ཁ་སང་བཞུགས་སྒར་ངྷ་རམ་ས་ལར་གཞུང་འབྲེལ་མིན་པའི་ཚོགས་པ་བཞིས་ཐུན་མོང་ཐོག རྒྱ་ནག་གི་མགོ་ཁྲིད་གསར་བར་བརྡ་ལན་སྤྲོད་རྒྱུའི་ལས་འགུལ་ཞིག་སྤེལ་སོང་།
ཁ་སང་ཕྱི་ཚེས་ ༡༥ཉིན་གྱི་ཕྱི་དྲོའི་ཆུ་ཚོད་ ༣།༠༠ ཡས་མས་སུ་བཞུགས་སྒར་ངྷ་རམ་ས་ལའི་མེག་གྷན་རླངས་འཁོར་འབབ་ཚིགས་སུ། བོད་ཀྱི་བུད་མེད་ལྷན་ཚོགས་དང་དགུ་བཅུ་གསུམ་ལས་འགུལ་ཚོགས་པ། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་གཞུང་འབྲེལ་མིན་པའི་ཚོཊ་པ་བཞི་ཐུན་མོང་ཐོག མི་རབས་ལྔ་བའི་རྒྱ་ནག་དམར་ཤོག་ཚོགས་པའི་མགོ་ཁྲིད་ཞི་ཅིན་ཕེན་གཙོས། གསར་དུ་བསྐོ་བཞག་བྱས་པའི་མགོ་ཁྲིད་རྣམས་ཀྱི་པར་རིས་མདུན་དུ་བོད་དོན་བརྡ་ལན་སྤྲོད་རྒྱུའི་ལས་འགུལ་ཞིག་སྤེལ་ཡོད་ཅིང་། དེར་རྒྱལ་སྤྱིའི་བོད་དོན་རྒྱབ་སྐྱོར་ཚོཊ་པའི་ཚོགས་ཆེན་ཐོག་བཅར་བའི་རྒྱལ་ཁབ་ཁག་གི་སྐུ་ཚབ་དང་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ། རྒྱ་གར་ཡུལ་མི། བཞུགས་སྒར་ཁུལ་སྐྱ་སེར་བོད་མི་ ༢༠༠ ཡས་མས་འདུ་འཛོམས་ཀྱིས། ཚོགས་པ་བཞིའི་སྐུ་ཚབ་རེ་རེས་རྒྱ་ནག་གི་མགོ་ཁྲིད་གསར་བ་ཚོས། ད་ལྟའི་བོད་ནང་གི་གནས་སྟངས་ཐད་བརྟག་དཔྱད་ཞིབ་འཇུག་མཐིལ་ཕྱིན་བྱས་ཏེ། བཟང་ཕྱོགས་ཀྱི་འགྱུར་བ་གཏོང་དགོས་པའི་བརྡ་ལན་སྤྲད་སོང་བ་མ་ཟད། རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་དུ་ཕེབས་པའི་ཨུ་རུ་སུ་དང་ར་ཤི་ཡ། ཨེ་སི་རེལ། བྷེལ་ཛལ། དབྱིན་ལན། ཧི་མ་ལ་ཡའི་རི་བརྒྱུད་བཅས་ཀྱི་སྐུ་ཚབ་དང་རྒྱ་གར་གྱི་ཡུལ་མི། བཞུགས་སྒར་གནས་སྡོད་བོད་མི་བཅས་ཀྱིས་ཞི་ཅིན་ཕུན་གཙོས་པའི་རྒྱ་ནག་དམར་ཤོག་ཚོཊ་པའི་དཔོན་རིགས་བདུན་གྱི་པར་རིས་མདུན་དུ། བོད་ནང་བོད་མི་མང་པོས་རང་ལུས་མེར་བསྲེགས་གནང་བཞིན་པའི་གནས་སྟངས་མགྱོགས་མྱུར་སེལ་ཐབས་བྱ་རྒྱུ་དང་། མ་འོངས་པའི་ལས་ཡུན་གྱི་ནང་བོད་དོན་གྱི་བདེན་མཐའ་སེལ་དགོས་པའི་རེ་འདུན་སོགས་བཏོན་ཏེ། རྒྱ་ནག་གི་མགོ་ཁྲིད་གསར་པར་རིས་མདུན་དུ་བོད་དོན་བརྡ་ལན་སྤྲོད་རྒྱུའི་ལས་འགུལ་ཞིག་སྤེལ་ཡོད།
དེའི་རྗེས་ངྷ་ས་ས་གནས་གཞོན་ནུས་སྣེ་འཁྲིད་འོག བོད་དོན་རྒྱབ་སྐྱོར་བ་དང་ཕྱི་རྒྱལ་བ། བཞུགས་སྒར་ཁུལ་གྱི་སེར་སྐྱ་མི་མང་བཅས་མི་ ༢༠༠ ཡས་མས་འདུ་འཛོམས་ཐོག ངྷ་རམ་ས་ལའི་ཁྲོམ་གཞུང་དུ་སྐད་འབོད་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་ཡོད།
གསར་འགོད་པ། དོན་གོ
མི་འཇོན་འཇོན་མདོག་གི་པར་རིགས་འདི་ཚོས་ཅི་ཞིག་བརྡ་ལན་སྤྲོད་ཀྱི་ཡོད་རེད། ངོ་མ་ཕན་ཐོག་ཡོད་པའི་ལུས་འགུལ་རེ་སྤེལ་མི་ཐུབ་རུང་། བོད་མི་རིགས་སྤྱི་དང་ལྷག་པར་དུ་གཞིས་ལུས་སྤུན་ཟླ་ཚོའི་ཚེ་སྲོག་གིས་རྩེད་ཆས་ལྟ་བུ་མི་བྱེད་པར་མཁྱེན། གོང་གི་དྲ་གྲོགས་གཉིས་ཀྱིས་བཤད་པར་རྒྱབ་སྐྱོར་ཡོད།
འདི་བྱ་སྐད་མ་བརྒྱག་གོང་ནས་བྱིའུ་སྐད་རྒྱག་བཞག་འདུག །ད་ལྟ་པེ་ཅིང་དུ་འགོ་ཁྲིད་འཕོར་འགྱུར་གཏོང་བཞིན་པའི་སྐབས་ཡིན་པར་མ་ཟད་ཞེ་ཅིང་ཕིང་གཙོས་པའི་མགོ་འགོ་ཁྲིད་གསར་པ་ཚོས་ལོང་ཕྱོགས་གང་ཡིན་གསལ་ཁར་མ་བྱུང་སྔོན་ནས་ཟུར་ཟའི་པར་རིས་འདི་ལྟ་བུ་ནི་བསམ་མེད་བྱིས་པའི་བྱེད་སྟངས་ཤིག་ལས་རྣམ་དཔྱོད་ལྡན་པའི་གཟི་བརྗིད་ཞིག་ག་ལ་ཡིན། འཆར་ལོའི་སྤྱི་ཟླ་གསུམ་པའི་ནང་ཚུན་དུ་རང་དབང་ལུང་པ་ནང་དུ་ཡོད་མཁན་ཚོས་ཁ་སྔ་ལག་སྔ་མ་གནང་རོགས་ཞེས་བསྐུལ་ལོ། །
འདི་རྟ་མ་བརྒྱུག་སྔོན་ལ་དགའ་རྟགས་བྱིན་ཅེས་པའི་དཔེ་ལྟར་སོང་འདུག
སྲིད་འཛིན་གསར་བའི་བཅོས་བསྒྱུར་གཏོང་མིན་མ་ཤེས་གོང་ནས་སུན་པོ་བཟོས་ཏེ་བོད་ཀྱི་བདེན་མཐའ་སེལ་རྒྱུར་སྡུག་རུ་བཏང་བ་རེད། བསམ་བཞིན་ཡིན་མིན་མི་ཤེས་ཀྱང་དེ་འདྲ་ཞིག་དོན་གྱིས་ཆགས་པ་རེད། མི་སུ་ཡིན་ན་ཁ་མ་གྲག་སྔོན་ནས་ཕར་ཕྱོགས་ཀྱིས་ཚོགས་གཏམ་སྤྲད་ན་ཁོང་ཁྲོ་ལངས་ཀི་རེད། ཁོང་ཁྲོ་ལངས་པ་ཙམ་གྱིས་འགྲིག་གི་ཡོད་ན་ཏག་ཏག་རེད། དེ་མིན་དང་པོ་དེ་འདྲ་བྱས་ན་སྡུག་རུ་འགྲོ་རྒྱུ་རེད། མཐར་གཏུག་ན་སྡུག་མྱོང་མཁན་བོད་ནང་གི་སྤུན་ཟླ་ཚོ་ལས་བཙན་བྱོལ་གྱི་ཁ་རྒྱགས་ཚོ་མ་ཡིན་པ་ཤེས་པར་གྱིས།