ཕྱི་ཚེས་ ༡༤ ནས་མགོ་བཙུགས་ཏེ་ཉིན་ ༣ རིང་སུད་སི་ཇི་ནི་ཝའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་སྒོ་འགྲམ་དུ། བོད་མི་བཞིས་རྒྱལ་ཚོགས་ལ་པུས་བཙུགས་ཞུ་འབོད་ཀྱི་ལས་འགུལ་ཞིག་སྤེལ་བཞིན་ཡོད་འདུག
ཟླ་འདིའི་ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༨ ། ༣༠ ཐོག་སུད་སི་ཇི་ནི་ཝའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་སྒོ་འགྲམ་དུ། བོད་མི་མཁར་ནང་འཕགས་པ་དང་། ཐར་ཤུལ་བསོད་གྲགས། སེར་ཤུལ་ཨུ་རྒྱན་ཚེ་རིང་། འཇིགས་བྲལ་བསྟན་འཛིན་བཅས་ནས། བོད་ནང་གི་བོད་མི་ཚོའི་ཞུ་འབོད་ལ་རྒྱལ་ཚོགས་ཀྱིས་བདག་སྤྲོད་མ་གནང་ཚེ། ཁོང་ཚོས་བོད་ནང་གི་བོད་མིའི་རང་ལུས་མེར་བསྲེགས་ཀྱི་མེ་ལྕེ་གསོན་པོ་ཞིག་རྒྱལ་ཚོགས་ཀྱི་སྒོ་འགྲམ་དུ་སྦར་དགོས་པ་ཆགས་ཉེན་ཡོད་པའི་སྙན་ཞུ་ཕུལ་ཏེ། ཉིན་ ༣ རིང་པུས་བཙུགས་ཀྱི་ཞུ་འབོད་ལས་འགུལ་ཅིག་སྤེལ་བཞིན་པ་མ་ཟད། ཁོང་ཚོས་རྒྱལ་ཚོགས་ལས་ཁུངས་ཀྱི་ལས་བྱེད་པ་ ༣༥༠ ལྷག་དང་། རྒྱལ་ཚོགས་གཡས་གཡོན་དུ་ལྟ་སྐོར་ཕེབས་མཁན་རྒྱ་རིགས་གཙོས་པའི་མི་མང་བརྒྱ་ཕྲག་གི་ལག་ཏུ་སྙན་ཞུ་ཡི་གེ་འགྲེམས་སྤེལ་བྱས་ཡོད་འདུག
འཇིགས་བྲལ་བསྟན་འཛིན་ལགས་ཀྱིས་འདི་གར་གནས་ཚུལ་མཁོ་གནང་དོན་ལྟར་ན། བོད་མི་ལས་འགུལ་ཁོང་ཚོས་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ནེ་ཝི་པེ་ལེ་མཆོག་ལ་ཕུལ་བའི་སྙན་ཞུའི་ནང་། རྒྱ་བོད་འགྲིག་མཐུན་གྱི་རེ་བ་འདི་ལ་བདག་སྤྲོད་མེད་ཚེ་བོད་མིའི་བཟོད་སྒོམ་ལ་ཚད་ཅིག་ཡོད་པ་ཡིན་པས། གཞིས་བྱེས་གཉིས་སུ་ཡོད་པའི་བོད་ཀྱི་གཞོན་རབས་ཡོངས་ནས། རང་གི་རྒྱལ་ཁབ་ཀྱི་ཁྲག་དྲི་བྲོ་བའི་ལོ་རྒྱུས་ཀྱི་དོན་རྐྱེན་འདི་རྩ་བ་ནས་བརྗེད་མི་སྲིད་པ་ང་ཚོས་གསལ་པོ་ཤེས་ཀྱི་ཡོད། དེར་བརྟེན། དེ་རིང་ང་ཚོས་བོད་ནང་གི་བོད་མི་ཚོ་དཀའ་ཁག་ལས་སྐྱོབ་ཆེད་ཁོང་ཚོའི་ཚབ་བྱས་ཏེ་པུས་མོ་སར་བཙུགས་ཏེ། དགོས་འདུན་དོན་ཚན་ ༤ ཅན་གྱི་རེ་འབོད་ཞུ་ཡིག་དེ་ཕུལ་བ་ཡིན་སྐོར་དང་། དེ་བཞིན། ང་ཚོས་བོད་ནང་གི་བོད་མིའི་རང་ལུས་མེར་བསྲེགས་ཀྱི་མེ་ལྕེ་གསོན་པོ་ཞིག་རྒྱལ་ཚོགས་ཀྱི་ལས་ཁུངས་སྒོ་འགྲམ་དུ་སྦར་མི་དགོས་པ་ཞིག་ཅི་ནས་དགོངས་བཞེས་གནང་རོགས་ཞེས་འབོད་སྐུལ་གནང་ཡོད་འདུག
ཁོང་ཚོས་བཏོན་པའི་དགོས་འདུན་ཁག་ནི། གཅིག ཕྱི་ལོ་ ༡༩༥༩ དང་། ༡༩༦༡། ༡༩༦༥ སོ་སོར་རྒྱལ་ཚོགས་ཀྱིས་བོད་དོན་ཐོག་བཞག་པའི་གྲོས་ཆོད་ཁག་སླར་ཡང་གླེང་སློང་དང་། ལག་བསྟར་མཇུག་གནོན་ངེས་པར་བྱེད་དགོས་པ། གཉིས། རྒྱལ་ཚོགས་ནས་རྒྱ་གཞུང་ལ་བོད་ནང་གི་ད་ལྟའི་ཛ་དྲག་གནས་སྟངས་རྟོག་ཞིབ་སླད། རང་དབང་ཅན་གྱི་རྒྱལ་སྤྱིའི་སྐུ་ཚབ་དང་གསར་འགོད་པ་ཆེད་གཏོང་གིས་ས་གནས་ས་ཐོག་གི་གནས་སྟངས་ངོ་མ་ཤེས་ཐབས་ཆེད། རྒྱབ་སྐྱོར་གནང་དགོས་པའི་ཛ་དྲག་གི་འབོད་སྐུལ་ཙམ་མིན་པར་ངེས་པར་ཕེབས་ཐུབ་པ་དགོས་རྒྱུ། གསུམ། རྒྱལ་ཚོགས་ཀྱིས་བོད་ཀྱི་སྲིད་སྐྱོང་བློ་བཟང་སེང་གེ་མཆོག་དང་རྒྱ་གཞུང་གི་དབར་དོན་དམ་གྱི་འབྲེལ་མོལ་གནང་རྒྱུའི་སྡིངས་ཆ་བསྐྲུན་དགོས། བཞི། ༸པཎ་ཆེན་རིན་པོ་ཆེ་སོགས་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་འཕྲལ་དུ་གློད་གྲོལ་གཏོང་ཐབས་བྱ་དགོས་རྒྱུ། བཅས་ཡིན་པ་རེད།
ཁོང་ཚོས་ལས་འགུལ་གྱི་ཉིན་གཉིས་པར་ཇི་ནི་ཝ་སྤྱི་ཁྱབ་ཉེན་རྟོག་པ་ཆེད་ཕེབས་ཀྱིས། པུས་བཙུགས་ལས་འགུལ་སྤེལ་མཁན་བོད་མི་བཞི་ལ་མེར་བསྲེགས་ཀྱི་ལས་འགུལ་གནང་ཐལ་མེད་པའི་ཞུ་སྐུལ་གནང་ཡོད་པ་མ་ཟད། ཉིན་འདི་འགར་རྒྱལ་ཚོགས་ཀྱི་གཡས་གཡོན་དུ་ལྟ་རྟོག་ནན་མོ་དང་། ལས་འགུལ་བ་བཞིའི་ལུས་ཕུང་ལ་ཞིབ་བཤེར། དགོང་དྲོ་རྒྱལ་ཚོགས་ཀྱི་མཐའ་འཁོར་ཡོངས་ཉེན་རྟོག་པས་ལྕགས་རིས་བསྐོར་ཡོད་པ་དང་། དེ་རིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་ཁུངས་སུ་པུས་བཙུགས་ལས་འགུལ་སྤེལ་གྱི་ཡོད་སྟབས། ལས་འགུལ་བ་ ༤ དང་ལྷན་དུ་ཉེན་རྟོག་པ་སྡོད་རྒྱུ་གཏན་འཁེལ་བྱས་ཡོད་འདུག
ལས་འགུལ་བ་ཚོས་འཕྲེད་དར་སྟེང་རང་ལུས་མེར་བསྲེགས་ཀྱི་དཔར་རིས་དག་བཤམས་སྟོན་བྱས་ཡོད་ཀྱང་། པར་རིས་མང་ཚོགས་ནང་འགྲེམས་སྟོན་ཐད་རྒྱ་ནག་གིས་རྙོག་དྲ་ཤོད་ཀྱི་ཡོད་པ་དང་། མང་ཚོགས་ནང་དཔར་དེ་འདྲ་འཇིགས་སུ་རུང་བ་སྟོན་ཆོག་གི་མེད་པའི་གནས་སྟངས་བཅས་ཀྱི་འོག རང་ལུས་མེར་བསྲེགས་ཀྱི་པར་རིས་བཤམས་སྟོན་བཀག་འགོག་བྱས་ཡོད་འདུག
གསར་འགོད་པ། ཚེ་རིང་རྒྱལ།
ལས་འགུལ་ལ་ཡི་རང་ཡོད།
ལས་འགུལ་འདི་ཧ་ཅང་ཡག་པོ་འདུག་ཐུགས་རྗེ་ཆེ་ཁྱེད་རྣམས་པས་སྐུ་གཟུགས་ལ་འཕྲོད་བསྟེན་དང་། ལས་དོན་མྱུར་སྒྲུབ་ཡོང་བའི་རེ་སྨོན་དང་གུས་འདུད་ཞུ།།།།
བོད་ཚང་དཔའ་མཛངས་ཡོངས་ཀྱི་རེ་སྨོན་སྒྲུབ་ནས་དལ་འབྱོར་རྟེན་བཟང་གི་ཉིན་དཀར་མྱུར་ཏུ་ཤར་བ་གྱུར་ཅིག།།།
བདེན་པ་ཉིད་རྒྱལ་གྱུར་ཅིག།།།།།།
ཤིན་ཏུ་ཛ་དྲག་ཅིང་སྐྱིད་གཡའ་བའི་དུས་སྐབས་འདིར་སུད་སིར་གནས་སྡོད་གཞོན་སྐྱེས་བཞི་ནས་ལས་འགུལ་འདི་འདྲ་ཞིག་སྤེལ་འགོ་བཙུགས་པ་ནི་བཙན་བྱོལ་རང་དབང་ལུང་པར་ཡོད་པར་བོད་མི་ཀུན་གྱིས་མིག་དཔེར་འོས་པ་ཞིག་ཏུ་མཐོང་། ལས་འགུལ་གྱི་རྣམ་པ་དང་ལྷག་པར་ཞུ་འབོད་ཀྱི་ངར་སྒྲ་ལས་ང་ཚོ་ཚང་མར་སྟོབས་ཤུགས་ཀྱི་རྣོ་ངར་ཞིག་སྟེར་བཞིན་འདུག བོད་མི་ཚོས་རྣ་བསམ་དེ་འདྲ་བཏང་ན་ལུས་སྲོག་མེ་ལྕེར་སྒྲོན་པའི་དཔའ་བོ་དཔའ་མོ་ཚོའི་རེ་བ་ཆུད་ཟོས་སུ་མི་འགྲོ་ལ། མགྱོགས་མྱུར་དོན་འབྲས་སྨིན་ངེས་ཡིན། ད་ཐོན་ཤོག ཁོང་རྣམས་ཀྱི་རྗེས་སུ་སུད་སི་བོད་སྟོང་ཚོ་བརྒལ་ཐོན་ཤོག ད་དུང་རྒྱལ་ཁབ་སོ་སོའི་ནང་ཡོད་པའི་རྒྱལ་ཚོགས་ཀྱི་སྒོ་འགྲམ་དུ་རྒྱལ་ཁབ་སོ་སོའི་ནང་ཡོད་པའི་བོད་མི་ཚང་མ་ཐོན་ཤོག ང་ཚོ་ཚང་མ་མཉམ་དུ་ཞུ་འབོད་བྱེད། གནས་སྐབས་རིང་། སྲིད་བློན་ནས་གཙོས། བླ་སྤྲུལ་མཁན་པོ་ནས་གཙོས། རྩོམས་པ་པོ་མཁས་དབང་ནས་གཙོས། དགེ་རྒན་སློབ་མ་ནས་གཙོས། རྒན་ཁོག་དང་། མདངས་གསུམ་སྐྱེས་པའི་ཕྲུ་གུ་ཡན་ཆད། མལ་སར་ལུས་པའི་ནད་པ་ཡན་ཆད་ཐོན་ཤོག དུས་ལ་བབས་འདུག་གོ། །དུས་ཚོད་འདི་མ་ཟིན་ན་ཕྱིས་ཡོང་ངོ་……………………
ལས་འགུལ་འདི་ཧ་ཅང་གི་ཡག་པོ་འདུག ཚང་མ་ལོས་མིག་དཔེར་འཛིན་འོས་པའི་ལས་འགུལ་ཞིག་རེད། དགོས་འདུན་ཁག་ལའང་གནས་ལུགས་དང་ཤེད་ཤུགས་འདུག ཁ་བྲོ། ལམ་ལྷོང་ཡོང་བར་ཤོག
ང་ཚོའི་འགུལ་སྟངས་འདི་རང་རེད་དོ།། ཤིན་ཏུ་ལེགས་སོ།།
གནས་ཚུལ་འདི་ཁ་སང་ནས་ཁ་བརྡ་སོགས་ཀྱི་གླེང་སྟེགས་སུ་རྟ་རྒྱུག་ཚར་བར་མ་ཟད་བུད་ཀྱང་ཡོལ་ནས་མེད་ཚོད་དོ།།