དེ་རིང་འདི་གར་རྒྱལ་གཅེས་དཔའ་མོ་ཏིང་འཛིན་སྒྲོལ་མའི་སྐུ་པར་དང་གནས་ཚུལ་ཁག་ཅིག་འབྱོར་བའི་ནང་། དཔའ་མོ་ཁོང་གི་བཟའ་ཟླ་རྒྱ་རིགས་ཤིག་ཡིན་འདུག
ཁ་སང་ཕྱི་ཚེས་ ༡༥ ཉིན་བོད་མདོ་སྨད་རེབ་གོང་བཙན་མོ་ཞང་མགོ་དགེ་སྡེ་བའི་རང་ལོ་ ༢༣ ཡིན་པའི་རྒྱལ་གཅེས་དཔའ་མོ་ཏིང་འཛིན་སྒྲོལ་མ་ལགས་ཀྱིས་རང་ལུས་མེར་བསྲེགས་ཀྱིས་སྐུ་གྲོངས་ཡོད་པ་ལྟར། དེ་རིང་འདི་གར་བསོད་ནམས་ལགས་ཀྱིས་ཞིབ་ཕྲའི་གནས་ཚུལ་ཁག་ཅིག་བཏང་འབྱོར་བྱུང་བའི་ནང་། ཕྱི་ཚེས་ ༡༥ ཉིན་གྱི་བོད་ནང་གི་ཆུ་ཚོད་ ༡༢།༣༠ ཡས་མས་ཙམ་ལ། རྒྱལ་གཅེས་དཔའ་མོ་ཁོང་གིས་སྡེ་བའི་ནང་ས་སྣུམ་བཙོང་ས་ཞིག་ཡོད་པ་དེར་ས་སྣུམ་རྒྱ་མ་ ༨ ཙམ་ཉོས་རྗེས། སྡེ་བའི་འདུ་ཁང་ནང་ཕྱིན་ནས་མི་མེད་པའི་གོ་སྐབས་དང་བསྟུན་ནས་དུང་དཀར་ཐེངས་གསུམ་བུས་ཏེ་འདུ་ཁང་ལྷས་སུ་རང་ལུས་མེར་བསྲེག་ཡོད་འདུག ཕ་བུ་ལོ་ལགས་ཀྱིས་ཁོང་མོས་ས་སྣུམ་ཉོས་པ་ཤེས་ཏེ་གང་སར་བཙལ་མཐར། སྡེ་བའི་འདུ་ཁང་གི་ལྷས་རའི་བསང་ཁུང་འགྲམ་དུ་མེས་འཚིགས་ཏེ་སྐུ་གྲོངས་ཡོད་པ་མཐོང་འདུག
རྒྱལ་གཅེས་དཔའ་མོ་ཁོང་གི་བཟའ་ཟླ་ནི་ཕ་ཡུལ་ཀ་ཅི་ནས་ཡིན་པའི་རྒྱ་རིགས་ཤིག་ཡིན་པ་དང་། ཁོའི་མིང་ལ་ཀ་ལེན་ཟེར་ཞིང་ད་ལྟ་ལོ་ ༢༤ ཡིན་འདུག ཁོང་བཟའ་ཟླ་གཉིས་རེབ་གོང་བཙན་མོ་ཞིང་མགོ་རྒས་སྡེ་བ་རུ། དཔའ་མོ་ཏང་འཛིན་འཚོའི་ཕ་མ་གཉིས་དང་མཉམ་དུ་ཞིང་ལས་གཉེར་བཞིན་ཡོད་པ་དང་། ཁོང་གཉིས་ལ་ད་དུང་བྱིས་པ་སྐྱེས་མེད་མོད་བཟའ་ཚང་ཧ་ཅང་འཆམ་པོ་དང་མཐུན་པོ་ཡོད་འདུག
གནས་ཚུལ་ཡོང་ཁུངས་གཞན་ཞིག་གིས་བརྗོད་ན། མེར་བསྲེགས་ལས་འགུལ་བསྟུད་མར་སྤེལ་ཡུལ་མདོ་བ་དང་སྒྲོ་རོང་པོ་ཁུལ་དུ་དམག་མི་ཕོན་ཆེ་བསླེབས་ཡོད་པ་དང་། མདོ་བ་ཞང་གི་སློབ་གྲྭའི་ནང་ལ་དམག་མི་ཉིས་སྟོང་ལྷག་གིས་སོ་སྲུང་བྱས་ནས་བསྡད་ཡོད་པའི་གནས་ཚུལ་ཐོན་འདུག
ད་ལྟའི་ཆར་རེབ་གོང་ཁུལ་གྱི་དགོན་པ་དག་གི་ནང་༸གོང་ས་མཆོག་གི་སྐུ་པར་བཤམས་མི་ཆོག་པའི་སྐོར་བཙན་བཀའ་གཏོང་བཞིན་ཡོད་པ་དང་། སློབ་གྲྭ་ཁག་ནང་མུ་མཐུད་ངོ་རྒོལ་ལས་འགུལ་སྤེལ་ཚེ་ཁྲིམས་ཐག་ནན་མོ་གཅོད་རྒྱུ་སྐོར་བརྗོད་འདུག དེ་བཞིན། གྲོང་སྡེ་ཁག་ཅིག་གི་ནང་དུ་མི་མང་འདུ་འཛོམས་ཐད་དམ་དྲག་དང་། ཡར་མར་འགྲུལ་བཞུད་ཚུན་ཆད་ལ་རྩད་ཞིབ་བྱེད་ཀྱིན་པའི་གནས་སྟངས་ཆགས་ཡོད་འདུག
ས་གནས་ནས་བོད་མི་ཞིག་གིས་གནས་ཚུལ་མཁོ་གཏོང་པར་བརྗོད་དོན་ལྟར་ན། གནས་སྐབས་རིང་རེབ་གོང་ཁུལ་གྱི་སློབ་གྲྭ་ཁག་ལ་གུང་གསེང་བཏང་ཡོད་འདུག་ཀྱང་། གུང་གསེང་གི་རྗེས་ནས་ཉེ་ཆར་སློབ་མའི་ངོ་རྒོལ་ལས་འགུལ་ལ་སྣེ་ཁྲིད་མཁན་གྱི་དོགས་ཡོད་དགེ་སློབ་མང་པོ་འཇུ་བཟུང་བྱ་འཆར་ཡོད་སྐོར་མང་ཚོགས་ནང་གླེང་སློང་བྱེད་བཞིན་ཡོད་འདུག
རྒྱལ་གཅེས་དཔའ་མོ་ཏིང་འཛིན་སྒྲོལ་མའི་སྐུ་པར།
ཕ་བུ་ལོ་(ལོ་༥༠)དང་མ་བཀྲ་ཤིས་སྒྲོལ་མ་(ལོ་༤༡)ལྷན་ལྷ་ལྡན་གཙུག་ལག་ཁང་དུ་སྒྲོན་པའི་པར།
གསར་འགོད་པ། ཚེ་རིང་རྒྱལ།
བརྟན་ལྷིང་དང། ཞི་བདེ། འཆམ་མཐུན་ཞེས་ཁ་ནས་མ་ཎི་བཞིན་བགྲང་མཁན་གུང་ཁྲན་གཞུང་འདི་ལུག་བརྒྱ་བསད་པའི་ཁྱི་སྤྱང་ཞིག་དང་འདྲ་སྟེ། ལུག་ག་ཚད་ཟས་ཀྱང་ད་དུང་ཟ་སེམས་ཆེ་རུ་འགྲོ་བཞིན་པ་མ་ཟད། ཧམ་བཤད་ཆེན་པོས་ཏཱ་ལའི་རུ་ཚོགས་ཀྱི་ངན་སྐུལ་འོག་ཁ་བྲལ་བའི་ལས་འགུལ་སྤེལ་གྱི་འདུག་ཅེས་ཁྱི་སྐད་བར་མཚམས་མེད་པར་རྒྱག་གི་འདུག
བོད་མི་ཚོས་རང་ལུས་མེ་ལ་བསྲེགས་ནས་ངོ་རྒོལ་བྱེད་བཞིན་པ་འདི། ཕྱི་ཚུལ་ནས་བལྟས་ན་རང་ཉིད་ཀྱིས་རང་ཉིད་བསྲེགས་པ་ལྟ་བུ་མཐོང་ཡང། དོན་ངོ་མར་རྒྱ་དམར་པོས་བོད་མི་འདི་དག་མེ་ལ་བསྲེགས་པ་རེད། རྒྱ་དམར་པོས་བོད་མི་འདི་དག་ལྔ་བའི་ལམ་དུ་བརྫངས་པ་རེད། རྒྱ་དམར་པོས་བོད་མི་འདི་དག་དམྱལ་ཁམས་སུ་གཡུགས་པ་རེད།
གང་ཡིན་ཟེར་ན། རྒྱ་མི་དམར་པོས་མི་རིགས་དབྱེ་འབྱེད་དང།
སྐད་ཡིག་དབྱེ་འབྱེད།
དཔལ་འབྱོར་གྱི་བསླུ་བྲིད།
རིག་གཞུང་གཏོར་བཤིག
རང་དབང་བཀག་སྡོམ།
ཆོས་དད་ཚོད་འཛིན།
སྨྲ་བརྗོད་བཙན་འཕྲོག
ཐོབ་ཐང་གཏོར་བཤིག
མཐོང་ཆུང་ཁྱད་གསོད།
རང་ས་བཙན་བཅོམ།
ཁོར་ཡུག་གཏོར་སྐྱོན།
རྐང་རྐྱང་ལག་རྐྱང།
རྔམ་རྔམ་རྫིག་རྫིག་སོགས་རྩུབ་སྤྱོད་དང་བྱ་ངན་ཟམ་མི་ཆད་པར་སྤེལ་བཞིན་པ་དང། སྤེལ་འདོད་ཀྱི་ཧམ་སེམས་ཆེ་ནས་ཆེ་རུ་སོང་བ་ལ་བརྟེན་ནས། སྐུ་ལུས་མེ་ལ་བསྲེགས་པ་མ་གཏོགས། མི་གཞན་ཞིག་གིས་ཁྱོད་རང་ཤི་དགོས་ཟེར་ན། སུས་ཀྱང་ཤི་འདོད་བྱེད་མི་སྲིད། མ་ཤི་རང་ཤི་བཟོ་མཁན་རྒྱ་གུང་ཁྲན་དེ་ཉིད་ཡིན་པ་བོད་པ་ཚང་མས་ཤེས་དགོས།།