དེ་རིང་ངྷ་སྟེང་བོད་ཁྱོམ་སློབ་གྲྭའི་བདེ་སྐྱིད་ཚེ་རིང་ཚོགས་ཁང་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་མགོ་འཛུགས་གནང་སོང་།
དེ་རིང་ཕྱི་ཚེས་ ༡༦ ཉིན་གྱི་སྔ་དྲོ་ཆུ་ཚོད་ ༩།༣༠ སྟེང་། བཙན་བྱོལ་དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་མཐུན་སྦྱོར་དང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག ངྷ་སྟེང་བོད་ཁྱིམ་སློབ་གྲྭའི་བདེ་སྐྱིད་ཚེ་རིང་ཚོགས་ཁང་དུ་ཉིན་ ༣ ་རིང་གི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་ཚོགས་ཆེན་མགོ་འཛུགས་གནང་ཡོད་པ་དང་། ཚོགས་ཆེན་དབུ་འབྱེད་མཛད་སྒོར་བཙན་བྱོལ་བོད་མིའི་སྒྲིག་འཛུགས་ཀྱི་མང་གཙོའི་བཀའ་བ་གསུམ་གྱི་མཛད་གཙོ་རྣམ་པ་དང་། སྐུ་ཚབ་དོན་གཅོད་རྣམ་པ། གཞུང་འབྲེལ་མ་ཡིན་པའི་ཚོགས་སྡེ་ཁག་གི་འགན་འཛིན་དང་འཐུས་མི། འཛམ་གླིང་རྒྱལ་ཁབ་ཁག་ ༤༢ ནས་ཕེབས་པའི་བོད་དོན་རྒྱབ་སྐྱོར་པ་རྣམས་བཅས་མཉམ་ཞུགས་གནང་ཡོད།
མཛད་སྒོའི་ཐོག་མར་ཚོགས་ཞུགས་པ་ཡོངས་ཀྱིས་བོད་བསྟན་པ་ཆབ་སྲིད་སླད་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་དང་། ལྷག་པར་དུ་རང་ལུས་མེར་བསྲེགས་ཀྱིས་འདས་གྲོངས་སུ་ཕྱིན་པ་དག་ལ་མྱ་ངན་གུས་འདུད་ཞུས་རྗེས། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨན་ཀེ་ཊི་རེ་ཁཱ་(Dr.N.K.Trikha) ལགས་ཀྱིས་ཕེབས་བསུའི་གསུང་བཤད་དང་སྦྲགས། ཁོང་གིས་བོད་ཀྱི་གནད་དོན་ནི་འགྲོ་བ་མིའི་རིགས་ཀྱི་གནད་དོན་ཞིག་ཏུ་ངོས་འཛིན་བྱེད་ཀྱི་ཡོད་ལ། བོད་མི་ ༧༠ ལྷག་གིས་རང་ལུས་མེར་བསྲེགས་བཏང་ཡོད་པ་སོགས་བོད་ནང་གི་གནས་བབ་ཧ་ཅང་ཛ་དྲག་ཆགས་ཡོད་ཀྱང་། རྒྱལ་སྤྱིའི་སྲིད་གཞུང་དག་དང་མི་མང་གིས་དེ་ཙམ་དོ་སྣང་བྱེད་ཀྱི་མེད་སྟབས། བོད་དོན་རྒྱབ་སྐྱོར་བ་ཚོས་ཕྱོགས་ཡོངས་ནས་སྔར་བས་ཤུགས་གནོན་རྒྱག་དགོས་པ་དང་། རྒྱ་གར་གཞུང་དང་མི་མང་གིས་བོད་དོན་རྒྱབ་སྐྱོར་གྱི་ནུས་ཤུགས་མཐོ་འདེགས་ཡོང་རྒྱུར་རྒྱ་གར་བོད་དོན་རྒྱབ་སྐྱོར་ཚོགས་པ་དག་གིས་ལས་དོན་ཅི་ལྟར་སྒྲུབ་ཀྱི་ཡོད་མེད། དེང་སྐབས་བོད་མི་ཚོས་སྡུག་སྦྱོང་དཀའ་ངལ་ཚད་མེད་མྱོང་བཞིན་པ་དེ། དུས་ཀྱི་སྔ་ཕྱི་ཙམ་ལས་བོད་མི་ཚོར་རང་དབང་གི་རྒྱལ་ཁབ་ཅིག་འཐོབ་པའི་རྨང་གཞི་ཡིན་སྐོར་སོགས་བརྗོད་སོང་།
དེའི་རྗེས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས། དེ་སྔའི་བཀའ་བློན་ཁྲི་པའི་མཚན་བྱང་སྲིད་སྐྱོང་དུ་བཅོས་སྒྱུར་བྱས་ཡོད་པ་དང་དེའི་བརྒྱུད་རིམ་ངོ་སྤྲོད། བཀའ་ཤག་སྐབས་ ༡༤ པ་དང་དེའི་ལས་དོན་བྱེད་ཕྱོགས་ངོ་སྤྲོད། ༸གོང་ས་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་གནང་རྗེས་ཀྱི་གཞུང་གི་ལས་དོན་ཁག་མུ་མཐུད་བདེ་ལེགས་ངང་འགྲོ་བཞིན་ཡོད་པ་དང་། རྒྱལ་སྤྱིའི་སྤྱི་ཚོགས་ནང་བོད་དོན་གསོན་གནས་ཐུབ་རྒྱུར་བཀའ་ཤག་གིས་དམིགས་བསལ་ཁ་ཕྱོགས་བཟུང་སྟེ་ནུས་པ་འདོན་གྱི་ཡོད་སྐོར། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཚོས་སོ་སོའི་སྤྱི་ཚོགས་ནང་བོད་དོན་རྒྱབ་སྐྱོར་བ་རྒྱ་སྐྱེད་དང་། འབྲེལ་ཡོད་གཞུང་དང་མི་མང་གི་རྒྱབ་སྐྱོར་འཚོལ་དགོས་པ། ལྷག་པར་དུ་ཐེངས་འདིའི་བགྲོ་གླེང་ཚོགས་འདུའི་སྐབས་བོད་དོན་རྒྱབ་སྐྱོར་བ་ཚོས། མ་འོངས་པར་ཆབ་སྲིད་ཙམ་མིན་པར་ཁོར་ཡུག་དང་ཤེས་ཡོན་སོགས། གོ་སྐབས་དང་བརྒྱུད་ལམ་འདྲ་མིན་ཐད་ནས་བོད་དོན་ཤུགས་ཆེ་རུ་གཏོང་རྒྱུའི་སྐོར་ལ་གྲོས་བསྡུར་བྱ་དགོས་པའི་འབོད་སྐུལ་བཅས་གནང་སོང་།
མཐར་སྲིད་སྐྱོང་བློ་བཟང་སེང་གེ་མཆོག་གིས། འཛམ་གླིང་གང་ས་ནས་ཕེབས་པའི་ཚོགས་ཞུགས་པ་ཚོར་ཕེབས་བསུའི་འཚམས་འདྲི་དང་ཁོང་ཚོའི་རྒྱབ་སྐྱོར་ལ་བསྔགས་བརྗོད་དང་སྦྲགས། བོད་པའི་གྲོགས་པོ་ཚོས་འདིར་བོད་མིའི་དཀའ་སྡུག་ལ་རྒྱབ་སྐྱོར་དང་གདུང་སེམས་མཉམ་སྐྱེད་བྱེད་ཀྱི་ཡོད་ལ། བོད་མིར་རང་དབང་མ་ཐོབ་བར་དུ་དང་། ༸གོང་ས་མཆོག་ཕྱིར་བོད་དུ་གདན་ཞུ་མ་ཐུབ་བར་དུ་བོད་ཀྱི་གནད་དོན་ནི་མུ་མཐུད་གནས་རྒྱུ་ཡིན་པ་མ་ཟད། བོད་ཀྱི་གནད་དོན་ཉིན་རེ་བཞིན་ཤུགས་ཆེ་རུ་འགྲོ་རྒྱུ་ཡིན་པའི་བརྡ་ལན་རྒྱ་ནག་གཞུང་ལ་སྤྲོད་ཀྱི་ཡོད་སྐོར། དེ་བཞིན་ཚོགས་ཆེན་འདི་བརྒྱུད་དེ་གཞིས་བཞུགས་བོད་མི་ཚོར། ཁོང་ཚོས་དཀའ་སྡུག་མནར་གཅོད་དང་སོ་སོའི་སྲོག་ལ་མ་འཛེམས་པར་རེ་བ་དང་ཡིད་ཆེས་བརྟན་པོས་བོད་ཀྱི་རྩ་དོན་རྩོད་བཞིན་པའི་ཐད། བྱེས་འབྱོར་བོད་མི་སྤུན་ཟླ་ཚོ་དང་རྒྱལ་སྤྱིའི་སྤྱི་ཚོགས་དུས་ནམ་ཡང་ཁོང་ཚོ་དང་ལྷན་དུ་ཡོད་ཅིང་། ཁོང་ཚོའི་མངོན་འདོད་ལ་རྒྱབ་སྐྱོར་ཡོད་པའི་བརྡ་ལན་སྤྲོད་ཀྱི་ཡོད་སྐོར་དང་། དེ་བཞིན། རྒྱལ་སྤྱིའི་སྤྱི་ཚོགས་ལ་བོད་ཀྱི་གནད་དོན་ཐད་དོ་སྣང་བྱ་དགོས་པའི་དུས་ལ་སླེབས་ཡོད་པའི་འབོད་སྐུལ་བཅས་གནང་ཡོད།
ཡང་ཁོང་གིས་བོད་མིའི་རང་ལུས་མེར་བསྲེགས་ཀྱི་གནས་བབ་ཛ་དྲག་ཏུ་གྱུར་ཡོད་པ། བོད་དོན་རྒྱབ་སྐྱོར་པ་ཚོས་སྐད་གསེང་མཐོན་པོ་དང་ནུས་ཤུགས་ལྡན་པའི་སྒོ་ནས་བོད་ཀྱི་གནད་དོན་དེ་རྒྱལ་སྤྱིའི་སྤྱི་ཚོགས་ནང་མཐོར་འདེགས་བྱ་དགོས་སྐོར་དང་། ད་ལྟའི་རྒྱ་ནག་གི་གཞུང་འཛིན་གསར་པ་ཚོའི་རྒྱབ་ལྗོངས་གནས་ཚུལ་ངོ་སྤྲོད། ད་ལྟའི་བོད་ནང་གི་ཛ་དྲག་གནས་བབ་དེ་རྒྱ་ནག་གི་རྩ་ཁྲིམས་ཀྱི་ནོར་འཁྲུལ་མིན་པར་ཆབ་སྲིད་མགོ་ཁྲིད་དག་གི་སྲིད་ཇུས་ནོར་འཁྲུལ་ཅན་ཆགས་ཡོད་ཚུལ། ཉེ་ཆར་ཚོགས་པའི་རྒྱ་ནག་ཚོགས་ཆེན་ ༡༨ པའི་སྟེང་བོད་དོན་གླེང་སློང་གང་ཡང་མཐོང་ཐོས་མ་བྱུང་པ་དེས། རྒྱ་ནག་གི་དཔོན་རིགས་ཚོས་ཆབ་སྲིད་དང་བསམ་བློའི་ཐད་ནས་བོད་ལ་ཕྱོགས་རིས་ཡོད་སྐོར། རྒྱ་གཞུང་གིས་ཧོང་ཀོ་དང་ཐའེ་ཝན། ཨཱོ་མཱན་སོགས་ལ་རང་སྐྱོང་གི་སྐད་ཆ་བཤད་ཆོག་གི་ཡོད་ཀྱང་བོད་ལ་དེ་ལྟར་བཤད་ཀྱི་མེད་སྐོར། ད་ཆར་ཨ་རིའི་སྲིད་འཛིན་འོས་བསྡུ་དང་རྒྱ་ནག་གི་མགོ་ཁྲིད་འཕོ་འགྱུར། ཡུ་རོབ་གྱི་དཔལ་འབྱོར་གནས་བབ། སེ་རི་ཡའི་གནད་དོན་བཅས་ཐག་གཅོད་ཀྱི་མགོ་ཚུགས་ཟིན་ཡོད་སྟབས། ༢༠༡༣ ལོ་ནི་བོད་མི་དང་བོད་དོན་རྒྱབ་སྐྱོར་བ་ཚོར་མཚོན་ན་བོད་དོན་རྒྱལ་སྤྱི་ཅན་དུ་བསྒྱུར་རྒྱུའི་གོ་སྐབས་ཧ་ཅང་གལ་ཆེན་པོ་ཞིག་ཆགས་ཡོད་པས་ནུས་ཤུགས་འདོད་དགོས་པ་སོགས་གསུངས་སོང་།
ཐེངས་འདིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་སྐབས། ཚོགས་ཞུགས་པ་ཚོས་རྒྱལ་སྤྱིའི་སྟེང་ཆབ་སྲིད་ཀྱི་ཐད་ནས་བོད་དོན་རྒྱབ་སྐྱོར་ནུས་པ་ཅི་ལྟར་མཐོར་འདེགས་བྱ་ཐབས་དང་། རྒྱ་ནག་དང་འབྲེལ་ལམ་ཅི་ལྟར་འཛིན་ཐབས། བོད་ཀྱི་ཁོར་ཡུག་སྲུང་སྐྱོབ་གྱི་སྐོར། འདས་པའི་བོད་དོན་རྒྱབ་སྐྱོར་ཚོགས་པ་ཁག་གི་ལས་དོན་བྱེད་ཕྱོགས་ཐད་བསྐྱར་ཞིབ། རྒྱལ་སྤྱིའི་སྲིད་གཞུང་ཁག་གི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་ཆུང་འཛུགས་ཐབས་སོགས་ཀྱི་སྐོར་ལ་གྲོས་བསྡུར་བྱ་རྒྱུ་ཡིན་འདུག
བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དང་པོ་ ༡༩༩༠ ལོར་ངྷ་སར་ཚོགས་པ་ནས་ད་བར་ཚོགས་ཆེན་ཐེངས་ ༦ དང་། དམིགས་བསལ་ཚོགས་ཆེན་ཐེངས་ ༡ བཅས་ཚོགས་ཡོད་པ་དང་། ཐེངས་འདིའི་ཚོགས་ཆེན་སྟེང་རྒྱབ་ཁབ་ཁག་ ༤༢ ནས་བོད་དོན་རྒྱབ་སྐྱོར་བ་ ༢༠༠ ལྷག་མཉམ་ཞུགས་བྱས་ཡོད་ལ། དེའི་ཁྲོད་ཕྱི་སྡོད་རྒྱ་རིགས་ ༤༠ ལྷག་ཡོང་ཡོད་འདུག
གསར་འགོད་པ། བནྡེ་སྐྱབས།
