང་བར་དགའ་བསུ་ཞུ།
རྩོམ་ཡིག་དཔེ་ཡག་པོ་བྲིས་འདུག བསྔགས་བརྗོད་ཡོད། རྒྱ་ནག་གིས་བོད་དང་བོད་རིགས་ཟེར་བའི་གནས་བབ་སྔ་ཕྱི་གཉིས་སུ་ཤེས་རྟོགས་ཐུབ་ཡོད།
འོན་ཀྱང་བོད་དང་བོད་རིགས་ཚོས་ད་དུང་ཡང་རྒྱ་ནག་དང་རྒྱ་རིགས་ཟེར་བའི་གནས་བབ་དེ་ངེས་ཤེས་ཐུབ་མེད།
ཏང་གི་ཚེ་སྲོག་དང་ལས་དབང་ལ་ཐུག་པའི་ཆེས་གལ་འགངས་ཆེ་བའི་ཚོགས་འདུའི་དུས་སྐབས་དེར་པེ་ཅིང་དུ་བདེ་འཇགས་མི་སྣ་ཁྲི་ ༡༤༠ ལྷག་འགྲེམ་འཇོག་བྱེད་པའི་དུས་དེར་བོད་ནས་རང་ལུས་མེར་བསྲེགས་གཅིག་ནས་བཅུ་དང་། ཉི་ཤུ། བརྒྱ། ཐ་ན་སྟོང་གཅིག་གི་ཚེ་སྲོག་བློས་གཏོང་བྱས་ཀྱང་པེ་ཅིང་སྲིད་གཞུང་གིས་ངོས་ནས་བཤད་ན་དུག་སྦྲང་འགའ་ཤས་ཤིག་ཤི་བའི་སྣང་བ་ཙམ་ལས་མེད།
ཕྱི་ནང་བོད་རིགས་ཚང་མས་འགག་རྩའི་གནད་དོན་སྐབས་ངེས་པར་བསམ་བློ་གཏོང་ཐུབ་པ་བྱེད་དགོས། བོད་མདོ་དབུས་ནས་མིའི་ཚེ་སྲོག་འཕང་མེད་དུ་གཏོང་བཞིན་པ་དེར་བསམ་བློ་གཏོང་དགོས།
གལ་ཏེ་བོད་དང་བོད་དོན་ཆེད་ངེས་པར་ཤི་དགོས་ན་བོད་དབུས་གཙང་དང་། མདོ་སྟོད་སྨད་ཙམ་མ་ཤད་ཕྱི་སྡོད་བོད་རིགས་ཚོས་ཀྱང་ཚེ་སྲོག་མུ་མཐུད་བློ་གཏོང་བྱེད་དགོས།
དེ་མིན་ཁམས་པ་དང་ཨ་མདོ་ཁུལ་གཅིག་པུ་ནས་ཚེ་སྲོག་བློས་གཏོང་འདི་འདྲ་བྱས་ན་མཐར་སྡུག་གྱོང་ལས་རག་རྒྱུ་མེད་ན་བོད་དང་བོད་རིགས་ཀྱི་ལས་དབང་དེ་དེ་ཡང་མཐའ་མ་རང་སྡུག་རང་མྱོང་ཙམ་ཆགས་རྒྱུ་རེད།
ང་ཚོར་འདི་ལྟ་བུའི་ཉམས་ཞིབ་པ་དང་དཔྱད་བརྗོད་པ་ཤིན་ཏུ་མཁོ་ཨང་། ང་ཚོའི་ཁ་གཏད་ནི་རྒྱ་ནག་དམར་པོ་ཡིན་ཞིང་། དེའི་ཆབ་དཔལ་རིག་གཞུང་གི་འགྲོ་སྟངས་མ་ཤེས་པར་བདེན་དོན་ཅི་ལྟར་རྩོད་ཀྱི་ཡིན་ནམ། རྩོམ་ཡིག་འདི་ཀློག་པའི་སྐབས་ངོ་མ་སློབ་གྲྭ་ཆེན་མོ་ཐོན་ཅིང་། རྒྱ་ནག་ཐོག་ཉམས་ཞིབ་གནང་གིན་པའི་དཔྱད་བརྗོད་པ་ཞིག་གི་ཉམས་ཐོན་འདུག དག་ཆ་འགའ་རེ་ནོར་འདུག་མོད། དེ་ནི་ངེས་པར་སྲིད་པ་ཞིག་ཡིན་ཏེ། དེར་དུས་བབ་རྩོམ་སྒྲིག་པས་ངེས་པར་ཞུ་དག་གནང་དགོས་པ་མ་ཡིན་ནམ། རྩོམ་པ་པོས་ཡིག་འབྲིའི་ཚེ་ནོར་མེད་བསམ་པ་རང་ཉིད་ཀྱིས་ཐེངས་འགར་མ་བཀླགས་ཚེ། ནོར་བ་མ་རིག་པ་འདི་རྒྱུན་གཏན་ཡིན། དེ་ལས་གཞན་དོན་དང་སྡེབ་ལེགས་པར་འཁྱོངས་འདུག རྗེས་སོར་ཡང་འདི་ལྟའི་རྩོམ་ཡིག་གང་མང་སྤེལ་གནང་ཡོད་པ་ཞུ།
རྒྱ་ནག་གི་ཚོགས་ཆེན་བཅོ་བརྒྱད་པའི་ཚོགས་བཅར་བ་ཚོས། རང་རང་གི་སྐེ་ལ་རས་དུམ་རེས་བཏགས་ནས། མའོའི་རོ་འཁོགས་ལ་གུས་དུད་བྱ་དགོས་དུས། ལྕམ་སྐུ་ཞབས་ཀྱི་འགྲོ་སྟངས་དེ་ཡང་མ་ཤེས། རང་གི་འགྲོ་སྟངས་དེ་ཡང་བརླག་སོང་ཟེར་བ་དང་མཚུངས་པ་མི་འདུག་གམ། ཧ་ཧ། ཧི་ཧི། ཧོཧོཧོ།
མའོས་རང་གི་སྐེ་ལ་ཐག་པ་བཏགས་མེད་ན། གསར་པ་འདི་ཚོས་སྐེད་ལ་ཐག་པ་བཏགས་དགོས་དོན་གང་ལ་ཐུག་པ་ཡིན་ནམ། ཧཧཧཧཧཧཧཧཧཧཧཧ
དག་སྡེབ་ལ་གཟབ་དགོས་འདུག
རྒྱ་ནག་སྐོར་གྱི་མ་འོངས་ལུང་བསྟན་འདི་དོན་དམ་དུ་གནས་ཀྱི་ཡོད་མེད་མི་ཤེས། འོན་ཀྱང་། ང་ཚོར་རྒྱ་ནག་སྐོར་ལ་དཔྱད་བརྗོད་སྤེལ་མཁན་གང་མང་དགོས་ལ།
བློ་གཟུ་བོར་གནས་པའི་སྤྱི་ཚོགས་དཔྱད་བརྗོད་པ་ཁང་གསར་རྡོ་རྗེ་ལྟ་བུ་གང་མང་མང་བྱུང་ན་ཅི་མ་རུང་སྙམ།
རྩོམ་ཡིག་ཡག་པོ་བྲིས་འདུག དགའ་བསུ་ཡོད། རྒྱ་ནག་སྐོར་ལ་དཔྱད་ཞིབ་འདི་རིགས་མང་ཙམ་དགོས་ཀྱི། ད་དུང་དཔལ་འབྱོར་དང་འབྲེལ་ནས།
ཚོད་དཔག་ལ་ཟུར་ཟ་་བཞིན་ཚོད་དཔག་བཟོ་བ་འདི་ནི་ང་ཚོ་བོད་པ་ཚང་གི་གོམ་གཤིས་ཞིག་ཧ་ཧ་ཧ་ཧ
གནམ་རྡིབ་ཚོད་དཔག་མ་བྱེད་དེ་ལས་རང་རེའི་དཔའ་བོ་ཕོ་མོས་མཛད་རྗེས་དྲྭ་རྒྱ་བརྒྱུད་རྒྱལ་སྤྱའི་མདུན་སར་གནད་ལ་འཁེལ་ཐབས་བྱོས། ཁུང་མེད་ལུང་མེད་མ་བྱེད་མི་སྣ། དེ་ལ་ཕན་ཐོགས་ཀྱི་དོན་སྤུ་ཙམ་མེད་པ་རེད།རང་ མགོ་མེར་ཚིག་ནའང་ད་དུང་རེ་བོ་ཆོ་ཆུང་མཆན་མ་བྲིས་ཨ་རོ་ཅི་ལེ་རེད།།།